“Makalilipay nga Balita” Gikan sa Apokalipsis

“Nakita ko ang isa pa ka anghel nga nagalupad sa tunga sang langit, kag may walay katapusan nga maayong balita sia nga ibantala subong makalilipay nga balita sa mga nagapuyo sa duta.”—BUGNA 14:6.

1. Samtang ang mga Saksi ni Jehova nagapati nga ang tulun-an sang Apokalipsis inspirado, ngaa indi sila isa ka “sekta nga nagatagna sang kalaglagan”?

KABALISKARAN sa mga panumbungon batok sa ila, ang mga Saksi ni Jehova indi isa ka “sekta nga nagatagna sang kalaglagan” ukon isa ka “kulto nga nagabantala sang adlaw sang paghukom.” Apang, ginabaton nila ang Apokalipsis, ukon ang tulun-an sang Bugna, subong bahin sang inspirado nga Pulong sang Dios. Matuod, ang Bugna may mga mensahe sang paghukom batok sa mga malauton. Apang sa ila pagpanaksi sing dayag, ang mga alagad sang Dios nagakonsentrar lamang sa dalayawon nga paglaum nga ginahatag sang Biblia, lakip na ang sa Apokalipsis, ukon Bugna. Busa, wala sila nagadugang ukon nagakuha gikan sa matagnaon nga mga pulong nga masapwan sa sini.—Bugna 22:18,19.

Mga Pahibalo Tuhoy sa Makalilipay nga Balita

2. Ano ang pila ka kasulatan nga masunson ginagamit sang mga Saksi ni Jehova sa ila pagbantala nga hilikuton?

² Ang masunson ginasambit nga basihan sa Kasulatan sang publiko nga ministeryo sang mga Saksi ni Jehova amo ang pinamulong ni Jesus: “Ining maayong balita sang ginharian ipahibalo sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14, footnote) Kag ano “ining maayong balita sang ginharian”? Madamong Saksi ang magasabat paagi sa pagbalikwat sang mga bersikulo gikan sa Bugna kapitulo 20 kag 21 nga nagapatuhoy sa Isa ka Libo ka Tuig nga Paggahom ni Cristo kag sa iya Ginharian nga panguluhan kag sa katilingban sang mga tawo, diin ang kamatayon, kalisod, kag kasakit “wala na.”—Bugna 20:6; 21:1, 4.

3. Sa ano nga misyon mapaanggid ang publiko nga ministeryo sang mga Saksi ni Jehova?

³ Subong mga manugpahibalo sining makalilipay nga mga balita, ang mga Saksi ni Jehova amo gid ang humalambal sang simbuliko nga langitnon nga mensahero nga ang iya misyon ginalaragway man sa Bugna. “Nakita ko ang isa pa ka anghel nga nagalupad sa tunga sang langit, kag may walay katapusan nga maayong balita sia nga ibantala subong makalilipay nga balita sa mga nagapuyo sa duta, kag sa tagsa ka pungsod kag tribo kag hambal kag katawhan.” (Bugna 14:6) Ang “walay katapusan nga maayong balita” nagalakip sang pahibalo nga ang “ginharian [ukon, pagginahom] sang kalibutan nangin ginharian sang aton Ginuo kag sang iya Cristo” kag nga ang “gintalana nga tion” ni Jehova nag-abot na “sa paglaglag sa mga nagalaglag sang duta.” (Bugna 11:15, 17, 18) Indi bala ina maayo gid nga balita?

Kon Ano ang Ginahatag Sang Bugna sa Aton

4. (a) Anong sadsaran nga mga kamatuoran ang ginabalay sa kapitulo 1 sang Bugna? (b) Ano ang ginakinahanglan sa mga luyag makabenepisyo gikan sa makalilipay nga mga balita?

4 Ang nagabukas nga kapitulo sang tulun-an sang Bugna nagapakilala kay Jehova subong “ang Alpha kag ang Omega, . . . ang Isa nga amo karon kag amo anay kag nga magakari, ang Labing Gamhanan.” Kag nagapakilala ini sa iya Anak, si Jesucristo, subong “ang Matutom nga Saksi,” “ang panganay sa mga patay,” kag “ang Manuggahom sang mga hari sang duta.” Nagapatuhoy man ini kay Jesus subong ‘sia nga nagahigugma sa aton kag naghubad sa aton gikan sa aton mga sala bangod sang iya dugo.’ (Bugna 1:5,8) Busa, halin sa umpisa, ginapaathag sang Bugna ang sadsaran nagaluwas-sang-kabuhi nga mga kamatuoran. Ang “mga nagapuyo sa duta” indi makabenepisyo sa makalilipay nga balita nga ginpahibalo sa ila kon indi nila anay kilalahon ang pagkasoberano ni Jehova, tuuhan ang ginpatulo nga dugo ni Jesus, kag patihan nga ginbanhaw sia ni Jehova kag nga si Cristo amo karon ang gintangdo sang Dios nga Gumalahom sa duta.—Salmo 2:6-8.

5. Ano nga papel ni Cristo ang ginalaragway sa kapitulo 2 kag 3 sang Bugna?

⁵ Ang masunod nga duha ka kapitulo nagalaragway kay Cristo Jesus subong ang mahigugmaon nga langitnon nga Manugtatap sang mga kongregasyon sang iya mga disipulo sa duta. Ang linukot nga ginsulat sa napili nga pito ka Cristianong kongregasyon sa Asia Minor sang nahaunang siglo C.E. nagaunod sing pangpalig-on kag mabakod nga laygay nga maaplikar gihapon karon. Ang mga mensahe nga ginpadala sa mga kongregasyon masunson nagasugod sa mga pinamulong subong sang “Nahibaluan ko ang imo mga buhat” ukon “Nahibaluan ko ang imo mga kapipit-an.” (Bugna 2:2,9) Huo, nahibaluan gid ni Cristo ang nagakatabo sa mga kongregasyon sang iya mga disipulo. Gindayaw niya ang iban tungod sa ila gugma, pagtuo, pinangabudlayan sa ministeryo, pagbatas, kag katutom sa iya ngalan kag pulong. Ginsaway naman niya ang iban bangod gintugutan nila ang ila gugma kay Jehova kag sa iya Anak nga magbugnaw, ukon nahulog sila sa seksuwal nga imoralidad, idolatriya, ukon apostata nga sektaryanismo.

6. Ano ang ginabulig sang palanan-awon nga narekord sa kapitulo 4 sa mga tawo nga mahangpan?

⁶ Ang kapitulo 4 nagahatag sing makahalawhaw nga palanan-awon tuhoy sa langitnon nga trono ni Jehova nga Dios. Nagahatag ini sing pagpasiplat sa himaya sang presensia ni Jehova kag sa kahimusan sang langitnon nga paggahom nga gamiton niya. Ang napurungpurungan nga mga gumalahom, nga ang ila trono nagalibot sa sentro nga trono sang uniberso, nagayaub kay Jehova kag dayag nga nagapahayag: “Takus ka, Jehova, nga amon Dios, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nagluntad sila kag gintuga.”—Bugna 4:11.

7. (a) Ano ang panawagan sang anghel nga himuon sang mga pumuluyo sa duta? (b) Ano ang importante nga bahin sang aton pagtudlo nga hilikuton?

⁷ May yara bala ini kahulugan sa katawhan sa karon? May yara gid. Kon luyag nila magkabuhi sa idalom sang Milenyo nga Ginharian, dapat nila pamatian ang ginapahayag sang “anghel nga nagalupad sa tunga sang langit”: “Kahadluki ninyo ang Dios kag hatagi sia sing himaya, kay nag-abot na ang oras sang iya paghukom.” (Bugna 14:6,7) Ang isa sang pangunang mga katuyuan sang pagtudlo-sing-Biblia nga hilikuton sang mga Saksi ni Jehova amo ang pagbulig sa “mga nagapuyo sa duta” nga makilala kag masimba si Jehova, mahangpan ang iya pagka-Manunuga, kag kinabubut-on nga magpasakop sa iya matarong nga pagkasoberano.

Ang Kordero nga Takus Sang Kadungganan

8. (a) Paano ginalaragway si Cristo sa kapitulo 5 kag 6? (b) Ano ang matun-an sang tanan nga nagapamati sa makalilipay nga mga balita sa sining palanan-awon?

⁸ Ang masunod nga duha ka kapitulo, ang 5 kag 6, nagapakilala kay Jesucristo subong ang Kordero nga takus sa pagbukas sa linukot nga may pito ka pat-in, sa amo nagasugid sa simbuliko nga hambal sang mga hitabo nga nagakahanabo sa aton adlaw. (Ipaanggid ang Juan 1:29.) Sa sining simbuliko nga Kordero, ang langitnon nga mga tingog nagasiling: “Takus ka sa pagkuha sang linukot kag sa pagbukas sang mga pat-in sini, kay gin-ihaw ka kag paagi sa imo dugo ginbakal mo ang mga tawo para sa Dios gikan sa tagsa ka tribo kag hambal kag katawhan kag pungsod, kag ginhimo mo sila nga ginharian kag mga saserdote sang aton Dios, kag magagahom sila subong mga hari sa ibabaw sang duta.” (Bugna 5:9,10) Ini nga palanan-awon nagatudlo nga pasad sa ginpatulo nga dugo ni Cristo, ang pila ka katawhan sang tanan nga ginhalinan gintawag nga mangin kaupod niya sa langit kag ‘magagahom subong mga hari sa duta.’ (Ipaanggid ang Bugna 1:5,6.) Ang ila limitado nga kadamuon ginsugid sang ulihi sa Bugna.

9. Paano ginpakilala si Cristo sa kapitulo 6?

⁹ Sa sini man nga palanan-awon, si Cristo ginpakilala man subong ang napurungpurungan nga nagasakay sa kabayo nga maputi, nga naglakat nga “nagapangdaug kag sa pagtapos sang iya pagdaug.” Sing makalilipay, daugon niya ang malain nga mga epekto nga ginsimbuluhan sang tatlo pa ka manugkabayo sang Apokalipsis, nga ang ila masingki nga pagsakay nagdala sing inaway, gutom, kag kamatayon sa katawhan sugod sang importante gid nga tuig sang 1914. (Bugna 6:1-8) Ang pinasahi nga papel ni Cristo, ang Kordero sang Dios, sa pagluwas sa katawhan kag sa pagtuman sa dalayawon nga mga katuyuan ni Jehova amo ang panguna nga tema sang nagatudlo-sing-Biblia nga hilikuton sang mga Saksi ni Jehova.

10. (a) Anong importante nga impormasyon ang ginahatag sa kapitulo 7? (b) Paano si Cristo nagpamulong tuhoy sa mga nagbaton sang Ginharian?

¹⁰ Ang kapitulo 7 may yara gid makalilipay nga mga balita. Sa tulun-an lamang sang Bugna naton makita ang kadamuon sang mga gintawag ni Jesus nga “diutay nga panong” nga sa ila ginahatag sang Amay sang Kordero ang Ginharian. (Lucas 12:32; 22:28-30) Ginpat-inan sila ni Jehova nga Dios paagi sa iya espiritu. (2 Corinto 1:21,22) Si apostol Juan, nga nagbaton sang Bugna, nagapamatuod: “Nabatian ko ang kadamuon sang mga napat-inan, isa ka gatos kag kap-atan kag apat ka libo.” (Bugna 7:4) Ining eksakto nga kadamuon ginapamatud-an sa mas naulihi nga kapitulo subong ang kabug-usan sang mga “ginbakal gikan sa katawhan” agod maggahom kaupod sang Kordero sa langitnon nga Bukid Sion. (Bugna 14:1-4) Samtang ang mga simbahan sang Cristiandad nagahatag sing di-maathag kag di-makakumbinsi nga mga paathag tuhoy sini nga kadamuon, sing makawiwili, ang iskolar sang Biblia nga si E.W.Bullinger nagasiling tuhoy sini: “Amo ini ang simple nga paghatag sang kamatuoran: ang pat-od nga kadamuon kabaliskaran sa indi pat-od nga kadamuon sa sini mismo nga kapitulo.”

11. (a) Anong makalilipay nga mga balita ang masapwan sa kapitulo 7? (b) Anong mga paglaum ang nabuksan sa atubangan sang mga katapo sang “dakung kadam-an”?

¹¹ Anong indi pat-od nga kadamuon ang ginpatuhuyan ni Bullinger? Sa bersikulo 9, si apostol Juan nagsulat: “Pagkatapos sini nga mga butang nakita ko, kag, yari karon! ang isa ka dakung kadam-an, nga wala sing tawo nga makaisip, gikan sa tanan nga pungsod kag tribo kag katawhan kag hambal.” (Bugna 7:9) Sin-o ang nagahuman sa sining dakung kadam-an, ano karon ang ila tindog sa atubangan sang Dios, kag ano ang ila palaabuton? Ang sabat sang apokalipsis maayong balita para sa mga nagapuyo sa duta. Aton mabasa: “Ini amo sila ang nagguwa sa dakung kapipit-an, kag ginlabhan nila ang ila mga panapton nga malaba kag ginpaputi ini sa dugo sang Kordero.” Paagi sa pagtuo sa ginpatulo nga dugo ni Cristo, amligan sila sa “dakung kapipit-an.” Si Cristo “magatuytoy sa ila sa mga tuburan sang tubig nga nagahatag sing kabuhi. Kag ang Dios magapahid sang tagsa ka luha sa ila mga mata.” (Bugna 7:14-17) Huo, ang minilyon sang katawhan nga nagakabuhi karon mahimo mangin bahin sang di-maisip nga kadam-an nga makalampuwas sa katapusan sang karon malauton nga sistema sang mga butang. Subong mga sakop ni Hari Jesucristo sa iya Milenyo nga Paggahom, tuytuyan niya sila sa kabuhi nga walay katapusan sa duta. Indi bala ina maayong balita?

“Ang Iya mga Paghukom Matuod kag Matarong”

12, 13. (a) Ano ang ginaunod sang kapitulo 8 tubtob 19? (b) Ngaa indi dapat matublag ang bunayag-sing-tagipusuon nga mga tawo sa sining mga tagna?

¹² Ang kapitulo 8 tubtob 19 amo gid ang kabangdanan nga ang tulun-an sang Apokalipsis, ukon Bugna, nakilal-an subong isa ka tulun-an nga nagatagna sang makakulugmat nga mga kapahamakan. Nagaunod ini sing matigdas nga mga mensahe sang paghukom (nga ginsimbuluhan sang mga pagtunog sang budyong, mga kalalat-an, kag mga yahong sang kaakig sang Dios) batok sa lainlain nga mga elemento sang sistema sang mga butang ni Satanas. Ining mga paghukom himuon, una batok sa butig nga relihion (“Babilonia nga Daku”), nian batok sa di-diosnon nga mga sistema sang politika, nga ginsimbuluhan sang mga sapat nga mapintas.—Bugna 13:1, 2; 17:5-7, 15, 16.a

¹³ Ginalaragway sining mga kapitulo ang pagtinlo sa kalangitan, paagi sa pagtagbong kay Satanas kag sa iya mga demonyo sa duta. Ginahatag sini ang lamang makatarunganon nga paathag tungod sa di-matupungan nga kasisit-an sa kalibutan sugod sang 1914. (Bugna 12:7-12) Ginalaragway man sini, sa simbuliko nga hambal, ang kalaglagan sang malauton nga sistema sang mga butang ni Satanas sa duta. (Bugna 19:19-21) Dapat bala makibot ang mga bunayag-sing-tagipusuon nga katawhan sa sining dramatiko nga mga hitabo? Indi, kay sa paghukom sang Dios, ang langitnon nga kasuldadusan nagasinggit: “Dayawa ninyo si Jah! Ang kaluwasan kag himaya kag gahom iya sang aton Dios, kay ang iya mga paghukom matuod kag matarong.”—Bugna 19:1, 2.

14, 15. (a) Paano tapuson nga may pagkamatarong ang karon malauton nga sistema? (b) Ngaa ini nga bahin sang Apokalipsis isa gid ka rason sang kasadya para sa bunayag-sing-tagipusuon nga mga tawo?

¹⁴ Indi pagpaluntaron ni Jehova ang matarong nga sistema sang mga butang kon indi anay madula sa duta ang mga nagalaglag sini. (Bugna 11:17,18; 19:11-16; 20:1, 2) Apang, wala sing tawo ukon estado sang politika ang may awtoridad ukon gahom sa paghimo sini. Si Jehova lamang kag ang iya gintangdo nga Hari kag Hukom, si Cristo Jesus, ang makahimo sini nga may pagkamatarong.—2 Tesalonica 1:6-9.

¹⁵ Ginapakita sing maathag gid sang Apokalipsis nga tuyo ni Jehova nga laglagon ang karon malauton nga sistema. Ini nga kamatuoran isa gid ka rason sang kasadya para sa mga lalaki kag mga babayi nga “nagapanghayhay kag nagabakho sa tanan nga kalangil-aran nga ginahimo.” (Ezequiel 9:4) Magapadulot ini sa ila sang kinahanglanon gid nga pamatian ang panawagan sang anghel nga may makalilipay nga mga balita, nga nagsiling: “Kahadluki ninyo ang Dios . . . kay nag-abot na ang oras sang iya paghukom, gani simbaha ninyo ang Isa nga naghimo sang langit kag duta.” (Bugna 14:7) Kabay nga simbahon kag alagaron sang subong sini nga mga tawo si Jehova kaupod sang iya mga Saksi, “nga nagatuman sang mga sugo sang Dios kag nagapanaksi kay Jesus.”—Bugna 12:17.

Ang Mahimayaon nga Milenyo nga Paggahom

16. (a) Ngaa ginsikway sang mga simbahan sang Cristiandad ang paglaum sa Milenyo? (b) Ngaa nagapati ang mga Saksi ni Jehova nga ang huwaran nga pangamuyo pagasabton?

¹⁶ Ang kapitulo 20 tubtob 22 sang tulun-an sang Bugna may Makasulatanhon nga basihan para sa paglaum sa Milenyo. Amo lamang ini ang bahin sang Biblia nga aktuwal nga nagasambit sang isa-ka-libo-ka-tuig nga panag-on nga magauna sa walay katubtuban nga kalipay sa langit kag sa duta. Ginsikway sang mga simbahan sang Cristiandad ang paglaum sa Milenyo. Sanglit ang doktrina sang simbahan amo nga ang matarong nagakadto sa langit kag ang malauton sa impierno, wala ini sing duog sa paraiso nga duta. Ang huwaran nga pangamuyo, nga nagapangabay nga “paghimuon ang kabubut-on [sang Dios] sa duta subong sa langit,” wala na sing kahulugan sa kalabanan nga katapo sang mga simbahan sang Cristiandad. (Mateo 6:10, New International Version) Apang indi ina matuod sa mga Saksi ni Jehova. Nagapati gid sila nga wala ginhimo ni Jehova nga Dios ang duta nga “wala sing pulos,” kundi “agod puy-an.” (Isaias 45:12,18) Busa, ang dumaan nga tagna, ang huwaran nga pangamuyo, kag ang apokaliptiko nga paglaum sa Milenyo nagahisantuanay. Sa iya Isa ka Libo ka Tuig nga Paggahom, pat-uron ni Cristo nga ang kabubut-on ni Jehova pagahimuon sa duta, subong amo man sa langit.

17. Ano ang nagapakita nga ang “isa ka libo ka tuig” dapat hangpon sing literal?

¹⁷ Ang termino nga “isa ka libo ka tuig” mabasa sing anom ka beses sa nahaunang pito ka bersikulo sang Bugna kapitulo 20. Talalupangdon ang katunayan nga ginagamit ini sing apat ka beses upod sang definite article nga “the” (sa Ingles), nagapakita nga nagapatuhoy ini sa isa ka literal nga milenyo, indi lamang sa wala masambit sing espesipiko nga malawig nga tion, subong sang ginapapati sa aton sang madamo nga komentarista sang Cristiandad. Ano ang mahanabo sa Milenyo? Una, si Satanas kuhaan sing gahom sa bug-os nga panag-on. (Bugna 20:1-3; ipaanggid ang Hebreo 2:14.) Maayo gid nga balita!

18. (a) Ngaa ang Milenyo sarang matawag nga “adlaw” sang paghukom? (b) Ano ang mahanabo sa katapusan sang isa ka libo ka tuig?

¹⁸ Sanglit ang “gahom sa paghukom” ginahatag sa mga ‘magagahom subong hari kaupod niya [si Cristo] sing isa ka libo ka tuig,’ ini nga panag-on, sa katunayan, amo ang isa-ka-libo-ka-tuig nga “adlaw” sang paghukom. (Bugna 20:4, 6; ipaanggid ang Binuhatan 17:31; 2 Pedro 3:8.) Ang mga patay banhawon kag, upod sa mga makalampuwas sa “dakung kapipit-an,” hukman sing nagakaigo suno sa ila mga binuhatan, ukon mga hinimuan, sa sina nga tion. (Bugna 20:12, 13) Pagkatapos sang isa ka libo ka tuig, si Satanas buy-an sing makadali agod tilawan sa katapusan nga tion ang katawhan nga sa tapos sini sia, ang iya mga demonyo, kag ang bisan sin-o nga mga rebelde sa duta nga magasunod sa iya laglagon sing dayon. (Bugna 20:7-10) Ang ngalan sang katawhan nga makapasar sa pagtilaw isulat sing di-mapanas sa “tulun-an sang kabuhi” kag pasudlon sa walay katapusan nga pagkabuhi sing malipayon, nga nagaalagad kag nagasimba kay Jehova sa paraiso nga duta.—Bugna 20:14,15; Salmo 37:9,29; Isaias 66:22,23.

19. (a) Ngaa mapat-od naton nga ang makalilipay nga mga saad nga ginhatag sa tulun-an sang Bugna matuman gid? (b) Ano ang binagbinagon sa masunod nga artikulo?

¹⁹ Amo ini ang makalilipay nga mga balita nga ginahatag sa Apokalipsis. Indi ini wala sing pulos kag hinimo-sang-tawo nga mga saad. Si apostol Juan nagsulat: “Ang Isa nga nagalingkod sa trono nagsiling: ‘Yari karon! Ginahimo ko nga bag-o ang tanan nga butang.’ Nagsiling man sia: ‘Isulat ini, kay ining mga pulong matutom kag matuod.’ ” (Bugna 21:5) Ano ang dapat naton himuon agod makapakigbahin sa katumanan sining makalilipay nga mga balita? Ang tulun-an sang Bugna may madamo nga laygay para sa mga luyag nga pahamut-an ang Dios. Ang pagsunod sa sining laygay magahatag sa aton sing walay latid nga kalipay, sa karon kag sa walay katubtuban, subong sang ipakita sang masunod nga artikulo.

[Footnote]

Mga Punto nga Repasuhon

◻ Anong sadsaran nga mga kamatuoran nga masapwan sa Bugna kapitulo 4 tubtob 6 ang may importante nga bahin sa makalilipay nga mga balita?

◻ Anong makalilipay nga mga balita ang masapwan sa Bugna kapitulo 7?

◻ Ngaa indi dapat matublag ang bunayag-sing-tagipusuon nga mga tawo sa mga mensahe sang paghukom nga masapwan sa Bugna?

◻ Sa anong mga paagi ang Milenyo mangin “adlaw” sang paghukom?

[Laragway sa pahina 10]

Si Hari Jesucristo magadula sing bug-os sang inaway, gutom, kag kamatayon