Ang “Eureka Drama” Nakabulig sa Madamo nga Masapwan ang Kamatuoran

“EUREKA!” Ini nga tinaga nagakahulugan sing “Nakita ko na!” Sang nagdinaguso ang mga tawo sa pagpangita sing bulawan sang ika-19 nga siglo sa California, U.S.A., amo ini ang ginasinggit sang mga minero kon makakita sila sang bulawan. Pero sanday Charles Taze Russell kag ang pareho niya nga mga Estudyante sang Biblia labaw pa sa sini ang nasapwan—ang kamatuoran sa Biblia. Kag gusto gid nila ini ipaambit sa iban.

Sang tig-ilinit sang 1914, minilyon sa dalagku nga mga siudad ang nagdugok agod magtan-aw sang walo ka oras nga “Photo-Drama of Creation,” nga ginhimo sang International Bible Students Association (I.B.S.A.). Matahom ang mga pelikula sini, masili ang kolor sang mga slide, manami ang pagsaysay, kag matahom ang klasikal nga musika, amo nga ining nabase sa Biblia nga presentasyon nagpakita sa mga tumalan-aw sang eksena halin sa pagpanuga, pakadto sa kasaysayan sang tawo, tubtob sa katapusan sang Isa ka Libo ka Tuig nga Paggahom ni Jesucristo.—Bug. 20:4.a

Pero paano na ang mga nagaistar sa magagmay nga banwa kag sa mga uma? Agod nga mapakaon ang tanan nga ginagutom sa kamatuoran, ginpagua sang I.B.S.A. sang Agosto 1914 ang “Eureka Drama”—ang madaladala nga bersion sang “Photo-Drama” nga wala ang mga bahin nga may pelikula. May tatlo ka pililian, nga ang kada isa matigayon sa lainlain nga lenguahe: Ang “Eureka X” may kompleto nga narekord nga pagsaysay kag musika. Ang “Eureka Y” nagaunod sang tanan nga rekording kag matahom nga mga slide. Ang “Eureka Family Drama,” nga ginhimo para sa mga puluy-an, may pinili nga mga pagsaysay kag musika. Mahimo man matigayon ang indi mahal nga mga ponograpo kag projector.

Bangod indi na kinahanglan ang film projector kag dalagku nga iskren, madala na sang mga Estudyante sang Biblia ining libre nga palaguaon sa mga uma, kag mapalab-ot ang mensahe sang Ginharian sa bag-o nga mga teritoryo. Ang audio lamang nga “Eureka X” puede mapatokar sa aga ukon sa gab-i. Ang “Eureka Y” nga slide projector puede mapasalida bisan wala kuryente, nga nagagamit sing isa ka sahi sang lampara. “Puede namon ini mapagua bisan diin,” siling sang report sang Watch Tower sa Finland. Matuod gid ini!

Imbes nga mag-arkila sang dalagku nga mga sinehan, masami nga makakita ang mga Estudyante sang Biblia sing libre nga mga pasilidad, pareho sang mga kuarto sa eskwelahan, opisina sang gobierno, estasyunan sang tren, ukon salas sang dalagku nga mga balay. Madamo ang ginpasalida sa mga wayang, nga ang ginahimo nga “iskren” amo ang puti kag masangkad nga mga tela nga ginasab-it sa kilid sang kamalig. Si Anthony Hambuch nagsulat: “Nagahimo ang mga mangunguma sing gamay nga istadyum sa ila ugsaran, nga nagagamit sing madamo nga troso para pungkuan samtang nagatan-aw sang programa.” Ang grupo nga nagadala sang “Eureka” nagagamit sang karo nga ginaguyod sang kabayo para kargahan sang mga kagamitan, bagahe, kag mga gamit sa pagkamping kag pagluto.

Kon kaisa gamay lang ang tumalambong sang “Eureka,” pero kon kaisa ginatos man. Sa Estados Unidos, 400 ang nagtan-aw sang pasalida sa eskwelahan sa banwa nga may 150 ka pumuluyo. Sa iban nga lugar, ang pila naglakat sing walo ka kilometro agod magtan-aw sang “Eureka Drama.” Sa Sweden, ang mga kaingod ni Charlotte Ahlberg nga nagtipon sa iya gamay nga balay “natandog gid” sang nabatian nila ang mga rekording. Mga 1,500 man ang nagkadto sa malayo nga siudad sa Australia nga may minahan para magtan-aw. Ang Watch Tower nagreport nga sa mga eskwelahan sang hayskul kag kolehiyo, “nanamian gid ang mga propesor kag mga estudyante sa mga piktyur kag sa aton matahom nga mga rekording sa ponograpo.” Nangin bantog ang “Eureka Drama” bisan sa mga lugar nga may mga sinehan.

Nangin mapuslanon gid ang “Eureka Drama” sa “Class Extension Work,” diin ang mga klase sang Estudyante sang Biblia nagapadala sing mga humalambal para magsugod sing bag-o nga mga klase. Mabudlay mahibaluan kon pila ang nakatan-aw sang “Eureka Drama.” Madamo nga set sang “Drama” ang padayon nga gingamit. Pero sang 1915, sa 86 ka grupo 14 lang sa mga nagadala sang “Drama” ang regular nga nagareport. Bisan pa indi kompleto, ang report sa katapusan sang tuig nagapakita nga sobra sa isa ka milyon ang nakatan-aw sang “Drama.” Mga 30,000 ang nangabay sing mga literatura sa Biblia.

Mahimo nga ang “Eureka Drama” wala magbantog sa kasaysayan, pero halin sa Australia asta sa Argentina, halin sa Bagatnan nga Aprika pakadto sa British Isles, India, kag Caribbean, minilyon ang mahimo nga nakatan-aw sining pinasahi nga presentasyon. Madamo sa ila ang nakasapo sang kamatuoran sa Biblia nga mas malahalon pa sangsa bulawan, kag makasinggit sing “Eureka!”