Gikan sa Amon mga Bumalasa

Walay Peligro nga Pagmaneho

Dapat gid kamo hatagan sing komendasyon tuhoy sa mga artikulo sa “Safe Driving.” (January 8, 1988) Subong isa nga interesado gid katama sa walay peligro nga pagmaneho sa sulod sang madamong tinuig, sa banta ko ang mga seksion nga natig-ulohan “Is Your Vehicle Roadworthy?” “Read the Road,” kag “Tips From the Experts” labi na nga ginpresentar sing maayo kag nakabulig sing daku. Ang inyo mga bumalasa mahimo nga mangin interesado sa sining tip sa pagmaneho nga naton-an ko sa akong ugangan nga lalaki, nga nakabulig sa akon sa sulod sang madamong tinuig. Siling niya sa akon nga sa kada pagsakay mo sa salakyan, dumduma nga magamaneho ka sing apat ka salakyan: ang imo, ang salakyan sa atubangan, ang salakyan sa likod, kag ang salakyan nga indi mo makita.

S. J. D., Estados Unidos

Nalipay gid ako sa pagbasa sa inyo mga artikulo tuhoy sa “Safe Driving.” Apang, ang kamatuoran nga ang mga artikulo ginpatuhoy lamang sa mga pamatan-on nagahimo sini nga daw indi husto. Bangod sang mapigaw nga panulok kag palamatin-an kag sang mahinay nga mga reaksion nila, ang mga tigulang amo sing masami ang peligruso sa iban nga nagagamit sa dalan. Narealisar ko kon daw ano ka kombeniente ang manglaktud pakadto sa mga balaligyaan nga dala ang salakyan. Apang madamo ako sing kilala nga mga tigulang nga ang batasan sa pagmaneho tuman ka peligruso. Bangod sina mas naluyagan ko kuntani ang pila ka mataktikahon nga pahanumdom nga ginpatuhoy sa mga tigulang nahanungod sa sangkol nga pagmaneho karon.

E. D., Republika Pederal sang Alemanya

Ginhunahuna namon na ang materyal naghatag sing maayong laygay para sa mga tsuper sang tanan nga pangedaron, apang ang laygay batok sa sobra nga kadasig kag kaarisgado ginpatuhoy labi na sa pamatan-on. Siling sang artikulo sa “New York Times” may kahilabtanan sa problema sang tigulang nga mga tsuper: “Indi subong sa batabata nga mga tsuper, nga ang paglapas sa trapiko masami nga may labot sa madasig ukon walay paghalong nga batasan, ang may edad nga mga tsuper nagakaaksidente kon wala sila nagahatag sing lugar ukon nagatuman sa mga karatula ukon mga senyales sa trapiko, sing masami bangod sang mapigaw nga panulok ukon pakamalipaton.” Daku nga kasulhay ang pagmaneho, labi na sa mga tigulang, apang luyag namon nga makapauli sila pirme nga wala maano.—ED.

Pagmulay sa Iban nga mga Relihion

Matutom ako nga bumalasa sang Magmata! sa sulod sang madamo na nga tinuig karon, kag sa banta ko husto kamo. Apang, nagakakibot ako sa pirme ninyo pagmulay sa iban nga mga relihion, kay kon kaisa katumbas na ini sa paglibak kag malaw-ay nga hambal, nga malapit na sa pasipala. Bangod sini, indi ini maayo kag nagapahilayo sa inyo gikan sa misyon nga ginasiling ninyo nga ginatuman, nga sa pagpati ko amo ang pagbantala sang maayong balita.

B. P., Pransya

May maayo kag mahigugmaon nga interes kami sa katawhan sang tanan nga relihion, apang kon ang ila relihiosong mga pagpati kag mga buhat dimatuod kag dikalahamut-an sa Dios pagpakita sing gugma nga ipatalupangod ini sa ila paagi sa pagbuyagyag sa kabutigan. Maathag nga ginpakita ni Jesus ang sala sang relihiosong mga batasan sang mga escriba kag mga Fariseo sang kaadlawan niya, nagasiling nga ang ila relihion walay pulos. (Mateo 15:1-14; 23:2-32) Ang Pulong sang Dios amo ang nagabuyagyag kag nagatagudili sa sayop nga relihiosong mga buhat nga ginahimo sa iya ngalan. Ginasunod namon ang mga tikang ni Jesus paagi sa pagpatalupangod kon ano ang ginasiling sang Pulong sang Dios, nga mahimo mangin sa walay katapusan nga kaayuhan sang mga nagapamati.—ED.