Mas Gamhanan si Jesus Sangsa mga Demonyo

NADUMDUMAN mo bala kon ngaa ang isa sa mga anghel sang Dios nangin si Satanas nga Yawa?⁠— Gintalikdan niya ang Dios, bangod sang iya makagod nga handum nga sia ang simbahon. Nangin sumulunod bala ni Satanas ang iban nga mga anghel?⁠— Huo. Ginatawag sila sang Biblia nga ‘mga anghel ni Satanas,’ ukon mga demonyo.​—⁠Bugna 12:9.

Nagatuo bala sa Dios ining malain nga mga anghel, ukon mga demonyo?⁠— ‘Nagatuo ang mga demonyo nga nagaluntad ang Dios,’ siling sang Biblia. (Santiago 2:19) Apang nahadlok na sila karon. Amo sini bangod nahibaluan nila nga silutan sila sang Dios sa malain nga mga butang nga ginhimo nila. Ano ang malain nga ginhimo nila?⁠—

Ang Biblia nagasiling nga ginbiyaan sining mga anghel ang ila nagakaigo nga puluy-an sa langit kag nagpakatawo sa duta. Ginhimo nila ini bangod luyag nila magpakigsekso sa matahom nga mga babayi sa duta. (Genesis 6:​1, 2; Judas 6) Ano ang nahibaluan mo tuhoy sa pagpakigsekso?⁠—

Ang pagpakigsekso amo ang paghirupay sang isa ka lalaki kag isa ka babayi sa isa ka pinasahi nga paagi. Pagkatapos sini, mahimo magtubo ang bata sa sulod sang tiyan sang iloy. Apang ini nga pagpakigsekso malain para sa mga anghel. Ginatugot lamang ini sang Dios sa isa ka lalaki kag isa ka babayi nga nakasal. Sa amo kon mabun-ag ang bata, maatipan sia sang iya tatay kag nanay.

Sang magsul-ob ang mga anghel sing tawhanon nga lawas kag nagpakigsekso sa mga babayi sa duta, ang ila mga anak nangin mga higante. Mapintas gid sila, kag nagapanakit. Gani nagpadala ang Dios sing daku nga anaw agod laglagon ang mga higante kag ang tanan nga malain nga tawo. Apang ginsugo niya si Noe nga magtukod sing isa ka arka, ukon daku nga sakayan, agod luwason ang pila ka tawo nga naghimo sing matarong. Nagsiling ang Daku nga Manunudlo nga ang natabo sa tion sang Anaw importante nga dumdumon.​—⁠Genesis 6:​3, 4, 13, 14; Lucas 17:​26, 27.

Sang mag-abot ang Anaw, nahibaluan mo bala kon ano ang natabo sa malain nga mga anghel?⁠— Gin-uba nila ang ila tawhanon nga lawas, kag nagbalik sa langit. Apang indi na sila mahimo mangin mga anghel sang Dios, gani nangin mga anghel sila ni Satanas, ukon mga demonyo. Kag ano ang natabo sa ila mga anak, ang mga higante?⁠— Napatay sila sa Anaw. Kag amo man ang tanan nga tawo nga wala magtuman sa Dios.

Halin sang matabo ang Anaw, wala na gintugutan sang Dios ang mga demonyo nga magpakatawo liwat sa duta. Apang bisan pa indi naton sila makita, ginasulay gihapon sang mga demonyo ang mga tawo nga maghimo sing malain gid nga mga butang. Labi pa nga nagapanggamo sila karon. Amo sini bangod gintagbong na sila sa duta halin sa langit.

Nahibaluan mo bala kon ngaa indi naton makita diri ang mga demonyo?⁠— Bangod mga espiritu sila. Apang mapat-od naton nga buhi sila. Ang Biblia nagasiling nga ‘ginapatalang ni Satanas ang bug-os nga kalibutan,’ kag ginabuligan sia sang iya mga demonyo.​​—⁠Bugna 12:​9, 12.

Mapatalang man bala kita ukon malimbungan sang Yawa kag sang iya mga demonyo?⁠— Huo, kon indi kita maghalong. Apang indi kita dapat mahadlok. Ang Daku nga Manunudlo nagsiling: ‘Ang Yawa wala sing gahom sa akon.’ Kon magpabilin kita nga suod sa Dios, amligan niya kita gikan sa Yawa kag sa iya mga demonyo.​—⁠Juan 14:30.

Importante nga mahibaluan naton kon ano nga malain nga mga butang ang luyag sang mga demonyo nga ipahimo sa aton. Gani hunahunaa ini. Anong malain nga mga butang ang ginhimo sang mga demonyo sang magkari sila sa duta?⁠— Antes sang Anaw, nagpakigsekso sila sa mga babayi, butang nga indi husto para sa mga anghel. Naluyagan gid sang mga demonyo karon kon ang mga tawo wala nagatuman sa sugo sang Dios tuhoy sa pagpakigsekso. Pamangkuton ko ikaw, Sin-o lamang ang may kinamatarong sa pagpakigsekso?⁠— Husto ka, amo lamang ang mga mag-asawa.

Ang mga pamatan-on nga mga lalaki kag mga babayi karon nagapakigsekso, apang malain ini para sa ila. Ang Biblia nagahambal tuhoy sa “kinatawo” sang lalaki, ukon penis. (Levitico 15:​1-3) Ang kinatawo sang babayi ginatawag nga vulva. Gintuga ni Jehova ini nga mga bahin sang lawas para sa isa ka pinasahi nga katuyuan nga para lamang sa mag-asawa. Nagakalipay ang mga demonyo kon maghimo ang mga tawo sing mga butang nga ginadumilian ni Jehova. Halimbawa, naluyagan gid sang mga demonyo kon ginahampangan sang bata nga lalaki kag bata nga babayi ang penis ukon vulva sang isa kag isa sa ila. Indi naton luyag nga pahalipayon ang mga demonyo, indi bala?⁠—

May isa pa ka butang nga naluyagan sang mga demonyo apang ginadumtan ni Jehova. Nahibaluan mo bala kon ano ini?⁠— Amo ang kasingki. (Salmo 11:5) Ang kasingki amo kon ang mga tawo mapintas kag nagapanakit. Dumduma, amo sini anay ang ginhimo sang mga higante, ang mga anak sang mga demonyo.

Luyag man pahugon sang mga demonyo ang mga tawo. Kon kaisa nagapakunokuno sila nga amo ang mga tawo nga napatay. Mahimo nga ilugon pa gani nila ang tingog sang mga napatay. Paagi sa sini ginalimbungan sang mga demonyo ang madamo sa pagpati nga ang mga patay buhi kag sarang makapakighambal sa mga nagakabuhi. Huo, ginapapati sang mga demonyo ang madamo nga tawo nga may murto.

Gani dapat kita magbantay nga indi kita malimbungan ni Satanas kag sang iya mga demonyo. Ang Biblia nagapaandam: ‘Nagapakunokuno si Satanas nga isa ka maayo nga anghel, kag amo man ang ginahimo sang iya mga alagad.’ (2 Corinto 11:​14, 15) Apang, malain gid ang mga demonyo. Tan-awon naton kon paano sila mahimo magtinguha nga impluwensiahan kita agod mangin kaangay nila.

Sa diin ang mga tawo makatuon sing daku tuhoy sa kasingki kag di-nagakaigo nga sekso kag mga espiritu kag mga murto?⁠— Indi bala sa pagtan-aw sing pila ka palaguwaon sa telebisyon kag mga pelikula, paghampang sing mga hampang sa kompyuter kag sa video, pagkadto sa Internet, kag pagbasa sing mga komiks? Kay sin-o kita nagalapit kon himuon naton ining mga butang? Sa Dios bala ukon sa Yawa kag sa iya mga demonyo? Ano sa banta mo?⁠—

Sin-o sa banta mo ang maluyag nga mamati kita kag magtan-aw sing malain nga mga butang?⁠— Huo, amo si Satanas kag ang iya mga demonyo. Gani, ano ang dapat naton himuon?⁠— Dapat naton basahon, pamatian, kag tan-awon ang mga butang nga mapuslanon sa aton kag makabulig sa aton sa pag-alagad kay Jehova. Mahunahuna mo bala ang pila sining maayong mga butang nga mahimo naton?⁠—

Kon himuon naton ang maayo, wala sing rason nga mahadlok kita sa mga demonyo. Mas makusog si Jesus sangsa ila, kag nahadlok sila sa iya. Sang isa ka adlaw nagsinggit ang mga demonyo kay Jesus: “Nagkari ka bala agod laglagon kami?” (Marcos 1:⁠24) Indi bala nga malipay kita kon mag-abot ang tion nga laglagon ni Jesus si Satanas kag ang iya mga demonyo?⁠— Samtang wala pa ini, mapat-od naton nga amligan kita ni Jesus gikan sa mga demonyo kon magpabilin kita nga suod sa iya kag sa iya langitnon nga Amay.