Sin-o si Jehova?

SI Jehova nagsiling sa isa sang iya matutom nga mga sumilimba: “Wala sing tawo nga makakita sa akon kag mabuhi.” (Exodo 33:20) “Ang Dios Espiritu,” kag indi sia makita sang mga tawo paagi sa ila pisikal nga mga mata. (Juan 4:24) Ang pagtulok sing direkta sa adlaw sa udtong-adlaw makahalalit sa aton mga mata, gani mangin makahalalit man para sa aton nga tulukon ang daku nga Ginhalinan sang enerhiya nga nagtuga indi lamang sang aton masilaw nga adlaw kundi sang dimaisip man nga iban pa nga mga adlaw sa uniberso.

Sing makalilipay, indi kinahanglan nga makita naton ang Dios agod mahibaluan ang nahanungod sa iya. Ang Biblia nagapakilala sa Isa nga naghimo sinang matahom nga pinutos, ang duta, para sa aton kag nagasugid sang iya personalidad. Gani mapuslanon nga usisaon ang Biblia agod mahibaluan ang tuhoy sa Amay nga naghatag sa aton sing kabuhi kag nag-aman sing makalilipay nga puluy-an nga sa sini maagom ina nga kabuhi.

Ang Kahulugan sang Iya Ngalan

Ang tanan nga ngalan may kahulugan, bisan nga ang madamo mahimo nga wala makahibalo sa ila karon. Halimbawa, ang kinaandan nga Hiligaynon nga ngalan nga David naghalin sa Hebreong tinaga nga nagakahulugan sing “Hinigugma.” Ang ngalan sang Manunuga, Jehova, may kahulugan man. Ano ini? Sa orihinal nga lenguahe sang Biblia nga Hebreo, ang ngalan sang Dios ginasulat sa apat ka letra, YHWH, kag mabasa sing halos 7,000 ka beses sa Hebreo nga bahin sang Biblia. Ang ngalan sang Dios ginahangop nga nagakahulugan sing “Ginapahanabo Niya.” Nagapahangop ini nga si Jehova maalamon nga nagapahanabo sang iya kaugalingon agod mangin kon ano dapat sia agod matuman ang iya mga katuyuan. Sia ang Manunuga, Hukom, Manluluwas, Manugsakdag sang Kabuhi, kag busa matuman niya ang iya mga saad. Dugang pa, sa Hebreo ang ngalan nga Jehova yara sa porma nga nagapahangop sing isa ka pagpanghikot sa pagtuman. Huo, si Jehova nagapahanabo gihapon sang iya kaugalingon agod mangin manugtuman sang iya mga katuyuan. Sia amo ang buhi nga Dios!

Ang Nagapangibabaw nga mga Kinaiya ni Jehova

Ginalaragway sang Biblia ang Manunuga subong “isa ka Dios nga maluluy-on kag mainayuhon, mahinay sa pagpangakig kag bugana sa mahigugmaon nga kaayo kag sa kamatuoran, nga nagatipig sang mahigugmaon nga kaayo para sa mga linibo, nga nagapatawad sang kasaypanan kag paglapas kag sala.” (Exodo 34:​6, 7) Ang ekspresyon “mahigugmaon nga kaayo” nagapaalinton sing tuman ka importante nga Hebreong tinaga. Nagapahangop ini sing kaayo nga mahigugmaon gid nga nagapasuod sini sa isa ka butang tubtob nga ang katuyuan sina nga butang matuman. Mahimo man ini mabadbad nga “mainunungon nga gugma.” Ang kaayo ni Jehova mahigugmaon gid nga nagapasuod sang iya kaugalingon sa iya mga tinuga kag nagatuman sang iya matahom nga katuyuan. Indi bala nimo pakamahalon ina nga gugma gikan sa Isa nga naghatag sing kabuhi sa imo?

Si Jehova mahinay sa pagpangakig kag maabtik sa pagpatawad sang aton mga kasaypanan. Makalilipay nga mangin suod sa subong nga persona. Apang, wala ina nagakahulugan nga ginakunsinte niya ang sala. Sia nagsiling: “Ako, si Jehova, nagahigugma sang katarungan, nagadumot sang pagpangawat upod sang pagkadimatarong.” (Isaias 61:8) Subong Dios sang katarungan, indi niya pagtugutan sing dayon ang masinupakon nga mga makasasala nga nagapadayon sang ila kalautan. Busa, makapat-od kita nga sa iya natalana nga tion, tadlungon ni Jehova ang mga inhustisya sa kalibutan. Indi niya pagtalikdan ang mga nasit-an.

Indi mahapos nga huptan ang himpit nga pagkatimbang sa ulot sang gugma kag katarungan. Kon ikaw isa ka ginikanan, nabudlayan ka bala sa pagpamat-od kon san-o, paano, kag tubtob diin tadlungon ang imo kabataan kon sila magtinonto? Ang pagtimbang sa katarungan sing mahigugmaon nga pagkaawa nagakinahanglan sing daku nga kaalam. Ina nga kinaiya ginapakita sing bugana ni Jehova kon nagapakig-angot sia sa mga tawo. (Roma 11:​33-36) Sa pagkamatuod, ang kaalam sang Manunuga makita bisan diin, halimbawa sa mga kalatingalahan sang pagpanuga sa palibot naton.​—⁠Salmo 104:​24; Hulubaton 3:⁠19.

Apang, ang pagtigayon sing kaalam indi bastante. Agod matuman ang iya kabubut-on, ang Manunuga dapat man may gahom, kag ginapakita sang Biblia nga gamhanan sia katama: “Itangla ang inyo mga mata kag tan-awa. Sin-o bala ang nagtuga sini nga mga butang? Ini amo ang Isa nga nagapaguwa sang ila kasuldadusan sa isip, ginatawag niya sila tanan sa ngalan. Paagi sa pagkabugana sang dinamiko nga enerhiya, sia man makusog sa gahom, wala sing isa nga nakulang.” (Isaias 40:26) Paagi sa “pagkabugana sang dinamiko nga enerhiya,” ginahimo ni Jehova ang tanan nga butang. Wala bala ini nga kinaiya nagaganyat sa imo sa iya?

Dios Sang Tanan nga Pungsod

‘Apang indi bala nga si Jehova nga Dios sang “Daan nga Testamento,” amo ang Dios sang dumaan nga Israel?’ ayhan ipamangkot mo. Matuod nga ginpakilala ni Jehova ang iya kaugalingon sa mga Israelinhon. Apang, bangod gintuga niya ang nahaunang tawhanon nga mag-asawa, si Jehova amo ang Dios nga “sa iya utang sang tagsa ka pamilya . . . sa duta ang iya ngalan.” (Efeso 3:15) Kon nagatuo ikaw nga nagakaigo nga tahuron ang imo mga katigulangan, indi bala nagakaigo nga tumanon ang Isa nga naghatag sing kabuhi sa nahaunang tawo, ang katigulangan naton tanan, nga amo ang ginhalinan sang tanan nga kaliwatan nga nagaluntad sa duta karon?

Ang Manunuga sang katawhan indi makitid sing hunahuna. Matuod, may pinasahi nga kaangtanan sia anay sa pungsod sang Israel. Apang bisan sadto pa, ginhumlad niya ang iya mga butkon sa tanan nga nagtawag sa iya ngalan. Ang maalam nga hari sang Israel nagsiling sa pangamuyo kay Jehova: “Sa mga dumuluong, nga indi bahin sang imo katawhan nga Israel kag sing aktuwal naghalin sa malayong duta tungod sa imo ngalan . . . , kabay nga ikaw mismo mamati gikan sa mga langit, . . . kag dapat mo himuon ang suno sa tanan nga pagpanawag sa imo sang dumuluong; agod nga ang tanan nga katawhan sang duta makakilala sang imo ngalan.” (1 Hari 8:​41-43) Tubtob karon, ang katawhan sang tanan nga pungsod makakilala kay Jehova kag makatigayon sing makahulugan nga kaangtanan sa iya. Apang paano ina makaapektar sa imo?

Mga Kapuslanan sang Pagkilala kay Jehova

Nagabalik sa ilustrasyon sa nahaunang artikulo, kon makabaton ka sing matahom nga pinutos, natural lamang nga luyag mo mahibaluan kon para sa ano ang regalo. Paano ini dapat gamiton kag tipigan? Sing kaanggid, luyag naton hibaluon ang ginahunahuna sang Dios sang ginhimo niya ang duta para sa aton. Ang Biblia nagasiling nga “wala sia magtuga sini nga walay pulos,” kundi sia “naghuman sini nga pagpuy-an,” kon sayuron, sang mga tawo.​—⁠Isaias 45:⁠18.

Apang, wala gintipigan sang kalabanan nga mga tawo ang dulot sang Manunuga. Ginalaglag nila ang duta, nga nagpaakig sing daku kay Jehova. Apang, suno sa kahulugan sang iya ngalan, si Jehova determinado nga tumanon ang iya orihinal nga katuyuan para sa tawo kag sa duta. (Salmo 115:​16; Bugna 11:18) Kay-uhon niya ang duta kag ihatag ini subong palanublion sa mga handa sa pagkabuhi subong iya matinumanon nga mga anak.​—⁠Mateo 5:⁠5.

Ang katapusan nga tulun-an sang Biblia nagalaragway kon ano ang mangin kahimtangan kon mahanabo ina: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. . . . Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:​3, 4) Wala na sing magapatulo sing luha sa kasubo ukon magalalaw bangod sang pagkapatay sang isa ka hinigugma. Wala sing isa ang magapangayo sing tabang tungod nadulaan sing paglaum ukon nagaantos sing kasakit sang makamamatay nga balatian. Bisan “ang kamatayon dulaon.” (1 Corinto 15:​26; Isaias 25:​8; 33:24) Ginalaragway sini ang sahi sang kabuhi nga luyag ni Jehova nga agumon naton sang gintuga niya ang aton nahaunang mga katigulangan.

Sa pagkamatuod, makita mo karon ining katulad-paraiso nga mga kahimtangan sa tunga sang mga sumilimba ni Jehova. Sia nagasugid sa ila: “Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga laktan mo.” (Isaias 48:17) Si Jehova isa ka maayo nga Amay nga nagatudlo sa aton, nga iya mga anak, sing labing maayo nga paagi sa pagkabuhi. Ang iya mga panuytoy sa mga tawo nagaaman, indi sing dinagakaigo nga mga limitasyon, kundi sing mahigugmaon nga pangamlig. Ang pagsunod sa sini magaresulta sa matuod nga kahilwayan kag kalipay, suno gid sa ginsulat: “Karon si Jehova amo ang Espiritu; kag kon diin ang espiritu ni Jehova, didto may kahilwayan.” (2 Corinto 3:17) Paagi sa pagsunod sa mga panuytoy nga ginapaathag sa Biblia, yadtong nagbaton sang iya pagginahom nagaagom karon sing kalinong sa hunahuna nga sa pila ka adlaw makita sa bug-os nga katawhan.​—⁠Filipos 4:⁠7.

Daw ano ka mabinuligon nga Amay si Jehova! Handa ka bala sa paghibalo sing dugang pa tuhoy sa Isa nga yara sa likod sang tanan nga mga katingalahan sang pagpanuga? Para sa tanan nga handa, ang mga kapuslanan hamili bisan karon. Kag sa ulihi ang mga pagpakamaayo mangin dayon.

[Retrato sa pahina 5]

Ang balaan nga ngalan nga nasulat sa apat ka Hebreong letra makita sa mga pader sang madamong dumaan nga mga simbahan