Mga Saksi ni Jehova​—⁠Matuod nga mga Ebanghelisador

¹ Ginhatag ni Jesucristo sa tanan niya nga disipulo ang salabton nga mag-ebanghelyo, nagasugo sa ila ilabi na nga ibantala ang maayong balita sang Ginharian. (Mat. 24:​14; Binu. 10:42) Ang iya unang mga disipulo nagpahamtang sing sulundan sa sini kay nagpamulong sila tuhoy sa Ginharian sa walay langan​—⁠indi lamang sa mga duog sang pagsimba kundi bisan diin man nga may masugilanon sila nga mga tawo sa publiko nga mga duog ukon sa pamalaybalay. (Binu. 5:​42; 20:20) Subong mga Saksi ni Jehova sa karon, ginapamatud-an naton ang aton kaugalingon subong matuod nga Cristianong mga ebanghelisador, nga nagabantala sang mensahe sang Ginharian sa 232 ka kadutaan kag nagabawtismo sa kapin sa isa ka milyon ka bag-ong disipulo sa sulod lamang sang tatlo ka tuig! Ngaa nangin tuman ka madinalag-on ang aton ebanghelyo nga hilikuton?

² Ang Maayong Balita Nagapahalipay sa Aton: Ang mga ebanghelisador mga manugbantala, ukon mga mensahero, sang maayong balita. Bangod sina, makalilipay ang aton pribilehiyo nga ibantala ang Ginharian ni Jehova​—⁠ang lamang matuod nga maayong balita nga mahatag sa nasit-an nga katawhan. Nakunyag kita sa abanse nga ihibalo nga natigayon naton tuhoy sa bag-ong mga langit nga magagahom sing matarong sa bag-ong duta nga ginahuman sang matutom nga katawhan sa nagapakari nga Paraiso. (2 Ped. 3:​13, 17) Kita lamang ang nakaagom sini nga paglaum, kag nalangkag kita nga ipaambit ini sa iban.

³ Ang Matuod nga Gugma Nagapahulag sa Aton: Ang pag-ebanghelyo isa ka nagaluwas-kabuhi nga hilikuton. (Roma 1:16) Amo ina kon ngaa nagakalipay kita sing daku sa pagpalapnag sang mensahe sang Ginharian. Subong matuod nga mga ebanghelisador, ginahigugma naton ang katawhan, kag nagapahulag ina sa aton nga ipaambit ang maayong balita sa ila​—⁠sa aton pamilya, kaingod, kilala, kag sa madamo pa kon mahimo. Ang bug-os kalag nga paghimo sini amo ang isa sang pinakamaayo nga paagi nga mapakita naton ang matuod nga gugma sa iban.​—⁠1 Tes. 2:⁠8.

⁴ Ang Espiritu Sang Dios Nagasakdag sa Aton: Ang Pulong sang Dios nagapasalig sa aton nga kon ginahimo naton ang hilikuton nga pagtanom kag pagbunyag sing binhi sang Ginharian, si Jehova amo ang “nagapatubo sini.” Amo gid sina ang nakita naton nga nagakatabo sa aton organisasyon karon. (1 Cor. 3:​5-7) Ang espiritu sang Dios amo ang nagasakdag sa aton sa aton pag-ebanghelyo nga hilikuton kag nagahatag sa aton sing daku nga kadalag-an.​—⁠Joel 2:​28, 29.

⁵ Bangod sang pagpalig-on sang 2 Timoteo 4:5 nga ‘himuon ang hilikuton sang ebanghelisador,’ kabay nga pahulagon kita sang aton gugma para sa tanan nga katawhan nga ibantala ang makalilipay nga maayong balita sang Ginharian sa tanan nga kahigayunan, nagasalig nga si Jehova padayon nga magapakamaayo sang aton hilikuton.