Ang Pagsunod sa mga Ginapatuman sang Dios Nagapakadaku kay Jehova
“Pakadakuon ko sia nga may pagpasalamat.”—SALMO 69:30.
1. (a) Ngaa si Jehova takus pakadakuon? (b) Paano naton sia pakadakuon nga may pagpasalamat?
SI Jehova amo ang labing gamhanan nga Dios, ang Soberano sa Bug-os nga Uniberso, ang Manunuga. Bangod sini, ang iya ngalan kag mga katuyuan takus pakadakuon. Ang pagpakadaku kay Jehova nagakahulugan sang pagpakita sing pinakamataas nga pagtahod, pagdayaw kag pagpakataas sa iya paagi sa pulong kag buhat. Agod mahimo ini nga “may pagpasalamat,” dapat kita pirme magpasalamat sa ginahimo niya para sa aton karon kag sa himuon pa niya sa palaabuton. Dapat ang panimuot naton amo ang ginapakita sa Bugna 4:11, diin ang matutom nga espiritu nga mga tinuga sa langit nagapahayag: “Takus ka, Jehova, nga amon Dios, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nangin amo kag gintuga sila.” Paano naton ginapakadaku si Jehova? Paagi sa pagtuon tuhoy sa iya kag nian sa paghimo sang ginapatuman niya sa aton. Ang aton balatyagon dapat nga subong sa salmista sang nagsiling sia: “Tudlui ako sa paghimo sang imo kabubut-on, kay ikaw amo ang akon Dios.”—Salmo 143:10.
2. Paano ginapakig-angutan ni Jehova ang mga nagapakadaku sa iya kag ang mga wala nagapakadaku sa iya?
2 Ginapabaloran gid ni Jehova ang mga nagapakadaku sa iya. Amo kon ngaa sia ang “manugpadya sadtong hanuot nga nagapangita sa iya.” (Hebreo 11:6) Ano ang padya? Si Jesus nangamuyo sa iya langitnon nga Amay: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Huo, ang mga ‘nagapakadaku kay Jehova nga may pagpasalamat’ “magapanag-iya sang duta, kag magapuyo sila sing dayon sa sini.” (Salmo 37:29) Sa pihak nga bahin, “wala sing palaabuton para kay bisan sin-o nga malain.” (Hulubaton 24:20) Kag sa sining katapusan nga mga adlaw, hilingagawon gid nga pakadakuon si Jehova bangod sa dili madugay laglagon niya ang mga malauton kag amligan ang mga matarong. “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”—1 Juan 2:17; Hulubaton 2:21, 22.
3. Ngaa dapat naton talupangdon ang tulun-an ni Malaquias?
3 Ang kabubut-on ni Jehova makita sa Biblia, kay ang “bug-os nga Kasulatan inspirado sang Dios.” (2 Timoteo 3:16) Ining Pulong sang Dios nagaunod sing madamong kasaysayan kon paano ginapakamaayo ni Jehova ang mga nagapakadaku sa iya kag kon ano ang nagakatabo sa mga wala nagapakadaku sa iya. Ang isa sini nga mga kasaysayan natabo sa Israel sang panahon ni manalagna Malaquias. Ginsulat ni Malaquias ang tulun-an nga may ngalan niya sang mga tuig 443 B.C.E., sang si Nehemias gobernador sang Juda. Ining mapuwersa kag makakulunyag nga tulun-an nagaunod sing impormasyon kag mga tagna nga ‘ginsulat subong paandam sa aton nga naabtan sang katapusan sang sistema sang mga butang.’ (1 Corinto 10:11) Ang pagtalupangod sa mga pulong ni Malaquias makabulig sa aton sa paghanda para sa “daku kag makakulugmat nga adlaw ni Jehova,” ang tion nga laglagon Niya ining malauton nga sistema.—Malaquias 4:5.
4. Anong anom ka punto ang ginapatalupangod sa aton sa Malaquias kapitulo 1?
4 Paano kita ginabuligan sa sining ika-21 nga siglo sang tulun-an ni Malaquias, nga ginsulat sang nagligad nga kapin sa 2,400 ka tuig, sa paghanda para sa sining daku kag makakulugmat nga adlaw ni Jehova? Ginapatalupangod sa aton sang nahauna nga kapitulo ang di-magkubos anom ka punto nga importante gid sa pagpakadaku naton kay Jehova nga may pagpasalamat agod matigayon ang iya kahamuot kag ang kabuhi nga walay katapusan: (1) Ginahigugma ni Jehova ang iya katawhan. (2) Dapat naton pabaloran ang sagrado nga mga butang. (3) Ginapaabot ni Jehova nga ihatag naton sa iya ang aton pinakamaayo. (4) Ang matuod nga pagsimba ginapahulag sang di-makagod nga gugma, indi sang kakagod. (5) Ang kalahamut-an nga pag-alagad sa Dios indi isa ka makapabug-at nga pormalidad. (6) Ang tagsa sa aton dapat manabat sa Dios. Gani, nian, sa sining nahauna sa tatlo ka artikulo tuhoy sa tulun-an ni Malaquias, binagbinagon naton ang tagsa sining mga punto samtang ginausisa naton ang Malaquias kapitulo 1.
Ginahigugma ni Jehova ang Iya Katawhan
5, 6. (a) Ngaa ginhigugma ni Jehova si Jacob? (b) Kon ginailog naton ang katutom ni Jacob, ano ang mapaabot naton?
5 Ang gugma ni Jehova maathag nga ginapakita sa unang mga bersikulo sang Malaquias. Ang tulun-an nagabukas paagi sa mga pulong: “Isa ka kapahayagan: Ang pulong ni Jehova tuhoy sa Israel.” Dugang pa, ang Dios nagsiling: “Ginhigugma ko kamo.” Nagahatag sing halimbawa, si Jehova nagsiling sa amo man nga bersikulo: “Ginhigugma ko si Jacob.” Si Jacob isa ka tawo nga nagatuo kay Jehova. Sang ulihi, gin-islan ni Jehova ang ngalan ni Jacob nga Israel, kag nangin katigulangan sia sang pungsod sang Israel. Ginhigugma ni Jehova si Jacob bangod isa sia ka tawo nga may pagtuo. Ang mga Israelinhon nga may subong nga panimuot ni Jacob kay Jehova ginhigugma man Niya.—Malaquias 1:1, 2.
6 Kon ginahigugma naton si Jehova kag mainunungon nga nagapabilin upod sa iya katawhan, malugpayan kita gikan sa pinamulong sa 1 Samuel 12:22: “Indi pagbiyaan ni Jehova ang iya katawhan tungod sa iya daku nga ngalan.” Ginahigugma ni Jehova ang iya katawhan kag ginapadyaan sila, sa ulihi padyaan niya sila sing kabuhi nga walay katapusan. Gani aton mabasa: “Magsalig ka kay Jehova kag maghimo ka sing maayo; magpuyo ka sa duta, kag makig-angot ka nga may katutom. Subong man magkalipay ka sing daku kay Jehova, kag ihatag niya sa imo ang mga ginapangabay sang imo tagipusuon.” (Salmo 37:3, 4) Ang paghigugma naton kay Jehova nagalakip sang ikaduha nga punto nga ginpatalupangod sa aton sa Malaquias kapitulo 1.
Pabalori ang Sagrado nga mga Butang
7. Ngaa gindumtan ni Jehova si Esau?
7 Kon basahon naton ang Malaquias 1:2, 3, pagkatapos nga nagsiling si Jehova, “Ginhigugma ko si Jacob,” sia nagsiling, “Gindumtan ko si Esau.” Ngaa magkatuhay? Ginpakadaku ni Jacob si Jehova, apang wala ginpakadaku sang iya kapid, nga si Esau, si Jehova. Si Esau gintawag man nga Edom. Sa Malaquias 1:4, ang duta sang Edom ginatawag nga teritoryo sang kalautan, kag ang mga pumuluyo sini ginapakamalaut. Ang ngalan nga Edom (nga nagakahulugan “Mapula”) ginhatag kay Esau sa tapos niya ginbaligya kay Jacob ang iya hamili nga kinamatarong sang pagkapanganay kabaylo sang mapula nga linaga. “Gintamay ni Esau ang pagkapanganay,” siling sang Genesis 25:34. Ginlaygayan ni apostol Pablo ang mga masigkatumuluo nga maghalong nga “wala sing makihilawason ukon bisan sin-o nga wala nagaapresyar sa sagrado nga mga butang, kaangay ni Esau, nga sa baylo sang isa ka pagkaon ginhatag niya ang iya mga kinamatarong subong panganay.”—Hebreo 12:14-16.
8. Ngaa ginpaanggid ni Pablo si Esau sa isa ka makihilawason?
8 Ngaa gin-angot ni Pablo sa pagpakighilawas ang mga buhat ni Esau? Bangod kon ang isa ka tawo may panghunahuna ni Esau, mahimo ini magdul-ong sa indi niya pagpabalor sa sagrado nga mga butang. Mahimo man ini magresulta sa mabug-at nga mga sala, subong sang pakighilawas. Gani, ang tagsa sa aton mahimo mamangkot: ‘Nasulay bala ako kon kaisa nga pabayluhan ang akon Cristianong palanublion—kabuhi nga walay katapusan—sing umalagi nga butang subong sang isa ka yahong sang linaga nga lentejas? Ayhan sing wala mamulalungi, ginatamay ko bala ang sagrado nga mga butang?’ Si Esau may matinalak-on nga handum nga paayawan ang pisikal nga luyag. Nagsiling sia kay Jacob: “Dalia, palihug, pakan-a ako sang mapula.” (Genesis 25:30) Makapasubo nga ang iban nga mga alagad sang Dios daw nagsiling man: “Dalia! Ngaa hulaton pa ang dungganon nga pag-asawahay?” Ang kailigbon para sa seksuwal nga kaayawan bisan ano man ang kabayaran daw nangin isa ka yahong sang linaga nga lentejas para sa ila.
9. Paano naton mahuptan ang matinahuron nga kahadlok kay Jehova?
9 Kabay nga indi gid naton pagtamayon ang sagrado nga mga butang paagi sa indi pagtahod sa kaputli, integridad, kag sa aton espirituwal nga palanublion. Sa baylo nga mangin subong ni Esau, mangin subong kita sa matutom nga si Jacob kag huptan ang matinahuron nga kahadlok sa Dios paagi sa pagpabalor sing tudok sa sagrado nga mga butang. Paano naton ini mahimo? Paagi sa pagsunod sing maayo sa mga ginapatuman ni Jehova. Makatarunganon ini nga nagadul-ong sa ikatlo nga punto nga ginpatalupangod sa Malaquias kapitulo 1. Ano ini?
Paghatag kay Jehova sang Aton Pinakamaayo
10. Sa anong paagi gintamay sang mga saserdote ang lamesa ni Jehova?
10 Ang mga saserdote sang Juda nga nagaalagad sa templo sa Jerusalem sang panahon ni Malaquias wala magdulot kay Jehova sing pinakamaayo nga mga halad. Ang Malaquias 1:6-8 nagasiling: “ ‘Ang anak nga lalaki, sa iya nga bahin, nagapadungog sa amay; kag ang alagad, sa iya daku nga agalon. Gani kon ako amay, diin ang pagpadungog sa akon? Kag kon ako daku nga agalon, diin ang kahadlok sa akon?’ amo ang siling ni Jehova sang mga kasuldadusan sa inyo, O mga saserdote nga nagatamay sa akon ngalan.” “Sa anong paagi gintamay namon ang imo ngalan?” pamangkot sang mga saserdote. “Paagi sa paghalad sing mahigko nga tinapay sa akon halaran,” sabat ni Jehova. “Sa anong paagi ginhigkuan namon ikaw?” pamangkot sang mga saserdote. Gani si Jehova nagsiling sa ila: “Paagi sa pagsiling ninyo: ‘Ang lamesa ni Jehova talamayon.’ ” Ginpakita sadtong mga saserdote nga gintamay nila ang lamesa ni Jehova kada magdulot sila sing may depekto nga halad, nga nagasiling: “Indi ini malaut.”
11. (a) Ano ang ginsiling ni Jehova tuhoy sa di-kalahamut-an nga mga halad? (b) Sa anong paagi may sala ang katawhan sa kabilugan?
11 Nian nangatarungan si Jehova bahin sining di-kalahamut-an nga mga halad: “Dalha ninyo ina, palihug, sa inyo gobernador. Mahamuot ayhan sia sa inyo, ukon batunon ayhan niya kamo sing mainayuhon?” Indi, ang ila gobernador indi mahamuot sa sini nga dulot. Pat-od gid nga indi pagbatunon sang Soberano sa Bug-os nga Uniberso ang may depekto nga mga dulot! Kag indi lamang mga saserdote ang may sala. Matuod, ginatamay nila si Jehova bangod sang paghimo sing aktuwal nga mga paghalad. Apang wala bala sing sala ang katawhan sa kabilugan? May sala gid sila! Sila ang nagpili sining bulag, piang, kag masakiton nga mga sapat kag gindala ini sa mga saserdote agod ihalad nila. Daw ano nga pagpakasala!
12. Paano kita ginabuligan nga mahatag kay Jehova ang aton pinakamaayo?
12 Mapakita naton nga ginahigugma gid naton si Jehova paagi sa paghatag sa iya sang pinakamaayo nga masarangan naton. (Mateo 22:37, 38) Indi subong sa balingag nga mga saserdote sang panahon ni Malaquias, ang organisasyon ni Jehova karon nagahatag sing madamong maayo nga instruksion gikan sa Kasulatan nga nagabulig sa aton nga mapakadaku si Jehova nga may pagpasalamat paagi sa pagsunod sa mga ginapatuman sang Dios. May kaangtanan sa sini ang ikap-at nga importante nga punto gikan sa Malaquias kapitulo 1.
Ang Matuod nga Pagsimba Ginapahulag sang Gugma, Indi sang Kakagod
13. Ano ang ginhimo sang mga saserdote nga nagpakita nga makagod sila?
13 Ang mga saserdote sang panahon ni Malaquias makagod, di-mahigugmaon, kag sakon sa kuwarta. Paano naton ini nahibaluan? Ang Malaquias 1:10 nagasiling: “ ‘Sin-o man bala sa inyo ang magtakop sang mga ganhaan? Kag indi ninyo pagdabukan ang akon halaran—kon wala sing balos. Wala ako mahamuot sa inyo,’ siling ni Jehova sang mga kasuldadusan, ‘kag sa dulot nga halad gikan sa inyo kamot wala ako sing kahamuot.’ ” Huo, ginpabayaran sang makagod nga mga saserdote ang pinakasimple nga serbisyo sa templo, bisan ang pagtakop sa mga ganhaan kag pagdabok sa halaran! Indi katingalahan nga wala mahamuot si Jehova sa mga dulot gikan sa ila mga kamot!
14. Ngaa makasiling kita nga ang mga Saksi ni Jehova ginapahulag sang gugma?
14 Ang pagkakagod kag pagkasakon sang makasasala nga mga saserdote sa dumaan nga Israel nagapahanumdom gid sa aton nga, suno sa Pulong sang Dios, ang mga makagod indi makapanubli sang Ginharian sang Dios. (1 Corinto 6:9, 10) Nagahunahuna sang kakagod sining mga saserdote, labi naton maapresyar ang bug-os kalibutan nga pagbantala nga ginahimo sang mga Saksi ni Jehova. Boluntaryo ini; wala gid kita nagapabayad sa bisan ano nga ministeryo naton. “Indi kita mga manuglibod sing pulong sang Dios.” (2 Corinto 2:17) Kaangay ni Pablo, ang tagsa sa aton makasiling sing matinuuron: “Walay bayad nga ginbantala ko sa inyo sing malipayon ang maayong balita sang Dios.” (2 Corinto 11:7) Talupangda nga ‘ginbantala ni Pablo sing malipayon ang maayong balita.’ Ginapatalupangod sini ang ikalima nga punto sa Malaquias kapitulo 1.
Ang Pag-alagad sa Dios Indi Makapabug-at nga Pormalidad
15, 16. (a) Ano ang panimuot sang mga saserdote sa paghalad? (b) Paano nagahalad ang mga Saksi ni Jehova?
15 Gintamod sang walay pagtuo nga mga saserdote sa dumaan nga Jerusalem ang paghalad subong makakalapoy nga pormalidad. Isa ini ka lulan para sa ila. Subong sang ginsiling sa Malaquias 1:13, ang Dios nagsiling sa ila: “Nagsiling kamo, ‘Yari karon! Daw ano ka makatalaka!’ kag ginpusngahan ninyo ini.” Ginpusngahan, ukon gintamay, sining mga saserdote ang sagrado nga mga butang sang Dios. Kabay nga ipangamuyo naton nga indi gid kita mangin subong sa ila. Sa baylo, kabay nga pirme naton ipadayag ang panimuot nga ginasiling sang 1 Juan 5:3: “Amo ini ang kahulugan sang gugma sa Dios, nga sundon naton ang iya mga sugo; apang ang iya mga sugo indi mabug-at.”
16 Magkalipay kita sa pagdulot sing espirituwal nga mga halad sa Dios, nga wala gid ini ginakabig nga isa ka makakalapoy nga lulan. Kabay nga pamatian naton ang matagnaon nga mga pulong: “Isiling ninyo tanan [kay Jehova], ‘Kabay nga pasayluhon mo ang kasaypanan; kag batunon ang maayo, kag ihalad namon subong balos ang mga tinday nga baka nga lalaki sang amon mga bibig.’ ” (Oseas 14:2) Ang ekspresyon nga “tinday nga baka nga lalaki sang amon mga bibig” nagapatuhoy sa espirituwal nga mga halad, sa aton mga pulong bilang pagdayaw kay Jehova kag sa iya mga katuyuan. Ang Hebreo 13:15 nagasiling: “Paagi [kay Jesucristo] maghalad kita pirme sa Dios sing halad sang pagdayaw, nga amo, ang bunga sang mga bibig nga nagapahayag sing dayag sang iya ngalan.” Malipayon gid kita nga ang aton espirituwal nga mga halad, indi mga pormalidad lamang, kundi bug-os tagipusuon nga pagpadayag sang aton gugma para sa Dios! Nagadul-ong ini sa ikan-om nga punto nga matun-an gikan sa Malaquias kapitulo 1.
Ang Tagsa Dapat Manabat
17, 18. (a) Ngaa ginpakamalaut ni Jehova ‘ang isa nga nagapanghikot sing malimbungon’? (b) Ano ang wala ginbinagbinag sang mga nagpanghikot sing malimbungon?
17 Ang mga indibiduwal sang panahon ni Malaquias dapat manabat sa ila mga buhat, kag amo man kita. (Roma 14:12; Galacia 6:5) Sing nagakahisuno, ang Malaquias 1:14 nagasiling: “Pakamalauton ang isa nga nagapanghikot sing malimbungon kon may yara [walay depekto nga] sapat nga lalaki sa iya panong, kag nagapanaad sia kag nagahalad kay Jehova sing isa nga may depekto.” Indi lamang isa ka sapat ang ginapanag-iyahan sang isa ka tawo nga may panong—isiling naton, isa lamang ka karnero—amo nga wala sia sing mapilian. Sa pagpili sa sapat nga ihalad, indi niya dapat pilion ang isa nga bulag, piang, ukon masakiton. Kon pilion niya ining may depekto nga sapat, nagapakita ini nga ginatamay niya ang kahimusan ni Jehova sa halad, kay ang isa ka tawo nga may panong sang mga sapat makakita gid sang isa nga wala sing depekto!
18 Kon amo, nagakaigo gid nga pakamalauton ni Jehova ang isa nga nagapanghikot sing malimbungon, ang isa nga may yara nagakaigo nga sapat nga lalaki apang nagdala—ayhan nagguyod—sang bulag, piang, ukon masakiton nga sapat sa saserdote para ihalad. Apang, wala gid ginapakita nga ginpahanumdom man lang sang bisan sin-o sa mga saserdote ang sugo sang Dios nga ang may depekto nga mga sapat wala ginakahamut-an. (Levitico 22:17-20) Nahibaluan sang makatarunganon nga mga indibiduwal nga mahimo may malain nga matabo sa ila kon limbungan nila ang ila gobernador sa ila ginaregalo sa iya. Apang ang matuod nagapakig-angot sila sa Soberano sa Bug-os nga Uniberso, si Jehova, nga daku pa sangsa kay bisan sin-o nga tawhanon nga gobernador. Ginsiling ini sang Malaquias 1:14 sa sining paagi: “ ‘Ako isa ka daku nga Hari,’ siling ni Jehova sang mga kasuldadusan, ‘kag ang akon ngalan mangin makakulugmat sa tunga sang mga pungsod.’ ”
19. Ano ang ginakalangkagan naton, kag ano dapat ang ginahimo naton?
19 Subong mainunungon nga mga alagad sang Dios, nalangkag kita sa adlaw nga simbahon sang tanan nga katawhan ang Dakung Hari, si Jehova. Sa sina nga tion, “ang duta pat-od gid nga matugob sang ihibalo ni Jehova subong sang tubig nga nagatabon sa dagat.” (Isaias 11:9) Samtang, panikasugan naton nga sundon ang mga ginapatuman ni Jehova paagi sa pag-ilog sa salmista nga nagsiling: “Pakadakuon ko sia nga may pagpasalamat.” (Salmo 69:30) Agod mahimo ini, may dugang nga laygay si Malaquias nga may daku nga benepisyo. Busa, sa masunod nga duha ka artikulo, binagbinagon naton sing maayo ang iban nga mga bahin sang tulun-an ni Malaquias.
Madumduman Mo Bala?
• Ngaa dapat naton pakadakuon si Jehova?
• Ngaa ang mga halad sang mga saserdote sang panahon ni Malaquias di-kalahamut-an kay Jehova?
• Paano kita nagadulot kay Jehova sing halad sang pagdayaw?
• Ano dapat ang nagapahulag sa aton para sa matuod nga pagsimba?
[Retrato sa pahina 9]
Ang tagna ni Malaquias nagatudlo sa aton adlaw
[Retrato sa pahina 10]
Wala ginpabaloran ni Esau ang sagrado nga mga butang
[Retrato sa pahina 11]
Ang mga saserdote kag ang katawhan nagdulot sing di-kalahamut-an nga mga halad
[Retrato sa pahina 12]
Sa bug-os nga kalibutan, ang mga Saksi ni Jehova walay bayad nga nagadulot sing mga halad sang pagdayaw