Pagpakita sing Interes sa Iban nga Tawo

KON nagapaambit sa iban sing mga kamatuoran sa Biblia, indi lamang naton pahibaluon ang hunahuna. Dapat buyukon man naton ang tagipusuon. Ang isa ka paagi sa paghimo sini amo ang pagpakita sing sinsero nga personal nga interes sa aton mga tagpalamati. Ini nga interes mapakita sa nanuhaytuhay nga paagi.

Talupangda ang Pagtamod Sang Imo mga Tagpalamati. Gintalupangod ni apostol Pablo ang ginhalinan kag ang mga panghunahuna sang iya mga tagpalamati. Sia nagpaathag: “Sa mga Judiyo nangin subong ako sang Judiyo, agod madaug ko ang mga Judiyo; sa mga yara sa idalom sang kasuguan nangin subong ako sang yara sa idalom sang kasuguan, bisan pa ako mismo wala sa idalom sang kasuguan, agod madaug ko ang mga yara sa idalom sang kasuguan. Sa mga walay kasuguan nangin subong ako nga sa walay kasuguan, bisan indi ako nga walay kasuguan sa Dios kundi sa idalom sang kasuguan ni Cristo, agod nga madaug ko ang mga walay kasuguan. Sa mga maluya nangin maluya ako, agod nga madaug ko ang mga maluya. Nangin tanan nga butang ako sa tanan nga sahi sang tawo, agod nga sa bisan ano nga paagi maluwas ko ang iban. Apang ginahimo ko ang tanan nga butang tungod sa maayong balita, agod mangin manugpaambit ako sini sa iban.” (1 Cor. 9:20-23) Paano kita karon ‘mangin tanan nga butang sa tanan nga sahi sang tawo’?

Kon may kahigayunan ka sa pagpanilag sa iban, bisan sing makadali lang, antes ka makighambal sa ila, mahimo matalupangdan mo kon sa ano sila interesado kag kon ano ang ila kahimtangan. Mahibaluan mo bala kon ano ang ila trabaho? May makita ka bala nga palatandaan sang ila relihioso nga mga pagpati? Makita mo bala ang kahimtangan sang ila pamilya? Pasad sa imo napanilagan, sarang mo bala mapasibu ang imo presentasyon agod labi ini nga makagalanyat sa imo mga tagpalamati?

Agod mangin makagalanyat ang imo presentasyon kinahanglan nga hunahunaon mo sing abanse kon paano ka magpalapit sa mga tawo sa inyo teritoryo. Sa pila ka duog, nagalakip ini sa mga dumuluong. Kon ini nga mga tawo nagapuyo sa inyo teritoryo, may epektibo ka bala nga paagi sa pagpanaksi sa ila? Sanglit kabubut-on sang Dios nga “ang tanan nga sahi sang tawo maluwas kag makadangat sa sibu nga ihibalo sang kamatuoran,” himua nga tulumuron ang pagpresentar sing mensahe sang Ginharian sa makawiwili nga paagi sa tanan mo nga masugilanon.​—1 Tim. 2:4.

Mamati Sing Maayo. Bisan pa sarang mahibaluan ni Jehova ang tanan nga gusto niya mahibaluan, nagapamati sia sa iban. Nakabaton sing palanan-awon si manalagna Micaya nga ginapalig-on ni Jehova ang mga anghel nga ipabutyag ang ila mga ideya tuhoy sa isa ka butang. Nian gintugutan sang Dios ang isa sang mga anghel nga himuon ang ginpanugda sang anghel. (1 Hari 22:19-22) Sang nagpabutyag sing kabalaka si Abraham tuhoy sa paghukom nga pagahimuon sa Sodoma, mainayuhon nga ginpamatian sia ni Jehova. (Gen. 18:23-33) Sa aton ministeryo, paano naton mailog ang halimbawa ni Jehova tuhoy sa pagpamati?

Palig-una ang iban nga ipabutyag ang ila kaugalingon. Magpamangkot sing nagakaigo, kag magdulog tubtob makasabat sila. Mamati gid. Ang imo mahunahunaon nga atension magapalig-on sa ila nga maghambal sing hilway. Kon ang ila mga sabat may ginapakita tuhoy sa ila mga interes, mataktikanhon nga mamangkot sing dugang. Wala nagapamangkot sing tuman kadamo nga personal nga pamangkot, tinguhai sing mataktikanhon nga makilala sila sing maayo. Dayawa sila sa ila mga opinyon kon mahimo mo ini sing sinsero. Bisan pa wala ka nagaugyon sang ila pagtamod, mangin mainayuhon sa pagkilala sang ila mga ekspresyon.​—Col. 4:6.

Apang, kinahanglan nga maghalong kita nga ang aton interes sa mga tawo indi magsobra sa kon ano ang nagakaigo. Ang pagkabalaka sa iban wala nagahatag sa aton sing kinamatarong sa pagpasilabot sa pribado nga kabuhi sang iban. (1 Ped. 4:15) Kinahanglan maghalong kita nga indi masal-an sang tuhay nga sekso ang ginapakita naton nga kaayo sa ila. Sanglit ang pagtamod sa nagakaigo nga kasangkaron sang interes sa iban nanuhaytuhay sa lainlain nga mga duog, bisan sa mga tawo pa gani, kinahanglan ang maayo nga paghantop.​—Luc. 6:31.

Ang paghanda isa ka bulig agod mangin maayo nga tagpalamati. Kon ang aton mensahe maathag sa aton hunahuna, nagabulig ini sa aton nga magrelaks kag magpamati sa iban sing natural. Magapahamtang ini sang ila buot kag mahimo nga mahuyog pa sila sa pagpakigsugilanon sa aton.

Ginapadunggan naton ang iban paagi sa pagpamati sa ila. (Roma 12:10) Nagapamatuod ini nga ginapabaloran naton ang ila mga opinyon kag mga balatyagon. Mahimo pa gani nga bangod sini mamati pa gid sila sa aton isiling. Kon amo, may maayo nga rason nga ginalaygayan kita sang Pulong sang Dios nga “magmadagmit sa pagpamati, magmahinay sa paghambal.”​—Sant. 1:19.

Buligi ang Iban nga Mag-uswag. Ang kabalaka sa iban magapahulag sa aton nga pirme hunahunaon ang mga nagapakita sing interes kag duawon sila liwat agod ipaambit ang mga kamatuoran sa Biblia nga halos direkta nga nagapuno sang ila mga kinahanglanon. Kon nagaplano para sa masunod nga pagduaw, binagbinaga kon ano ang imo nahibaluan tuhoy sa ila sang nagligad mo nga pagduaw. Ihanda ang impormasyon tuhoy sa topiko nga ginakabalak-an nila. Ipadaku ang praktikal nga kabilihanan sang materyal, nagabulig sa ila nga makita kon paano sila makabenepisyo gikan sa ila ginatun-an.​—Isa. 48:17.

Kon isugid sang imo tagpalamati ang isa ka kahimtangan ukon problema nga iya ginakahangaw-an, tamda ini nga isa ka pinasahi nga kahigayunan nga mapaambit ang maayong balita sa iya. Sunda ang halimbawa ni Jesus, nga pirme handa sa paglugpay sa mga ginasit-an. (Mar. 6:31-34) Pamatuki ang pagsulay nga maghatag sing padali nga solusyon ukon maghatag sing pakulahaw nga laygay. Bangod sini, mahimo batyagon sang tawo nga wala ka sing sinsero nga interes. Sa baylo, magpakita sing patugsiling. (1 Ped. 3:8) Nian magpanalawsaw sa mga publikasyon nga pasad sa Biblia, kag ipaambit ang makapalig-on nga impormasyon agod buligan ang tawo nga maatubang ang iya kahimtangan. Sa pagkamatuod, bangod sang mahigugmaon nga kabalaka sa imo tagpalamati, indi mo pag-isugid ang kompidensial nga butang nga ginsugid niya sa imo magluwas kon may maayo nga rason nga himuon ini.​—Hulu. 25:9.

Ilabi na nga dapat kita magpakita sing personal nga interes sa mga ginadumalahan naton sing mga pagtuon sa Biblia. Mapangamuyuon nga binagbinaga ang mga kinahanglanon sang kada estudyante, kag maghanda sa pagtuon nga ginahunahuna ini. Pamangkuta ang imo kaugalingon, ‘Ano ang masunod niya nga dapat himuon agod padayon sia nga mag-uswag sa espirituwal?’ Mahigugmaon nga buligi ang estudyante nga mahangpan kon ano ang ginasiling sang Biblia kag sang mga publikasyon sang “matutom kag mainandamon nga ulipon” tuhoy sa sini nga butang. (Mat. 24:45) Sa pila ka higayon, ang pagpaathag lamang mahimo nga indi pa tuman. Mahimo kinahanglan nga ipakita mo sa estudyante kon paano iaplikar ang isa ka prinsipio sa Biblia, magkaupod nga nagahimo gid sing isa ka butang nga nagapakita sang aplikasyon sini.​—Juan 13:1-15.

Kinahanglan ang pagkabalanse kag maayo nga paghukom kon nagabulig sa iban nga mapahisuno ang ila kabuhi sa mga talaksan ni Jehova. Ang mga tawo may nagkalainlain nga ginhalinan kag mga ikasarang, kag nagauswag sila sa nanuhaytuhay nga kadasigon. Mangin makatarunganon sa imo ginapaabot sa iban. (Fil. 4:5) Indi sila pagpilita nga bag-uhon ang ila kabuhi. Tuguti ang Pulong sang Dios kag ang iya espiritu sa pagpahulag sa ila. Luyag ni Jehova nga alagaron sia sang mga tawo sing kinabubut-on, indi sing pilit. (Sal. 110:3) Likawi nga ipabutyag ang imo kaugalingon nga mga opinyon tuhoy sa personal nga mga desisyon nga ila ginaatubang, kag bisan pa pangabayon ka sang iban nga himuon ini, maghalong nga indi ka magdesisyon para sa ila.​—Gal. 6:5.

Maghatag Sing Praktikal nga Bulig. Bisan pa ang panguna nga ginakabalak-an ni Jesus amo ang espirituwal nga kaayuhan sang iya mga tagpalamati, mabinalak-on man sia sa iban pa nila nga mga kinahanglanon. (Mat. 15:32) Bisan pa kon pigado kita, madamo kita sing mabulig sa praktikal nga paagi.

Ang interes sa iban magapahulag sa aton nga mangin mapatugsilingon. Halimbawa, kon bangod sa kahimtangan sang panahon indi na komportable ang imo kahambal, magsaylo sa mas maayo nga duog, ukon maghimo sing kahimusan nga padayunon ang paghambalanay sa masunod nga tion. Kon nagaduaw ka sa di-kombeniente nga tion, magpanugda nga magabalik na lang. Kon ang kaingod ukon ang isa ka interesado nagabalatian ukon naospital, ipakita ang imo kabalaka paagi sa pagpadala sa iya sing isa ka kard ukon malip-ot nga sulat ukon paagi sa pagduaw sa iya. Kon nagakaigo, makaluto ka man sing isa ka simple nga pagkaon ukon maghimo sing iban nga buhat sang kaayo.

Samtang nagauswag ang mga estudyante sa Biblia, mahimo nga masubuan sila bangod wala na sila nagahinguyang sing madamo nga tion upod sa ila anay mga kaupod. Makig-abyan sa ila. Maghinguyang sing tion sa pagsugilanon sa ila pagkatapos sang ila pagtuon sa Biblia kag sa iban pa nga mga tion. Palig-una sila nga palambuon ang maayo nga mga pagpakig-upod. (Hulu. 13:20) Buligi sila nga makatambong sa Cristianong mga miting. Magpungko sa tupad nila sa sini nga mga pagtinipon, kag buligi sila sa ila kabataan agod makabenepisyo gid ang tanan gikan sa programa.

Ipakita ang Tinagipusuon nga Interes. Ang pagpakita sing interes sa mga tawo, indi isa ka teknik nga dapat sauluhon, kundi isa ini ka kinaiya sang tagipusuon. Ang kasangkaron sang aton interes sa iban makita sa madamo nga paagi. Makita ini sa kon paano kita nagapamati kag kon ano ang aton ginasiling. Ginapadayag ini paagi sa kaayo kag konsiderasyon nga ginapakita naton sa iban. Bisan pa kon wala kita sing ginasiling ukon ginahimo, makita ini sa aton panimuot kag sa aton pangguyahon. Kon nagakabalaka gid kita sa iban, mahibaluan gid nila ini.

Ang labing importante nga rason sa pagpakita sing sinsero nga interes sa iban amo nga sa paghimo sini, ginailog naton ang gugma kag kaluoy sang aton langitnon nga Amay. Nagabulig ini agod ang aton mga tagpalamati mabuyok kay Jehova kag batunon ang mensahe nga iya ginahatag agod ipalapnag naton. Busa, samtang ginapaambit mo ang maayong balita, panikasugi nga ituon ang mata “indi sa personal nga interes sang inyo kaugalingon lamang nga mga butang, kundi sa personal man nga interes sang iban.”​—Fil. 2:4.