Sin-o ang Matuod nga mga Ebanghelisador?

BISAN diin ka man nagapuyo, ang imo kabuhi naapektuhan sa nanuhaytuhay nga paagi sang pag-ebanghelyo nga ginsugdan ni Jesucristo. Apang indi tanan sang nagapangangkon nga nagatiglawas kay Cristo nagapalapnag sing matuod nga mensahe sang Pulong sang Dios. Indi tanan sang mga ebanghelisador—sang karon ukon sang una—may kakugi sang pagkamisyonero nga kasubong sang mga disipulo ni Cristo sang unang siglo.

Matuod, ginabanta nga 220,000 ang mga misyonero sang mga iglesia sang Cristiandad sa kalibutan karon, apang nakapasar bala ining mga misyonero sa pasinawan sang matuod nga mga ebanghelisador? Ang Cristianong pag-ebanghelyo wala gintuyo nga mangin isa ka porma sang espirituwal nga imperyalismo, nga sa diin ang mga manugbantala magapangabudlay subong mga ahente sang nagapangsakop nga mga kagamhanan sa kalibutan. (Ipaanggid ang Santiago 4:4.) Dugang pa, ang matuod nga Cristianong pag-ebanghelyo wala man nagasakdag sa ginatawag nga teolohiya sang kahilwayan kag nagapanikasog para sa radikal nga mga pagbag-o sa politikal kag sosyal nga mga sistema; wala man ginhunahuna ni Jesus ang nagapusdak-pusdak sing Biblia nga elektroniko nga mga manugsermon nga nagahambal sang ila bersion sang “teolohiya sang kabuganaan” sa TV kag radyo. (Juan 17:16; Mateo 6:24) Ti, ano nian ang ebanghelisador?

Ano ang Matuod nga Pag-ebanghelyo?

Sa orihinal nga mga pamulong sang Biblia, nga Hebreo kag Griego, ang ebanghelisador isa ka manugbantala sing makalilipay nga balita, ukon maayong balita.a Maayong balita sang ano? Sang kaluwasan, sang matarong nga paggahom, kag sang paghidait. Halimbawa, ang Isaias 52:7 nagasiling: “Daw ano katahom sa mga bukid ang mga tiil sang nagadala sing maayong balita, nga nagabantala sing paghidait, nga nagadala sing maayong balita sang kaayuhan, nga nagabantala sing kaluwasan, nga nagasiling sa Sion: ‘Ang imo Dios nagahari!’”

Dugang pa, sang matawo ang Anak sang Dios, ang anghel nagpahibalo sa mga manugbantay sing karnero: “Dili kamo mahadlok, kay, yari karon! ginabantala ko sa inyo ang maayong balita tuhoy sa dakung kalipay nga matigayon sang tanan nga katawhan, kay natawo sa inyo karon ang isa ka Manluluwas, nga amo si Cristo nga Ginuo.” (Lucas 2:10, 11) Sa amo, ang maayong balita nasentro kay Jesucristo.

Mga 30 ka tuig sang ulihi, nagsulod si Jesus sa sinagoga sa siudad sang Nasaret sa adlaw nga Inugpahuway kag nagtindog didto agod magbasa. “Ginhatag sa iya ang tolon-an ni Isaias nga manalagna, kag ginbukad niya ang tolon-an kag nakita niya ang bahin diin nasulat: ‘Ang espiritu ni Jehova yari sa akon, bangod nga ginhaplas niya ako sa pagwali sing maayong balita.’” Sang makatapos sia sa pagbasa, “ginlukot niya ang linukot, kag gin-uli ini sa manugbulig kag naglingkod; kag ang mga mata sang tanan sa sinagoga nag-ungot sa iya. Kag nagsugod sia sa pagsiling sa ila: ‘Ining kasulatan nga bag-o lang ninyo nabatian natuman karon.’” Si Jesus matuod gid nga isa ka manugbantala sing maayong balita, kag ang maayong balita nga iya ginwali nagsentro sa “ginharian sang Dios.”—Lucas 4:17-21; 8:1.

Ginpaanggid ni Jesus ang iya ebanghelyo nga hilikuton sa alanyon kag nagsiling nga “ang alanyon bugana, apang pila lamang ang mangangani.” (Mateo 9:36-38) Gani, ginhanas kag ginsugo niya ang iya mga sumulunod nga mangin mga ebanghelisador man. (Mateo, kapitulo 10; Lucas, kapitulo 10) Subong sang ila Manunudlo, ang sentro sang ila pagbantala amo “ang ginharian sang mga langit.” (Mateo 10:7) Apang, indi lamang ang mga apostoles ni Jesus ang nagbantala sang Ginharian.

Sang mag-utwas ang paghingabot batok sa natukod pa lang sadto nga Cristianong kongregasyon sa siudad sang Jerusalem, ang maragtason nga rekord sa Binuhatan 8:1 nagaasoy nga ang “tanan nag-aplaag sa bug-os nga mga ginsakpan sang Judea kag Samaria, luwas ang mga apostoles.” Nanago bala yadtong nag-aplaag nga mga disipulo kag nag-uklo sa kahadlok? Wala, kay ang bersikulo 4 nagapadayon: “Ang mga nag-aplaag nagpanglakatan nga nagawali sing maayong balita sang pulong.” Sa sining paagi ang dakung alanyon gin-ani sang unang siglo nga mga ebanghelisador.

Sing makawiwili, ang libro nga A Theological Word Book of the Bible nagasiling: “Sa BT [Bag-ong Testamento] ang pagbantala wala sing kaangtanan sa paghatag sing mga sermon sa mga kombertido, nga amo sa karon ang masami nga kahulugan sini, kundi tuhoy ini sa pagwali sing ‘maayong balita sang Dios’ sa di-Cristiano nga kalibutan.” Sa amo, ang tanan nga Cristiano mga ebanghelisador, kag ang ila pag-ebanghelyo wala nalimitehan sa mga masigkatumuluo.

Apang ano ang tema sang pag-ebanghelyo karon? Gintagna ni Jesus para sa aton adlaw nga “ibantala ining maayong balita sang ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14) Kag ginsugo ni Jesus indi lamang ang mga nakakita sang pagkayab niya kundi ang iya man palaabuton pa sadto nga mga sumulunod nga mangin “mga saksi [niya] sa Jerusalem kag sa bug-os nga Judea kag Samaria kag tubtob sa ukbong sang duta.”—Binuhatan 1:8; tan-awa man ang Mateo 28:19, 20.

Sa amo, ang tema sang mensahe sang isa ka ebanghelisador amo ang maayong balita sang Ginharian ni Jehova nga Dios sa mga kamot sang iya gintangdo nga Manuggahom, si Jesucristo, ang Prinsipe sang Paghidait. (Isaias 9:6) Kag ginalakip sini ang tanan nga kamatuoran nga ginhambal ni Jesus kag ginrekord sang iya mga disipulo. Ang matuod nga mga ebanghelisador karon matutom nga nagaunong sa sining isa ka tema.

Sin-o ang Nagasakdag sang Matuod nga Pag-ebanghelyo?

Ang matuod nga mga ebanghelisador nagasimba kay Jehova subong Dios. Sia ang Daku nga Ebanghelisador; sia ang Sumalakdag sa pagbantala sing maayong balita. (Galacia 3:8; Bugna 10:7) Kag ginahandum niya nga ang tanan nga katawhan bisan diin makabati kag magtuman sa iya mensahe. “Matuod gid ginahantop ko nga ang Dios wala sing ginapasulabi,” siling ni apostol Pedro sa isa ka diutay nga kadam-an sa pantalan sang Caesarea sa Mediterraneo. “Apang sa tagsa ka pungsod ang nagakahadlok sa iya kag nagahimo sing katarungan kalahamut-an sa iya. Ginpadala niya ang pulong sa mga anak sang Israel agod iwali sa ila ang maayong balita sang paghidait paagi kay Jesucristo: ining Isa amo ang Ginuo sang tanan nga iban pa.”—Binuhatan 10:34-36.

Ginatagna sa Biblia nga sa aton adlaw ang mga ebanghelisador magaani liwat sing daku nga alanyon. (Bugna 14:15, 16) Basaha sa masunod nga artikulo ang pila sang mga eksperiensia sang mga Saksi ni Jehova samtang nagapakigbahin sila sa sining hilikuton sa pagpangani. Usisaa ang rekord sang ila pagbantala sa pahina 12 tubtob sa 15 sini nga magasin. Nian hambala ang mga Saksi ni Jehova kon magduaw sila sa inyo puluy-an kag tan-awa kon wala kamo nagaugyon nga sila ang matuod nga mga ebanghelisador karon.

[Footnote]