Pamangkot sang mga Pamatan-on . . .

Paano Ako Makabenepisyo sing Kapin Gikan sa Cristianong mga Miting?

“ANG serioso nga pagnubo sang mga nagasimba nagapakita nga napaslawan ang iglesia sa pagbihag kag sa paghupot sa igtalupangod sang iya mga pamatan-on.” Amo ang ginsiling sang Katolikong arsobispo nga si Emmett Cardinal Carter. Kaanggid man nga mga report ang mabatian sa bilog nga kalibutan.

Apang, ginpakita sang nagligad nga guwa sang Magmata! nga linibolibo sang mga pamatan-on ang nakasapo nga ang mga miting sa lokal nga Kingdom Hall sang mga Saksi ni Jehova tuhay sa makatalagam nga mga serbisyo sang simbahan. Ining mga miting nagahatag sa isa sing matuod nga kahigayunan sa pagtubo sa espirituwal. Walay sapayan, ang pagtambong lamang sa sining mga miting wala nagakahulugan nga ang isa nagabenepisyo gid gikan sa sini.

Halimbawa, ang isa ka pamatan-on nga lalaki nga nagtambong sa miting sa Kingdom Hall sa nahaunang tion nagsiling nga samtang naluyagan niya ang mga tawo nga nakilala niya didto, “wala [niya] mahangpi kon ano ang nagakatabo sa plataporma.” Kag kon ang mga miting bag-o sa imo, ang mga ekspresyon subong sang “Armagedon,” “dakung kadam-an,” kag “nagkalabilin” mahimo gid nga makalilibog sa imo nga subong sang dumuluong nga hambal. Ti, ginakilala gid sang Biblia ang kinatuhayan, ginapaanggid ang mga kamatuoran sang Dios sa “putli nga hambal.”—Sofonias 3:9.

Bisan daw makalilibog sa primero ining “hambal,” indi pagpaluyaha ang imo buot. Si Janet, edad 15, nga nagsugod kasan-o lang sa pagtambong sa mga miting sa Kingdom Hall nagsiling: “Sang primero nagsiling ako, ‘Ano ang ila ginahambalan?’ Apang sing amat-amat nahangpan ko na ang mga ekspresyon.” Huo, indi mahapos ang magtuon sing bag-o nga hambal. Ang isa ka kurso sa pagtuon sing dumuluong nga hambal nagasiling nga ang isa ka tawo nagakinahanglan sing “pailob, kag padayon nga pagtuon” agod maton-an ang bag-o nga hambal. Ginarekomendar pa gani sini ang “adlaw-adlaw nga pag-ensayo.” Sing kaanggid, agod maton-an ang putli nga hambal sang kamatuoran sang Biblia natural nga ang isa dapat magkadto sa lugar nga ginahambal ini, sa Cristianong mga miting!

Walay sapayan, ang regular nga pagtambong sa mga miting umpisa lamang. Agod makabenepisyo ka sing labi sa mga miting, ginapanugda namon nga sundon mo ang tatlo ka simple nga tikang.

Tikang Uno: Maghanda

Sa wala pa mapatay si Jesus, ginpamangkot sia sang iya mga disipulo: “Sa diin mo luyag nga maghanda kami sing makaunan mo sing paskuwa?” Ginsabat sila ni Jesus. Gani, bilang pagtuman, “ginhimo sang mga disipulo ang ginsugo sa ila ni Jesus, kag ginhanda nila ang mga butang.” (Mateo 26:17-19) Samtang isa ini ka pinasahi gid nga miting, pareho nga sulundan ang ginasunod sa semanal nga mga miting sa Kingdom Hall. Agod makabenepisyo sing labi gikan sa sini, dapat man ikaw “maghanda” kag ‘maghanda sang mga butang.’ Paano mo ina mahimo?

“Nagapain ako sing oras sa pagtuon sang mga libro nga ginagamit namon sa mga miting,” siling sang 16-anyos nga si Anita. Si Malene, edad 11, nagdugang: “Antes sang mga miting, ginapamangkot ko ang akon iloy sang kahulugan sang mabudlay nga mga tinaga nga mabasahon ko sa Ang Lalantawan.” Ining napasad sa Biblia nga magasin ginaton-an sing regular sa mga kongregasyon sang mga Saksi ni Jehova. Si Anne, edad 13, nagapangayo man sing bulig. “Kada Biernes, ginaton-an sang akon amay ang katunga sang leksion sa Lalantawan upod sa akon,” paathag niya. “Kag nian kon Sabado, ginaton-an namon ang ikaduha nga katunga.” Ang resulta? Nagakadto sila sa mga miting nga nasangkapan sing balayan sa hunahuna. Sa tion sang miting, ginapun-an nila ini sing mga detalye. “Sa sinang paagi,” siling ni Anne, “nadalahig ikaw kag mahapos ka makatuon.”—Ipaanggid ang Hulubaton 14:6.

Kapin pa ang ginalakip sa paghanda. “Ginaensayo ko ang mga ambahanon nga ginaamba namon sa miting,” paathag ni Simeon, edad 14. “Ginapatokar ko ang mga cassette recording sang mga ambahanon sa puluy-an kag nagadungan ako sa pag-amba. Kon kaisa ginabuylugan ako sang akon manghod nga lalaki. Nian, sa miting,” dugang niya, “Makaamba ako sing mabaskog.” (Salmo 105:2) May iban pa bala nga butang nga ‘ginahanda’ niya? “Huo,” padayon ni Simeon. “Isa ka adlaw antes sang miting, ginasulod ko ang akon Biblia, songbook, kag tolon-an nga libro sa akon bag, agod nga sa masunod nga adlaw bitbiton ko na lang ini.”

Tikang Dos: Magpakigbahin!

Ang dose-anyos nga si Jesus aktibo kon tuhoy sa pagsimba sa Dios. Ang Biblia nagasiling nga sa templo sa Jerusalem, si Jesus nakit-an nga ‘nagapamati, nagapamangkot, nagasabat.’ (Lucas 2:46, 47) Ang pagpakigbahin isa pa ka yabi agod makabenepisyo gikan sa mga miting. Apang, kinahanglan ang panikasog sa paghimo sini.

Binagbinaga, halimbawa, ang pagpamati. “Masami nga mabudlay mamati sa pamulongpulong sang sa ikaw ang nagapamulongpulong,” siling sang isa ka manunulat. Nahauna, nagahunahuna kita sa kadasigon nga apat ka beses sang sa paghambal sang kinaandan nga tawo. Ang resulta? Ang 11-anyos nga si Joseph nagtuad: “Kon kaisa sa tion sang mga miting ang akon hunahuna nagalagaw—nagakabalaka nahangungod sa akon hilimuon para sa eskwelahan.” Nagakatabo ini sa aton tanan kon kaisa. Gani gamita ang madugay na nga mga metodo sa pagpugong sining paglagaw sang hunahuna. Ang mga Cristiano sang nahaunang siglo masami nga nagadala sing mga tapitapi nga daga sa ila mga miting. “Samtang ginapamatian nila ang Kasulatan nga ginabasa,” paathag sang publikasyon nga Aid to Bible Understanding, “ginakopya nila ini sa mga tapitapi nga daga paagi sa tinta.”

Sa karon, ang madali dalhon nga kuwaderno nagbulos sa mga tapitapi nga daga, apang epektibo gihapon ang pagkuha sing nota. Siling ni Anita: “Ginalista ko ang mga kasulatan nga ginasambit sa tion sang pamulongpulong; sa amo sarang ko marepaso ang pamulongpulong sa balay.” Si Michael, edad 16 nagdugang: “Ginalista ko ang dalagku nga mga punto. Paagi sa sini wala nagalagaw ang akon hunahuna.” Sa pagkamatuod, ang pagkuha sing nota nagabulig sa imo sa “paghatag sing kapin sa kinaandan nga igtalupangod sa mga butang nga nabatian.”—Hebreo 2:1.

Subong ginsambit kaina, ang lamharon nga si Jesus namangkot kag nagsabat sing mga pamangkot. Madamo nga pamatan-on ang nagapakigbahin man sa mga miting. Sa pungsod sang Suriname, halimbawa, ang surbe kasan-o lang nagpakita nga pito sa napulo ka pamatan-on, edad 12 tubtob 20, nga nagatambong sa mga miting sa Kingdom Hall, ang nagapakigbahin sa pamangkot-kag-sabat nga mga sesyon.

Kaangay ni Jesus, nagatinguha sila sa paghatag sing mga sabat nga nagapakita sing paghangop. Wala sila nagabasa lamang sing mga sabat gikan sa tolon-an nga libro nga ila ginagamit kundi nagakomento sila sa ila kaugalingon nga mga pulong. Ginasulat sang iban ang ila mga sabat sa kuwaderno kag ginabasa ang ginpaathag nga sabat sa tion sang miting. Sa tapos sang pila ka pag-ensayo, ginadula na nila ang kuwaderno kag, sa kalipay sang tanan nga nagatambong, nagahambal sila gikan gid sa tagipusuon. Si Anil, edad 13, nagapaathag: “Sa sining paagi ang iban nagabenepisyo sing kapin gikan sa sini, kag amo man ako.”—Hulubaton 15:28.

Matuod, mahimo nga ang imo ginabatyag pareho sa pamatan-on nga si Anita, nga nagsiling: “Nahadlok ako sa pagkomento.” Apang sa dili madugay magaugyon ka kay Michael, nga nagasiling karon: “Luyag ko maghatag sing mga sabat!” Ang Hulubaton 15:23 nagasiling: “Ang tawo may kalipay sa sabat sang iya baba.”

Tikang Tres: Gamita ang Imo Naton-an

Ang katapusan nga tikang amo ang pagpat-od nga ang imo ginaton-an ‘nagapanghikot sa imo.’ (1 Tesalonica 2:13) Buot silingon sini gamiton mo ang imo naton-an. Si Tammy, isa ka lin-ay sa Estados Unidos, nagapaathag: “Sugod sang nagatambong ako sa mga miting, daku ang ginbag-o ko.”

Mahimo nga matalupangdan sang imo mga masigkabumulutho ining pagbag-o kag mamangkot sa imo nahanungod sini. Magahatag ini sa imo sing kahigayunan sa pagpaambit sa ila sang imo naton-an sa mga miting. Nagakinahanglan ini sing kaisog, apang makapaladya ini. Si Susan, isa ka lin-ay nga taga-Canada, nagsiling: “Nalipay gid ako magpanaksi sa akon mga abyan sa eskwelahan.” (Hulubaton 3:27) Huo, ang paggamit sang imo naton-an sa mga miting magadugang sing kalipay sa imo pagtuon.

Katapusan nga laygay: Himua ining tatlo ka tikang sing tayuyon. Maghanda para sa mga miting. Magpakigbahin. Kag dayon gamita ang imo naton-an. Kon himuon mo ini, makabenepisyo ka sing bug-os sa mga miting sa Kingdom Hall. Sa tanan nga paagi, himua ang pagtambong sa miting nga “kinabatasan,” subong nga ini kinabatasan anay ni Jesus.—Lucas 4:16.

[Kahon sa pahina 25]

Hilimuon Para sa Eskwelahan kag mga Miting?

“Masunson ako nagapauli nga puno sing hilimuon para sa ekswelahan. Nian makasululay ang magsiling, ‘Indi ako anay magtambong sa miting agod himuon ang akon hilimuon para sa eskwelahan,’” siling ni Anita. Kon kaisa ayhan nagaatubang ka sina man nga pagsulay. Apang, paano ini ginaatubang sang iban nga Cristiano?

“Ginahimo ko ang iban nga hilimuon ko para sa eskwelahan antes sang miting kag ang iban pa pagpauli ko,” siling ni Wanita. “Sa sinang mga gab-i,” dugang niya, “gab-i na ako nagatulog sang sa kinaandan, apang ginauna ko anay ang mga miting!” (Mateo 6:33) Siling ni Simeon: “Luyag ko magsugilanon pagkatapos sang miting kag magpabilin tubtob sa katapusan. Apang kon may hilimuon ako para sa eskwelahan, nagalakat ako dayon agod himuon ini.”

‘Apang indi bala maapektuhan sang pagtambong sa mga miting ang akon rekord sa eskwelahan?’ ipamangkot mo. Huo, apang indi sing negatibo. Sa katunayan, ang isa ka manunudlo sa Scotland nagsiling nga ang kabataan sang mga Saksi ni Jehova “maayo sa eskwelahan . . . bangod, kutob sa pagkabata, gintudluan sila kon paano maglingkod kag magpamati kag kon paano iaplikar kon ano ang naton-an nila.”

[Mga piktyur sa pahina 26, 27]

Ang sekreto sa pagkalipay mo sa mga miting amo ang paghanda kag pagpakigbahin, subong man ang pagbuhat sang imo naton-an