Enoc—Walay Kahadlok Walay Sapayan sang mga Kabudlayan

PARA sa isa ka maayo nga tawo, amo ini ang pinakamabudlay nga tion. Ang duta puno sing pagkadidiosnon. Ang moral nga kahimtangan sang katawhan padayon nga nagausmod. Sa katunayan, ginsiling sang ulihi: “Nakita ni Jehova nga ang kalautan sang tawo bugana sa duta kag ang tagsa ka huyog sang mga hunahuna sang iya tagipusuon malaut gid sa tanan nga tion.”​—⁠Genesis 6:5.

Si Enoc, ang ikapito nga tawo sa linya sang kaliwatan halin kay Adan, may kaisog nga mangin tuhay. Nagtindog sia nga malig-on para sa pagkamatarong walay sapayan sang mga resulta. Ang mensahe ni Enoc makaulugot para sa didiosnon nga mga makasasala amo kon ngaa gintuyo sia nga patyon, kag si Jehova lamang ang makabulig sa iya.​—⁠Judas 14, 15.

Si Enoc kag ang Bug-os Uniberso nga Hulusayon

Madugay pa antes natawo si Enoc, ang hulusayon tuhoy sa bug-os uniberso nga pagkasoberano ginbangon. May kinamatarong bala ang Dios sa paggahom? Sa katunayan, si Satanas nga Yawa nagsiling nga wala. Nangatarungan sia nga ang intelihente nga mga tinuga magahimo sing mas maayo kon independiente sila sa panuytoy sang Dios. Naninguha si Satanas nga makapatok sing inugsumbong batok kay Jehova paagi sa malimbungon nga pagmaniobra sa mga tawo dampig sa iya. Si Adan, ang iya asawa nga si Eva, kag ang ila panganay nga anak nga lalaki, si Cain, nakilal-an nga nagdampig kay Satanas paagi sa pagpili sing kinaugalingon nga paggahom sa baylo sang paggahom sang Dios. Ginpakita ini sang nahaunang mag-asawa paagi sa pagkaon sang bunga nga gindumili sang Dios, kag ginhimo ini ni Cain paagi sa pagpatay sing hungod sa iya matarong nga utod, si Abel.​—⁠Genesis 3:​4-6; 4:⁠8.

Si Abel maisugon nga nagdampig kay Jehova. Bangod ginpasanyog sang integridad ni Abel ang putli nga pagsimba, walay duhaduha nga nalipay si Satanas sa pagtan-aw nga ginpabutyag ni Cain ang iya kasingkal kay Abel paagi sa pagpatay sa iya. Sugod sadto nga tion, ginbayaw ni Satanas ang “kahadlok sa kamatayon” subong makahalalit nga hinganiban. Luyag niya nga mahadlok ang bisan sin-o nga may huyog sa pagsimba sa matuod nga Dios.​—⁠Hebreo 2:​14, 15; Juan 8:​44; 1 Juan 3:⁠12.

Sang matawo si Enoc, ang pagtamod ni Satanas nga ang tawo indi magasakdag sang pagkasoberano ni Jehova mahimo nga daw ginsuportahan sing maayo. Si Abel patay na, kag ang iya matutom nga halimbawa wala masundan. Apang, ginpamatud-an ni Enoc ang iya kaugalingon nga tuhay. May malig-on sia nga sadsaran para sa pagtuo, kay pamilyar gid sia sa mga hitabo sa katamnan sang Eden.⁠a Daku gid ang pagpakabahandi niya sa tagna ni Jehova nga nagapakita nga laglagon sang ginsaad nga Binhi si Satanas kag ang iya mga padugi!​—⁠Genesis 3:⁠15.

Bangod sining paglaum nga pirme sa unahan niya, wala mahadlok si Enoc sa bantog sa maragtas nga pagpatay kay Abel sa sugyot sang Yawa. Sa baylo, nagpabilin sia nga nagalakat upod kay Jehova, nagasunod sang bug-os kabuhi nga dalanon sang pagkamatarong. Ginhuptan ni Enoc ang iya kaugalingon nga nahamulag sa kalibutan, nagalikaw sa independiente nga espiritu sini.​—⁠Genesis 5:​23, 24.

Dugang pa, si Enoc maisugon nga nagpamulong kag nag-athag nga ang malaut nga mga buhat sang Yawa mabang-awan. Sa idalom sang impluwensia sang balaan nga espiritu, ukon aktibo nga puwersa, sang Dios, si Enoc nagtagna nahanungod sa malauton: “Tuluka! si Jehova nag-abot upod ang iya balaan nga linaksa, sa pagpatuman sang paghukom batok sa tanan, kag sa paghukom sa tanan nga didiosnon nahanungod sa tanan nila nga didiosnon nga mga buhat nga ginhimo nila sa didiosnon nga paagi, kag nahanungod sa tanan makakilibang nga mga butang nga ginpamulong sang didiosnon nga mga makasasala batok sa iya.”​—⁠Judas 14, 15.

Bangod sang walay kahadlok nga mga pagbantala ni Enoc, ginlakip sia ni apostol Pablo, sang nagsulat sa Hebreo nga mga Cristiano, sa tunga sang dakung “panganod sang mga saksi” nga nagpahamtang sing dalayawon nga halimbawa sang pagtuo nga nagapanghikot.⁠b (Hebreo 11:​5; 12:1) Subong isa ka tawo nga may pagtuo, si Enoc nagpadayon sa dalanon sang integridad sa kapin sa 300 ka tuig. (Genesis 5:22) Mahimo gid nga naugot ang mga kaaway sang Dios sa langit kag duta sa katutom ni Enoc! Ang nagapangutot nga tagna ni Enoc nagpukaw sang pagdumot ni Satanas, apang nagdul-ong ini sa pagpangamlig ni Jehova.

Ginkuha sang Dios si Enoc​—⁠Paano?

Wala gintugutan ni Jehova si Satanas ukon ang iya dutan-on nga mga alagad nga patyon si Enoc. Sa baylo, ang inspirado nga pulong nagasiling: “Ginkuha sia sang Dios.” (Genesis 5:24) Ginlaragway ini ni apostol Pablo sa sining paagi: “Bangod sa pagtuo si Enoc ginliton agod indi sia makakita sing kamatayon, kag indi sia masapwan bisan diin bangod ginliton sia sang Dios; bangod bag-o pa sia maliton may yara sia panaksi nga napahamut-an niya sing maayo ang Dios.”​—⁠Hebreo 11:5.

Paano si Enoc “ginliton agod indi sia makakita sing kamatayon”? Ukon subong sang pagbadbad ni R. A. Knox, paano si Enoc “ginkuha nga wala makaeksperiensia sing kamatayon”? Mahidaiton nga gintapos sang Dios ang kabuhi ni Enoc, nagluwas sa iya sa mga kasakit sang kamatayon ayhan bangod sang balatian ukon kasingki sa kamot sang iya mga kaaway. Huo, gin-utod ni Jehova ang kabuhi ni Enoc sa edad nga 365​—⁠batabata diutay kon ipaanggid sa iya mga katubotubo.

Paano nakahatag si Enoc sing “panaksi nga napahamut-an niya sing maayo ang Dios”? Ano ang iya panaksi? Ayhan ginpanganinaw sang Dios si Enoc, subong nga si apostol Pablo “ginsabnit,” ukon ginliton, ayhan nakabaton sing palanan-awon tuhoy sa palaabuton nga espirituwal nga paraiso sang Cristianong kongregasyon. (2 Corinto 12:​3, 4) Ang panaksi, ukon pamatuod, nga si Enoc kalahamut-an sa Dios mahimo nga nagalakip sang pagsid-ing paagi sa isa ka palanan-awon sa palaabuton nga dutan-on nga Paraiso diin ang tanan nga nagakabuhi magasakdag sang pagkasoberano sang Dios. Ayhan samtang nagapanganinaw si Enoc paagi sa isa ka palanan-awon nga ginkuha sia sang Dios sa dimasakit nga kamatayon agod magtulog tubtob sa adlaw sang iya pagkabanhaw. Daw subong bala nga, subong sang natabo kay Moises, ginkuha ni Jehova ang bangkay ni Enoc, kay “wala sia makita.”​—⁠Hebreo 11:​5; Deuteronomio 34:​5, 6; Judas 9.

Ang Tagna Natuman

Karon, ginabantala sang mga Saksi ni Jehova ang labing importante nga bahin sang tagna ni Enoc. Gikan sa Kasulatan, ginapakita nila kon paano ini matuman kon laglagon sang Dios ang mga didiosnon sa malapit nga palaabuton. (2 Tesalonica 1:​6-10) Bangod sang ila mensahe, wala sila maluyagan, kay tuhay gid ini sa mga pagtamod kag mga tulumuron sining kalibutan. Wala sila makibot sa mga pagpamatok nga nasumalang nila, kay ginpaandaman ni Jesus ang iya mga sumulunod: “Dumtan kamo sang tanan nga tawo bangod sang akon ngalan.”​—⁠Mateo 10:22; Juan 17:⁠14.

Apang, kaangay ni Enoc, ang mga Cristiano karon ginapasalig nga luwason sila sa ulihi gikan sa ila mga kaaway. Si apostol Pedro nagsulat: “Si Jehova makahibalo magluwas sang mga tawo nga may diosnon nga debosyon gikan sa pagtilaw, apang ginatigana ang mga tawo nga dimatarong para sa adlaw sang paghukom agod utdon.” (2 Pedro 2:9) Ayhan makita sang Dios nga nagakaigo nga kuhaon ang isa ka problema ukon isa ka mabudlay nga kahimtangan. Ang paghingabot mahimo matapos. Apang, kon indi, makahibalo sia kon paano ‘maghatag sing lulutsan’ agod mabatas sang iya katawhan ang ila mga pagtilaw sing madinalag-on. Si Jehova nagahatag pa gani sing “gahom nga labaw sa kinaandan” kon kinahanglanon.​—⁠1 Corinto 10:​13; 2 Corinto 4:⁠7.

Subong “manugpadya sang mga hanuot nga nagapangita sa iya,” pakamaayuhon man ni Jehova ang iya matutom nga mga alagad sing kabuhi nga walay katapusan. (Hebreo 11:6) Para sa kalabanan sa ila, mangin kabuhi nga dayon ini sa dutan-on nga paraiso. Busa, kaangay ni Enoc, kabay nga ibantala naton ang mensahe sang Dios sa walay kahadlok. Sa pagtuo, himuon naton ini walay sapayan sang mga kabudlayan.

[Mga footnote]

[Kahon sa pahina 30]

Ang Ngalan sang Dios Ginpasipalahan

Mga apat ka siglo antes ni Enoc, ang apo nga lalaki ni Adan nga si Enos natawo. “Sadto nga tion ginsugdan ang pagtawag sa ngalan ni Jehova,” siling sang Genesis 4:⁠26. Nagapati ang iban nga nagapamulong-sing-Hebreo nga mga iskolar nga ining bersikulo dapat mabasa sing “nagsugod sa mapasipalahon” nga pagtawag sa ngalan sang Dios, ukon “nian ang pagpasipala nagsugod.” Nahanungod sa sinang panag-on sang maragtas, ang Jerusalem Targum nagasiling: “Amo yadto ang kaliwatan nga sa ila mga adlaw nagsugod sila sa pagpakasala, kag sa paghimo sa ila kaugalingon sing mga idolo, kag gintawag ang ila mga idolo paagi sa ngalan sang Pulong sang Ginuo.”

Ang sayop nga paggamit sa ngalan ni Jehova lapnag sang panahon ni Enos. Mahimo nga gin-aplikar sang mga tawo ang balaan nga ngalan sa ila kaugalingon ukon sa mga tawo nga paagi sa ila nagpakunokuno sila nga nagapalapit kay Jehova nga Dios sa pagsimba. Ukon mahimo nga gin-aplikar nila ang balaan nga ngalan sa mga idolo. Ano man ang matuod, ginsiod ni Satanas nga Yawa ang tawhanon nga rasa sa idolatriya. Sang matawo si Enoc, ang matuod nga pagsimba malaka lamang. Ang bisan sin-o nga kaangay ni Enoc, nga nagkabuhi sa kamatuoran kag nagbantala sini, wala maluyagan kag gani ginhingabot.​—⁠Ipaanggid ang Mateo 5:​11, 12.

[Kahon sa pahina 31]

Nagkadto Bala si Enoc sa Langit?

“Bangod sa pagtuo si Enoc ginliton agod nga indi makakita sing kamatayon.” Sa pagbadbad nila sini nga bahin sang Hebreo 11:​5, ginapakita sang pila ka badbad sang Biblia nga si Enoc wala gid mapatay. Halimbawa, ang A New Translation of the Bible, ni James Moffatt nagasiling: “Bangod sa pagtuo nga si Enoc gindala sa langit agod indi gid sia mapatay.”

Apang, mga 3,000 ka tuig pagkatapos sang adlaw ni Enoc, si Jesucristo nagsiling: “Wala sing tawo nga nakasaka sa langit kundi sia nga nanaug sa langit, ang Anak sang tawo.” (Juan 3:13) Ang The New English Bible mabasa: “Wala gid sing isa nga nakasaka sa langit luwas sa isa nga nanaug halin sa langit, ang Anak sang Tawo.” Sang ginpamulong ina ni Jesus, bisan sia wala pa makasaka sa langit.​—⁠Ipaanggid ang Lucas 7:⁠28.

Si apostol Pablo nagsiling nga si Enoc kag ang iban pa nga nagahuman sa dakung panganod sang antes-Cristiano nga mga saksi ‘tanan napatay’ kag “wala makakita sang katumanan sang saad.” (Hebreo 11:​13, 39) Ngaa? Bangod ang tanan nga tawo, lakip na si Enoc, nakapanubli sing sala gikan kay Adan. (Salmo 51:​5; Roma 5:12) Ang lamang nga paagi sang kaluwasan amo ang sa kalalangan sang halad-gawad ni Cristo Jesus. (Binuhatan 4:​12; 1 Juan 2:​1, 2) Sang adlaw ni Enoc yadto nga gawad wala pa mabayaran. Gani, si Enoc wala magkadto sa langit, kundi nagtulog sia sa kamatayon nga nagahulat sing pagkabanhaw sa duta.​—⁠Juan 5:​28, 29.

[Picture Credit Line on page 29]

Ginkopya gikan sa Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s