Disiplina nga Makapatubas sing Mahidaiton nga Bunga

“Wala sing disiplina nga sa karon makalipay, kundi masakit; apang sa ulihi nagapatubas ini sing mahidaiton nga bunga, nga amo ang pagkamatarong, sa mga nahanas sa sini.”—HEBREO 12:11.

 1, 2. (a) Suno sa Hebreo 12:9-11, ano ang mahigugmaon nga ginaaman sang Dios? (b) Ano ang isa ka halimbawa sang disiplina, kag ano ang magaresulta sa sini?

DUMDUMA ang mga adlaw sang imo pagkabata. Madumduman mo bala ang pagdisiplina sa imo sang imo mga ginikanan? Madumduman ina sang kalabanan sa aton. Gingamit ina ni apostol Pablo subong halimbawa sang nagakomento tuhoy sa disiplina halin sa Dios, nga makita naton sa Hebreo 12:9-11.

² Ang katulad sang amay nga pagdisiplina sang Dios, nga mahimo makaapektar sang aton espirituwal nga pagkabuhi, madamo sing dagway. Ang isa amo ang iya kahimusan sa pagpaguwa sa Cristianong kongregasyon sang isa ka tawo nga indi na maluyag sa pagpahisuno sa mga talaksan sang Dios ukon sa isa nga nagadumili sa paghimo sina. Ang tawo nga ginsabdong ukon gindisiplina sing malig-on mahimo magahinulsol kag magapanumbalik. Busa, ang kongregasyon sang mga matutom ginadisiplina man sa bagay nga maton-an nila ang importansia sang pagpahisuno sa mataas nga mga talaksan sang Dios.—1 Timoteo 1:20.

 3. Ano ang reaksion sang iban sa ideya sang pagdis­fel­low­ship?

³ ‘Apang,’ ayhan mamangkot ang isa, ‘indi bala masakit ang magpaguwa kag nian ang indi magpakighambal sa isa ka ginpaguwa nga tawo?’ Nag-utwas ina nga pagtamod sa isa ka kasaba sa hukmanan sining karon lang nahanungod sa isa ka babayi nga ginpadaku sang mga ginikanan nga mga Saksi ni Jehova. Ang iya mga ginikanan gindis­fel­low­ship. Sia indi dis­fel­low­ship, apang boluntaryo sia nga nag-untat sa pagpakig-upod paagi sa pagsulat nga mahalin na sia sa kongregasyon. Sing nahisuno, ginpahibalo ang kongregasyon nga indi na sia isa ka Saksi ni Jehova. Nagsaylo sia sa malayo, apang mga tinuig sang ulihi nagbalik sia kag nasapwan niya nga ang lokal nga mga Saksi indi na makigsugilanon sa iya. Gani gindala niya ang bagay sa hukmanan. Ano ang resulta, kag paano ka maapektuhan sini? Agod mahangpan ini sing maayo, tan-awon naton kon ano ang ginasiling sang Biblia nahanungod sa topiko may kahilabtanan sa pagdis­fel­low­ship.

Ngaa May Amo Sini Kalig-on nga Tindog?

 4. Ano kon kaisa ang nagakatabo sa iban sa kongregasyon? (Galacia 6:1; Judas 23)

⁴ Kalabanan sang matuod nga mga Cristiano matutom nga nagasakdag sa Dios kag sa iya matarong nga mga sugo. (1 Tesalonica 1:2-7; Hebreo 6:10) Apang, kon kaisa, ang isa nagapahilayo sa banas sang ­kamatuoran. Halimbawa, walay sapayan sang bulig gikan sa Cristianong mga gulang, ayhan dimahinulsulon nga ginalapas niya ang mga sugo sang Dios. Ukon ayhan ginasikway niya ang pagtuo paagi sa pagpanudlo sing sayop nga mga doktrina ukon paagi sa pagbulag ukon pagdis­asso­ciate sang iya kaugalingon gikan sa kongregasyon. Nian ano ang dapat nga himuon? Amo sina ang natabo bisan sang buhi pa ang mga apostoles; busa, tan-awon naton kon ano ang ginsulat nila nahanungod sini.

 5, 6. (a) Ano ang maalamon nga laygay nahanungod sa pagpakig-angot sa mga nakahimo sing mabug-at nga mga sala kag wala nagahinulsol? (Mateo 18:17) (b) Ano nga mga pamangkot ang ginaatubang naton?

⁵ Sang ang isa ka tawo sa Corinto dimahinulsulon nga imoral, ginsilingan ni Pablo ang kongregasyon: “Dili kamo magpakig-upod sa bisan kay sin-o nga ginhingalanan nga utod kon sia makihilawason ukon mahamkunon ukon diwatahan ukon mapasipalahon ukon palahubog ukon malugus, bisan sa pagkaon dili kamo magpakig-upod sa iya.” (1 Corinto 5:11-13) Amo man sina ang himuon sa mga apostata, kaangay ni Himeneo: “Isikway mo ang tawo nga nagapauswag sing sekta, sa tapos sang makaisa ukon makaduha nga laygay; nga nahibal-an mo nga ang among tawo nagtalang kag nagapakasala.” (Tito 3:10, 11; 1 Timoteo 1:19, 20) Ina nga paglikaw nagakabagay man para sa bisan sin-o nga nagasikway sa kongregasyon: “Naghalin sila sa aton, apang indi sila tagaaton; kay kon sila tagaaton, nagpadayon kuntani sila kaupod naton. Apang naghalin sila agod nga mapahayag nga sila tanan indi tagaaton.”—1 Juan 2:18, 19.

⁶ Ginalauman nga magahinulsol sia agod batunon sia liwat. (Binuhatan 3:19) Apang, mahimo bala nga ang mga Cristiano makig-upod sa iya sing limitado, ukon kinahanglan bala ang bug-os nga paglikaw sa iya? Kon amo, ngaa?

Bug-os nga Pag-utod?

 7. Paano magkatuhay ang aton paggawi tuhoy sa duha ka klase sang mga makasasala?

⁷ Ang mga Cristiano masami nga indi malayo sa mga tawo. Kinaandan kita nga nagapakigsugilanon sa mga isigkatawo, sa mga kaupod sa palamugnan, sa mga kabutho, kag sa iban pa kag nagapanaksi sa ila bisan pa nga ang iban sa ila ‘mga makihilawason, mga mahamkunon, mga malugus, ukon mga diwatahan.’ Si Pablo nagsulat nga indi naton sila malikawan sing bug-os, ‘kon indi dapat kita magguwa sa kalibutan.’ Apang, naglaygay sia nga tuhay ini upod sa “utod” nga nagkabuhi sing kaangay sina: “Dili kamo magpakig-upod sa bisan kay sin-o nga ginhingalanan nga utod kon [nagbalik sia sa sina nga mga buhat], bisan sa pagkaon dili kamo magpakig-upod sa iya.”—1 Corinto 5:9-11; Marcos 2:13-17.

 8. Ano nga laygay ang ginhatag ni apostol Juan nahanungod sa paglikaw?

⁸ Sa sinulatan ni apostol Juan, masapwan naton ang kaanggid nga laygay nga nagapadaku kon daw ano kaid-id nga likawan sang mga Cristiano ang mga subong sa ila: “Ang bisan sin-o nga nagalapas kag wala nagapabilin sa panudlo ni Cristo wala sang Dios . . . Kon may tawo nga nagaabot sa inyo kag wala nagadala sining panudlo, dili pagbatuna sia sa inyo balay kag dili pag-abiabiha sia. Kay ang nagaabiabi [Griego, khaiʹro] sa iya nagaambit sa iya mga buhat nga malaut.”a—2 Juan 9-11.

 9, 10. (a) Ano ang natabo sa dimahinulsulon nga mga manuglapas sing sugo sa Israel? (b) Paano naton dapat tamdon ang kahimusan karon sa pagpakig-angot sa mga tawo nga ginpaguwa bangod sang wala ginahinulsuli nga sala? (2 Pedro 2:20-22)

⁹ Ngaa inang malig-on nga tindog nagakaigo bisan sa karon? Ti, binagbinaga ang pag-utod nga ginmando sang Kasuguan sang Dios sa Israel. Sa serioso nga mga butang, ang hungod nga mga manuglapas ginpatay. (Levitico 20:10; Numeros 15:30, 31) Kon matabo ina, ang iban, bisan ang mga himata, indi na makapakigsugilanon sa patay nga manuglapas sang kasuguan. (Levitico 19:1-4; Deuteronomio 13:1-5; 17:1-7) Bisan pa nga ang matutom nga mga Israelinhon sadto anay normal nga mga tawo nga may balatyagon kaangay naton, nahibal-an nila nga ang Dios makatarunganon kag mahigugmaon kag ginaamligan sang iya Kasuguan ang ila katinlo sa moral kag espirituwal. Gani sarang nila mabaton nga ang kahimusan niya sa pag-utod sa mga nakasala maayo kag makatarunganon nga butang.—Job 34:10-12.

¹⁰ Makasiguro man kita nga ang kahimusan sang Dios nga ang mga Cristiano indi makig-upod sa isa nga ginpaguwa bangod sang indi paghinulsol sa sala isa ka maalamon nga pangamlig para sa aton. “Panghugas kamo gikan sa daan nga tapay, agod nga mangin bag-o kamo nga linamas, subong nga wala kamo sing tapay.” (1 Corinto 5:7) Paagi man sa paglikaw sa mga tawo nga hungod nga nagbulag (dis­asso­ciate) sang ila kaugalingon, ang mga Cristiano ginaamligan gikan sa posible nga mamulayon, dimainapresyahon, ukon apostata nga mga pagtamod.—Hebreo 12:15, 16.

Kamusta ang mga Himata?

11, 12. (a) Ano ang epekto sa Israelinhon nga mga himata kon ang nakasala ginpatay? (b) Iilustrar ang mga kaayuhan sang pagkamatinumanon.

¹¹ Pat-od nga nahibaluan sang Dios nga ang pagpatuman sang iya matarong nga mga sugo tuhoy sa pag-utod sa mga nakasala masami nga nagadalahig kag nagaapektar sa mga himata. Subong sang ginsambit sa ibabaw, kon ang Israelinhon nga makasasala ginpatay, indi na posible ang asosasyon sang pamilya. Sa katunayan, kon ang anak nga lalaki palahubog ukon hakugan, ang iya mga ginikanan magadala sa iya sa atubangan sang mga hukom, kag kon indi sia maghinulsol, ang mga ginikanan magapakigbahin sa makatarunganon nga pagpatay sa iya, ‘sa amo mapahilayo ang malaut gikan sa tunga sang Israel.’ (Deuteronomio 21:18-21) Mahangpan ninyo nga indi ini mahapos para sa ila nga himuon. Handurawa man kon ano ang batyagon sang mga utod nga lalaki, mga utod nga babayi, ukon mga lolo kag lola sang nakasala. Apang, ang pagbutang nila sang katutom sa ila matarong nga Dios nga una sa pagpalangga sa pamilya mahimo nga makaluwas sang kabuhi para sa ila.

¹² Dumduma ang natabo kay Core, isa ka lider nga nagrebelde batok sa pagpangulo sang Dios paagi kay Moises. Sa iya himpit nga hustisya, ginpat-od sang Dios nga mapatay si Core. Apang ang tanan nga mga matutom ginlaygayan: “Halin kamo gikan sa mga layanglayang sini nga mga tawo nga malaut kag dili magtandug sing bisan ano nga ila, basi mapapas kamo sa tanan nila nga sala.” Ang mga himata nga wala magsunod sa paandam sang Dios napatay kaupod sang mga rebelde. Apang ang iban nga mga himata ni Core maalamon nga nagpakamaayo nga mangin matutom kay Jehova, nga nagluwas sang ila kabuhi kag nagdul-ong sa ulihi nga mga pagpakamaayo.—Numeros 16:16-33; 26:9-11; 2 Cronica 20:19.

13. Ano ang himuon sang matutom nga mga Cristiano kon ang suod nga katapo sang pamilya gindis­fel­low­ship ukon nagdis­asso­ciate sang iya kaugalingon?

¹³ Ang pag-utod gikan sa Cristianong kongregasyon wala nagahilabot sa gilayon nga kamatayon, gani ang relasyon sang pamilya nagapabilin. Busa, ang tawo nga nadis­fel­low­ship ukon nagdis­asso­ciate sang iya kaugalingon mahimo nga magaistar gihapon sa balay kaupod sang iya Cristianong asawa kag matutom nga kabataan. Ang pagtahod sa mga paghukom sang Dios kag sa aksion sang kongregasyon magapahulag sa asawa kag kabataan nga kilalahon nga bangod sang iya ginhimo kag bangod sang pagpaguwa sa iya, ginbayluhan niya ang espirituwal nga wagkus nga nagaluntad anay sa tunga nila. Apang, bangod ang pagdis­fel­low­ship sa iya wala nagatapos sang ila relasyon sa dugo ukon kaangtanan sa pag-asawahay, ang ila normal nga pagpakig-angot kag pagpalangga sang pamilya nagapadayon.

14. Anong balaan nga laygay ang dapat magaimpluensia sang aton kaangtanan sa nadis­fel­low­ship ukon nagdis­asso­ciate nga himata sa guwa sang suod nga pamilya?

¹⁴ Tuhay ang kahimtangan kon ang nadis­fel­low­ship ukon nagdis­asso­ciate isa ka himata nga nagaistar sa guwa sang pamilya kag puluy-an. Ayhan posible nga indi na gid makig-angot sa himata. Bisan pa nga may pila ka bagay sa pamilya nga nagakinahanglan sing pagpakig-angot, dapat gid ini nga latiran, nahisuno sa balaan nga prinsipio: “Dili kamo magpakig-upod sa bisan kay sin-o nga ginhingalanan nga utod kon sia makihilawason ukon mahamkunon [ukon nakasala sing iban pa grabe nga sala], . . . bisan sa pagkaon dili kamo magpakig-upod sa iya.”—1 Corinto 5:11.

15. Paano mapunggan sang mga himata ang impluensia sang mga emosyon sa sina nga hitabo? (Salmo 15:1-5; Marcos 10:29, 30)

¹⁵ Sing halangpunon, mahimo nga mabudlay ini bangod sang mga emosyon kag relasyon sang pamilya, subong sang gugma sang mga lolo kag mga lola sa ila mga apo. Apang, isa ini ka pagtilaw sa katutom sa Dios, subong sang ginsiling sang utod nga ginbalikwat sa pahina 26. Ang bisan sin-o nga nagabatyag sing kasubo kag kasakit nga gintuga sang nadis­fel­low­ship nga himata mahimo nga mapaumpawan kag mapalig-on sa halimbawa nga ginpahamtang sang mga himata ni Core.—Salmo 84:10-12.b

Desisyon sang Hukmanan

16-18. Ano nga desisyon ang nalab-ot sang kasaba sa hukmanan nga ginsambit kaina, kag anong dugang nga opinyon ang ginhatag sang hukmanan?

¹⁶ Ayhan luyag ninyo mahibal-an ang resulta sang kasaba sa hukmanan nga nagadalahig sa babayi nga naakig bangod indi na makigsugilanon sa iya ang iya anay mga abyan sa tapos niya ginpili nga sikwayon ang relihion, kag nagbulag sang iya kaugalingon sa kongregasyon.

¹⁷ Sa wala pa magpadayon ang pagbista sa kasaba, ang fed­eral dis­trict ­court nagdesisyon batok sa iya. Ina nga desisyon ginpasad sa pagtamod nga ang mga hukmanan wala nagapasilabot sa mga pagdisiplina sang simbahan. Nian nag-apelar sia. Ang nahiusa nga desisyon sang fed­eral ­court of ap­pealsc ginpasad sa mas masangkad nga katuyuan sang Una nga Kaligwatan sang mga kinamatarong (sa Konstitusyon sang E.U.): “Bangod ang buhat nga paglikaw bahin sang pagtuluohan sang Saksi ni Jehova, nasapwan namon nga ang probisyon sang ‘hilway nga pagbuhat’ sa Konstitusyon sang Estados Unidos . . . nagapugong [sa iya] sa pagdaug. Ang mga akusado may ginaamligan sang konstitusyon nga pribilehiyo sa paghimo sang buhat sa paglikaw. Sing nahisantu, ginalig-on namon” ang una nga desisyon sang hukmanan sang distrito.

¹⁸ Ang opinyon sang hukmanan nagapadayon: “Ang paglikaw isa ka buhat nga ginahimo sang mga Saksi ni Jehova nahisuno sa pagpatpat nila sa kanoniko nga teksto, kag indi kami hilway sa pagpatpat liwat sina nga teksto . . . Ang mga akusado may kinamatarong sa hilway nga pagbuhat sang ila relihioso nga pagtuluohan . . . Masami nga wala ginausisa sing maayo sang mga hukmanan ang kaangtanan sa sulod sang mga katapo (ukon mga katapo anay) sang iglesia. Ang mga iglesia ginahatagan sing daku nga kahilwayan kon ginapatuman nila ang disiplina sa mga katapo ukon mga katapo anay. Nagaugyon kami sa pagtamod ni Huwes Jack­son [sang Korte Suprema sang E.U. anay] nga ang ‘[r]elihioso nga mga aktibidad nga nagahilabot lamang sa mga katapo sang pagtuluohan amo kag dapat mangin hilway—nga halos hilway sang sa bisan ano nga butang.’ . . . Ang mga katapo sang Iglesia nga ginpamat-uran [niya] nga bayaan nagpamat-od nga indi na nila luyag makig-upod sa iya. Ginapatihan namon nga hilway sila sa paghimo sina nga pamat-od.”

19, 20. Ngaa ang nga tawo nga ginpaguwa sa kongregasyon wala sa posisyon nga magsukot sing kuarta bangod sang mga halit sa hukmanan?

¹⁹ Ginkilala sang ­court of ap­peals nga bisan pa nasubuan ang babayi bangod namat-od ang iya anay mga kakilala nga indi na makigsugilanon sa iya, “ang pagtugot sa iya nga mabawi ang dimahangpan ukon emosyonal nga mga halit indi nahisuno sa konstitusyon nga magadumili sa mga Saksi ni Jehova sa hilway nga pagbuhat sang relihion . . . Ang konstitusyonal nga garantiya sang hilway nga pagbuhat sang relihion nagakinahanglan nga tugutan sang katilingban ang sahi sang mga halit nga ginaantos [niya] subong bayad nga takus ibayad agod amligan ang kinamatarong sang relihiosong kinatuhayan nga ginaagom sang tanan nga banwahanon.” Ini nga desisyon, sa bisan paano, nakabaton sing daku pa nga bug-at kutob sang ginpapanaug ini. Paano? Nagpetisyon sang ulihi ang babayi sa pinakamataas nga hukmanan agod pamatian ang kaso kag ayhan baliskaron ang desisyon batok sa iya. Apang sang Nobiembre 1987, ang Korte Suprema sang Estados Unidos nagdumili sa paghimo sina.

²⁰ Busa ining importante nga hukmanan nagpamat-od nga ang tawo nga gindis­fel­low­ship ukon nagdis­asso­ciate indi makakuha sing bayad sa mga halit gikan sa mga Saksi ni Jehova sa hukmanan sang kasuguan nga ginlikawan sia.d Bangod ginahimo sang kongregasyon ang himpit nga mga panuytoy nga mabasa naton tanan sa Pulong sang Dios kag ginaaplikar ini, ang isa nagbatyag nga may nawasi nga tuga sang iya mismo nga ginhimo.

Disiplina—Madamo ang Nakabenepisyo

21. Ngaa kinahanglan ang pagkatimbang sa pagtamod sa pagdis­fel­low­ship?

²¹ Ang iban nga mga taga-guwa, kon mabatian ang nahanungod sa pagdis­fel­low­ship, nahuyog sa pagsimpatiya sa nakasala nga indi na makapakigsugilanon sa mga katapo sang Cristianong kongregasyon. Apang indi bala nga ina nga simpatiya wala sa lugar? Binagbinaga ang posible nga benepisyo nga mabaton sang nakasala kag sang iban.

22, 23. Iilustrar ang importansia kag balor sang pagtuman sa Dios sa aton pagtamod sa gindis­fel­low­ship nga mga tawo.

²² Halimbawa, nabasa naton sa pahina 26 ang komento ni Lynette tuhoy sa pamat-od niya nga ‘utdon sing bug-os ang iya pagpakig-upod’ sa iya nadis­fel­low­ship nga utod nga babayi nga si Margaret. Sia kag ang iya Cristianong mga himata ‘nagpati nga ang dalanon ni Jehova amo ang labing maayo.’ Kag amo gid!

²³ Ang utod ni Lynette nagsiling sang ulihi sa iya: ‘Kon gintamod mo sing pasapayan ang pagdis­fel­low­ship, kuntani wala ako maghimo sing mga tikang sa pagpanumbalik sing mas maaga sang sa ginhimo ko. Bangod bug-os nga napahilayo sa mga hinigugma kag suod nga mga kakilala sa kongregasyon nagtuga ini sing makusog nga handum nga maghinulsol. Narealisar ko kon daw ano kasayop ang akon ginhimo kag kon daw ano ka serioso ang pagtalikod ko kay Jehova.’

24. Paano ang reaksion sang isa pa ka utod sa pagdis­fel­low­ship nag-apektar sa iya kag sa iban?

²⁴ Sa iban pa nga kaso, ang mga ginikanan ni Lau­rie gindis­fel­low­ship. Apang nagsiling sia: ‘Ang akon pagpakig-upod sa ila wala gid mag-untat kundi nagdugang pa. Sa pagligad sang tion, nangin diaktibo ako. Naglab-ot ako sa punto nga wala na nagatambong sa mga miting.’ Nian nabasa niya ang materyal sa Ang Lalantawan sang Marso 1 kag 15, 1982, nga nagpadaku sang laygay sa 1 Corinto 5:11-13 kag 2 Juan 9-11. “Daw subong bala nga ginsindihan sa akon ang isa ka bombilya,” sulat niya. ‘Nahibal-an ko nga dapat ako maghimo sing pila ka pagbag-o. Nahangpan ko sing maayo pa ang kahulugan sang Mateo 10:34-36. Ang akon desisyon indi mahapos para sa akon pamilya nga batunon, para sa akon anak nga lalaki, singko anyos, nga amo lamang ang lalaki, kag ginahigugma gid nila sia.’ Ginalauman nga ang pagkawasi sina nga pagpakig-upod magatandog sa tagipusuon sang mga ginikanan, kaangay sang kay Margaret. Apang, ang disiplina nga nadalahig nagbulig kay Lau­rie: ‘Nagaguwa na liwat ako sa latagon. Ang akon pag-asawahay kag pamilya mas mabakod bangod sang pagbag-o ko, kag mabakod man ako.’

25. Ano ang pagtamod sang nakapanumbalik nga tawo tuhoy sa disiplina sang Dios?

²⁵ Ukon binagbinaga ang balatyagon sang isa nga gindis­fel­low­ship kag sang ulihi nakapanumbalik. Si Sandi nagsulat: ‘Nagapasalamat ako sa inyo tungod sa tuman ka mabuligon kag makatudlo nga mga artikulo [nga ginsambit sa ibabaw] nahanungod sa pagsabdong kag pagdis­fel­low­ship. Nalipay ako nga ginahigugma ni Jehova ang iya katawhan sa bagay nga ginatatap niya nga ang iya organisasyon ginahuptan nga matinlo. Ang daw mapintas sa mga taga-guwa kinahanglanon kag isa gid ka mahigugmaon nga butang nga himuon. Nagapasalamat ako nga ang aton langitnon nga Amay isa ka mahigugmaon kag mapinatawaron nga Dios.’

26. Anong matarong nga bunga ang magaresulta gikan sa pagbaton sing disiplina? (Salmo 94:10, 12)

²⁶ Busa ang aton Dios nga nagasugo nga ang dimahinulsulon nga makasasala pagguwaon sa kongregasyon mahigugmaon man nga nagapakita nga ang makasasala sarang makapanumbalik sa kongregasyon kon maghinulsol sia kag magpanumbalik. (Ang isa ka tawo nga nagdis­asso­ciate sarang man makapangabay nga mangin bahin liwat sang kongregasyon.) Pagkatapos sina mapahalipay sia sang mga Cristiano nga magalig-on sang ila gugma sa iya. (2 Corinto 2:5-11; 7:8-13) Sa pagkamatuod, subong ini sang ginsiling ni Pablo: “Wala sing disiplina nga sa karon makalipay, kundi masakit; apang sa ulihi nagapatubas ini sing mahidaiton nga bunga, nga amo ang pagkamatarong, sa mga nahanas sa sini.”—Hebreo 12:11.

[Mga footnote]

Mga Punto nga Dumdumon

◻ Sa anong mga paagi nga ang pagdis­fel­low­ship mangin isa ka dagway sang disiplina?

◻ Ngaa ang paggawi sang Cristiano sa nadis­fel­low­ship nga tawo tuhay sang sa paggawi niya sa mga makasasala sang kalibutan?

◻ Anong Makasulatanhon nga laygay ang dumdumon kon ang isa ka himata gin­dis­fel­low­ship?

◻ Ano nga desisyon ang ginhimo sang ap­peals ­court sa isa ka kaso nga ginpasaka sang nagdis­asso­ciate nga tawo?

◻ Ano ang maton-an naton gikan sa pila ka personal nga mga ekspresyon nahanungod sa pag­dis­fel­low­ship?

[Kapsion sa pahina 26]

“Ang pag-utod sing bug-os sang amon pagpakig-upod [sa akon nadis­fel­low­ship nga utod nga babayi] nga si Margaret nagtilaw sang amon katutom sa kahimusan ni Jehova. Naghatag ini sa amon pamilya sing kahigayunan nga ipakita nga nagapati gid kami nga ang dalanon ni Jehova amo ang labing maayo.”—Lynette.

Ekskomunikasyon—Ano ang Epekto?

Ang Ingles nga istoryador nga si Edward Gib­bon nagsulat nahanungod sa pagkamakatarunganon kag epekto sang pagdis­fel­low­ship malapit sa tion sang mga apostoles:

“Dimapangduhaduhaan nga kinamatarong sang tagsa ka katilingban nga indi makig-upod kag indi pag-ilakip sa mga benepisyo sini ang mga katapo nga ginsikway ukon naglapas sa mga regulasyon nga ginapatuman sang kalabanan. . . . Ang mga resulta sang ekskomunikasyon dutan-on kag subong man espirituwal sing kinaugali. Ang mga Cristiano nga ginpamatbatan sini ginadingotan sing bisan ano nga bahin sa pagsimba sang mga katapo. Ang kaangtanan sang relihioso kag pribado nga pag-abyanay nadula.”