“Kon Ngaa Wala Ako Nagasaulog sing Krismas”

ANG iban nagasiling nga ang mga kabataan sang mga Saksi ni Jehova ginadingutan bangod wala sila nagasaulog sing Krismas. Apang binagbinaga ang sinulatan nga “Kon Ngaa Wala Ako Nagasaulog sing Krismas” nga ginsulat sang isa ka 11-anyos nga Saksi sa California, E.U.A, subong isa ka asaynment sa klase:

“Para sa madamo nga tawo, ang Krismas nagakahulugan sing madamong butang​—mga regalo, pamilya, mga regalo, pagkaon, mga regalo, pagpaambitay, mga regalo, gugma, mga regalo, si Santa Claus, mga regalo, kbp. Apang ang mga tawo sa karon talagsa lang nagahunahuna tuhoy sa kon ano ang kahulugan sang Krismas ukon kon ngaa ginasaulog nila ini. Kon nagahunahuna man sila, ginahunahuna nila sa masami ang Krismas subong ang kaadlawan ni Jesus, isa ka tion para sa pamilya kag, siempre, madamong regalo. Ang kalabanan nga mga tawo naluoy sa mga Saksi ni Jehova bangod ginahunahuna nila nga nadingutan ang ila mga kabataan. Apang matuod gid bala nga may nawasi kami? Binagbinagon naton kon ngaa wala ginasaulog sang mga Saksi ni Jehova ini nga kapiestahan.

“Subong isa sa mga Saksi ni Jehova, wala ako nagasaulog sing Krismas bangod sa madamo nga rason. Una, indi ini amo ang kaadlawan ni Jesus. Ginasiling sang Biblia nga may mga manugbantay nga didto sa latagon upod sa ila panong. Tuman ka tugnaw sa Jerusalem sa tion sang tigtulugnaw kag masami nga nagaulan sing yelo. Malayo gid nga ang mga manugbantay magpabilin sa guwa sa tion sining mga binulan. . . . Apang, may kapin nga dapat binagbinagon sa sini.

“Indi lamang nga ang Krismas indi amo ang kaadlawan ni Jesus kundi wala gid ini ginsaulog sang unang siglo nga mga Cristiano. Naghalin ini sa dumaan Romanong kapiestahan sang Saturnalia, nga nagasugod sa Dis. 17 kag nagatapos sa Dis. 25, ang ‘kaadlawan sang dimalutos nga adlaw.’ Sang ikaapat nga siglo, namat-od ang pila ka opisyal sang Roma nga saulugon ang kaadlawan ni Jesus sa Dis. 25, ayhan agod pakabalaanon ang ila pagano nga kapiestahan.

“Indi katingalahan nga ang Krismas gindumilian sa madamo nga pungsod. Sa karon may pila ka katawhan (kaangay sang mga Saksi ni Jehova) ang nagasunod sa halimbawa sang unang siglo nga mga Cristiano. . . .

“Nagasaulog ako anay sang Krismas​—tubtob sang apat ka tuig ako. Kon tuhoy sa ginadingutan, wala gid ginadingutan ang mga Saksi ni Jehova. Nagabaton kami sang mga regalo sa bug-os nga tuig. Ang lamang nga butang nga amon nawasi amo ang paganong mga kapiestahan kag ang ila pagano man nga mga selebrasyon.”

Bisan pa nga ginsulatan sang manunudlo ang papel nga, “Indi tanan nga tawo nagapaabot sing mga regalo,” nagsulat man sia, “Maayo gid ang pagkasulat,” kag ginhatagan ang estudyante sing marka nga “A.”