Pagbaton sing Malipayon sa Panuytoy ni Jehova

PANUGIRON NI ULYSSES V. GLASS

Isa yadto ka pinasahi gid nga okasyon. May yara lamang 127 ka estudyante sa manuggradwar nga klase, apang may 126,387 ka malangkagon nga tumalambong, nga naghalin sa madamo nga pungsod. Gradwasyon yadto sang ika-21 nga klase sang Watchtower Bible School of Gilead, nga ginhiwat sa Yankee Stadium sa New York City sang Hulyo 19, 1953. Ngaa isa yadto ka importante gid nga hitabo sa akon kabuhi? Tuguti ako sa pagsugid sing diutay nga detalye tuhoy sini.

NATAWO ako sa Vincennes, Indiana, E.U.A., sang Pebrero 17, 1912, mga duha ka tuig antes mabun-ag ang Mesianikong Ginharian, subong ginalaragway sa Bugna 12:1-5. Sang tuig antes sini nagatuon na ang akon mga ginikanan sing Biblia upod sa mga tomo sang Studies in the Scriptures. Kada Domingo sang aga, ginabasahan ni Tatay ang pamilya gikan sa isa sadtong mga libro, kag dayon ginahambalan namon ini.

Gingamit ni Nanay ang iya natun-an sa pagbulig dihon sa panghunahuna sang iya kabataan. Mabuot gid sia—tuman kaayo, handa gid pirme magbulig. Apat kami nga kabataan, apang ang gugma ni Nanay nagsangkad sa paglakip sa iban nga kabataan sa kaingod. Naghinguyang sia sing tion upod sa amon. Nalipay sia mag-istorya sa amon sing mga sugilanon sa Biblia kag mag-amba upod sa amon.

Gin-agda man niya sa amon puluy-an ang nanuhaytuhay nga tawo nga nagaalagad sing bug-os tion sa ministeryo. Nagatener sila sing isa lamang ukon duha ka adlaw, nga pirme nagahiwat sing mga miting kag nagapamulongpulong sa amon puluy-an. Ilabi na nga naluyagan namon ang mga nagagamit sing mga ilustrasyon kag nagaistorya sa amon sing mga sugilanon. Sa isa ka okasyon sang 1919, mga isa ka tuig nga nagligad pagkatapos sang una nga bug-os kalibutan nga inaway, ilabi na nga ginpatuhoy sang nagduaw nga utod nga lalaki ang iya mga komento sa amon nga kabataan. Ginbinagbinag niya ang konsagrasyon—mas sibu nga ginapatuhuyan naton karon subong dedikasyon—kag ginbuligan kami nga mahangpan kon paano ini nagaapektar sa amon kabuhi. Sang ulihi sadto nga gab-i sang manugtulog na ako, nangamuyo ako sa akon langitnon nga Amay kag ginsilingan sia nga luyag ko nga alagaron sia pirme.

Apang, sa tapos sang 1922, bangod sang iban nga ginakabalak-an sa kabuhi napahigad yadto nga pamat-od. Nagsaylo kami sa nagkalainlain nga duog kag wala makapakig-angot sa kongregasyon sang katawhan ni Jehova. Malayo si Tatay bangod sang iya trabaho sa riles. Indi na tayuyon ang pagtuon namon sa Biblia. Nag-eskwela ako sa tuyo nga mangin isa ka commercial artist kag nagplano nga mag-eskwela sa maayo gid nga unibersidad.

Pagpasibu sang Akon Tulumuron sa Kabuhi

Sang tungatunga sang dekada 1930, ang kalibutan liwat nga nagpadulong sa bug-os globo nga inaway. Nagapuyo kami sadto sa Cleveland, Ohio, sang ang isa sang mga Saksi ni Jehova nagduaw sa amon puluy-an. Ginhunahuna namon sing labi ka serioso ang amon natun-an sang bata pa kami. Ang akon magulang nga lalaki nga si Russell, ilabi na nga serioso sing panghunahuna, gani una sia nga nagpabawtismo. Indi ako subong sini nga sahi sang tawo, apang sang Pebrero 3, 1936, nagpabawtismo man ako. Nag-uswag ang akon paghangop sa kon ano ang ginalakip sang dedikasyon kay Jehova, kag natun-an ko nga batunon ang panuytoy ni Jehova. Sadto man nga tuig, nagpabawtismo man ang akon duha ka utod nga babayi nga sanday Kathryn kag Gertrude. Tanan kami nag-alagad sing bug-os tion subong mga payunir.

Apang, wala yadto nagkahulugan nga wala na kami sing iban nga ginapamensar. Namati ako sing maayo sang ginsugiran ako sang akon bayaw nga babayi tuhoy sa matahom kaayo nga dalagita nga si Ann nga “tuman kapagsik” kutob sang nabatian niya ang tuhoy sa kamatuoran kag magatambong sia sa mga pagtinipon sa amon balay. Nagatrabaho sadto si Ann subong isa ka sekretarya sa opisina sang mga abogado, kag sa sulod sang isa ka tuig nagpabawtismo sia. Wala ako sing plano nga magpangasawa, apang maathag nga si Ann 100 porsiento nga para sa kamatuoran. Luyag niya nga makapakigbahin sing bug-os sa pag-alagad kay Jehova. Wala gid sia nagasiling, “Mahimo ko bala ini?” Sa baylo, nagapamangkot sia, “Ano ang labing maayo nga paagi nga mahimo ko ini?” Kag determinado sia nga himuon ini. Yadtong positibo nga panimuot nagganyat sa akon. Luwas sina, matahom sia kaayo sadto, kag tubtob karon. Nangin asawa ko sia, kag wala magdugay nangin kaupod ko sia sa payunir nga pag-alagad.

Mapuslanon nga Paghanas Subong mga Payunir

Subong mga payunir natun-an namon ang sekreto sang kon paano mangin kontento kon pigado kami kag kon bugana kami. (Filipos 4:11-13) Isa ka adlaw sadto, sirom na kag wala kami sing makaon. May lima ka sentimos lamang kami. Nagkadto kami sa karnehan, kag namangkot ako, “Mahimo mo bala kami baligyaan sing lima ka sentimos nga balor sang bologna?” Gintulok niya kami kag naghiwa sing apat ka hiwa. Napat-od ko nga ang bili sadto sobra sa lima ka sentimos, gani may nakaon kami sadto.

Kinaandan na nga makasumalang kami sing mabaskog nga pagpamatok samtang ginahimo namon ang amon ministeryo. Sa isa ka banwa malapit sa Syracuse, New York, nagpanagtag kami sing mga handbill sa kalye kag nagsuksok sing mga karatula agod makakuha sing igtalupangod tuhoy sa isa ka pinasahi nga miting publiko. Hinali lang nga gin-uyatan ako sang duha ka mabukod nga tawo kag ginbulyabulya ako. Ang isa pulis, apang wala sia nagauniporme, kag wala niya ginsapak ang pangabay ko nga makita ang iya tsapa. Nian, nag-abot si Grant Suiter halin sa Brooklyn Bethel kag nagsiling nga makadto kami sa estasyon sang pulisiya agod husayon ang problema. Nian ginteleponohan niya ang talatapan sang Sosiedad sa Brooklyn, kag ginsugo kami nga magguwa liwat sa amo man nga adlaw nga may mga karatula kag mga handbill agod may sadsaran para sa basehan nga kaso. Subong sa ginpaabot, gindakop kami. Apang, sang ginsilingan namon ang mga pulis nga isumbong sila bangod sang ilegal nga pag-aresto, ginbuy-an nila kami.

Sang masunod nga adlaw ginsalakay sang madamo nga hurong nga tin-edyer ang amon duog-tilipunan sa sugyot sang isa ka pari, kag wala sing makita nga pulis. Ginhan-usan sang mga hurong ang salog nga kahoy sing mga bat sa baseball, ginpaniklod ang pila ka tumalambong gikan sa pulungkuan, kag nagsalaka sila sa entablado, diin ginpataas nila ang bandera sang Amerika kag nagsininggit, “Saludo sa sini! Saludo sa sini!” Nian nagkinanta sila sing “Beer Barrel Polka.” Napauntat gid nila ang pagtinipon. Naeksperiensiahan namon mismo ang buot silingon ni Jesus sang nagsiling sia: “Bangod kamo indi bahin sang kalibutan, kundi ginpili ko kamo gikan sa kalibutan, sa sining kabangdanan ang kalibutan nagadumot sa inyo.”—Juan 15:19.

Sa pagkamatuod, ang pamulongpulong publiko isa ka rekord sang diskurso ni J. F. Rutherford, nga amo sadto ang presidente sang Watch Tower Society. Nagtener kami ni Ann sa amo nga banwa sa sulod sang pila ka adlaw kag nagduaw sa mga tawo agod tanyagan sila sing kahigayunan nga mabatian ang pamulongpulong sa ila mga puluy-an. Ginbaton sang pila yadto nga tanyag.

Pagboluntaryo sa Pag-alagad sa Iban nga Pungsod

Sang ulihi, nagbukas ang bag-o nga mga bahin sang pag-alagad. Ang akon utod nga si Russell, kag ang iya asawa nga si Dorothy, gin-agda subong mag-asawa nga mag-eskwela sa una nga klase sang Gilead School, sang 1943, kag dayon ginpadala subong mga misyonero sa Cuba. Ang akon utod nga babayi nga si Kathryn sa ikap-at nga klase. Ginpadala man sia sa Cuba. Sang ulihi ginpadala sia sa Dominican Republic kag dayon sa Puerto Rico. Kamusta naman kami ni Ann?

Sang nabatian namon ang tuhoy sa Gilead School kag ang katunayan nga luyag sang Sosiedad nga magpadala sing mga misyonero sa iban nga pungsod, nabatyagan namon nga luyag namon mag-alagad sa iban nga pungsod. Sang primero, ginbinagbinag namon nga magmatumato sa pagkadto, ayhan sa Mexico. Apang namat-od kami nga ayhan mas maayo kon maghulat kami kag tugutan ang Sosiedad nga mag-asayn sa amon sa tapos nga makaeskwela kami sa Gilead School. Narealisar namon nga amo ini ang kahimusan nga ginagamit ni Jehova.

Gin-agda kami sa ikap-at nga klase sang Gilead School. Apang antes pa magsugod ang klase, nahisayran ni N. H. Knorr, nga presidente sadto sang Watch Tower Society, ang mga limitasyon ni Ann bangod sang polio sang bata pa sia. Nagpakighambal sia sa akon tuhoy sini kag namat-od nga indi maalamon nga ipadala kami agod mag-alagad sa iban nga pungsod.

Pagligad sang mga duha ka tuig, sang nagatrabaho kami bilang paghanda sa kombension, nakita ako liwat ni Utod Knorr kag ginpamangkot niya ako kon bala interesado kami gihapon nga mag-eskwela sa Gilead. Ginsilingan niya ako nga indi kami pag-ipadala sa iban nga pungsod; may lain sia nga ginahunahuna. Gani sang nagpalista ang ikasiam nga klase sang Pebrero 26, 1947, nalakip kami sa mga estudyante.

Indi gid malipatan yadtong mga inadlaw sa Gilead. Ang mga kurso bugana sa espirituwal. Natukod ang bug-os kabuhi nga pag-abyanay. Apang ang akon pagpakigbahin sa eskwelahan naglabaw pa sa sina.

Sa Ulot sang Washington kag sang Gilead

Bag-o pa lang sadto ang Gilead School. Wala pa masyado mahibaluan sang gobierno sang Estados Unidos ang mga tulumuron sang eskwelahan, gani madamo sing ginpautwas nga pamangkot. Luyag sang Sosiedad nga may yara tiglawas sa Washington, D.C. Didto kami ginpadala pila ka bulan pagkatapos sang gradwasyon sa Gilead. Nagbulig ako sa pagtigayon sing mga visa para sa mga gin-agda sa pagkari sa ­Gilead gikan sa iban nga mga pungsod kag sa pagtigayon sing legal nga mga papeles agod ang mga naggradwar mapadala sa iban nga pungsod para sa misyonero nga pag-alagad. Ang iban nga mga opisyal tuman ka makatarunganon kag mabuligon. Ang iban may mabaskog nga balatyagon batok sa Saksi. Ang pila nga may mabaskog nga pagtamod sa politika nagsiling nga may koneksion kami sa mga grupo nga ginakabig nila nga dimaayo.

Ang isa ka tawo nga ginkadtuan ko sa iya opisina matigdas nga nagmulay sa amon bangod wala kami nagasaludo sa bandera ukon nagapakigbahin sa inaway. Sa tapos sang iya pagwarakwarak tuhoy sini, nagsiling ako: “Luyag ko mahibaluan mo, kag nahibaluan mo, nga ang mga Saksi ni Jehova wala nadalahig sa isa ka inaway batok kay bisan sin-o sa kalibutan. Wala kami nadalahig sa mga hilikuton sang kalibutan. Wala kami nagapasilabot sa mga inaway sini, sa politika sini. Neutral kami sing bug-os. Nalubad na namon ang mga problema nga inyo ginaatubang; may paghiusa kami sa amon organisasyon. . . . Karon, ano ang luyag ninyo nga himuon namon? Luyag ninyo nga balikan namon ang inyo paagi sang paghimo sa mga butang kag talikdan ang amon?” Wala na sia sing ginhambal pagkatapos sadto.

Duha ka bug-os nga adlaw kada semana ang ginatigana sa pagkadto sa mga opisina sang gobierno. Dugang sa sina, nagaalagad kami subong mga espesyal payunir. Sang una, 175 ka oras ang kinahanglan nga ihinguyang sa ministeryo kada bulan (sang ulihi ginhimo ini nga 140 ka oras), gani pirme kami nagakagab-ihan gid sa pag-alagad. Malipayon gid kami. Madamo kami sing ginadumalahan nga maayo nga pagtuon sa bug-os nga mga pamilya, kag nag-uswag sila sing maayo. Namat-od kami ni Ann nga indi mag-anak, apang sa espirituwal, wala lamang kami sing mga anak kundi mga apo man kag mga apo sa tuhod. Nagapahalipay gid sila sa amon tagipusuon!

Sang talipuspusan sang 1948, nakabaton ako sing dugang nga asaynment. Ginpaathag ni Utod Knorr nga si Utod Schroeder, ang registrar kag isa sang mga instruktor sa Gilead School, mangin masako sa iban pa importante nga hilikuton, gani ginpangabay ako nga magtudlo sa klase sang Gilead kon kinahanglanon. Bisan pa nagapangalag-ag gid ako, nagbalik ako sa Gilead, sa South Lansing, New York, upod kay Ann sang Disiembre 18. Sang primero, nagahinguyang kami sa Gilead sing pila lamang ka semana kada tion, kag dayon nagabalik kami sa Washington. Apang, sang ulihi, mas malawig nga tion ang ginahinguyang ko sa Gilead sangsa Washington.

Amo sadto nga tion, subong sang ginsambit ko kaina, nga ang ika-21 nga klase sang Gilead naggradwar sa Yankee Stadium sa New York. Gani subong isa sang mga instruktor, may pribilehiyo ako nga makigbahin sa sadto nga programa sang gradwasyon.

Pag-alagad sa Bug-os Kalibutan nga Ulong Talatapan

Sang Pebrero 12, 1955, ginsugdan namon ang isa pa ka asaynment sa pag-alagad. Nangin katapo kami sang pamilya Bethel sa bug-os kalibutan nga ulong-talatapan sang kitaon nga organisasyon ni Jehova. Apang ano ang nadalahig sa sini? Una, ang pagkahanda sa paghimo sing bisan ano nga ipahimo sa amon, nga nagapakigbahin sa mga proyekto nga nagakinahanglan sing kooperasyon upod sa iban. Sa pagkamatuod, nahimo namon ini sang una, apang karon mangin bahin kami sang mas daku nga grupo—ang pamilya Bethel sa ulong-talatapan. Malipayon nga ginbaton namon ining bag-o nga asaynment subong pamatuod sang panuytoy ni Jehova.

Ang daku nga bahin sang akon trabaho nagalakip sing mga butang may kaangtanan sa media. Bangod sang handum sa makapulukaw nga istorya kag bangod sang pagkuha sing impormasyon gikan sa may ginapasulabi nga mga tiliman-an, ang media nagsulat sing pila ka malaw-ay nga butang tuhoy sa mga Saksi ni Jehova. Gintinguhaan namon nga lubaron inang kahimtangan.

Luyag ni Utod Knorr mapat-od nga tanan kami may madamo nga hilikuton, gani may iban pa nga mga asaynment. Ang pila sini nagkinahanglan sing kalantip nga natigayon ko subong isa ka commercial artist. Ang iban naglakip sa estasyunan sang radyo sang Sosiedad, ang WBBR. May yara hilikuton may kaangtanan sa mga pelikula nga ginhimo sang Sosiedad. Sa pagkamatuod, ang teokratikong maragtas bahin sang kurso sa Gilead, apang karon ginahimo ang nanuhaytuhay nga proyekto agod mahibaluan sing labi sang katawhan ni Jehova ang detalye sinang maragtas sang modernong-adlaw nga teokratikong organisasyon kag agod mahibaluan man ini sang publiko. Ang isa pa ka bahin sang paghanas sa Gilead nagalakip sing pagpamulongpulong sa publiko, kag dapat nga tudluan sing dugang pa ang mga kauturan sa kongregasyon tuhoy sa kinahanglanon nga mga butang sa pagpamulongpulong sa publiko. Gani may madamo gid nga hilikuton.

Sa Gilead sing Regular

Sang 1961, sang nagahilapit ang paghanas sa nagalakbay nga mga manugtatap kag sa mga katapo sang talapuanan sang sanga, ginsaylo ang Gilead School sa Brooklyn, diin nahamtang ang panguna nga mga opisina sang Watch Tower Society. Sa liwat nagbalik ako sa hulot-klasehan—sa sining tion indi subong tal-us nga instruktor kundi subong regular nga katapo sang mga instruktor. Daw ano nga pribilehiyo! Kumbinsido gid ako nga ang Gilead School isa ka dulot gikan kay Jehova, isa ka dulot nga nakahatag sing benepisyo sa iya bug-os kitaon nga organisasyon.

Sa Brooklyn ang mga klase sa Gilead may mga kahigayunan nga wala matigayon sang mga estudyante sang nagliligad nga mga klase. May mas madamo nga dinapit nga manugpamulongpulong kag may suod nga pagpakig-upod sa Nagadumala nga Hubon kag masangkad nga pagpakig-upod sa pamilya Bethel sang ulong-talatapan. Nangin posible man para sa mga estudyante nga mahanas sa mga pamaagi sa opisina, sa pagpanghikot sa puluy-an Bethel, kag sa nanuhaytuhay nga bahin sang hilikuton sa pabrika.

Sa sulod sang tinuig ang kadamuon sang estudyante nagalainlain, kag amo man ang kadamuon sang instruktor. Pila man ka beses nga ginsaylo ang nahamtangan sang eskwelahan. Karon yari ini sa matahom nga palibot sa Patterson, New York.

Pagpanghikot Upod sa mga Estudyante

Makalilipay gid ang pagtudlo sa sining mga klase! Yari ang mga pamatan-on nga indi interesado sa paghimo sing mga butang sa daan nga sistema. Ginabayaan nila ang ila pamilya, ang ila mga abyan, ang ila puluy-an, kag ang mga tawo nga nagahambal sang ila lenguahe. Ang klima, ang pagkaon—ang tanan nga butang mangin tuhay na. Wala gani nila mahibaluan kon sa diin nga pungsod sila makadto, apang ang ila tulumuron amo ang mangin mga misyonero. Indi mo kinahanglan pahulagon ina nga sahi sang mga tawo.

Kon magsulod ako sa hulot-klasehan, tulumuron ko pirme nga ipahamtang ang buot sang mga estudyante. Wala sing makatuon sing maayo kon ginakulbaan sia ukon nagakabalaka. Matuod, ako ang instruktor, apang nahibaluan ko kon ano ang mangin estudyante. Nagpungko ako sa amo nga pulungkuan anay. Sa pagkamatuod, nagtuon sila sing maayo kag madamo sing natun-an sa Gilead, apang luyag ko man nga mangin malipayon sila.

Nahibal-an ko nga kon magkadto na sila sa ila mga teritoryo, may pila ka butang nga kinahanglan nila agod magmadinalag-on. Kinahanglan nila ang mabakod nga pagtuo. Kinahanglan nila ang pagkamapainubuson—sing daku gid. Kinahanglan matun-an nila ang pagpakigbagay sa iban nga tawo, ang pagbaton sa mga kahimtangan, ang sinsero nga pagpatawad. Kinahanglan padayon nila nga palambuon ang mga bunga sang espiritu. Kinahanglan man nila higugmaon ang mga tawo kag higugmaon ang hilikuton nga ginpadala sila nga himuon. Amo yadtong mga butang ang pirme ko ginatinguhaan nga ipadaku sa mga estudyante samtang yara sila sa Gilead.

Wala ako makahibalo kon pila na ka estudyante ang akon natudluan. Apang nahibaluan ko kon ano ang ginabatyag ko sa ila. Sa tapos makahinguyang sing lima ka bulan upod sa ila sa hulot-klasehan, indi ko malikawan nga mangin suod sa ila. Nian kon makita ko sila nga nagasaka sa entablado kag nagabaton sang ila diploma sa adlaw sang gradwasyon, nahibal-an ko nga natapos nila sing madinalag-on ang kurso kag sa indi madugay magabiya sila. Daw subong nga naglakat ang katapo sang akon pamilya. Paano mo mapunggan ang paghigugma sa mga tawo nga handa sa paghatag sang ila kaugalingon kag sa paghimo sing hilikuton nga pagahimuon sining mga pamatan-on?

Tinuig sa ulihi, kon magbalik sila agod magduaw, mabatian ko sila nga nagasugid sang ila kalipay sa pag-alagad, kag nahibaluan ko nga yara sila gihapon sa ila mga asaynment, nga ginahimo ang ginhanas sa ila nga himuon. Ano ang akon pamatyag sa sini? Abaw, makalilipay gid.

Pagtulok sa Palaabuton

Nagaburon na ang akon panulok karon, kag naeksperiensiahan ko ang mga kabang-awan nga dala sini. Indi na ako makatudlo sa hulot-klasehan sang Gilead. Sang primero, nabudlayan ako sa pagpasibu, apang sa bug-os ko nga kabuhi natun-an ko nga batunon ang mga kahimtangan kag landason ini. Pirme ko ginahunahuna si apostol Pablo kag ang iya “tunok sa unod.” Tatlo ka beses nga nagpangamuyo si Pablo para sa kaumpawan gikan sa amo nga balatian, apang ang Ginuo nagsiling sa iya: “Ang akon dibagay nga kaayo tuman na para sa imo; kay ang akon gahom ginahimpit sa kaluyahon.” (2 Corinto 12:7-10) Padayon nga ginbatas ini ni Pablo. Kon nahimo niya ini, dapat ko man tinguhaan. Bisan pa wala na ako nagatudlo sa klase, nagapasalamat ako nga ang akon opisina malapit sa eskwelahan. Kon kaisa makapakighambal ako sa mga estudyante, kag malipayon gid ako sa paghunahuna sa maayo nga espiritu nga ila ginpakita.

Makalilipay pamalandungan ang yara sa palaabuton. Ang sadsaran ginapasad karon. Daku gid ang bahin sang Gilead sa sini. Pagkatapos sang dakung kapipit-an, kon ang linukot nga ginapatuhuyan sa Bugna 20:12 buksan na, may isa ka libo ka tuig sang maid-id nga edukasyon tuhoy sa mga dalanon ni Jehova. (Isaias 11:9) Apang indi pa ina ang katapusan. Sa pagkamatuod umpisa lamang ini. Tubtob sa walay katubtuban, madamo pa sing matun-an tuhoy kay Jehova kag madamo pa ang hilimuon samtang ginapahibalo sa aton ang iya mga katuyuan. Nagasalig gid ako nga tumanon ni Jehova ang tanan niya nga matahom nga saad, kag luyag ko nga didto ako agod makapakigbahin sa pagbaton sing mga panuytoy ni Jehova para sa aton.

[Laragway sa pahina 26]

Gradwasyon sang Gilead sa Yankee Stadium sang New York sang 1953

[Laragway sa pahina 26]

Si Gertrude, ako, si Kathryn, kag si Russell

[Laragway sa pahina 26]

Nagatrabaho upod kay N.H.Knorr (pinakawala) kag kay M.G.Henschel sa pag-organisar sang kombension

[Laragway sa pahina 26]

Sa estasyon sang WBBR

[Laragway sa pahina 29]

Sa hulot-klasehan sang Gilead

[Laragway sa pahina 31]

Upod kay Ann, sining karon lang