“Dumduma ang mga Nagapanguna sa Inyo”

INING ginsiling ni apostol Pablo, nga narekord sa Hebreo 13:7, mahimo man badbaron: “Dumduma ang mga nagadumala sa inyo.” Sugod sang Pentecostes 33 C.E., ang matutom nga mga apostoles ni Ginuong Jesucristo ang may katungdanan subong nagadumala nga hubon, nga nagapanguna sa pag-aman sing panuytoy sa bag-o natukod nga Cristianong kongregasyon. (Binu. 6:2-4) Sang mga 49 C.E., ang nagadumala nga hubon ginatapuan indi lang sang mga apostoles ni Jesus. Sang gindesisyunan ang parte sa pagtuli, ang nagadumala nga hubon ginatapuan ‘sang mga apostoles kag sang mga gulang sa Jerusalem.’ (Binu. 15:1, 2) Responsibilidad nila nga atipanon ang mga butang nga nagaapektar sa mga Cristiano bisan diin. Nagapadala sila sing mga sulat kag mga mando, nga nagapabakod sa mga kongregasyon kag nagapaposible sa mga disipulo nga magpabilin nga nahiusa sa ila hunahuna kag buluhaton. Ang mga kongregasyon matinumanon kag mapinasakupon sa panuytoy sang nagadumala nga hubon, kag subong resulta, ginpakamaayo sila ni Jehova kag nag-uswag.—Binu. 8:1, 14, 15; 15:22-31; 16:4, 5; Heb. 13:17.

² Sang napatay ang mga apostoles, nagsugod ang daku nga apostasya. (2 Tes. 2:3-12) Subong sang gintagna ni Jesus sa iya parabola parte sa mga trigo kag mga gamhon, ang mga trigo (hinaplas nga mga Cristiano) sab-ugan sang mga gamhon (butig nga mga Cristiano). Sa sulod sang mga siglo, ini nga mga grupo gintugutan nga magtubo sing dungan asta sa tig-alani, “ang hingapusan sang sistema sang mga butang.” (Mat. 13:24-30, 36-43) Ang indibiduwal nga hinaplas nga mga Cristiano padayon nga ginakahamut-an ni Jesus sa sini nga tion, pero wala pa sing nagadumala nga hubon, wala pa sing maathag nga gingamit si Jesus nga palaagyan sa duta sa paghatag sing panuytoy sa iya mga sumulunod. (Mat. 28:20) Pero gintagna niya nga may matabo nga pagbag-o sa tion sang tig-alani.

³ “Sin-o gid bala ang matutom kag mainandamon nga ulipon?” Paagi sa sina nga pamangkot, ginsugid ni Jesucristo ang isa ka parabola, ukon ilustrasyon, subong bahin sang “tanda” nga iya ginhatag parte sa “hingapusan sang sistema sang mga butang.” (Mat. 24:3, 42-47) Ginpakita ni Jesus nga ining matutom nga ulipon mangin masako sa pag-aman sa katawhan sang Dios sing espirituwal nga pagkaon sa “nagakaigo nga tion.” Subong nga naggamit si Jesus sing grupo sang mga tawo—imbes nga indibiduwal—nga manguna sang unang siglo, ang matutom nga ulipon nga ginagamit ni Jesus sa hingapusan sang sistema sang mga butang indi isa ka tawo.

⁴ Sin-o ang gintangdo ni Jesus sa pagpakaon sa iya mga sumulunod? Nagakaigo lamang nga gamiton niya ang hinaplas nga mga Cristiano sa duta. Ginapatuhuyan sila sang Biblia subong “harianon nga mga saserdote” nga ginsugo nga ‘magpahayag sing lapnag sa pagkahalangdon sang Isa nga nagtawag sa ila halin sa kadudulman pakadto sa iya makatilingala nga kapawa.’ (1 Ped. 2:9; Mal. 2:7; Bug. 12:17) Ang tanan bala nga hinaplas sa duta amo ang matutom nga ulipon? Indi. Sang milagruso nga nag-aman si Jesus sing pagkaon sa mga 5,000 ka lalaki, luwas sa mga babayi kag kabataan, ginhatag niya ini sa mga disipulo, ang mga disipulo naman amo ang naghatag sa mga tawo. (Mat. 14:19) Ginpakaon niya sila paagi sa pila ka tawo. Sa karon, amo man sini ang iya paagi sa pag-aman sang espirituwal nga pagkaon.

⁵ Gani ang “matutom nga tulugyanan, ang isa nga mainandamon,” ginahuman sang gamay nga grupo sang hinaplas nga mga utod nga direkta nga nadalahig sa paghanda kag pagpanagtag sang espirituwal nga pagkaon sa tion sang presensia sang Cristo. (Luc. 12:42) Sa katapusan nga mga adlaw, ang mga hinaplas nga nagahuman sang “matutom kag mainandamon nga ulipon” magkaupod nga nagaalagad sa ulong talatapan. Sa karon, sila ang nagahuman sa Nagadumala nga Hubon sang mga Saksi ni Jehova.

⁶ Ginagamit sang Cristo ini nga hubon sa pagbalhag sang impormasyon parte sa katumanan sang mga tagna sa Biblia kag nagahatag sing suno sa tion nga panuytoy kon paano maaplikar ang mga prinsipio sa Biblia sa adlaw-adlaw nga pagkabuhi. Ining espirituwal nga pagkaon ginapanagtag sa lokal nga mga kongregasyon sang mga Saksi ni Jehova. (Isa. 43:10; Gal. 6:16) Sa panahon sang Biblia, ang masaligan nga ulipon, ukon tulugyanan, amo ang nagadumala sa balay. Sing kaanggid, ang matutom kag mainandamon nga ulipon amo ang gintugyanan sang responsibilidad sa pagdumala sa panimalay sang pagtuo. Gani ang matutom nga ulipon amo man ang nagadumala sa materyal nga mga pagkabutang, pagbantala, programa sa asembleya kag kombension, pagtangdo sang mga manugtatap nga mag-alagad sa lainlain nga katungdanan sa sulod sang organisasyon, kag pagbalhag sang mga literatura sa Biblia, tanan ini sa kaayuhan sang “panimalay.”—Mat. 24:45.

⁷ Sin-o naman ang “panimalay”? Sa simple nga hambal, sila ang ginapakaon. Sang primero, ang tanan sa panimalay mga hinaplas. Sang ulihi, nalakip sa panimalay ang dakung kadam-an sang “iban nga mga karnero.” (Juan 10:16) Ining duha ka grupo nagakaon sing pareho nga espirituwal nga pagkaon nga ginapanagtag sang matutom nga ulipon.

⁸ Sa daku nga kapipit-an, kon mag-abot si Jesus sa pagpahayag kag pagpadapat sang paghukom sa sining malauton nga sistema, itangdo niya ang matutom nga ulipon “sa tanan niya nga pagkabutang.” (Mat. 24:46, 47) Ang tanan nga miembro sang matutom nga ulipon magabaton sang ila padya sa langit. Upod sa iban nga 144,000, magaupod sila sa paggahom sang Cristo sa langit. Bisan wala na sing matutom kag mainandamon nga ulipon sa duta, magahatag sing panuytoy si Jehova kag si Jesus sa mga sakop sang Mesianikong Ginharian sa duta paagi sa gintangdo nga “mga prinsipe.”—Sal. 45:16.

⁹ May madamo kita nga rason nga ‘dumdumon ang mga nagapanguna’ kag saligan sila. Ngaa mapuslanon sa aton ang paghimo sini? Si apostol Pablo nagsiling: “Ginabantayan nila kamo subong nga sila ang manabat, agod himuon nila ini nga may kalipay kag wala nagapanghayhay, kay makahalit ini sa inyo.” (Heb. 13:17) Importante nga mangin matinumanon kita kag mapinasakupon sa panuytoy sang mga nagapanguna kay ginabantayan nila kita para sa aton espirituwal nga proteksion kag kaayuhan.

¹⁰ Subong sang narekord sa 1 Corinto 16:14, si Pablo nagsiling: “Himua ninyo nga may paghigugma ang tanan ninyo nga hilikuton.” Ang desisyon para sa katawhan sang Dios nabase sa sining nagalabaw nga kinaiya sang gugma. Parte sa gugma, ang 1 Corinto 13:4-8 nagasiling: “Ang gugma mapinasensiahon kag mainayuhon. Ang gugma indi mahisaon. Wala ini nagapabugal, wala ini nagapahambog, wala ini nagagawi sing indi nagakaigo, wala ini nagapangita sang kaugalingon nga kaayuhan. Indi ini maakigon. Wala ini nagaisip sang kahalitan. Wala ini nagakalipay sa kalautan, kundi sa kamatuoran. Nagaantos ini sang tanan nga butang, nagapati sang tanan nga butang, nagalaum sang tanan nga butang, nagabatas sang tanan nga butang. Ang gugma wala sing katapusan.” Bangod nabase sa gugma ang tanan nga desisyon para sa kaayuhan sang mga alagad ni Jehova, may rason gid kita nga magsalig sa sina nga panuytoy. Isa pa, pagpakita ini sang gugma ni Jehova.

¹¹ Pareho sang unang siglo, indi himpit nga mga lalaki ang ginagamit ni Jehova nga magdumala sa iya katawhan. Pero, gingamit sila ni Jehova sadto para matuman ang iya kabubut-on. Si Noe naghimo sang arka kag nagbantala parte sa nagahilapit nga kalaglagan sang iya adlaw. (Gen. 6:13, 14, 22; 2 Ped. 2:5) Si Moises ang gintangdo sa pagpanguna sa katawhan ni Jehova pagua sa Egipto. (Ex. 3:10) Ang indi himpit nga mga tawo gintuytuyan sa pagsulat sing Biblia. (2 Tim. 3:16; 2 Ped. 1:21) Ang paggamit ni Jehova sang indi himpit nga mga lalaki karon para giyahan ang pagbantala kag paghimo sing disipulo wala nagapaluya sang aton pagsalig sa organisasyon sang Dios. Sa baylo, napalig-on kita bangod nahibaluan naton nga kon wala ang bulig ni Jehova, indi masarangan sang organisasyon ang mga nahimo sini karon. Bangod naeksperiensiahan nila kag nabatas ang grabe nga kabudlayan, ginpakita sang matutom nga ulipon nga ang nagagiya sa mga butang amo ang espiritu sang Dios. Bugana nga ginapakamaayo ang makita nga bahin sang organisasyon ni Jehova subong. Gani, bug-os naton ini nga ginasuportahan kag ginasaligan.

¹² Ang mga gintangdo sa responsable nga mga katungdanan sa kongregasyon nagapakita sing pagsalig paagi sa malipayon nga pagbaton kag matutom nga pagtuman sang ila mga obligasyon. (Binu. 20:28) Subong mga manugbantala sang Ginharian, makugi kita nga nagapamalaybalay, nagaduaw liwat, kag nagadumala sing mga pagtuon sa Biblia. (Mat. 24:14; 28:19, 20) Para makabenepisyo sing bug-os sa bugana nga espirituwal nga pagkaon nga ginaaman sang matutom nga ulipon, nagahanda kita kag nagatambong sa Cristianong mga miting, lakip sa mga asembleya kag mga kombension. Nagabenepisyo gid kita sa pagbayluhanay sang pagpalig-on sa aton pagpakig-upod sa aton kauturan sa sini nga mga pagtilipon.—Heb. 10:24, 25.

¹³ Kon ginasuportahan naton ang organisasyon paagi sa aton materyal nga mga amot, ginapakita naton ang aton pagsalig sa sini. (Hulu. 3:9, 10) Kon makita naton nga napigaduhan ang aton kauturan, ginabuligan dayon naton sila. (Gal. 6:10; 1 Tim. 6:18) Ginahimo naton ini bangod sa utudnon nga gugma, nga alisto pirme sa mga kahigayunan nga mapakita kay Jehova kag sa iya organisasyon nga ginaapresyar naton ang kaayo nga aton nabaton.—Juan 13:35.

¹⁴ Ginapakita man naton nga nagasalig kita sa organisasyon paagi sa pagsuporta sa mga desisyon sini. Nagalakip ini sa mapainubuson nga pagsunod sa panuytoy sang mga gintangduan nga magdumala, subong sang mga manugtatap sang sirkito kag mga gulang sa kongregasyon. Ini nga mga utod nalakip sa “mga nagapanguna,” nga dapat naton tumanon kag pasakupan. (Heb. 13:7, 17) Bisan pa indi naton mahangpan sing bug-os ang mga rason sa pila ka desisyon, nahibaluan naton nga ang pagsakdag sa sini para sa aton dayon nga kaayuhan. Subong resulta, ginapakamaayo kita ni Jehova sa aton pagtuman sa iya Pulong kag sa iya organisasyon. Gani, ginapakita naton ang aton pagpasakop sa Agalon, nga si Jesucristo.

¹⁵ Huo, may madamo kita nga rason sa pagsalig sa matutom kag mainandamon nga ulipon. Si Satanas, ang dios sining sistema sang mga butang, nagapanikasog gid sa pagpakahuya sa ngalan kag organisasyon ni Jehova. (2 Cor. 4:4) Indi magpadaug sa malaut nga mga taktika ni Satanas! (2 Cor. 2:11) Nahibaluan niya nga “malip-ot na lamang ang iya tion” antes sia itagbong sa kadadalman, kag determinado gid sia nga patalikdon sa Dios ang madamo sa katawhan ni Jehova. (Bug. 12:12) Pero samtang ginapabaskog ni Satanas ang iya mga panikasog, dapat nga labi pa gid kita nga makigsuod kay Jehova. Kabay nga magsalig kita kay Jehova kag sa iya ginagamit nga palaagyan sa paggiya sa iya katawhan karon. Paagi sini, mahiusa kita subong mag-ululutod.