Ang “Kalahamut-an nga mga Butang” Nagapuno sang Balay ni Jehova

“Uyugon ko [ni Jehova] ang tanan nga pungsod, kag ang kalahamut-an nga mga butang sang tanan nga pungsod magaabot; kag pun-on ko ining balay sing himaya.”​—⁠HAGEO 2:⁠7.

1. Sa tion sang emerhensia, ngaa ginahunahuna naton una ang aton mga hinigugma?

ANONG kalahamut-an nga mga butang ang nagapuno sang inyo balay? May yara bala kamo maluho nga muwebles, pinakaulihi nga kompyuter, bag-o nga salakyan sa inyo garahe? Bisan pa nagapanag-iya kamo sining tanan nga butang, wala bala kamo nagaugyon nga ang pinakahamili nga butang sa inyo puluy-an amo ang mga tawo​—⁠ang mga katapo sang inyo pamilya? Handurawa lamang nga isa ka gab-i nakabugtaw kamo sa baho sang aso. Ang inyo balay nasunog, kag may pila ka minuto na lamang kamo agod makapalagyo! Ano bala ang importante gid sa inyo? Ang inyo bala mga muwebles? Ang inyo kompyuter? Ang inyo salakyan? Indi bala nga, sa baylo, hunahunaon ninyo ang inyo mga hinigugma? Siempre hunahunaon gid ninyo sila, kay ang mga tawo mas malahalon sangsa mga pagkabutang.

2. Ano ang kasangkaron sang pagpanuga ni Jehova, kag ano nga bahin sini ang naluyagan gid ni Jesus?

² Hunahunaa karon si Jehova nga Dios kag ang iya Anak, nga si Jesucristo. Si Jehova amo ang “Isa nga naghimo sang langit kag sang duta kag sang dagat kag sang tanan nga butang nga yari sa sini.” (Binuhatan 4:24) Ang iya Anak, ang “batid nga manugpangabudlay,” amo ang ahente nga paagi sa iya ginhimo ni Jehova ang tanan iban pa nga mga butang. (Hulubaton 8:​30, 31; Juan 1:​3; Colosas 1:​15-17) Pat-od gid nga ginapakabahandi ni Jehova kag ni Jesus ang tanan nga gintuga. (Ipaanggid ang Genesis 1:⁠31.) Apang diin nga bahin sang tinuga sa banta ninyo ang pinakaimportante gid sa ila​—⁠mga pagkabutang bala ukon mga tawo? Sa papel sang kaalam nga ginpersonipikar, si Jesus nagsiling: “Ang mga butang nga naluyagan ko amo ang mga anak sang mga tawo,” ukon suno sa badbad ni William F. Beck, si Jesus “nalipay sa mga tawo.”

3. Ano nga tagna ang ginpabutyag ni Jehova paagi kay Hageo?

³ Wala duhaduha nga ginapakabahandi gid ni Jehova ang mga tawo. Ang isa ka tanda sini makita sa iya matagnaon nga pinamulong sang tuig 520 B.⁠C.⁠E. paagi sa iya manalagna nga si Hageo. Si Jehova nagsiling: “Uyugon ko ang tanan nga pungsod, kag ang kalahamut-an nga mga butang sang tanan nga pungsod magaabot; kag pun-on ko ining balay sing himaya. . . . Mangin daku pa ang himaya sining ulihing balay sangsa una.”​—⁠Hageo 2:​7, 9.

4, 5. (a) Ngaa indi makatarunganon ang maghinakop nga ang ekspresyon nga “kalahamut-an nga mga butang” nagapatuhoy sa materyal nga katahom? (b) Paano ninyo ilaragway ang “kalahamut-an nga mga butang,” kag ngaa?

⁴ Anong “kalahamut-an nga mga butang” ang magapuno sa balay ni Jehova kag magahatag sa sini sing di-matupungan nga himaya? Ang maluho bala nga mga kasangkapan kag sobra nga mga dekorasyon? Ang bulawan, pilak, kag malahalon bala nga mga bato? Daw indi gid ini makatarunganon. Dumduma, ang nauna nga templo, nga gin-inagurahan mga lima ka siglo antes, isa anay ka multibilyones-dolyares nga edipisyo!⁠a Pat-od gid nga wala magpaabot si Jehova nga labawan sang templo nga gintukod sining diutay lamang nga hubon sang nagbalik nga mga Judiyo ang templo ni Solomon sa materyal nga katahom!

⁵ Ano, kon amo, ang “kalahamut-an nga mga butang” nga magapuno sang balay ni Jehova? Sing maathag, mga tawo sila. Ti, indi pilak kag bulawan ang nagapahalipay sa tagipusuon ni Jehova kundi mga tawo nga nagaalagad sa iya bangod sang gugma. (Hulubaton 27:​11; 1 Corinto 10:26) Huo, hamili kay Jehova ang tanan nga lalaki, babayi, kag kabataan nga nagasimba sa iya sing kalahamut-an. (Juan 4:​23, 24) Ini sila “kalahamut-an nga mga butang,” kag mas mahal gid sila kay Jehova sangsa tanan nga dekorasyon nga nagapuni sa templo ni Solomon.

6. Ano ang katuyuan sang dumaan nga templo sang Dios?

⁶ Walay sapayan sang dalayon nga pagpamatok, ang templo nahuman sang 515 B.⁠C.⁠E. Tubtob sang panahon sang paghalad ni Jesus, ang templo sa Jerusalem nagpabilin nga sentro sang putli nga pagsimba para sa madamong “kalahamut-an nga mga butang,” nga ginahuman sang kinaugali nga mga Judiyo kag sang proselita nga mga Gentil. Apang ang templo nagtiglawas sang daku pa nga butang, subong sang makita naton.

Unang-Siglo nga Katumanan

7. (a) Ano ang ginalandong sang dumaan nga templo sang Dios sa Jerusalem? (b) Ilaragway ang ginahimo sang mataas nga saserdote sa Adlaw sang Katumbasan.

⁷ Ang templo sa Jerusalem naglandong sa daku pa nga kahimusan sa pagsimba. Ini ang espirituwal nga templo sang Dios, nga gintukod ni Jehova sang 29 C.⁠E. kag si Jesus ang Mataas nga Saserdote. (Hebreo 5:​4-10; 9:​11, 12) Binagbinaga ang magkaanggid sa ulot sang mga katungdanan sang mataas nga saserdote sang Israel kag sang mga ginhimo ni Jesus. Kada tuig sa Adlaw sang Katumbasan, ang mataas nga saserdote nagakadto sa halaran sa luwang sang templo kag nagahalad sing baka nga lalaki sa pagtumbas para sa mga kasal-anan sang mga saserdote. Pagkatapos sini, nagasulod sia sa templo nga dala ang dugo sang baka nga lalaki, nagaagi sa mga ganhaan nga nagahamulag sang luwang gikan sa Balaan kag nian paagi sa kurtina nga nagahamulag sang Balaan gikan sa Labing Balaan. Sa tion nga makasulod na sa Labing Balaan, ang mataas nga saserdote nagasabya sang dugo sa kaban sang katipan. Masunod, nagahimo sang amo man nga tikang, nagadulot sia sing kanding sa pagtumbas para sa 12 ka di-saserdotenhon nga mga tribo sang Israel. (Levitico 16:​5-15) Ano ang kaangtanan sini nga seremonya sa espirituwal nga templo sang Dios?

8. (a) Sa anong kahulugan gindulot si Jesus sugod sang 29 C.⁠E.? (b) Anong pinasahi nga kaangtanan ang gin-agom ni Jesus upod kay Jehova sa bug-os nga ministeryo niya sa duta?

⁸ Si Jesus daw gindulot sa halaran sang kabubut-on sang Dios sang ginbawtismuhan kag ginhaplasan sia sing balaan nga espiritu sang Dios sang 29 C.⁠E. (Lucas 3:​21, 22) Sa katunayan, ini nga hitabo nagpatimaan sang pagsugod sang mahalaron nga pagkabuhi ni Jesus nga naglawig sing tatlo ka tuig kag tunga. (Hebreo 10:​5-10) Sadto nga tion, si Jesus nagaagom sing ginpanganak-sang-espiritu nga kaangtanan sa Dios. Ining pinasahi nga tindog ni Jesus upod sa iya langitnon nga Amay indi mahantupan sing bug-os sang iban nga mga tawo. Ang ila mga mata sang paghantop daw subong bala nga natabunan sang kumbong, subong nga ang kumbong nagtabon sang Balaan gikan sa panan-aw sang mga yadto sa luwang sang tabernakulo.​—⁠Exodo 40:⁠28.

9. Ngaa indi makasulod si Jesus sa langit subong isa ka tawo, kag paano nalubad ini nga kahimtangan?

⁹ Walay sapayan nga sia ginhaplas-sang-espiritu nga Anak sang Dios, ang tawo nga si Jesus indi makatigayon sing kabuhi sa langit. Ngaa indi? Bangod ang unod kag dugo indi makapanubli sang langitnon nga Ginharian sang Dios. (1 Corinto 15:​44, 50) Sanglit ang tawhanon nga unod ni Jesus isa ka sablag, ginasimbuluhan gid ini sang kurtina nga nagahamulag sang Balaan gikan sa Labing Balaan sa dumaan nga templo sang Dios. (Hebreo 10:20) Apang tatlo ka adlaw pagkatapos sia mapatay, si Jesus ginbanhaw sang Dios subong espiritu. (1 Pedro 3:18) Kon amo makasulod na sia sa Labing Balaan nga hulot sang espirituwal nga templo sang Dios​—⁠ang langit mismo. Kag amo gid sini ang natabo. Si Pablo nagsulat: “Si Cristo nagsulod, indi sa balaan nga duog [maathag nga nagapatuhoy sa Labing Balaan] nga ginhimo sang mga kamot, nga isa ka kopya sang katunayan, kundi sa langit mismo, agod magpakita karon sa atubangan sang persona sang Dios para sa aton.”​—⁠Hebreo 9:⁠24.

10. Ano ang ginhimo ni Jesus sa pagbalik sa langit?

¹⁰ Sa langit, si Jesus ‘nagsabya sang dugo’ sang iya halad paagi sa pagpresentar kay Jehova sang nagagawad nga balor sang iya dugo. Apang, labi pa ang ginhimo ni Jesus. Wala madugay antes sia mapatay, nagsiling sia sa iya mga sumulunod: “Magalakat ako agod maghanda sing duog para sa inyo. Subong man, kon maglakat ako kag maghanda sing duog para sa inyo, magakari ako liwat kag magabaton sa inyo sa akon kaugalingon, agod kon diin ako didto man kamo.” (Juan 14:​2, 3) Gani paagi sa pagsulod sa Labing Balaan, ukon sa langit, ginbuksan ni Jesus ang dalan agod magasunod ang iban. (Hebreo 6:​19, 20) Ining mga indibiduwal, nga may kadamuon nga 144,000, magaalagad subong kabulig nga mga saserdote sa kahimusan sang espirituwal nga templo sang Dios. (Bugna 7:​4; 14:​1; 20:6) Subong nga gindala una sang mataas nga saserdote sang Israel ang dugo sang baka nga lalaki pasulod sa Labing Balaan sa pagtumbas sa mga kasal-anan sang mga saserdote, ang balor sang ginpatulo nga dugo ni Jesus ginpadapat una sa sining 144,000 ka kabulig nga mga saserdote.⁠b

Modernong-Adlaw nga “Kalahamut-an nga mga Butang”

11. Tungod kay sin-o nagdulot sing kanding ang mataas nga saserdote sang Israel, kag ano ang ginlandong sini?

¹¹ Sang tuig 1935, ang kabilugan nga pagtipon sa mga hinaplas daw natapos.⁠c Apang wala pa matapos ni Jehova ang paghimaya sa iya balay. Ang “kalahamut-an nga mga butang” buot pa lang nga magasulod sa sini. Dumduma nga ang mataas nga saserdote sang Israel nagdulot sing duha ka sapat​—⁠ang baka nga lalaki para sa mga kasal-anan sang mga saserdote kag ang kanding para sa mga kasal-anan sang di-saserdotenhon nga mga tribo. Sanglit ang mga saserdote nagalaragway sa mga hinaplas nga mangin kaupod ni Jesus sa langitnon nga Ginharian, sin-o ang ginatiglawas sang di-saserdotenhon nga mga tribo? Ang sabat makita sa pinamulong ni Jesus nga narekord sa Juan 10:​16: “May iban ako nga mga karnero, nga indi sa sining toril; sila man dapat ko dalhon, kag magapamati sila sa akon tingog, kag mangin isa sila ka panong, isa ka manugbantay.” Gani, ang ginpatulo nga dugo ni Jesus magabenepisyo sa duha ka grupo sang mga tawo​—⁠una, sa mga Cristiano nga ang ila paglaum amo ang maggahom kaupod ni Jesus sa langit kag ikaduha, ang mga nagalaum nga magkabuhi sing walay katapusan sa paraiso nga duta. Sing maathag, ining ikaduha nga grupo ang ginalaragway sang “kalahamut-an nga mga butang” sang tagna ni Hageo.​—⁠Miqueas 4:​1, 2; 1 Juan 2:​1, 2.

12. Paano karon ginabuyok sa balay sang Dios ang madamong “kalahamut-an nga mga butang”?

¹² Ining “kalahamut-an nga mga butang” nagapuno gihapon sang balay ni Jehova. Sining ulihi nga tinuig, ang mga pagdumili sa Nasidlangan nga Europa, mga bahin sang Aprika, kag iban pa nga kadutaan ginkuha, nagatugot nga ang maayong balita sang gintukod na nga Ginharian sang Dios mag-uswag sa wala mabantalaan nga mga teritoryo tubtob karon. Samtang ang mga kalahamut-an nagasulod sa kahimusan sang templo sang Dios, nagapanikasog man sila sa paghimo sing dugang pa nga mga disipulo, bilang pagtuman sa sugo ni Jesus. (Mateo 28:​19, 20) Samtang ginahimo nila ini, nakasumalang sila sing madamong indibiduwal, bata kag tigulang, nga posible mangin “kalahamut-an nga mga butang” nga magahimaya sang balay ni Jehova. Binagbinaga ang pila lamang ka halimbawa kon paano ini ginahimo.

13. Paano ginpakita sang diutay nga bata nga babayi sa Bolivia ang iya kakugi sa pagpalapnag sing mensahe sang Ginharian?

¹³ Sa Bolivia, ang singko-anyos nga bata nga babayi nga ginpadaku sang Saksi nga mga ginikanan nagpangayo sing pahanugot sa iya maestra nga indi sia makaeskwela sa semana sang pagduaw sang manugtatap sang sirkito. Ngaa? Luyag niya makigbahin sa ministeryo sa sining bug-os nga pinasahi nga semana sang hilikuton. Nagpakibot ini sa iya mga ginikanan, apang nalipay sila nga may subong sia sini kaayo nga panimuot. Ang diutay nga bata nagadumala karon sing lima ka pagtuon sang Biblia sa puluy-an, kag ang pila sining mga estudyante nagatambong sa Cristianong mga miting. Gindala pa gani niya sa Kingdom Hall ang iya maestra. Ayhan sa ulihi, ipakita sang pila sang iya mga estudyante sa Biblia ang ila kaugalingon subong “kalahamut-an nga mga butang” nga magahimaya sang balay ni Jehova.

14. Sa Korea, paano ang paghimud-os sang isa ka utod nga babayi sa daw indi interesado nga indibiduwal ginpadyaan?

¹⁴ Samtang nagahulat sa estasyon sang tren, ginpalapitan sang Cristiano nga babayi sa Korea ang isa ka estudyante nga nagapamati sing musika sa iya headphone. “May relihion ka bala?” pamangkot niya. “Indi ako interesado sa bisan ano nga relihion,” sabat sang estudyante. Ang utod nga babayi wala maluyahan sing buot. “Sa paglipas sang tion,” padayon niya, “ang isa ka tawo mahimo nga luyag magpili sing isa ka relihion. Apang kon wala sia sing ihibalo tuhoy sa relihion, mahimo nga sayop ang iya pilion.” Nagbag-o ang pangguyahon sang estudyante, kag namati sia nga may interes sa aton utod nga babayi. Gintanyagan niya sia sing libro nga Is There a Creator Who Cares About You? kag nagsiling nga ini nga publikasyon isa ka daku nga bulig kon mag-abot ang tion nga magpili sia sing relihion. Gilayon niya nga ginbaton ang libro. Sang masunod nga semana, nagsugod sia sa pagtuon sa Biblia upod sa mga Saksi ni Jehova, kag nagatambong na sia karon sa tanan nga miting sang kongregasyon.

15. Paano ginasugdan sang isa ka bata nga babayi sa Japan ang mga pagtuon sa Biblia, kag paano ginpadyaan ang iya mga panikasog?

¹⁵ Sa Japan, ginakabig sang 12-anyos nga si Megumi ang iya eskwelahan subong isa ka mabungahon nga latagon para sa pagbantala kag pagtudlo. Nakasugod pa gani sia sing madamong pagtuon sa Biblia. Paano ini ginahimo ni Megumi? Sanglit nagabasa sia sing Biblia ukon nagahanda para sa mga miting sa tigpalanyaga, ang iya mga kabutho masunson nagapamangkot sa iya kon ano ang iya ginahimo. Ang iban nagapamangkot kay Megumi kon ngaa wala sia nagapakigbahin sa pila ka aktibidades sa eskwelahan. Ginasabat ni Megumi ang ila mga pamangkot kag ginasugiran sila nga ang Dios may ngalan. Masunson ini nagapukaw sang interes sang iya mga tagpalamati. Nian ginatanyagan niya sila sing pagtuon sa Biblia. Si Megumi nagadumala karon sing 20 ka pagtuon​—⁠18 sa ila mga kabutho niya.

16. Paano nakasugod sing mga pagtuon sa Biblia ang isa ka utod nga lalaki sa Cameroon sa tunga sang isa ka grupo sang mga manugyaguta?

¹⁶ Sa Cameroon, gintawag sang isa ka grupo sang walo ka lalaki nga nagatrabaho sa job site ang isa ka utod nga lalaki nga nagatanyag sing mga literatura sa Biblia sa nagalabay. Sa luyag nga yagutaon ang utod, ginpamangkot nila sia kon ngaa wala sia nagapati sa Trinidad, kalayuhon nga impierno, ukon sa pagkadi-mamalatyon sang kalag. Nagagamit sang Biblia, ginsabat sang aton utod ang ila mga pamangkot. Subong resulta, tatlo sa mga lalaki ang nagbaton sang pagtuon sa Biblia. Ang isa sa ila, si Daniel, nagsugod sa pagtambong sa mga miting kag nagguba pa gani sang tanan niya nga pagkabutang nga may kaangtanan sa espiritismo. (Bugna 21:8) Sa kubos lamang sa isa ka tuig, ginbawtismuhan sia.

17. Paano gingamit sang pila ka kauturan sa El Salvador ang pagkamapahituon sa pagbantala sa isa ka lalaki nga sang una indi luyag sa pagpamati sing mensahe sang Ginharian?

¹⁷ Sa El Salvador, ginahigot sang isa ka lalaki ang iya mabaris nga ido sa atubangan sang ganhaan kon makakita sia sing mga Saksi ni Jehova sa kaingod. Nagahulat sia tubtob makalabay ang mga Saksi, kag dayon ginabalik niya sa sulod sang balay ang ido. Ang lalaki wala gid masugilanon sang mga utod. Gani isa ka adlaw namat-od sila nga tilawan ang lain nga paagi. Bangod nahibaluan nila nga mabatian sang lalaki ang ila ginahambal, namat-od sila nga magbantala sa ido. Nagduaw sila sa balay, gintamyaw ang ido, kag nagsiling nga nalipay gid sila sa kahigayunan nga masugilanon ini. Naghambal sila tuhoy sa tion nga ang duta mangin isa ka paraiso, kon san-o wala na sing maakig​—⁠huo, kon san-o mangin mahidaiton bisan ang mga sapat. Nian matinahuron sila nga nagpaalam sa ido kag naglakat. Sa ila daku nga kakibot, ang lalaki nagguwa sa iya balay kag nagpangayo sing pasaylo bangod sang indi gid paghatag sing kahigayunan sa mga Saksi nga masugilanon sia. Nagkuha sia sing mga magasin, kag isa ka pagtuon sa Biblia ang nasugdan. Ini nga lalaki isa na karon ka utod naton​—⁠isa sang “kalahamut-an nga mga butang”!

“Dili Kamo Magkahadlok”

18. Anong mga problema ang ginaatubang sang madamong Cristiano, apang paano ginatamod ni Jehova ang iya mga sumilimba?

¹⁸ Nagapakigbahin bala kamo sa importante nga hilikuton sang pagbantala sing Ginharian kag paghimo sing disipulo? Kon amo, daku gid ang inyo pribilehiyo. Sa katunayan, paagi sini nga hilikuton nga ang “kalahamut-an nga mga butang” ginabuyok ni Jehova pasulod sa iya balay. (Juan 6:44) Matuod, ayhan mahimo kamo kon kaisa ginakapoy ukon ginaluyahan sing buot. Kon kaisa, ang pila​—⁠bisan sa tunga sang matutom nga mga alagad ni Jehova​—⁠nagapakigsumpong sang mga balatyagon sang pagkawalay pulos. Apang indi mag-untat! Ginatamod ni Jehova ang kada isa sang iya mga sumilimba subong kalahamut-an, kag interesado gid sia sa inyo kaluwasan.​—⁠2 Pedro 3:⁠9.

19. Anong pagpalig-on ang ginhatag ni Jehova paagi kay Hageo, kag paano ining mga pinamulong isa ka tuburan sang kusog sa aton?

¹⁹ Kon ginaluyahan kita sing buot, ayhan bangod sang pagpamatok ukon sang iban pa di-makalilipay nga mga sirkunstansia, ang mga pinamulong ni Jehova sa nagbalik nga mga Judiyo mahimo nga mangin tuburan sang kusog. Sa Hageo 2:​4-6, aton mabasa: “ ‘Apang karon magpakabakod ka, O Zorobabel,’ siling ni Jehova, ‘kag magpakabakod, O Josue nga anak ni Josadac nga mataas nga saserdote. Kag magpakabakod kamo, kamo tanan nga katawhan sang duta,’ siling ni Jehova, ‘kag magpangabudlay. Kay ako nagaupod sa inyo,’ siling ni Jehova sang mga kasuldadusan. ‘Dumduma ang butang nga ginpakigkatipan ko sa inyo sang pagguwa ninyo sa Egipto, kag sang ang akon espiritu nagapabilin sa tunga ninyo. Dili kamo magkahadlok.’ Kay amo ini ang ginsiling ni Jehova sang mga kasuldadusan, ‘Sa makaisa pa​—⁠diutay nga tion na lamang​—⁠kag uyugon ko ang mga langit kag ang duta kag ang dagat kag ang mamala nga duta.’ ” Talupangda nga si Jehova wala lamang nagalaygay sa aton nga magpakabakod kundi nagahatag man sa aton sing paagi agod makatigayon sing kabakod. Paano? Talupangda ang nagapasalig nga mga pulong: “Ako nagaupod sa inyo.” Makapabakod gid sing pagtuo ang paghibalo nga bisan ano man nga mga sablag ang aton ginaatubang, si Jehova kaupod naton!​—⁠Roma 8:⁠31.

20. Sa anong paagi ang di-matupungan nga himaya karon nagapuno sa balay ni Jehova?

²⁰ Ginpamatud-an gid ni Jehova nga kaupod sia sang iya katawhan. Suno gid ini sa ginsiling niya paagi kay manalagna Hageo: “Mangin daku pa ang himaya sining naulihing balay sangsa nauna . . . Kag sa sining duog magahatag ako sing paghidait.” (Hageo 2:9) Sa pagkamatuod, ang pinakadaku nga himaya karon masapwan sa espirituwal nga templo ni Jehova. Ti, ginatos ka libo ang nagadugok sa matuod nga pagsimba kada tuig. Ginapakaon sila sing maayo sa espirituwal, kag bisan sa sining magamo nga kalibutan, nagaagom sila sing paghidait nga labawan lamang sang maeksperiensiahan sa bag-ong kalibutan sang Dios.​—⁠Isaias 9:​6, 7; Lucas 12:⁠42.

21. Ano dapat ang mangin determinasyon naton?

²¹ Ang pagtay-ug ni Jehova sa mga pungsod sa Armagedon yara lamang sa unahan. (Bugna 16:​14, 16) Busa gamiton naton ang nabilin nga tion agod makabulig sa pagluwas sa dugang pa nga kabuhi. Kabay nga mangin mabakod kita kag may bug-os nga pagsalig kay Jehova. Kabay nga mangin determinasyon naton nga padayon nga magsimba sa iya dakung espirituwal nga templo, nagapuno sini sing madamo pa nga “kalahamut-an nga mga butang” tubtob magasiling si Jehova nga ang aton hilikuton natapos na.

[Mga nota]

Madumduman Mo Bala?

• Ano ang mas hamili kay Jehova sangsa materyal nga mga butang?

• Anong duha ka grupo sang mga tawo ang nakabenepisyo sa ginpatulo nga dugo ni Jesus?

• Sin-o ang “kalahamut-an nga mga butang” nga magapuno sang balay ni Jehova sing himaya?

• Ano ang aton pamatuod nga ang tagna ni Hageo nagakatuman sa karon?

[Diagram sa pahina 16]

(Para sa aktual nga pormat, tan-awa ang publikasyon)

Nahibaluan mo bala ang simbuliko nga kahulugan sang dumaan nga templo ni Jehova?

[Kapsion sa pahina 16]

Kurtina

Balaan

Halaran

Labing Balaan

Balkon

Luwang

[Retrato sa pahina 17]

Ang mataas nga saserdote nagdulot sing baka nga lalaki para sa mga kasal-anan sang mga saserdote kag sing kanding para sa mga kasal-anan sang di-saserdotenhon nga mga tribo sang Israel

[Retrato sa pahina 18]

Ang bug-os kalibutan nga pagbantala sing Ginharian nga hilikuton nagabuyok sa kadam-an pasulod sa balay ni Jehova