Organisado sa Paghimo sang Kabubut-on ni Jehova

SA BUG-OS nga kalibutan, madamo sing relihioso, pulitikal, komersial, kag sosyal nga organisasyon nga may lainlain nga kinaiya, tulumuron, pagtamod, kag pilosopiya. Pero may isa ka organisasyon nga tuhay gid. Ang Pulong sang Dios maathag nga nagapakilala sina nga organisasyon subong mga Saksi ni Jehova.

² Malipayon ka kay nangin bahin ka sang organisasyon ni Jehova. Bangod nahibaluan mo ang kabubut-on sang Dios, ginahimo mo ini karon. (Sal. 143:10; Roma 12:2) Aktibo ka nga ministro nga nagaalagad upod sa mahigugmaon nga kauturan sa bug-os nga kalibutan. (2 Cor. 6:4; 1 Ped. 2:17; 5:9) Subong sang ginsaad sang Pulong sang Dios, nagahatag ini sa imo sing bugana nga pagpakamaayo kag daku nga kalipay. (Hulu. 10:22; Mar. 10:30) Paagi sa matutom nga paghimo sang kabubut-on ni Jehova karon, ginahanda ka para sa dayon kag malipayon nga palaabuton.—1 Tim. 6:18, 19; 1 Juan 2:17.

³ Ang aton Daku nga Manunuga may pinasahi nga organisasyon nga ginagamhan sing teokratiko. Nagakahulugan ini nga ginagamhan ini ni Jehova, nga amo ang Ulo sang tanan. Nagasalig kita sing bug-os sa iya. Sia ang aton Hukom, Manughatag sing Kasuguan, kag Hari. (Isa. 33:22) Bangod Dios sia sang kahim-ong, may maayo sia nga mga kahimusan para ‘makapangabudlay kita kaupod niya’ sa katumanan sang iya katuyuan.—2 Cor. 6:1, 2.

⁴ Samtang nagahilapit ang katapusan sang presente nga sistema sang mga butang, nagauswag kita sa pagpanguna sang gintangdo nga Hari, si Cristo Jesus. (Isa. 55:4; Bug. 6:2; 11:15) Si Jesus mismo ang nagtagna nga ang iya mga sumulunod magahimo sing mga hilikuton nga mas labaw pa sa iya ginhimo sa tion sang iya pagministeryo sa duta. (Juan 14:12) Matuod gid ina bangod sa sulod sang malawig nga tion kag sa ila kadamuon, malapad nga teritoryo ang natuptupan sang mga sumulunod ni Jesus. Ibantala nila ang maayong balita sang Ginharian tubtob sa pinakamalayo nga bahin sang duta.—Mat. 24:14; 28:19, 20; Binu. 1:8.

⁵ Natabo gid ini. Apang, subong sang maathag nga ginsiling ni Jesus, ang pagbantala sing maayong balita matapos suno sa tion nga gintalana ni Jehova. Ang tanan nga palatandaan sa tagna sang Pulong sang Dios nagapakita nga ang daku kag makahalawhaw nga adlaw ni Jehova malapit na.—Joel 2:31; Sof. 1:14-18; 2:2, 3; 1 Ped. 4:7.

⁶ Bangod nahangpan naton ang kabubut-on ni Jehova sa sining katapusan nga tion, kinahanglan pa gid naton panikasugan nga himuon ang mga ginapatuman sang Dios. Kinahanglan mangin pamilyar kita kon paano nagapanghikot ang organisasyon sang Dios kag magkooperar sing bug-os sa sini. Ang pagpanghikot sang organisasyon nabase sa mga prinsipio sang Kasulatan, lakip na ang mga sugo, mga kasuguan, mga mando, mga pagsulundan, kag mga panudlo nga mabasa sa Pulong sang Dios.—Sal. 19:7-9.

⁷ Kon tumanon sang katawhan ni Jehova inang base sa Biblia nga panuytoy, magakabuhi sila kag magapangabudlay sing tingob nga may paghidait kag paghiusa. (Sal. 133:1; Isa. 60:17; Roma 14:19) Ano ang nagapabakod sa kaangtanan sang aton kauturan bisan diin? Gugma. Ginapahulag kita sang gugma kag ginasuksok naton ini. (Juan 13:34, 35; Col. 3:14) Bangod ginakahamut-an kita ni Jehova, nagadungan kita sa langitnon nga bahin sang Iya organisasyon.

⁸ Ang mga manalagna nga sanday Isaias, Ezequiel, kag Daniel nakakita sang mga palanan-awon tuhoy sa langitnon nga bahin sang organisasyon ni Jehova. (Isa., kap. 6; Ezeq., kap. 1; Dan. 7:9, 10) Si apostol Juan nakakita man sing palanan-awon parte sining langitnon nga kahimusan kag naglaragway sa aton sang pila ka bahin sini sa libro sang Bugna. Nakita niya si Jehova sa mahimayaon nga trono, kag ang mga anghel nga nagapahayag: “Balaan, balaan, balaan si Jehova nga Dios, ang Labing Gamhanan, nga amo anay kag amo karon kag ang magakari.” (Bug. 4:8) Nakita man ni Juan nga “nagatindog sa tunga malapit sa trono . . . ang kordero,” ang Kordero sang Dios, si Jesucristo.—Bug. 5:6, 13, 14; Juan 1:29.

⁹ Ang palanan-awon parte kay Jehova nga nagapungko sa trono nagapakita nga sia amo ang Ulo sini nga organisasyon. Tuhoy sa iya kag sa iya mataas nga posisyon, ang 1 Cronica 29:11, 12 nagasiling: “O Jehova, dalayawon ka kag gamhanan kag mahimayaon kag halangdon kag dungganon; kay imo ang tanan nga butang sa langit kag sa duta. O Jehova, imo ang ginharian. Ginabayaw mo ang imo kaugalingon nga labaw sa tanan. Ang manggad kag ang himaya halin sa imo, kag ikaw ang nagadumala sa tanan nga butang. Gamhanan gid ikaw, kag may ikasarang ka nga himuon nga bantog ang mga tawo kag hatagan sing kusog ang tanan.”

¹⁰ Subong masigkamanugpangabudlay ni Jehova, si Jesucristo may mataas nga posisyon sa langit, kag ginhatagan sia sing daku nga awtoridad. Sa pagkamatuod, “ginpasakop man [sang Dios] ang tanan nga butang sa idalom sang iya mga tiil, kag ginhimo sia nga ulo sang tanan nga butang nga may kaangtanan sa kongregasyon.” (Efe. 1:22) Si apostol Pablo nagsiling tuhoy kay Jesus: “Ginbayaw sia sang Dios sa mataas gid nga posisyon kag mainayuhon nga ginhatagan sing ngalan nga labaw sa tanan nga ngalan agod sa ngalan ni Jesus magluhod ang tanan nga yara sa langit kag sa duta kag sa idalom sang duta kag ang tanan dayag nga magkilala nga si Jesucristo Ginuo sa himaya sang Dios nga aton Amay.” (Fil. 2:9-11) Sa amo, makasalig kita sing bug-os sa matarong nga pagpanguna ni Jesucristo.

¹¹ Nakita ni manalagna Daniel sa palanan-awon ang Dumaan sang mga Adlaw sa Iya trono sa langit kag ang mga anghel nga may kadamuon nga ‘isa ka milyon nga nagaalagad sa iya kag isa ka gatos ka milyon nga nagatindog sa atubangan niya.’ (Dan. 7:10) Ang Biblia nagapatuhoy sa sining hangaway sang mga anghel subong “mga espiritu para sa balaan nga pag-alagad, nga ginpadala agod mag-alagad sa mga magapanubli sang kaluwasan.” (Heb. 1:14) Ining tanan nga espiritu nga mga tinuga gin-organisar sa ‘mga trono, mga pagkaginuo, mga panguluhan, kag mga awtoridad.’—Col. 1:16.

¹² Kon pamalandungan naton ini nga mga butang sa langitnon nga bahin sang organisasyon ni Jehova, mahangpan naton ang reaksion ni Isaias sa palanan-awon diin “nakita [niya] si Jehova nga nagapungko sa isa ka trono nga mataas kag nabayaw,” kag “may mga serafin sa palibot niya.” Si Isaias nagsiling: “Makaluluoy ako! Daw pareho lang nga patay na ako, bangod indi matinlo ang akon mga bibig, kag nagaistar ako upod sa mga tawo nga indi matinlo ang mga bibig; kay nakita ko mismo ang Hari, si Jehova sang mga kasuldadusan!” Ang matuod nahayanghag gid si Isaias kag napaubos sang nahangpan niya ang kadakuon sang organisasyon ni Jehova. Naapektuhan gid sia sa sini nga eksperiensia amo nga sang may panawagan halin sa langit parte sa pinasahi nga hilikuton nga pagpahayag sang paghukom ni Jehova, ang reaksion ni Isaias amo: “Yari ako! Ipadala ako!”—Isa. 6:1-5, 8.

¹³ Ginakilala kag ginaapresyar sang katawhan ni Jehova ang Iya organisasyon, gani pareho man ang ila reaksion kay Isaias. Samtang nagauswag ang organisasyon, ginatinguhaan naton nga makadungan sa sini. Ginapanikasugan naton nga ipakita ang aton pagsalig sa organisasyon ni Jehova subong.

¹⁴ Sa kapitulo 1 sang tagna ni Ezequiel, si Jehova ginlaragway subong nagasakay sa daku katama nga kangga sa langit. Ining masanag nga salakyan nagarepresentar sa indi makita nga bahin sang organisasyon ni Jehova. Ang iya pagsakay sa kangga nagapahangop nga ginatuytuyan kag ginagamit niya ini suno sa iya katuyuan.—Sal. 103:20.

¹⁵ Ang tagsa ka ruweda sining kangga may isa ka ruweda sa tunga sini—isa nga kapareho sing diametro amo nga makaigo ini sing pabalabag sa sulod sang ruweda. Sa sini lamang nga paagi masiling nga ang mga ruweda ‘makakadto sa bisan diin nga direksion.’ (Ezeq. 1:17) Ang mga ruweda gilayon nga makabag-o sing direksion. Apang, ini nga kangga indi wala sing kontrol ukon wala sing intelihente nga nagadumala. Wala ginapabay-an ni Jehova ang iya organisasyon nga magpadulong sa bisan diin lang nga direksion. Ang Ezequiel 1:20 nagasiling: “Kon diin pakadto ang espiritu, didto man sila nagakadto.” Gani, si Jehova amo ang nagagiya sang iya organisasyon bisan diin man ini pakadtuon sang iya espiritu. Ang dapat naton ipamangkot sa aton kaugalingon amo, ‘Nagadungan bala ako sa sini?’

¹⁶ Makadungan kita sa organisasyon ni Jehova indi lamang paagi sa pagtambong sa mga miting kag pagpakigbahin sa ministeryo. Una sa tanan, ang aton pagdungan nagapahangop nga mag-uswag kag magtubo kita sa espirituwal. ‘Ginapat-od naton ang mas importante nga mga butang’ kag ginahibalo ang pinakabag-o nga programa sang pagpakaon sa espirituwal. (Fil. 1:10; 4:8, 9; Juan 17:3) Dapat man naton dumdumon nga kinahanglan sang maayo nga organisasyon ang maayo nga koordinasyon kag kooperasyon. Gani dapat naton mahangpan kon daw ano ka importante ang paggamit sing maayo sang espirituwal kag materyal nga mga pagkabutang nga ginsalig ni Jehova sa aton agod matuman ang iya hilikuton. Samtang nagadungan kita sa langitnon nga kangga ni Jehova, nagakabuhi kita nahisanto sa mensahe nga aton ginabantala.

¹⁷ Sa bulig sang organisasyon ni Jehova, kita tanan nagauswag sa paghimo sang kabubut-on sang Dios. Dumduma nga ang Nagasakay sa sining langitnon nga kangga amo si Jehova. Gani, ang pagdungan sa iya kangga nagapakita nga ginatahod naton si Jehova kag nagasalig kita sa aton Igang. (Sal. 18:31) Ang Biblia nagasaad: “Pabaskugon ni Jehova ang iya katawhan. Hatagan ni Jehova sing paghidait ang iya katawhan.” (Sal. 29:11) Subong bahin sang organisasyon ni Jehova karon, nagabaton kita sang kusog nga iya ginahatag kag nagatigayon sang paghidait nga iya ginapakamaayo sa iya organisado nga katawhan. Huo, wala gid sing duhaduha nga matigayon naton ang bugana nga pagpakamaayo samtang ginahimo naton ang kabubut-on ni Jehova karon kag sa wala sing katubtuban.