“Ako . . . Mapainubuson sing Tagipusuon”

1-3. Paano si Jesus nagsulod sa Jerusalem, kag ngaa mahimo nga nakibot ang iban nga tumalan-aw sa kadam-an?

NAGAHAGONG sa kalangkag ang mga tawo sa Jerusalem. Isa ka dungganon nga tawo ang manug-abot! Sa gua sang siudad, nagakulubay ang mga tawo sa higad sang dalan. Nalangkag sila nga abiabihon ini nga tawo, kay siling sang iban sia ang manunubli ni Hari David kag ang may kinamatarong nga Manuggahom sang Israel. Nagdala ang iban sing mga paklang sang palma agod iwagayway bilang pag-abiabi; ang iban naman naghumlad sang ila mga kunop kag nagladlad sing mga sanga sang kahoy sa dalan agod mangin matapan ang iya alagyan. (Mateo 21:7, 8; Juan 12:12, 13) Mahimo gid nga madamo ang nagpalibog kon sa ano nga paagi sia magasulod sa siudad.

² Mahimo nga ginpaabot sang iban ang isa ka engrande nga pag-abot. May nahibaluan sila nga importante nga mga tawo nga naghimo sini. Halimbawa, ginproklamar ni Absalom nga anak ni David ang iya kaugalingon nga isa ka hari; naghimo sia sing kahimusan nga 50 ka lalaki ang magdalagan sa unahan sang kangga nga ginasakyan niya. (2 Samuel 15:1, 10) Mas magarbo pa ang ginpahimo sang Romano nga manuggahom nga si Julio Cesar; ginpangunahan niya anay ang isa ka prosesyon sang kadalag-an tubtob sa kapitolyo sang Roma, kag sa iya magtimbang nga kiliran, may yara 40 ka elepante nga may mga lampara! Apang, sini nga tion, mas dungganon nga tawo ang ginahulat sang mga tawo sa Jerusalem. Nahangpan man nila ukon wala, amo ini ang Mesias, ang labing dungganon nga tawo nga nabuhi sa duta. Apang, mahimo nga makibot ang iban kon makita na nila ining palaabuton nga Hari.

³ Wala sila sing makita nga kangga, mga tawo nga nagadalagan sa iya unahan, mga kabayo​—kag pat-od nga wala sing mga elepante. Sa baylo, nagsakay si Jesus sa isa ka ordinaryo lamang nga sapat nga ginagamit sang mga tawo sa pagkarga kag sa pagguyod, isa ka asno.a Wala magsuksok si Jesus sing magarbo nga sahi sang panapton kag bisan ang asno nga iya ginasakyan wala sing dekorasyon. Sa baylo sang isa ka malahalon nga siya, ginhapinan sang suod nga mga sumulunod ni Jesus ang likod sang asno sing mga kunop. Ngaa ginpili ni Jesus nga magsulod sa Jerusalem sa sining simple lamang nga paagi, samtang ang mga tawo nga indi subong ka prominente sa iya nag-insister sa magarbo nga kahimusan?

 4. Ano ang gintagna sang Biblia tuhoy sa paagi sang pagsulod sang Mesianiko nga Hari sa Jerusalem?

⁴ Gintuman ni Jesus ang isa ka tagna: “Magkalipay ka sing tuman . . . Magsinggit ka sa kadalag-an, O anak nga babayi sang Jerusalem. Yari karon! Ang imo hari magaabot sa imo. Matarong sia, huo, ginluwas; mapainubuson, kag nagasakay sa asno.” (Zacarias 9:9) Ginapakita sini nga tagna nga sa pila ka adlaw ang Isa nga Hinaplas sang Dios, ang Mesias, magapakilala sang iya kaugalingon sa mga taga-Jerusalem subong amo ang Hari nga gintangdo sang Dios. Dugang pa, ang paagi mismo sang iya pagpakilala sang iya pagkahari, lakip ang ginpili niya nga sakyan, magapakita sang isa ka matahom nga kinaiya sang iya tagipusuon​—ang pagkamapainubuson.

 5. Ngaa makapahulag gid nga binagbinagon ang pagkamapainubuson ni Jesus, kag ngaa importante nga tun-an naton nga ilugon si Jesus sa sini nga bahin?

⁵ Ang isa sa makagalanyat gid nga mga kinaiya ni Jesus amo ang iya pagkamapainubuson, ang kinaiya nga makapahulag gid nga binagbinagon. Subong sang nabinagbinag na naton sa nagligad nga kapitulo, si Jesus lamang “ang dalan kag ang kamatuoran kag ang kabuhi.” (Juan 14:6) Maathag nga wala sing bisan isa sa binilyon ka tawo nga nabuhi sa duta ang subong ka importante sa Anak sang Dios. Apang, wala gid magpakita si Jesus sing bisan diutay man lang nga bugal, pagkamatinaastaason, ukon pagpaimportante sa kaugalingon nga amo ang balatian sang madamo nga di-himpit nga mga tawo. Agod mangin mga sumulunod ni Cristo, dapat naton batuan ang huyog nga magpadaug sa bugal. (Santiago 4:6) Dumduma, ginadumtan ni Jehova ang pagkamatinaastaason. Gani, importante nga tun-an naton kon paano naton mailog ang pagkamapainubuson ni Jesus.

 6. Ano ang pagkamapainubuson, kag paano napat-od ni Jehova nga mangin mapainubuson ang Mesias?

⁶ Ang pagkamapainubuson amo ang mapainumuron nga panghunahuna, wala ini nagapakita sing pagkamatinaastaason ukon bugal. Isa ini ka kinaiya nga nagasugod sa tagipusuon kag makita sa panghambal, paggawi, kag pagpakig-angot sang isa ka tawo sa iban. Paano napat-od ni Jehova nga mangin mapainubuson ang Mesias? Nahibaluan niya nga ang iya Anak nagpakita man sang iya mismo himpit nga huwaran sa pagkamapainubuson. (Juan 10:15) Nakita man niya ang pagkamapainubuson sang Anak sa buhat. Paano?

7-9. (a) Paano si Miguel nagpakita sing pagkamapainubuson sa iya komprontasyon kay Satanas? (b) Paano mailog sang mga Cristiano si Miguel sa pagpakita sing pagkamapainubuson?

⁷ Ang tulun-an sang Judas nagapakita sing isa ka makawiwili nga halimbawa: “Sang si Miguel nga arkanghel nakigsuay sa Yawa tuhoy sa lawas ni Moises, wala sia nangahas nga hukman kag pasipalahan sia, kundi nagsiling sia: ‘Kabay nga sabdungon ka ni Jehova.’” (Judas 9) Ang Miguel isa ka ngalan nga gin-aplikar kay Jesus​—antes kag sa tapos sang iya pagkabuhi sa duta—​sa iya papel subong arkanghel, ukon pangulo sang langitnon nga kasuldadusan sang mga anghel ni Jehova.b (1 Tesalonica 4:16) Apang, talupangda kon ano ang ginhimo ni Miguel sa sini nga komprontasyon kay Satanas.

⁸ Wala ginasugid sa aton sang rekord ni Judas kon ano ang luyag himuon ni Satanas sa bangkay ni Moises, apang mapat-od naton nga malain ang katuyuan sang Yawa sa sini. Ayhan luyag niya nga gamiton ang bangkay sining matutom nga tawo sa butig nga pagsimba. Sang ginpamatukan ni Miguel ang malaut nga plano ni Satanas, nagpakita man sia sing tumalagsahon nga pagpugong sa kaugalingon. Takus gid nga sabdungon si Satanas, apang nahibaluan ni Miguel nga si Jehova nga Dios lamang ang dapat maghimo sini kay, sadto nga tion nga nagapakigsuay sia kay Satanas, wala pa matugyan sa iya ang “tanan nga paghukom.” (Juan 5:22) Subong arkanghel, daku gid ang awtoridad ni Miguel. Apang, mapainubuson nga naghulat sia kay Jehova sa baylo nga agawon ang dugang pa nga awtoridad. Magluwas sa pagkamapainubuson, nagpakita man sia sing pagkaugdang, ukon sing pagkilala sa iya mga limitasyon.

⁹ May rason kon ngaa gin-inspirar si Judas nga isulat ini nga hitabo. Makapasubo nga ang iban nga mga Cristiano sang panahon ni Judas indi mapainubuson. Matinaastaason nga “nagapasipala [sila] sa tanan nga butang nga wala gid nila mahibalui.” (Judas 10) Subong di-himpit nga mga tawo, madali kita madaug sang aton bugal! Kon may indi kita mahangpan nga ginahimo sa sulod sang Cristianong kongregasyon​—ayhan isa ka desisyon sang hubon sang mga gulang—​ano ang ginahimo naton? Kon magkatakata kita batok sa sini bisan pa indi puede nga mahibaluan naton ang mga rason kon ngaa amo sini ang desisyon, indi ayhan kulang kita sing pagkamapainubuson? Sa baylo, ilugon naton si Miguel, ukon si Jesus, kag likawan nga maghukom tuhoy sa mga butang nga wala kita sing awtoridad halin sa Dios.

10, 11. (a) Ano ang tumalagsahon tuhoy sa pagkahanda sang Anak sang Dios nga batunon ang tulumanon nga magkari sa duta? (b) Paano naton mailog ang pagkamapainubuson ni Jesus?

¹⁰ Nagpakita man ang Anak sang Dios sing pagkamapainubuson sang ginbaton niya ang tulumanon nga magkari sa duta. Binagbinaga kon ano ang dapat niya biyaan. Sia ang arkanghel. Sia man “ang Pulong”​—ang humalambal ni Jehova mismo. (Juan 1:1-3) Nagapuyo sia sa langit, ang iya ni Jehova “halangdon nga puluy-an sang pagkabalaan kag katahom.” (Isaias 63:15) Walay sapayan sini, “gin-uba [sang Anak] ini nga dagway kag nagsuklob sing dagway sang ulipon kag nangin kaanggid sa mga tawo.” (Filipos 2:7) Hunahunaa kon ano ang nadalahig sa iya tulumanon sa duta! Ang iya kabuhi ginliton sa taguangkan sang isa ka Judiyo nga ulay, diin nagtubo ini sing siam ka bulan agod mangin isa ka tawhanon nga lapsag. Natawo sia subong isa ka walay mahimo nga lapsag sa panimalay sang isa ka imol lamang nga panday, kag naagihan niya nga nangin bata nga nagatuon sa pagtakangtakang tubtob nga makalakat na gid sia kag nangin tin-edyer. Bisan pa himpit sia, nagpasakop sia sa iya di-himpit nga tawhanon nga mga ginikanan sang bata sia. (Lucas 2:40, 51, 52) Tumalagsahon gid ini nga pagkamapainubuson!

¹¹ Mailog bala naton ang pagkamapainubuson ni Jesus paagi sa pagkahanda nga batunon ang mga tulumanon nga daw manubo kon kaisa? Halimbawa, ang aton tulumanon nga pagbantala sing maayong balita sang Ginharian sang Dios daw manubo kon ang mga tawo wala nagasapak, nagapangyubit, ukon nagapamatok. (Mateo 28:19, 20) Apang, kon magbatas kita sa sini nga hilikuton, mahimo nga makabulig kita sa pagluwas sing mga kabuhi. Kon ano man, daku ang matun-an naton tuhoy sa pagkamapainubuson, kag sundon naton ang mga tikang sang aton Agalon, si Jesucristo.

12-14. (a) Paano si Jesus nagpakita sing pagkamapainubuson sang gindayaw sia sang mga tawo? (b) Sa ano nga mga paagi mapainubuson nga nagpakig-angot si Jesus sa iban? (c) Ano ang nagapakita nga ang pagkamapainubuson ni Jesus indi isa ka pormalidad lamang ukon pagpakita lamang sing maayo nga pamatasan?

¹² Halin gid sa umpisa tubtob sa katapusan, nakilala si Jesus nga mapainubuson sa iya bug-os nga ministeryo sa duta. Ginpakita niya ini sa isa ka paagi nga ginpatuhoy niya ang tanan nga kadayawan kag himaya sa iya Amay. Kon kaisa gindayaw sang mga tawo si Jesus bangod sang iya kaalam, sang gahom sang iya mga milagro, kag bisan gani sang iya maayo nga mga kinaiya. Sa liwat kag liwat, ginpatuhoy ni Jesus ang himaya kay Jehova sa baylo nga sa iya kaugalingon.​—Marcos 10:17, 18; Juan 7:15, 16.

¹³ Nagpakita si Jesus sing pagkamapainubuson sa iya pagpakig-angot sa mga tawo. Sa katunayan, gin-athag niya nga nagkari sia sa duta, indi agod alagdon, kundi agod mag-alagad sa iban. (Mateo 20:28) Nagpakita sia sing pagkamapainubuson sa iya malulo kag rasonable nga pagpakig-angot sa mga tawo. Sang ginpaslaw sia sang iya mga sumulunod, wala sia mangakig sa ila; nagtinguha gihapon sia nga lab-uton ang ila tagipusuon. (Mateo 26:39-41) Sang gin-awat sang kadam-an ang iya pagpangita sing malinong nga palahuwayan, wala niya pagtabuga sila; gin-atipan niya gihapon sila, nga ginatudluan sila sing “madamo nga butang.” (Marcos 6:30-34) Sang magpakiluoy sa iya ang isa ka di-Israelinhon nga babayi nga ayuhon ang iya anak nga babayi, ginpasat-um niya sang primero nga indi niya paghimuon ini. Apang, wala sia mangindi nga nagapangakig; nagpasugot sia sang ulihi bangod sang tumalagsahon nga pagtuo sang babayi, subong sang binagbinagon naton sa Kapitulo 14.​—Mateo 15:22-28.

¹⁴ Sa indi maisip nga mga paagi, gintuman ni Jesus ang iya ginsiling tuhoy sa iya kaugalingon: “Ako malulo kag mapainubuson sing tagipusuon.” (Mateo 11:29) Ang iya pagkamapainubuson indi salimpapaw, isa ka pormalidad lamang ukon pagpakita lamang sing maayo nga pamatasan. Naghalin ini sa iya tagipusuon, ang iya nasulod nga pagkatawo. Gani, indi katingalahan, nga nagtinguha gid si Jesus nga tudluan ang iya mga sumulunod sing pagkamapainubuson!

15, 16. Ano nga pagpaanggid ang ginpatalupangod ni Jesus tuhoy sa panimuot sang kalibutanon nga mga manuggahom kag sa panimuot nga dapat palambuon sang iya mga sumulunod?

¹⁵ Wala dayon mapalambo sang mga apostoles ni Jesus ang pagkamapainubuson. Gani, napilitan si Jesus nga sulitsuliton ang pagtudlo sa ila nga dapat sila mangin mapainubuson. Halimbawa, sang isa ka higayon, paagi sa ila iloy nangabay sanday Santiago kag Juan kay Jesus nga ipangako sa ila ang mataas nga mga posisyon sa Ginharian sang Dios. Maugdang nga nagsabat si Jesus: “Ang paglingkod sa akon tuo kag sa akon wala indi ako ang magahatag, kundi ila ini sang mga gin-amanan sang akon Amay.” “Naakig” ang napulo pa ka apostoles kay Santiago kag kay Juan. (Mateo 20:20-24) Paano ginlubad ni Jesus ini nga problema?

¹⁶ Mainayuhon nga ginsabdong niya sila tanan, nga nagasiling: “Nahibaluan ninyo nga ang mga manuggahom sang mga pungsod nagapakaginuo sa ila kag ang mga kadalagkuan may awtoridad sa ila. Indi subong sini sa inyo; kundi ang bisan sin-o nga luyag mangin daku sa inyo mangin alagad ninyo, kag ang bisan sin-o nga luyag mangin nahauna sa inyo mangin ulipon ninyo.” (Mateo 20:25-27) Mahimo gid nga nakita sang mga apostoles kon daw ano ka arogante, ambisyuso, kag kakagod ang “mga manuggahom sang mga pungsod.” Nagsiling si Jesus nga dapat mangin tuhay ang iya mga sumulunod gikan sa sining gutom sa gahom nga mga diktador. Dapat sila mangin mapainubuson. Nahangpan bala sang mga apostoles ang punto?

17-19. (a) Sang gab-i antes sia mapatay, sa ano nga indi malipatan nga paagi gintudluan ni Jesus ang iya mga apostoles sing isa ka leksion tuhoy sa pagkamapainubuson? (b) Ano ang labing mapuersa nga leksion tuhoy sa pagkamapainubuson nga gintudlo ni Jesus subong isa ka tawo?

¹⁷ Indi ini mahapos para sa ila. Indi ini ang nahauna ukon ang katapusan nga tion nga gintudluan sila ni Jesus sing subong sini nga leksion. Antes pa sini, sang magbaisay sila kon sin-o ang labing daku sa ila, ginpatindog ni Jesus ang isa ka gamay nga bata sa tunga nila kag ginsingganan sila nga ilugon ang mga bata, kay wala sila sing bugal, ambisyon, kag wala nagahingamo sang posisyon nga amo ang kinaandan gid sa mga hamtong na. (Mateo 18:1-4) Walay sapayan sini, sang gab-i mismo antes mapatay si Jesus, nakita niya nga problema gihapon sang mga apostoles ang paglandas sa ila bugal. Gani, gintudluan niya sila sing isa ka indi gid malipatan nga leksion. Nagwagkus sia sing tualya kag ginhimo niya ang pinakamanubo nga sahi sang katungdanan, nga amo sadto anay ang kinaandan nga ginahimo sang mga suluguon para sa mga bisita sang isa ka panimalay. Ginhinawan ni Jesus ang mga tiil sang tagsatagsa sang iya mga apostoles​—lakip si Judas, nga buot na sadto magluib sa iya!​—Juan 13:1-11.

¹⁸ Ginbuligan sila ni Jesus nga mahangpan ang punto tuhoy sa pagkamapainubuson sang magsiling sia sa ila: “Naghatag ako sa inyo sing sulundan.” (Juan 13:15) Nagdulot gid man bala sang ulihi ini nga leksion sa ila tagipusuon? Sang magnagob pa ang gab-i, nagbaisay naman sila liwat kon sin-o gid ang labing daku sa ila tanan! (Lucas 22:24-27) Walay sapayan sini, nagpailob gihapon si Jesus kag mapainubuson nga gintudluan niya sila. Pagkatapos sini, ginhatag niya ang labing mapuersa nga leksion sa tanan: “Nagpaubos sia kag nangin matinumanon tubtob sa kamatayon, huo, kamatayon sa usok sang pag-antos.” (Filipos 2:8) Kinabubut-on nga ginbaton ni Jesus ang isa ka makahuluya nga kamatayon, kay sayop nga ginkondenar sia subong isa ka kriminal kag manugpasipala. Paagi sa sini, ginpamatud-an sang Anak sang Dios nga tumalagsahon gid sia, kay sa tanan nga mga tinuga ni Jehova, sia ang nagpakita sing himpit kag labing maayo nga sahi sang pagkamapainubuson.

¹⁹ Mahimo nga amo ini​—ang katapusan nga leksion tuhoy sa pagkamapainubuson nga gintudlo ni Jesus subong isa ka tawo—​ang nagpatudok gid sa tagipusuon sang matutom nga mga apostoles ni Jesus sang kinaiya nga pagkamapainubuson. Ginasugiran kita sang Biblia nga ini nga mga tawo mapainubuson nga nag-alagad sing mga tinuig, kag sing mga dekada pa gani, sang ulihi. Kamusta naman kita?

20. Paano naton mahibaluan kon bala mapainubuson kita sing tagipusuon?

²⁰ Ginalaygayan ni Pablo ang kada isa sa aton: “Hupti ninyo ining panimuot sang hunahuna nga yara man kay Cristo Jesus.” (Filipos 2:5) Kaangay ni Jesus, dapat kita mangin mapainubuson sing tagipusuon. Paano naton mahibaluan kon bala mapainubuson kita sing tagipusuon? Ginapahanumdom ni Pablo sa aton nga dapat “wala [kita] nagahimo sing bisan ano bangod sa huyog nga makigbais ukon bangod sa sobra nga pagpaimportante sang kaugalingon, kundi may pagpaubos sang hunahuna nga nagakabig sa iban nga labaw sa [aton].” (Filipos 2:3) Ang sekreto, kon amo, yara sa kon paano naton ginatamod ang iban. Dapat naton sila tamdon subong labaw sa aton, subong mas importante sangsa aton. Iaplikar mo bala ina nga laygay?

21, 22. (a) Ngaa dapat mangin mapainubuson ang Cristiano nga mga manugtatap? (b) Paano naton mapakita nga nawagkusan kita sing pagkamapainubuson?

²¹ Madamo nga tinuig sa tapos mapatay si Jesus, ginahunahuna gihapon ni apostol Pedro ang importansia sang pagkamapainubuson. Gintudluan ni Pedro ang Cristiano nga mga manugtatap nga dapat nila himuon ang ila mga katungdanan sing mapainubuson, nga wala gid nagapakaginuo sa mga karnero ni Jehova. (1 Pedro 5:2, 3) Indi dapat magpabugal ang isa bangod sang iya responsibilidad. Sa baylo, labi pa gani nga dapat magpakita ang isa sing tunay nga pagkamapainubuson kon may responsibilidad sia. (Lucas 12:48) Sa pagkamatuod, importante ini nga kinaiya indi lamang para sa mga manugtatap kundi para man sa tagsa ka Cristiano.

²² Wala gid malipatan ni Pedro ang gab-i nga ginhinawan ni Jesus ang iya mga tiil​—walay sapayan sang iya pagpamatok! (Juan 13:6-10) Nagsulat si Pedro sa mga Cristiano: “Kamo tanan magpangwagkus sang inyo kaugalingon sing pagpaubos sa hunahuna sa isa kag isa.” (1 Pedro 5:5) Ang ekspresyon nga “magpangwagkus kamo” nagapahangop sang ginahimo sang isa ka suluguon nga magasuksok sing epron agod himuon ang isa ka sahi sang manubo nga trabaho. Ini nga prase mahimo magpahanumdom sa aton sang isa ka higayon nga nangwagkus si Jesus sing tualya kag nagluhod agod hinawan ang mga tiil sang iya mga apostoles. Kon sundon naton si Jesus, ano ayhan nga tulumanon halin sa Dios ang makabig naton nga nagapanubo sang aton dignidad? Dapat makita sang tanan ang aton mapainubuson nga tagipusuon, nga daw nawagkusan kita sini.

23, 24. (a) Ngaa dapat naton pamatukan ang huyog nga magmatinaastaason? (b) Ang masunod nga kapitulo magabulig sa pagtadlong sang ano nga sayop nga ideya tuhoy sa pagkamapainubuson?

²³ Ang pagkamatinaastaason daw hilo. Mahimo nga mahalitan kita. Isa ini ka kinaiya nga bisan pa maabilidad ang isa ka tawo, mahimo nga mangin walay pulos sia sa itululok sang Dios. Sa pihak nga bahin, ang isa ka daw waaywaay gid nga tawo mahimo nga mangin tuman ka mapuslanon sa itululok sang Dios bangod sang iya pagkamapainubuson. Kon palambuon naton ining hamili nga kinaiya sa adlaw-adlaw paagi sa pagtinguha nga mangin mapainubuson bilang pagsunod sa mga tikang ni Cristo, matahom binagbinagon ang mangin padya sini. Nagsulat si Pedro: “Magpaubos kamo sang inyo kaugalingon sa idalom sang gamhanan nga kamot sang Dios, agod bayawon niya kamo sa nagakaigo nga tion.” (1 Pedro 5:6) Ginbayaw ni Jehova si Jesus bangod nagpaubos gid sia. Malipay man ang aton Dios nga padyaan ang imo pagkamapainubuson.

²⁴ Makapasubo nga pagdumdom sang iban ang pagkamapainubuson isa ka tanda sang kaluyahon. Ang huwaran ni Jesus nagabulig sa aton sa paghangop nga sayop ini nga ideya, kay ang labing mapainubuson nga tawo amo man ang labing maisog. Amo ini ang topiko sang masunod nga kapitulo.