Mga Reperensia Para sa Pagkabuhi kag Pagministeryo nga Workbook Para sa Miting
ENERO 3-9
MGA BAHANDI SA PULONG SANG DIOS | HUKOM 15-16
“Malain Gid ang Pagluib!”
Pagluib—Talalupangdon nga Tanda sang mga Tion!
4 Una, binagbinaga ang malimbungon nga si Delila nga ginhigugma ni Hukom Samson. Luyag ni Samson nga manguna sa pagpakig-away batok sa mga Filistinhon para sa katawhan sang Dios. Kag mahimo nahibaluan sang lima ka pangulo sang mga Filistinhon nga pakunokuno lang ang gugma ni Delila kay Samson, amo nga gintanyagan sia sang daku nga kuarta agod hibaluon kon diin naghalin ang pinasahi nga kusog ni Samson agod mapatay nila sia. Ginbaton sang makagod nga si Delila ang ila tanyag, kag nagtinguha sia nga hibaluon ang sekreto ni Samson, pero tatlo ka beses sia nga napaslawan. Padayon nga “ginpuga sia niya adlaw-adlaw sa iya mga polong, kag ginpilit sia.” Sang ulihi, “ang iya kalag gingamohan sa ikamatay.” Gani ginsugiran niya sia nga wala pa gid mautdan ang iya buhok kag kon utdon ini, madula ang iya kusog. Pagkahibalo ni Delila, ginpautdan niya ang buhok ni Samson samtang nagakatulog ini sa iya sabak. Dayon gintugyan niya sia sa mga kaaway agod mahimo nila kon ano ang ila gusto nga himuon sa iya. (Huk. 16:4, 5, 15-21) Tuman gid kalain sang iya ginhimo! Bangod sang iya kakagod, ginluiban ni Delila ang tawo nga naghigugma sa iya.
Talalupangdon nga mga Punto sa Tulun-an nga Hukom
14:16, 17; 16:16. Ang pag-ipit sa iban paagi sa paghibi kag dalayon nga pagreklamo nagaguba sang kaangtanan.—Hulubaton 19:13; 21:19.
Pagluib—Talalupangdon nga Tanda sang mga Tion!
15 Paano makapabilin nga mainunungon sa isa kag isa ang mag-asawa? Ang Pulong sang Dios nagasiling:“Magkalipay sa asawa [ukon bana] sang imo pagkamapamatan-on” kag, “Magkabuhi sing malipayon upod sa asawa [ukon bana] nga imo ginahigugma.” (Hulu. 5:18; Man. 9:9) Samtang nagatigulang ang mag-asawa, dapat tinguhaan nila nga pabakuron ang ila kaangtanan sa pisikal kag emosyonal. Buot silingon, dapat mangin mapatugsilingon sila sa isa kag isa, nagahatag sing tion sa isa kag isa, kag suod sa isa kag isa. Dapat magpokus sila sa pag-amlig sang ila pag-asawahay kag sang ila kaangtanan kay Jehova. Agod mahimo nila ini, dapat updanay sila nga nagatuon sang Biblia, updanay nga nagabantala sing regular, kag updanay nga nagapangamuyo sang pagpakamaayo ni Jehova.
MAGPABILIN NGA MAINUNUNGON KAY JEHOVA
16 May mga miembro sang kongregasyon nga nakahimo sang serioso nga sala kag nadisiplina “sing matigdas, agod mangin mapagros sila sa pagtuo.” (Tito 1:13) May mga tion nga dapat sila i-disfellowship bangod sang ila ginhimo. Para “sa mga nahanas sini,” ang disiplina nakabulig nga mapasag-uli ang ila kaangtanan sa Dios. (Heb. 12:11) Apang ano abi kon may paryente kita ukon suod nga abyan nga na-disfellowship? Matilawan sini ang aton pagkamainunungon, indi sa sina nga tawo, kundi sa Dios. Ginatan-aw ni Jehova kon bala matuman kita sa iya sugo nga indi makig-angot sa kay bisan sin- o nga na-disfellowship.—Basaha ang 1 Corinto 5:11-13.
Espirituwal nga mga Hiyas
Nagmadinalag-on si Samson Paagi sa Kusog ni Jehova!
Determinado si Samson nga padayunon ang iya tulumuron nga makig-away batok sa mga Filistinhon. Ang iya katuyuan sa pagdayon sa balay sang isa ka pampam sa Gaza amo ang pagpadayon sa pagpakig-away batok sa mga kaaway sang Dios. Nagakinahanglan si Samson sang dalayunan para sa gab- i sa siudad sang kaaway, kag ini masapwan sa balay sang isa ka pampam. Wala sang imoral nga tinutuyo si Samson. Nagbiya sia sa balay sang babayi sa tungang gab- i, kag gingabot niya ang mga gawang sang siudad kag ang duha ka haligi sini, kag gindala sa ibabaw sang bukid malapit sa Hebron, mga 60 kilometros ang kalayuon. Ginhimo ini nga may pahanugot sang Dios kag hatag Dios nga kusog.—Hukom 16:1-3.
ENERO 10-16
MGA BAHANDI SA PULONG SANG DIOS | HUKOM 17-19
“Ang Indi Pagtuman sa Kasuguan sang Dios Nagaresulta sa mga Problema”
it-2-E 390-391
Miqueas
1. Isa ka lalaki nga taga-Efraim. Nalapas ni Miqueas ang ikawalo sa Napulo ka Sugo (Ex 20:15), kay ginkawat niya ang 1,100 ka bilog nga pilak sang iya iloy. Sang gin-aku niya nga sia ang nagkuha kag ginbalik ini, ang iya iloy nagsiling:“Pakabalaanon ko ang pilak kay Jehova para sa akon anak, agod makapahimo ako sing tinigib nga imahen kag metal nga estatwa. Pagkatapos ibalik ko ini sa imo.” Dayon nagkuha ang iya iloy sing 200 ka bilog nga pilak kag ginhatag ini sa platero, kag naghimo ini “sing tinigib nga imahen kag metal nga estatwa” kag sang ulihi ginbutang ini sa balay ni Miqueas. Si Miqueas, nga “may isa ka balay sang mga dios,” naghimo sing efod kag terapim kag gin-ordenahan ang isa sa iya mga anak para mag-alagad bilang saserdote niya. Bisan pa ginhimo ini nga kahimusan para padunggan si Jehova, indi gid ini insakto, kay nagalapas ini sa sugo nga indi magsimba sa mga diosdios (Ex 20:4-6) kag sa kahimusan ni Jehova parte sa tabernakulo kag pagkasaserdote. (Huk 17:1-6; Deu 12:1-14) Sang ulihi gindala ni Miqueas si Jonatan, nga kaliwat sang bata ni Moises nga si Gersom, sa iya balay kag ginsuhulan niya ining pamatan-on nga Levinhon para mag-alagad sa iya bilang saserdote. (Huk 18:4, 30) Abi ni Miqueas insakto ang iya ginhimo, gani nagsiling sia:“Karon nahibaluan ko nga pakamaayuhon ako ni Jehova.” (Huk 17:7-13) Pero si Jonatan indi kaliwat ni Aaron, amo nga indi sia kalipikado nga mag-alagad bilang saserdote, gani nagdugang pa gid ang sala ni Miqueas.—Nu 3:10.
it-2-E 391 ¶2
Miqueas
Wala madugay pagkatapos sini, ginlagas ni Miqueas kag sang isa ka grupo sang mga lalaki ang mga Danhanon. Sang naabtan nila sila, ginpamangkot sila sang mga Danhanon kon ano ang natabo, gani si Miqueas nagsiling:“Ginkuha ninyo ang ginhimo ko nga mga dios, kag gin-upod pa ninyo ang saserdote. Ano na lang ang nabilin sa akon?” Bangod sini, ginpaandaman sang mga Danhanon si Miqueas nga kon indi sia mag-untat sa pagsunod kag pagsinggit sa ila basi may masalakay sa iya nga kaupod nila. Sang nakita ni Miqueas nga mas makusog ang mga Danhanon sangsa iya, nagpauli na lang sia. (Huk 18:22-26) Dayon, ginpamatay sang mga Danhanon ang mga taga-Lais kag ginsunog ang siudad, kag gintukod sa sini ang siudad nga gintawag nga Dan. Si Jonatan kag ang iya mga anak ang nangin mga saserdote sang mga Danhanon, kag “ginbutang nila didto ang tinigib nga imahen nga ginhimo ni Miqueas kag nagpabilin ini didto tubtob nga ang balay sang matuod nga Dios [ang tabernakulo] yara sa Shilo.”—Huk 18:27-31.
Espirituwal nga mga Hiyas
Isa ka Buhi nga Badbad sang Pulong sang Dios
6 Ang ebidensia sa paggamit sang ngalan sang Dios sa Biblia wala nabuhinan kundi nagdamo pa. Makita sa 2013 nga rebisyon sang New World Translation ang ngalan sing 7,216 ka beses, nga sobra sing 6 sangsa 1984 nga edisyon. Ang lima sa gindugang makita sa 1 Samuel 2:25; 6:3; 10:26; 23:14, 16. Ginbalik ini bangod makita ang ngalan sa sini nga mga bersikulo sa Dead Sea Scrolls, nga mas nauna sa Hebreo nga sinulatan sang mga Masorete sing masobra 1,000 ka tuig. Subong man, ginbalik man ini sa Hukom 19:18 bangod sang dugang nga pagtuon sa dumaan nga mga manuskrito.
ENERO 17-23
MGA BAHANDI SA PULONG SANG DIOS | HUKOM 20-21
“Padayon nga Magpamangkot kay Jehova”
Mailog Mo Bala si Finehas Kon Nagaatubang Ka sing mga Kabudlayan?
Pagkatapos sang masubo nga trahedya nga paglugos kag pagpatay sa babayi sang isa ka Levinhon sang mga taga-Gabaa nga gikan sa tribo ni Benjamin, naghanda sa pagpakig-away sa ila ang iban nga tribo. (Huk. 20:1-11) Antes makig-away, nangamuyo sila kay Jehova, apang duha ka beses nga nalutos sila kag madamo ang napatay. (Huk. 20:14-25) Makasiling bala sila nga wala sing pulos ang ila pagpangamuyo? Nagaugyon bala si Jehova sa ila himuon batok sa malaut nga buhat?
Mailog Mo Bala si Finehas Kon Nagaatubang Ka sing mga Kabudlayan?
Ano ang matun-an naton sa sini? May pila ka problema sa kongregasyon nga indi dayon masolbar bisan ginapanikasugan ini sang mga gulang kag ginapangamuyo ang bulig sang Dios. Kon matabo ini, maayo nga dumdumon sang mga gulang ang ginsiling ni Jesus:“Padayon sa pagpangayo [ukon pangamuyo], kag hatagan kamo; padayon sa pagpangita, kag inyo makita; padayon sa pagpanuktok, kag pagabuksan kamo.” (Luc. 11:9) Bisan daw indi insigida ang sabat sa pangamuyo, makasalig ang mga manugtatap nga si Jehova magasabat suno sa Iya tion.
Espirituwal nga mga Hiyas
Nahibaluan Mo Bala?
Paano ginagamit ang labyog sa pagpakig-away sang una?
Ang labyog amo ang gingamit ni David para patyon ang higante nga si Goliat. Mahimo nga nangin hanas si David sa paggamit sini sang batan-on pa sia bilang manugbantay sang karnero.—1 Samuel 17:40-50.
Makita ang labyog sa mga art sa Egipto kag Asiria sa tion sang Biblia. Ini nga hinganiban may bulutangan sang bato nga panit ukon tela nga naangot sa duha ka higot. Mahimo ibutang sang nagagamit sang labyog ang tipulon nga bato nga mga 5 tubtob 7.5 sentimetros ang kadakuon nga nagabug-at sing mga 250 ka gramo. Palibuton dayon niya ang labyog sa ibabaw sang iya ulo kag buy-an ang isa ka higot, amo nga magalupad ang bato nga tuman kabaskog kag maigo ang iya iliguon.
May nakutkutan nga madamo nga bato nga ginagamit sa labyog sa Middle East nga halin pa sa mga inaway sang una. Ang hanas nga hangaway mahimo maglabyog nga may kabaskugon nga 160 tubtob 240 kilometros kada oras. Wala nagaugyon ang mga iskolar nga pareho katayog ang labyog sa pana, pero pareho lang ini nga duha nga makamamatay.—Hukom 20:16.
ENERO 24-30
MGA BAHANDI SA PULONG SANG DIOS | RUT 1-2
“Tinguhai ang Mainunungon nga Gugma”
Iluga ang Suod nga mga Abyan ni Jehova
5 Puede tani irason ni Rut, nga isa ka lamharon nga balo, nga mabalik na lang sia sa Moab kay didto ang iya iloy kag mga paryente nga makaatipan sa iya. Ang Moab amo ang iya duta nga natawhan. Amo ini ang iya kultura, lenguahe, kag katawhan. Indi mapasalig ni Noemi nga mangin amo man sini ang iya kahimtangan sa Betlehem. Ginlaygayan pa gani niya si Rut nga magpabilin na lang sa Moab. Nabalaka si Noemi nga basi indi makapamana ang iya mga umagad kag wala sila sing maistaran sa Betlehem. Ano ang himuon ni Rut? Si Orpa ‘nagbalik sa iya katawhan kag sa iya mga dios.’ (Rut 1:9-15) Mabalik man bala si Rut sa butig nga mga dios sang iya katawhan? Indi.
Iluga ang Suod nga mga Abyan ni Jehova
6 Mahimo gid nga nakilala ni Rut si Jehova nga Dios paagi sa iya bana ukon paagi kay Noemi. Si Jehova indi pareho sa mga dios sang Moab. Natun-an ni Rut nga si Jehova takus higugmaon kag simbahon. Pero indi bastante nga kilala lang niya si Jehova. Kinahanglan ni Rut maghimo sang desisyon. Si Jehova bala ang pilion niya nga Dios? Maayo nga desisyon ang ginhimo ni Rut. “Ang imo katawhan mangin akon katawhan,” siling niya kay Noemi, “kag ang imo Dios mangin akon Dios.” (Rut 1:16) Dalayawon ang gugma ni Rut kay Noemi, pero mas dalayawon ang gugma niya kay Jehova. Sang ulihi, gindayaw si Rut sang tag-iya sang uma nga si Boaz bangod nagdangop sia sa idalom sang mga pakpak ni Jehova. (Basaha ang Rut 2:12.) Ginapahanumdom sini sa aton ang isa ka boto sang pispis nga nagapanago sa idalom sang mga pakpak sang inang para maamligan ini. (Sal. 36:7; 91:1-4) Amo man sini ang pag-amlig ni Jehova kay Rut. Ginpadyaan niya ang iya pagtuo, kag wala gid naghinulsol si Rut sa iya desisyon.
Espirituwal nga mga Hiyas
Talalupangdon nga mga Punto Gikan sa Tulun-an nga Rut
1:13, 21—Si Jehova bala ang nagpalisod sang kabuhi ni Noemi kag nagpasakit sa iya? Indi, kag wala ginbasol ni Noemi ang Dios sa bisan ano nga sala. Apang, bangod sang tanan nga natabo sa iya, abi niya batok si Jehova sa iya. Nagbatyag sia sing kalisod kag kapaslawan. Isa pa, ginakabig sadto nga isa ka pagpakamaayo sang Dios ang pagpanganak kag isa ka pagpakamalaut ang pagkabaog. Bangod wala sia sing mga apo kag napatay ang iya duha ka anak, mahimo nga ginbatyag ni Noemi nga gintamay sia ni Jehova.
ENERO 31–PEBRERO 6
MGA BAHANDI SA PULONG SANG DIOS | RUT 3-4
“Hupti ang Maayo nga Reputasyon”
“Babayi nga Takus”
Naghambal si Boaz, kag sigurado gid nga naumpawan si Rut sa iya malulo kag matawhay nga tingog. Nagsiling sia:“Pakamaayohon ka sang GINOO, anak ko; nakapakita ka sing labi pa nga kalolo sa katapusan sang sa kamunoan, sanglit nga wala ka magsonod sa mga pamatan-on nga lalaki, bisan imol ukon manggaranon.” (Rut 3:10) Ang “kamunoan” nagapatuhoy sa mainunungon nga gugma ni Rut kay gin-updan niya si Noemi sa Israel kag gin-atipan sia. Ang “katapusan” amo ang ginhimo niya sina nga tion. Ginsambit ni Boaz nga ang lamharon pareho kay Rut, mahimo mangita sang lamharon nga palamanhon, manggaranon man ukon imol. Sa baylo, luyag niya nga maghimo sing maayo indi lamang kay Noemi kundi sa napatay man nga bana sini, para magpadayon ang ngalan niya sa iya lugar. Indi mabudlay hunahunaon kon ngaa nagdayaw gid si Boaz sa indi pagkamaiyaiyahon ni Rut.
“Babayi nga Takus”
Mahimo nga nalipay gid si Rut sa pagpamensar sang ginsiling ni Boaz—nga kilala sia nga “babayi nga takus”! Pat-od nga resulta ini sang iya handum nga kilalahon kag alagdon si Jehova. Nagpakita man sia sing tuman nga kaayo kag kaluoy kay Noemi kag sa iya katawhan, nga handa sia magpahisuno sa mga dalanon kag kustombre nga bag- o gid sa iya. Kon ilugon naton ang pagtuo ni Rut, tinguhaan naton nga tahuron gid ang iban pati na ang ila mga dalanon kag kustombre. Kon himuon naton ini, mangin maayo man ang aton reputasyon.
“Babayi nga Takus”
Ginpangasawa ni Boaz si Rut. Kag mabasa naton:“Ginpapanamkon sia sang GINOO, kag nag-anak sia sing lalaki.” Ang mga babayi sang Betlehem nagpakamaayo kay Noemi kag nagdayaw kay Rut bangod mas maayo pa sia sangsa pito ka anak nga lalaki para kay Noemi. Sang ulihi, natun-an naton nga ang anak ni Rut nangin katigulangan sang bantog nga si Hari David. (Rut 4:11-22) Si David naman nangin katigulangan ni Jesucristo.—Mateo 1:1.
Espirituwal nga mga Hiyas
Talalupangdon nga mga Punto Gikan sa Tulun-an nga Rut
4:6—Paano “masamad” sang isa ka manuggawad ang iya palanublion kon himuon niya ang paggawad? Una, kon ginbaligya sang isa nga nag-imol ang iya ginpanubli nga duta, dapat baklon sang manuggawad ang duta sa kantidad suno sa kon pila ka tuig pa ang nabilin antes sang masunod nga Jubileo. (Levitico 25:25-27) Magabuhin ini sang balor sang iya propiedad. Isa pa, kon magbata si Rut sang isa ka lalaki, ini nga bata, sa baylo sang iban nga malapit nga mga paryente sang manuggawad, ang makapanubli sang gingawad nga uma.
PEBRERO 7-13
MGA BAHANDI SA PULONG SANG DIOS | 1 SAMUEL 1-2
“Isugid kay Jehova ang Imo Ginabatyag Paagi sa Pangamuyo”
Ginpautwas Niya sa Dios ang Iya Ginabatyag
12 Isa gid ka maayo nga halimbawa para sa tanan nga alagad sang Dios ang pagpangamuyo ni Ana. Ginaagda kita ni Jehova nga magpalapit sa iya kag ipabutyag ang tanan naton nga ginabatyag pareho sa isa ka bata nga nagasalig sa iya mapinalanggaon nga ginikanan. (Basaha ang Salmo 62:8; 1 Tesalonica 5:17.) Si apostol Pedro gin-inspirar sa pagsulat sining makapaumpaw nga mga pulong parte sa pagpangamuyo kay Jehova:‘Itugyan ninyo sa iya ang tanan ninyo nga kabalaka, bangod nagaulikid sia sa inyo.’—1 Ped. 5:7.
Kon Paano si Ana Nakasapo sing Kalinungan
Ano ang matun-an naton sa sini? Kon magpangamuyo kita kay Jehova tuhoy sa aton mga kabalaka, mapabutyag naton sa iya ang aton balatyagon kag makapangabay kita sing tinagipusuon. Kon wala na kita sing mahimo agod malubad ang problema, dapat naton ini itugyan sa iya. Amo ini ang pinakamaayo nga himuon.—Hulubaton 3:5, 6.
Espirituwal nga mga Hiyas
Talalupangdon nga mga Punto Gikan sa Tulun-an nga Nahaunang Samuel
2:10—Ngaa nangamuyo si Ana nga ‘hatagan (ni Jehova) sing kusog ang iya hari’ samtang wala pa sing tawhanon nga hari sa Israel? Gintagna na nga daan sa Mosaikong Kasuguan nga makatigayon sing tawhanon nga hari ang mga Israelinhon. (Deuteronomio 17:14-18) Sang malapit na mapatay si Jacob, sia nagtagna:“Ang setro [isa ka simbulo sang harianon nga awtoridad] indi mahamulag kay Juda.” (Genesis 49:10) Dugang pa, tuhoy kay Sara nga katigulangan sang mga Israelinhon—si Jehova nagsiling:“Magagikan sa iya ang mga hari sang mga katawhan.” (Genesis 17:16) Kon amo, nangamuyo si Ana para sa palaabuton nga hari.
PEBRERO 14-20
MGA BAHANDI SA PULONG SANG DIOS | 1 SAMUEL 3-5
“Si Jehova Nagapakita sing Konsiderasyon”
Labing Gamhanan Pero May Konsiderasyon
3 Bata pa si Samuel sang nagsugod sia sa ‘pag-alagad kay Jehova’ sa tabernakulo. (1 Sam. 3:1) Isa ka gab- i samtang nagakatulog si Samuel, may indi kinaandan nga natabo. (Basaha ang 1 Samuel 3:2-10.) Nabatian niya nga may nagatawag sa iya. Abi niya ang Mataas nga Saserdote nga si Eli yadto, amo nga nagdalagan sia kay Eli kag nagsiling:“Ngaa gintawag mo ako ginuo ko?” Pero nagsiling si Eli nga wala niya sia gintawag. Sang natabo ini liwat sing duha pa ka beses, nahangpan ni Eli nga ang Dios ang nagatawag kay Samuel. Gani ginhambalan niya ang bata kon ano ang isabat, kag nagtuman si Samuel. Pero ngaa wala ginsugid ni Jehova, paagi sa iya anghel, nga sia ang nagatawag kay Samuel sa umpisa pa lang? Wala ginasugid sang Biblia ang rason, pero posible nga ginhimo ini ni Jehova bangod sang iya konsiderasyon sa bata nga si Samuel. Ngaa masiling naton ini?
Labing Gamhanan Pero May Konsiderasyon
4 Basaha ang 1 Samuel 3:11-18. Ang Kasuguan ni Jehova nagasugo sa mga kabataan nga tahuron nila ang mga tigulang, ilabi na ang mga pangulo. (Ex. 22:28; Lev. 19:32) Gani daw indi naton maimadyin si Samuel nga makadto kay Eli pagkaaga kag isugid sa iya ang matigdas nga paghukom sang Dios. Ang rekord nagasiling nga “nahadlok si Samuel nga isugid kay Eli ang tuhoy sa palanan-awon.” Pero, gin-athag sang Dios kay Eli nga Sia ang nagatawag kay Samuel. Gani, ginsugo ni Eli si Samuel nga isugid sa iya ang ginsiling sang Dios. Nagsiling si Eli:“[Indi pag-ilikom] sa akon ang bisan isa lang ka tinaga sa tanan nga ginsiling niya sa imo.” Nagtuman si Samuel kag “ginsugiran [niya si Eli] sang tanan nga ginsiling sa iya.”
Espirituwal nga mga Hiyas
Talalupangdon nga mga Punto Gikan sa Tulun-an nga Nahaunang Samuel
3:3—Nagtulog gid bala si Samuel sa duog nga Labing Balaan? Wala. Si Samuel isa ka Levinhon sang indi saserdotenhon nga pamilya sang mga Kohatnon. (1 Cronica 6:33-38) Gani, wala sia gintugutan nga “magsulod agod tan-awon ang balaan nga mga butang.” (Numeros 4:17-20) Ang makadtuan lamang ni Samuel nga bahin sang santuaryo amo ang luwang sang tabernakulo. Mahimo nga didto sia nagtulog. Maathag nga nagtulog man si Eli sa luwang. Ang ekspresyon nga “ginahamtangan sang kaban sang Dios” maathag nga nagapatuhoy sa duog sang tabernakulo.
PEBRERO 21-27
MGA BAHANDI SA PULONG SANG DIOS | 1 SAMUEL 6-8
“Sin- o ang Inyo Hari?”
it-2-E 163 ¶1
Ginharian sang Dios
Nangayo Sila sang Tawo nga Magahari sa Ila. Pagligad sang halos 400 ka tuig halin sang nakagua sila sa Egipto kag sobra 800 ka tuig halin sang nakigkatipan ang Dios kay Abraham, nangayo ang mga Israelinhon sing tawo nga magahari sa ila, pareho sa iban nga pungsod nga may monarkiya. Ang ila pagpangayo sang hari nagapakita nga indi na nila gusto nga si Jehova ang magahari sa ila. (1 Sa 8:4-8) Insakto man nga magpaabot ang pungsod nga magatukod ang Dios sang ginharian bilang pagtuman sa iya promisa kay Abraham kag kay Jacob, suno sa nasambit na. Nangin basihan man nila ang tagna ni Jacob parte sa Juda antes sia napatay (Ge 49:8-10), ang ginsiling ni Jehova sa Israel sang naggua sila sa Egipto (Ex 19:3-6), ang mga kondisyon sa Kasuguan nga katipan (Deu 17:14, 15), kag bisan ang bahin sang mensahe nga ginpahambal sang Dios sa propeta nga si Balaam (Nu 24:2-7, 17). Ini nga paglaum ginsambit sang matutom nga nanay ni Samuel nga si Hana sa iya pangamuyo. (1 Sa 2:7-10) Pero wala pa ginpahayag ni Jehova sing bug-os ang iya “sagrado nga likom” parte sa Ginharian kag wala pa man niya ginsugid kon san- o ang iya ginpat-od nga tion sa pagtukod sini, pati man ang iya kahimusan kag kon bala sa langit ini ukon sa duta. Gani nangin makahas gid ang mga Israelinhon sang nangayo sila sang tawo nga magahari sa ila.
Nagbatas Sia Bisan Pa May mga Kapaslawan
Talupangda ang sabat ni Jehova sang ginpangamuyo ini ni Samuel:“Pamatii ang tingug sang katawohan sa tanan nga ginasiling nila sa imo; kay wala sila magsikway sa imo, kondi nagsikway sila sa akon agud nga indi ako maghari sa ila.” Nagmag-an ang pamatyag ni Samuel. Pero grabe ini nga pag-insulto sa Labing Gamhanan nga Dios! Ginpaandaman ni Jehova ang mga Israelinhon paagi sa iya propeta kon ano ang kabaylo sang ila pagpangayo sang hari. Sang ginsugid ini sa ila ni Samuel, namilit sila:“Indi! kondi buut kami nga may hari sa ibabaw namon.” Bangod matinumanon sa Dios, gintangduan ni Samuel ang hari nga ginpili ni Jehova.—1 Samuel 8:7-19.
Ang Paggahom ni Jehova Napamatud-an nga Amo ang Pinakamaayo!
9 Ginpamatud-an sang maragtas ang kamatuoran sang ginsiling ni Jehova. Naeksperiensiahan sang Israel ang dalagku nga mga problema sang gingamhan sila sang mga hari nga tawo kag ilabi na gid sang nangin di-matutom yadtong mga hari. Subong sang natabo sa Israel, indi man kita matingala kon ngaa sa sulod sang malawig nga tion, ang mga panguluhan nga ginagamhan sang mga tawo nga wala nakakilala kay Jehova wala gid nakahatag sing permanente nga kaayuhan. Huo, ginapangabay sang pila ka pulitiko ang pagpakamaayo sang Dios sa ila mga panikasog nga maagom ang paghidait kag kalig-unan. Apang, paano sila pakamaayuhon sang Dios kon wala gani sila nagapasakop sa iya paggahom?—Sal. 2:10-12.
Espirituwal nga mga Hiyas
Ngaa Dapat Magpabawtismo?
13 Antes bawtismuhan subong mga Saksi ni Jehova, dapat anay nga makumbertir kita. Ang pagkanakumbertir isa ka boluntaryo nga buhat nga ginahimo sing kinabubut-on sang isa nga nagdesisyon sing bug-os tagipusuon nga magsunod kay Cristo Jesus. Ginatalikdan sining mga indibiduwal ang ila anay sayop nga dalanon kag nagapamat-od nga himuon kon ano ang husto sa itululok sang Dios. Sa Kasulatan, ang Hebreo kag Griego nga mga berbo nga nagapatuhoy sa pagkanakumbertir nagakahulugan sang pagtalikod, pagliso. Ini nga buhat nagakahulugan sang pagliso sa Dios gikan sa sayop nga dalanon. (1 Hari 8:33, 34) Ang pagkanakumbertir nagakinahanglan sang “mga buhat nga nagakabagay sa paghinulsol.” (Binuhatan 26:20) Nagakinahanglan ini nga biyaan naton ang butig nga pagsimba, magpanghikot nahisanto sa mga sugo sang Dios, kag maghatag sing eksklusibo nga debosyon kay Jehova. (Deuteronomio 30:2, 8-10; 1 Samuel 7:3) Ang pagkanakumbertir nagaresulta sa mga pagbag- o sa aton panghunahuna, mga tulumuron, kag personalidad. (Ezequiel 18:31) ‘Nagaliso’ kita samtang ang di-diosnon nga mga kinaiya ginabuslan sang bag- ong personalidad.—Binuhatan 3:19; Efeso 4:20-24; Colosas 3:5-14.
PEBRERO 28–MARSO 6
MGA BAHANDI SA PULONG SANG DIOS | 1 SAMUEL 9-11
“Si Saul Mapainubuson kag Maugdang sang Primero”
Mangin Mapainubuson kag Batuna ang Imo mga Limitasyon
11 Hunahunaa ang natabo kay Hari Saul. Sang pamatan-on pa sia, kabalo sia sang iya mga limitasyon kag daw indi pa gani niya pagbatunon ang dugang nga responsibilidad. (1 Sam. 9:21; 10:20-22) Pero sang nangin hari na si Saul, nangin bugalon sia kag ginhimo niya ang mga hilikuton nga wala sia sing kinamatarong nga himuon. Isa ka bes, tinak-an sia sa paghulat kay manalagna Samuel. Sa baylo nga magsalig nga buligan ni Jehova ang iya katawhan, naghalad si Saul sang halad nga sinunog bisan pa wala sia sing awtoridad nga himuon ini. Bangod sini, naakig si Jehova kay Saul kag ginsikway sia bilang hari. (1 Sam. 13:8-14) Paandam gid sa aton ini nga halimbawa. Gani, indi gid naton paghimuon ang mga hilikuton nga wala kita sing kinamatarong nga himuon.
Kon Paano Mahuptan ang Pagkamasinakripisyuhon
8 Si Hari Saul sang Israel isa ka paandam sa aton nga mahimo madula ang aton pagkamasinakripisyuhon bangod sang pagkamaiyaiyahon. Sang primero, si Saul isa ka mapainubuson nga hari. (1 Sam. 9:21) Wala niya ginsilutan ang mga Israelinhon nga nagtamay sa iya pagkahari, bisan puede niya kuntani ini himuon para pangapinan ang iya posisyon nga ginhatag sang Dios. (1 Sam. 10:27) Ginbaton man ni Hari Saul ang panuytoy sang espiritu sang Dios paagi sa pagpanguna sa Israel sa ila madinalag-on nga pagpakig-away sa mga Amonhon. Pagkatapos sini, mapainubuson niya nga ginhatag kay Jehova ang kadungganan.—1 Sam. 11:6, 11-13.
Mga Amonhon—Ang Katawhan nga Nagbalus sa Kalulo sing Kaawayon
Sa liwat ginbalusan sang mga Amonhon ang kalulo ni Jehova sing kaawayon. Wala ginpabay-an ni Jehova ining malaut nga pamahog. “Ang espiritu sang Dios nag-abot sing gamhanan kay Saul sang pagkabati niya sini nga mga pulong [ni Nahas], kag nagdabdab sing daku ang iya kaakig.” Sa idalom sang panuytoy sang espiritu sang Dios, gintipon ni Saul ang isa ka hubon sang 330,000 ka hangaway nga naglutos sing bug-os sa mga Amonhon sa bagay nga “wala sing nabilin nga duha sa ila nga tingob.”—1 Samuel 11:6, 11.
Espirituwal nga mga Hiyas
Talalupangdon nga mga Punto Gikan sa Tulun-an nga Nahaunang Samuel
9:9—Ano ang ginapahangop sang ekspresyon nga “ang manalagna karon ginatawag nga manugpanan-aw sadto anay”? Ining mga pulong mahimo nagapahangop nga samtang nangin kilala ang mga manalagna sang mga adlaw ni Samuel kag sa dag-on sang mga hari sa Israel, ang tinaga nga “manugpanan-aw” ginbuslan na sang “manalagna.” Si Samuel ginakabig nga amo ang una nga manalagna.—Binuhatan 3:24.