Ang Kamatuoran Nagapabag-o sang Kabuhi

MASUBO apang matuod nga ang kabuhi sang madamo gid nga tawo mabudlay, kag sa ital-ital pa gani. Makasapo pa ayhan sing kalipay ini nga mga tawo? Ang iban mga kriminal kag nagabiktima sa ila mga isigkatawo. Mangin bunayag pa ayhan sila nga katapo sang katilingban? Huo ang sabat sa sining duha ka pamangkot. Ang mga tawo mahimo magbalhin. Ang kabuhi mahimo bag-uhon. Ginpakita ni apostol Pablo kon paano ini mahimo sang sia nagsulat: “Magbag-o kamo paagi sa pagbalhin sang inyo hunahuna, agod mapamatud-an ninyo sa inyo mga kaugalingon ang maayo kag kalahamut-an kag himpit nga kabubut-on sang Dios.”​—⁠Roma 12:⁠2.

Ang paghinambit sa “himpit nga kabubut-on sang Dios” mahimo magapahanumdom sang ginsiling ni Jesus sa iya mga disipulo sang nagligad nga kapin sa 20 ka tuig antes ginsulat ni Pablo ang mga pulong sa ibabaw. Si Jesus nagsiling: “Mahibaluan ninyo ang kamatuoran, kag ang kamatuoran magahilway sa inyo.” (Juan 8:32) Buot silingon ni Jesus sa “kamatuoran” amo ang gin-inspirar nga impormasyon halin sa Dios​—⁠ilabi na ang impormasyon nahanungod sa kabubut-on sang Dios​—⁠nga gintipigan para sa aton sa Biblia. (Juan 17:17) Apang ginahilway gid bala sang kamatuoran sa Biblia ang katawhan? Ang pagkabuhi nahisuno sa kabubut-on sang Dios nagapabag-o gid bala sang kabuhi? Huo, sa pagkamatuod. Binagbinaga ang pila ka halimbawa.

Isa ka Kabuhi nga May Katuyuan

Sang nagligad lang, si Moisés sa Gibraltar, masinulub-on gid nga tawo. Sia nagsiling: “Palahubog ako anay kag nagatulog sa kalye. Nadulaan ako sing paglaum. Kada gab-i nagapangabay ako sa Dios nga kaluy-an ako kag indi na pagpaantuson pa sa masunod nga adlaw. Nagahibi ako samtang ginapamangkot ko ang Dios kon ngaa natawo pa ako kon wala man lang ako sing pulos, wala sing trabaho, wala sing pamilya, kag wala sing nagabulig sa akon. Ngaa padayon pa ako nga magkabuhi?” Kag, may natabo.

Si Moisés nagpadayon: “Nahibal-an ko nga ginpamatian sang Dios ang akon pangamuyo sang nakilala ko si Roberto, isa sang mga Saksi ni Jehova. Ginhatagan ako ni Roberto sing Biblia kag sing isa ka kopya sang balasahon nga bulig sa pagtuon sa Biblia nga Ano ang Ginapatuman sang Dios sa Aton?a Kada adlaw gintun-an namon ang Biblia sa bangko nga akon ginatulugan kon gab-i. Pagligad sang isa ka bulan gindala ako ni Roberto sa isa ka miting sa lokal nga Kingdom Hall sang mga Saksi ni Jehova. Wala magdugay, bug-os nga ginbag-o sang kamatuoran sa Biblia ang akon panimuot. Wala na ako nagatulog sa kalye; ukon nagainom ukon nagapanigarilyo. Nagbag-o ang akon kabuhi, kag malipayon ako. Nagalaum ako nga mabawtismuhan sa indi madugay kag mag-alagad kay Jehova subong isa sang iya mga Saksi.”

Daw ano nga pagbag-o! Kon ang mga tawo wala sing paglaum, masami nga bangod ini sa kakulang sing ihibalo. Wala sila sing ihibalo tuhoy sa Dios ukon sa iya matahom nga mga katuyuan. Sa kaso ni Moisés, sang natigayon niya ini nga ihibalo, naghatag ini sa iya sing kusog kag kaisog nga bag-uhon ang iya pagkabuhi. Ang pangamuyo sang salmista sa Dios nasabat sa kaso ni Moisés: “Ipadala ang imo kapawa kag ang imo kamatuoran. Kabay nga ini magatuytoy sa akon. Kabay nga dalhon nila ako sa imo balaan nga bukid kag sa imo halangdon nga tabernakulo.”​—⁠Salmo 43:⁠3.

Sa Belize, amo man sini ang inagihan ni Daniel. Si Daniel wala nagatulog sa mga kalye​—⁠may maayo sia nga trabaho. Apang sa sulod sang 20 ka tuig nakig-away sia sa pagkagiyan sa droga kag sa alkohol kag nangin imoral. Bisan pa ginpadaku sia nga isa ka Katoliko, wala ni Daniel makita ang kahulugan sang kabuhi, kag ginduhaduhaan niya ang pagluntad sang Dios. Nagsulod sia sa nanuhaytuhay nga simbahan nga nagapangita sing bulig apang nasapwan niya nga madamo sang iya palasimba nga mga abyan kag bisan pa gani ang pila sang iya mga abyan nga klero ang nagaabuso sa droga ukon alkohol. Sa sining tion, buot na sia diborsiohan sang iya asawa.

Bangod wala na sing mahimo nagsulod si Daniel sa sentro sang rehabilitasyon. Apang, nahibal-an niya nga kon makaguwa na sia, indi madugayan kag mabalik sia liwat sa droga kon indi sia mabuligan. Apang ano nga sahi sang bulig? Sang Mayo 1996, duha ka adlaw pagkatapos nga nakaguwa sa rehabilitasyon, ginpalapitan ni Daniel ang isa sang mga Saksi ni Jehova kag nakibot sia sa iya pangabay, “Tudlui ako sa Biblia palihug.” Ginhimos sang Saksi ang pagtinuon sa Biblia upod kay Daniel sing duha ka beses kada semana, kag wala magdugay ginpahisuno ni Daniel ang iya kabuhi sa kabubut-on sang Dios kag gintal-usan ang iya mga abyan anay sing Cristianong mga abyan nga wala nagaabuso sa droga ukon alkohol kag nagalikaw sa imoralidad. Sa amo, nakita ni Daniel nga ang ginasiling sang Biblia matuod: “Sia nga nagalakat upod sa maalam nga mga tawo mangin maalam, apang sia nga nagapakig-upod sa mga buangbuang magaantos.” (Hulubaton 13:20) Wala magdugay, nagsiling sia: “Karon ko lamang nahibaluan kon daw ano ang pagtigayon sing matinlo nga konsiensia.” Nagbag-o man ang kabuhi ni Daniel.

Sa Puerto Rico, naeksperiensiahan sang isa pa ka tawo ang talalupangdon nga pagbag-o. Nabilanggo sia kag ginkabig nga tuman ka makatalagam, sanglit madamo na ang iya napatay nga tawo. Makapabag-o ayhan sa iya ang kamatuoran sa Biblia? Huo. Nahatagan sia sang isa sang mga Saksi ni Jehova sing pila ka kopya sang Lalantawan kag Magmata! nga mga magasin, kag gilayon nga nangayo sia sing dugang. Nasugdan ang isa ka pagtuon sa Biblia upod sa iya, kag samtang nagaapektar ang kamatuoran sa Biblia sa iya tagipusuon, nakita sang tanan ang iya pagbag-o. Ang isa sang una nga mga pamatuod sang iya pagbag-o amo ang pagpautod niya sang iya malaba nga buhok kag pagbarbas sang iya gumon nga bigote.

Ginasiling sang Biblia nga ginapatawad sang Dios ang mga makasasala nga matuod nga nagahinulsol kag nagabag-o sang ila estilo sang pagkabuhi. Si Pablo nagsulat: “Wala bala kamo makahibalo nga ang dimatarong nga mga tawo indi makapanubli sang ginharian sang Dios? . . . Apang amo sina anay ang pila sa inyo. Apang ginhugasan na kamo sing matinlo.” (1 Corinto 6:​9, 11) Wala sing duhaduha, ining mga pulong nagpaumpaw sa sining tawo, subong man ang mga pulong sa Hulubaton 24:15: “May pagkabanhaw sang mga matarong kag mga dimatarong.” Sia nagsiling: “Luyag ko didto ako kon matabo ang pagkabanhaw sa mga patay agod makapangayo ako sing patawad sa mga tawo nga akon ginpatay.”

Isa ka Bag-o nga Pamilya

Sang isa ka adlaw si Luis, isa ka bug-os tion nga ebanghelisador sang mga Saksi ni Jehova sa Argentina, ginpakilala sa isa ka lamharon nga tawo nga may masubo nga inagihan. Ginbayaan sia sang iya mga ginikanan halin sang pagkabun-ag niya, gani ginpadaku sia sa nanuhaytuhay nga institusyon. Sang mga 20 anyos na sia, natultulan niya kon diin nagapuyo ang iya iloy kag namat-od nga magpuyo malapit sa iya. Nagtrabaho sia sing lakas, nagsupot sing madamo nga kuwarta, kag nagkadto sa siudad nga nahamtangan sang iya iloy. Ginpapuyo sia sang iya iloy upod sa iya tubtob nga naubos ang iya kuwarta kag dayon ginpahalin sia. Bangod sining pagsikway nagbuko sia sa paghikog.

Apang, napaambitan ni Luis ining lamharon nga tawo sing kamatuoran sa Biblia. Yadto nga kamatuoran nagalakip sa pasalig: “Kon ang akon amay kag ang akon iloy magbiya sa akon, si Jehova mismo magasapupo sa akon.” (Salmo 27:10) Nasapwan sang lamharon nga tawo nga may langitnon sia nga Amay nga indi gid magbiya sa iya. Malipayon sia karon nga mangin bahin sang isa ka bag-o nga pamilya, ang pamilya ni Jehova.

Ang isa pa ka tawo sa amo man nga pungsod nagsiling sa isa sang mga Saksi ni Jehova nga naluyagan niya ang Lalantawan nga magasin. Ngaa? Bangod ginsalbar sini ang iya pag-asawahay. Natabuan nga sang isa ka adlaw, sang nakalakat na ining tawo gikan sa iya trabaho, nakita niya sa basurahan ang isa ka Lalantawan nga magasin nga may tig-ulo nga “Diborsio” sa dalagku nga mga letra. Sanglit may problema ang iya pag-asawahay kag nasugdan na nila sang iya asawa ang mga proseso para sa legal nga pagbulagay, ginpulot niya ang magasin kag ginbasa ini. Gindala niya ini pauli kag ginbasa ini upod sa iya asawa. Gintinguhaan sang mag-asawa nga iaplikar ang pasad sa Biblia nga laygay sa magasin. (Efeso 5:⁠21–​6:⁠4) Wala magdugay, nag-uswag ang ila relasyon. Gin-untat nila ang mga proseso sa pagbulagay kag nagatuon na karon sa Biblia subong nahiusa nga mag-asawa.

Sa Uruguay, ang isa pa ka tawo nga si Luis indi gid malipayon. Pagkagiyan sa droga, espiritismo, pagsimba sa mga idolo, pag-abuso sa alkohol​—⁠amo ini ang pila sang mga butang nga nagpagamo sang iya kabuhi. Sang ulihi, bangod bug-os nga nalugaw-an si Luis, nangin isa sia ka ateista. Ginhatagan sia sang isa ka abyan sing libro nga Life​—⁠How Did It Get Here? By Evolution or by Creation?b Nagresulta ini sa malip-ot nga pagpakig-angot sa mga Saksi ni Jehova, apang wala magdugay nagbalik si Luis sa alkohol kag sa droga. Sa tion sang daku nga kalisang, sang nasapwan niya ang iya kaugalingon nga nagapungkuon sa isa ka basurahan, nagpangamuyo sia, nga nagapatuhoy sang iya pangamuyo sa “amay ni Jesucristo,” sanglit indi sia sigurado tuhoy sa ngalan sang Dios.

Nangabay sia sa Dios nga ipakita sa iya kon bala may katuyuan ang iya pagluntad. “Sang masunod gid nga adlaw,” siling ni Luis, “ginhatagan ako sang isa ka kakilala sing libro nga wala na niya ginagamit. Ang tig-ulo? Revelation​—⁠Its Grand Climax At Hand!”c Nabuligan sia sining libro nga masabat ang iya pamangkot. Nangamuyo liwat si Luis nga buligan sia sa pagpangita sing relihion nga magapakita sa iya kon paano alagaron ang Dios. Makakilibot gid! Nagtunog ang doorbell, kag nagatindog sa guwa ang duha sang mga Saksi ni Jehova. Gilayon nga nagtuon si Luis sa Biblia upod sa ila. Madasig ang iya pag-uswag kag nagabatyag sia karon nga ginpakamaayo subong isa ka bawtismado nga Saksi. Nagakabuhi sia sing matinlo kag nagabulig man sa iban nga masapwan ang katuyuan sa ila kabuhi. Para sa iya, ang mga pulong sa Salmo 65:2 nagmatuod: “O Manugpamati sa pangamuyo, sa imo magakari ang katawhan sang tanan nga unod.”

Sa Pilipinas, si Allan isa anay ka estudyante nga aktibista. Katapo sia sang isa ka organisasyon nga ang katuyuan amo ang “pagpukan sa gobierno agod nga ang palaabuton nga mga henerasyon mangin alalangay.” Apang, sang isa ka adlaw, nakapakigsugilanon sia sa mga Saksi ni Jehova kag natukiban halin sa Biblia ang katuyuan sang Dios para sa katawhan. Ina nga katuyuan nagalakip sa gin-inspirar nga saad: “Kay sa diutay pa nga tion, kag ang malauton wala na . . . Apang ang mahagop magapanubli sang duta, kag magakalipay sila sa kabuganaan sang paghidait.” (Salmo 37:​10, 11) Si Allan nagsiling: “Wala magdugay natukiban ko nga ang ginapakig-away sang amon kahublagan madugay na nga ginsaad sa Biblia. Ang tanan nga butang nga ginahandum gid namon pagaihatag sa idalom sang Ginharian sang Dios.” Ginasakdag karon ni Allan ang Ginharian sang Dios kag ginabuligan ang iban nga magtuo sa kamatuoran sa Biblia.

Huo, ang kabuhi nagabag-o kon pamatian sang mga tawo ang kamatuoran sang Pulong sang Dios, ang Biblia. Sa pagkamatuod, magaabot ang tion nga ang tanan nga nakalampuwas nga katawhan magapahisuno sang ila kabuhi sa kabubut-on sang Dios. Daw ano ini nga pagbag-o! Nian, ang tagna matuman: “Indi sila magahalit ukon maglaglag sa bug-os ko nga bukid nga balaan; bangod ang duta pat-od nga matugob sang ihibalo ni Jehova subong nga ang mga tubig nagatabon sa dagat.”​—⁠Isaias 11:⁠9.

[Mga footnote]