Pagbulig sa mga Biktima sang Kalamidad sang 2023—“Naeksperiensiahan Gid Namon ang Gugma ni Jehova”

Gintagna sang Biblia nga “magailinaway ang mga pungsod” kag may mga kalamidad sa “hingapusan sang sistema sang mga butang.” (Mateo 24:3, 7) Nakita naton nga natuman ini nga mga tagna sining 2023 nga tuig sang pag-alagad.a Pero samtang nagakatabo ining mga inaway kag mga kalamidad sa halos 100 ka pungsod, ginpakita gid sang mga Saksi ni Jehova ang gugma ni Jehova. Paano?

Sa tion sang 2023 nga tuig sang pag-alagad, ang aton mga kauturan naapektuhan sang sobra 200 ka natural ukon ginhimo sang tawo nga mga kalamidad. Sa kabilugan, ang mga organisasyon nga ginagamit sang mga Saksi ni Jehova naggasto sing sobra pulo ka milyon ka dolyarb halin sa pondo nga gin-donate sa worldwide work para gamiton sa pagbulig sa mga biktima sang kalamidad. Dugang ini sa personal nga kuarta nga gingamit sang aton mga kauturan para sa pagbulig sa nagakinahanglan sa ila mismo lugar. Hibalua kon paano gingamit ang imo mga donasyon para mabuligan ang mga biktima sang duha lang sa madamo nga kalamidad nga nakaapekto sa aton mga kauturan.

Ang pila ka lugar sa Nigeria makaeksperiensia gid sang pagbaha kada tuig. Pero, ang Oktubre 2022 nga pagbaha amo ang pinakagrabe nga naeksperiensiahan sang pungsod sa sulod sang pulo ka tuig. Sobra 676,000 ka ektarya sang uma ang naguba, kag sobra duha ka milyon ka tawo ang nagbakwit. Nag-asayn dayon sang Disaster Relief Committee ang branch sa Nigeria para magbulig sa mga kauturan kag para magpalig-on sa ila.

• 7,505 ka manugbantala ang nagbakwit

• 860 ka balay ang naguba ukon nawasak

• 90 ka Kingdom Hall kag isa ka Assembly Hall ang nabahaan

Sobra $250,000 ang gingasto sa pagbulig sa mga biktima sang kalamidad, nga nagalakip sang:

• Mga pagkaon pareho sang bugas, beans, kag noodles

• Mga gamit sa balay pareho sang mga mattress kag mga muskitero

• Pagkay-o ukon pagpatindog liwat sang naguba nga mga balay

Paano ginsigurado sang aton mga kauturan nga ginagamit sing maayo ang mga donasyon? Ang isa ka paagi amo ang pag-evaluate sang kada bilding para mabal-an kon bala puede ini kay-uhon. Kon kinahanglan ini islan, nagatukod sang bag-o nga bilding gamit ang desinyo nga kinaandan sa sina nga lugar.

Nagapasalamat gid ang aton mga kauturan nga nakabaton sang bulig. Ang isa ka sister nagsiling: “Ginguba gid sang baha ang amon palangabuhian kay naguba ang amon uma kag wala na kami sang balay. Naumpawan gid kami sang nagkadto ang mga kauturan sina mismo nga adlaw para buligan kami kag pangitaan kami sang safe nga dalayunan. Nalipay pa gid kami sang nag-abot ang mga pagkaon halin sa branch office. Nagdayaw gid kami sang nakita namon mismo nga natuman ang Juan 13:34, 35 sa amon. . . . May matuod gid nga gugma. Nagapasalamat gid ang amon bilog nga pamilya sa mga kauturan nga nagbulig sa amon sang kinahanglan namon ini.”

Nakita sang iban sa komunidad ang aton ginhimo nga pagbulig. Ang isa ka community chief sa Sabagreia, Bayelsa State, nagsiling: “Madamo sang mga organisasyon ukon relihion sa bilog nga kalibutan, pero ang mga Saksi ni Jehova lang gid ang naghimo sang pareho sini. . . . [Ang inyo] organisasyon amo ang isa sa pinakamaayo sa bilog nga kalibutan.”

Sang Pebrero 2023, sobra 400 ka sunog ang nagresulta sa daku nga halit sa Chile. Sobra 430,000 ka ektarya sang duta, lakip ang importante nga mga bilding sa Chile ang naguba. Mga 8,000 ka tawo ang nagbakwit. Wala madugay pagkatapos sang natabo nga kalamidad, nag-organisar dayon ang branch office sang pagbulig sa mga biktima.

• 222 ka manugbantala ang nagbakwit

• 20 ka balay ang nasunog

Sobra $200,000 ang gingasto sa pagbulig sa mga biktima sang kalamidad, nga nagalakip sang:

• Pagkaon kag tubig

• Gasolina, gamit sa pagpaninlo, kag mga bulong

• Pagkay-o sa naguba nga mga balay

Nakibot ang isa ka pamilya sang mabal-an nila nga naguba ang tanan nila nga ginapanag-iyahan, lakip ang ila balay kag negosyo. Gani nadulaan sang obra ini nga pamilya. Sa una nga mga inadlaw, nasubuan gid ang pamilya nga makita ang bakante nga lote nga ginatindugan anay sang ila balay. Pero sang nagpadayon ang konstruksion, nangin maayo na ang ila pamatyag. Ang ginpakita nga gugma kag pagpalangga sang mga volunteer nakabulig gid sa ila nga masarangan ini nga sitwasyon. Napalig-on gid ang pamilya sa sini nga eksperiensia gani nagbulig man sila sa mga volunteer nga makay-o ang balay sang isa ka utod.

Madamo gid nga kauturan ang nagdayaw sa ginhimo nga pagbulig. Ang isa ka brother nagsiling: “Ang Disaster Relief Committee isa gid ka manami nga kahimusan ni Jehova. Sa adlaw pagkatapos sang kalamidad, ara na sila sa lugar nga naapektuhan kag nagapanghatag sang mga kinahanglanon. Makapalig-on gid nga makabasa sang ginhimo nga pagbulig sa iban nga bahin sang kalibutan. Pero lain gid kon matabo ini sa imo. Mas maapresyar mo ang organisasyon; kon paano ginailog sang mga kauturan ang mga kinaiya ni Jehova; kag nagakabalaka gid sila sa amon mga kinahanglanon sa materyal, espirituwal, kag emosyonal. Naeksperiensiahan gid namon ang gugma ni Jehova.”

Samtang ini nga sistema nagahilapit pa gid sa katapusan, maeksperiensiahan naton ang mas madamo nga mga kalamidad. (Lucas 21:10, 11) Bisan pa sini, ginagamit sang aton mahigugmaon nga Hari, si Jesucristo, ang kongregasyon para ipakita sa aton nga kaupod naton sia “sa tanan nga tion tubtob sa hingapusan sang sistema sang mga butang.” (Mateo 28:20) Ang imo maalwan nga paghatag sang donasyon sa worldwide work, paagi sa donate.jw.org kag sa iban pa nga paagi, lakip ang imo paghatag sang tion kag kusog, nagapakita nga ginasuportahan mo ang Ginharian kag ang mahigugmaon nga Hari sini. Salamat gid sa imo padayon nga kaalwan.