Paano Matudluan sang mga Ginikanan ang Ila Kabataan Parte sa Sex?

Ang sabat sang Biblia

Sin-o dapat ang magtudlo sa kabataan parte sa sex? Suno sa Biblia, responsibilidad ini sang mga ginikanan, kag madamo sa ila ang nabuligan sang masunod nga mga suhestyon:

• Indi mahuya. Ang Biblia prangka kon parte sa sex kag mga kinatawo, kag ginsugo sang Dios ang pungsod sang Israel nga ang “mga kabataan” dapat tudluan parte sa sini. (Deuteronomio 31:12, Ang Pulong sang Dios; Levitico 15:​2, 16-​19) Puede mo gamiton ang nagakaigo nga mga tinaga kon nagasambit parte sa sex ukon mga kinatawo para indi ini mangin makahuluya.

• Amat-amat nga pagtudlo. Sa baylo nga istoryahon lang ang imo bata parte sa sex kon maghinupang na sia, amat-amat nga isugid sa iya ang parte sa sini samtang nagadaku sia depende sa iya maintiendihan.​—1 Corinto 13:11.

• Pagtudlo sang mga pagsulundan sa moral. May mga eskwelahan nga nagatudlo sing sex education sa mga bata. Pero ginapalig-on sang Biblia ang mga ginikanan nga tudluan ang ila kabataan indi lamang sang seksuwal nga mga bahin sang lawas kundi kon ano ang husto nga pagtamod parte sa sex.​—Hulubaton 5:​1-​23.

• Pamatii ang imo bata. Indi dayon maakig kon mamangkot ang imo bata parte sa sex. Kundi “mangin maabtik sa pagpamati, mahinay sa paghambal.”​—Santiago 1:​19.

Kon paano maproteksionan ang imo bata batok sa mga manug-abuso

• Edukaha ang imo kaugalingon. Tun-i kon paano ang isa ka manug-abuso nagapangbiktima.​—Hulubaton 18:15; tan-awa ang kapitulo 32 sang libro nga Questions Young People Ask​—Answers That Work, Volume 1.

• Hibalua pirme ang nagakatabo sa imo bata. Indi pag-isalig ang imo bata kay bisan sin-o nga wala mo pa makilal-an kon bala masaligan, kag indi pagtuguti ang imo bata nga “ginapabayaan sa iya kaugalingon.”​—Hulubaton 29:15.

• Tudlui sila parte sa nagakaigo nga pagtuman. Dapat matun-an sang kabataan nga magtuman sa ila ginikanan. (Colosas 3:​20) Pero kon tudluan mo ang imo bata nga dapat pirme gid sia magtuman sa kay bisan sin-o nga mas magulang sa iya, mas mahapos sia nga abusuhan. Dapat silingan sang Cristiano nga mga ginikanan ang ila bata, “Kon ipahimo sa imo ang butang nga ginasiling sang Dios malain, indi ka magtuman.”​—Binuhatan 5:​29.

• Magpraktis sang simple nga mga paagi. Buligi ang imo bata nga matun-an ang dapat niya himuon pananglitan may magtinguha nga abusuhan sia kon wala ikaw. Ang pagpraktis sang pila ka posible nga mga sitwasyon makabulig sa imo bata nga maisog nga magsiling “Indi! Isugid ta gid ka!” kag magpalagyo dayon. Mahimo kinahanglan mo ini ‘itudlo pirme’ sa imo mga bata kay madali lang sila malipat.​—Deuteronomio 6:7, APD.