Ngaa Dapat Mangamuyo sa Ngalan ni Jesus?

MASAMI nga nagatudlo si Jesus tuhoy sa pangamuyo. Ang Judiyo nga mga lider sang relihion sang panahon niya nagapangamuyo “sa mga ginsang-an sang malapad nga mga dalan.” Ngaa? “Agod makita [sila] sang mga tawo.” Luyag nila nga silingon sila nga ka debotado gid sa ila. Madamo ang nagasulitsulit sang malawig nga mga pangamuyo, nga daw subong bala nga kinahanglan ang “madamo nga ginahambal” agod pamatian ang ila pangamuyo. (Mateo 6:5-8) Nagsiling si Jesus nga wala ini sing pulos, sa amo nabuligan niya ang sinsero nga mga tawo nga mahibaluan kon ano ang dapat likawan kon nagapangamuyo. Gintudlo man niya kon ano ang husto nga paagi sa pagpangamuyo.

Gintudluan kita ni Jesus nga kon nagapangamuyo kita, dapat naton pakabalaanon ang ngalan sang Dios, pangabayon nga magkari ang Iya Ginharian, kag matuman ang Iya kabubut-on. Gintudluan man niya kita nga makapangayo kita sang bulig sa Dios tuhoy sa personal nga mga butang. (Mateo 6:9-13; Lucas 11:2-4) Paagi sa mga ilustrasyon ginpakita ni Jesus nga pamatian lamang sang Dios ang aton mga pangamuyo kon magpakita kita sing pagtuo, pagpaubos kag indi kita mag-untat sa pagpangamuyo. (Lucas 11:5-13; 18:1-14) Kag nangin epektibo ang iya ginatudlo bangod makita ini sa iya ginahimo.​—⁠Mateo 14:23; Marcos 1:35.

Pat-od gid nga nakabulig ini nga instruksion agod mapauswag sang mga disipulo ni Jesus ang ila mga pangamuyo. Apang, gintudlo lamang ni Jesus sa iya mga disipulo ang labing importante nga leksion tuhoy sa pangamuyo sang katapusan na niya nga ­gab-i sa duta.

Halos ginhinguyang ni Jesus ang iya katapusan nga gab-i sa pagpalig-on sa iya matutom nga mga apostoles. Nagakaigo gid yadto nga tion agod ipahayag ang isa ka bag-o nga butang. “Ako amo ang dalan kag ang kamatuoran kag ang kabuhi,” siling ni Jesus. “Wala sing makakadto sa Amay kon indi paagi sa akon.” Sang ulihi, ginhatagan niya sila sang makapalig-on nga saad: “Bisan ano ang pangayuon ninyo sa akon ngalan, himuon ko ini, agod ang Amay mahimaya paagi sa Anak. Kon magpangayo kamo sang bisan ano sa akon ngalan, himuon ko ini.” Sang nagahingapos na ang ila paghambalanay, sia nagsiling: “Tubtob karon wala pa kamo makapangayo sang bisan isa ka butang sa akon ngalan. Pangayo kag magabaton kamo, agod ang inyo kalipay mangin bug-os.”​—⁠Juan 14:​6, 13, 14; 16:24.

Importante gid ini nga mga pulong. Ang isa ka reperensia naglaragway sini subong “isa ka ­bag-o nga butang sa maragtas sang pangamuyo.” Indi tuyo ni Jesus nga ipatuhoy sa iya ang pangamuyo kundi sa Dios. Sa baylo, ginpakita niya ang isa ka paagi sa pagpalapit kay Jehova nga Dios.

Matuod nga pirme ginapamatian sang Dios ang mga pangamuyo sang iya matutom nga mga alagad. (1 Samuel 1:9-19; Salmo 65:2) Apang, sang nakigkatipan na ang Dios sa Israel, dapat kilalahon sang mga tawo nga ang Israel amo ang pinili nga pungsod sang Dios kon luyag nila nga pamatian ang ila mga pangamuyo. Kag sang ulihi, sang panahon ni Solomon, dapat nila kilalahon nga ang templo amo ang ginpili sang Dios agod hiwatan sang paghalad. (Deuteronomio 9:29; 2 Cronica 6:​32, 33) Apang, temporaryo lamang ini nga kahimusan sang pagsimba. Subong sang ginsiling ni apostol Pablo, ang Kasuguan nga ginhatag sa Israel kag ang mga halad nga ginhimo sa templo mga “landong sang maayong mga butang nga magaabot, apang indi ang katunayan sang mga butang.” (Hebreo 10:​1, 2) Ang landong dapat buslan sang katunayan. (Colosas 2:17) Sugod sang 33 C.⁠E., ang kaangtanan sang isa ka tawo kay Jehova wala na nagadepende sa iya pagtuman sa Mosaiko nga Kasuguan. Sa baylo, nagadepende ini sa pagtuman kay Cristo Jesus nga amo ang ginapatuhuyan sang Kasuguan.​—⁠Juan 15:14-16; Galacia 3:​24, 25.

Ginpakita ni Jesus ang labing importante nga paagi sa pagpalapit kay Jehova. Ginpakilala niya ang iya kaugalingon subong gamhanan nga abyan nga nagabukas sang dalan agod pamatian kag sabton sang Dios ang aton mga pangamuyo. Ngaa mahimo ini ni Jesus para sa aton?

Bangod tanan kita nakapanubli sang sala, bisan ano man ang aton himuon ukon ihalad indi ini makatinlo sa aton sala ukon makahatag sa aton sing kinamatarong nga matigayon ang kaangtanan sa aton balaan nga Dios, si Jehova. (Roma 3:​20, 24; Hebreo 1:​3, 4) Apang, sang yari si Jesus sa duta ginhalad niya ang iya himpit nga kabuhi kag gingawad ang mga sala sang mga tawo agod mapasag-uli sila sa Dios. (Roma 5:​12, 18, 19) Ang tanan nga luyag matinluan gikan sa ila mga sala may kahigayunan na karon nga mangin matinlo sa atubangan ni Jehova, kag kon magtuo sila sa halad ni Jesus kag mangamuyo paagi sa iya ngalan matigayon nila ang “kahilwayan sa paghambal” sa Dios.​—⁠Efeso 3:​11, 12.

Kon nagapangamuyo kita sa ngalan ni Jesus, nagatuo kita sa indi magkubos tatlo ka bahin sang papel niya agod matuman ang katuyuan sang Dios: (1) Sia ang “Kordero sang Dios,” nga paagi sa iya halad mapatawad ang aton mga sala. (2) Ginbanhaw sia ni Jehova kag karon nagapanghikot subong “mataas nga saserdote” sa pagpadapat sang mga benepisyo sang gawad. (3) Sia lamang “ang dalan” agod makapalapit kita kay Jehova sa pangamuyo.​—⁠Juan 1:29; 14:⁠6; Hebreo 4:​14, 15.

Ang pagpangamuyo paagi sa ngalan ni Jesus nagapadungog kay Jesus. Nagakaigo nga padunggan sia, kay katuyuan ni Jehova nga paagi “sa ngalan ni Jesus magluhod ang tagsa ka tuhod . . . , kag ang tagsa ka dila dayag nga magkilala nga si Jesucristo Ginuo sa himaya sang Dios nga Amay.” (Filipos 2:​10, 11) Apang, labaw sa tanan ang pagpangamuyo paagi sa ngalan ni Jesus nagahimaya kay Jehova, ang naghatag sang iya Anak para sa aton kaayuhan.​—⁠Juan 3:16.

Agod mahangpan naton ang importansia sang palangakuan ni Jesus, naggamit ang Biblia sing nanuhaytuhay nga mga titulo kag mga ngalan agod ilaragway sia. Magabulig ini sa aton nga mahangpan ang madamo nga kaayuhan nga magaabot sa aton pasad sa ginhimo, ginahimo, kag sa himuon pa ni Jesus para sa aton. (Tan-awa ang kahon nga “Ang Importante nga Papel ni Jesus”.) Matuod gid nga ginhatagan si Jesus sing “ngalan nga labaw sa tanan iban pa nga ngalan.”a Ginhatag sa iya ang bug-os nga awtoridad sa langit kag sa duta.​—⁠Filipos 2:⁠9; Mateo 28:18.

Huo, dapat kita magpangamuyo sa ngalan ni Jesus kon luyag naton nga pamatian ini ni Jehova. (Juan 14:​13, 14) Apang indi gid naton luyag suliton ang mga tinaga nga “sa ngalan ni Jesus” bangod lang kay naandan naton ini. Ngaa?

Binagbinaga ang isa ka ilustrasyon. Kon makabaton ka sing sulat gikan sa isa ka negosyante, mahimo ini maghinakop sa naandan na nga “ang matinahuron.” Hangpon mo bala nga amo ini ang matuod nga balatyagon sang negosyante, ukon ginagamit lamang niya ang kinaandan nga paghinakop sa sulat nga pangnegosyo? Sa pagkamatuod, ang paggamit naton sang ngalan ni Jesus sa aton pangamuyo dapat nga may kapin nga kahulugan sangsa pormal nga paghinakop sa isa ka sulat. Bisan pa nga ‘indi kita mag-untat sa pagpangamuyo,’ himuon naton ini sing ‘bug-os tagipusuon,’ kag indi sing pakulahaw lamang.​—⁠1 Tesalonica 5:17; Salmo 119:145.

Paano mo malikawan ang pakulahaw nga paggamit sing mga tinaga nga “sa ngalan ni Jesus”? Ngaa indi mo pagpamalandungan ang maayo nga mga kinaiya ni Jesus? Hunahunaa kon ano na ang iya nahimo kag ang luyag pa niya himuon para sa imo. Paagi sa pangamuyo, pasalamati kag dayawa si Jehova kay ginhatag niya ang iya Anak para sa aton. Nian, makasalig ka sa saad ni Jesus: “Kon magpangayo kamo sa Amay sang bisan ano nga butang sa akon ngalan ihatag niya ini sa inyo.”​—⁠Juan 16:23.