“Nagalakat Paagi sa Pagtuo, Indi Paagi sa Panulok”

“Nagalakat kita paagi sa pagtuo, indi paagi sa panulok.”​—⁠2 CORINTO 5:⁠7.

1. Ano ang kahulugan sang ‘paglakat paagi sa pagtuo’?

KADA mangamuyo kita suno sa mga panuytoy nga nabalay sa Pulong sang Dios, ginapakita naton nga sa bisan paano kita may pagtuo. Sang nagsugod kita sa pagpanaksi sa iban nahanungod sa Ginharian sang Dios, nagapakita man ini sing pagtuo. Kag sang gindedikar naton ang aton kabuhi kay Jehova, ginapamatud-an naton nga handum naton ang ‘maglakat paagi sa pagtuo,’ kon sayuron, ang magkabuhi nga ginatuytuyan sang pagtuo.​—⁠2 Corinto 5:​7; Colosas 1:​9, 10.

2. Ngaa ang pagpakigbahin sa mga hilikuton sa kongregasyon indi gid man pamatuod nga ang isa may pagtuo?

² Agod tunay kita nga magkabuhi sa sini nga paagi, nagakinahanglan kita sing pagtuo nga may malig-on nga sadsaran. (Hebreo 11:​1, 6) Madamo nga tawo ang nabuyok sa mga Saksi ni Jehova bangod sang mataas nga talaksan sa moral kag sang gugma nga nakita nila sa tunga sang mga Saksi. Maayo ina nga panugod, apang wala ini nagakahulugan nga ini nga mga tawo may pagtuo. Ang iban mahimo nga may tiayon ukon ginikanan nga mabakod sa pagtuo, kag mahimo sila magbuylog sa pila ka hilikuton nga ginahimo sang isa nga ginahigugma nila. Ini nga impluwensia sa puluy-an isa gid ka pagpakamaayo, apang indi ini tal-us sa personal nga gugma sa Dios kag sa personal nga pagtuo.​—⁠Lucas 10:​27, 28.

3. (a) Agod matigayon ang malig-on sing sadsaran nga pagtuo, ano dapat ang personal nga pagpati naton nahanungod sa Biblia? (b) Ngaa mas madali makumbinse ang pila ka tawo tuhoy sa pagkainspirado sang Biblia sangsa iban?

³ Yadtong tunay nga nagalakat paagi sa pagtuo kumbinsido sing bug-os nga ang Biblia amo ang Pulong sang Dios. Madamo ang ebidensia nga ang Balaan nga Kasulatan, sa pagkamatuod, “gin-inspirar sang Dios.”⁠a (2 Timoteo 3:16) Pila sini nga ebidensia ang dapat usisaon antes makumbinse ang isa ka tawo? Nasandig ina sa iya inagihan. Ang nagakumbinse sing bug-os sa isa ka tawo mahimo nga indi magabuyok sa iban. Sa pila ka hitabo, bisan pakitaan ang isa ka tawo sing madamong dimabais nga ebidensia, mahimo gihapon niya pamatukan ang makatarunganon nga konklusion sini. Ngaa? Bangod sang mga kailigbon nga natanom sing tudok sa iya tagipusuon. (Jeremias 17:9) Busa, walay sapayan nga ang isa ka tawo mahimo magasiling nga interesado sia sa katuyuan sang Dios, ang iya tagipusuon mahimo magahandum nga kahamut-an sia sang kalibutan. Mahimo nga indi niya luyag talikdan ang pangabuhi nga nagasupak sa mga talaksan sang Biblia. Apang, kon ang bisan sin-o tunay nga ginagutom sa kamatuoran, kon bunayag sia sa iya kaugalingon, kag kon mapainubuson sia, marealisar niya sa ulihi nga ang Biblia amo ang Pulong sang Dios.

4. Ano ang ginakinahanglan sa bahin sang isa ka indibiduwal agod matigayon ang pagtuo?

⁴ Sa masami sa sulod lamang sang pila ka bulan, makita sang mga tawo nga ginabuligan sa pagtuon sa Biblia nga madamo na sila sing natun-an nga nagapamatuod nga amo ini ang Pulong sang Dios. Kon nagapahulag ini sa ila nga buksan ang ila tagipusuon agod magpatudlo kay Jehova, nian ang ila nasulod nga mga panghunahuna, ang ila mga handum, kag ang ila mga motibo amat-amat nga pagadihunon sang kon ano ang ila natun-an. (Salmo 143:10) Ang Roma 10:​10 nagasiling nga ang tawo nagapakita sing pagtuo “paagi sa tagipusuon.” Ginapakita sini nga pagtuo kon ano gid ang ginabatyag sang indibiduwal, kag makita ini sa iya pagkabuhi.

Si Noe Naghulag sa Malig-on Sing Sadsaran nga Pagtuo

5, 6. Sa ano napasad ang pagtuo ni Noe?

⁵ Si Noe isa anay sang may malig-on sing sadsaran nga pagtuo. (Hebreo 11:⁠7) Ano ang iya sadsaran para sini? Si Noe may pulong sang Dios, indi sa nasulat nga porma, kundi suno sa ginhambal sa iya. Ang Genesis 6:​13 nagasiling: “Ang Dios nagsiling kay Noe: ‘Ang katapusan sang tanan nga unod nag-abot sa atubangan nakon, kay ang duta napun-an sing kasingki paagi sa ila.’ ” Ginsugo ni Jehova si Noe nga maghimo sing arka kag naghatag sia sing mga detalye kon paano ini himuon. Nian ang Dios nagdugang: “Tuhoy sa akon, yari ako nagapadala sing anaw sang mga tubig sa duta sa paglaglag sa tanan nga unod diin ang puwersa sang kabuhi aktibo sa idalom sang mga langit. Ang tanan nga butang sa duta mapatay.”​—⁠Genesis 6:​14-17.

⁶ May ulan na bala antes sini? Wala sing ginasiling ang Biblia. Ang Genesis 2:5 nagasiling: “Si Jehova nga Dios wala pa makapaulan.” Apang, amo sini kon paano ginpaathag ni Moises, nga nagkabuhi mga siglo sang ulihi, ang mga butang nga nagahinun-anon indi sa adlaw ni Noe kundi sa tion antes pa sina. Subong sa ginpakita sang Genesis 7:​4, ginsambit ni Jehova ang ulan sang nakighambal kay Noe, kag maathag nga nahangpan ni Noe ang buot niya silingon. Apang, wala lamang magtuo si Noe sa kon ano ang iya makita. Si apostol Pablo nagsulat nga si Noe ‘ginpaandaman sang Dios tuhoy sa mga butang nga wala pa makita.’ Ginsilingan sang Dios si Noe nga magapadala Sia sa duta sing “anaw sang mga tubig,” ukon sing “langitnon nga kalalawran,” suno sa ginasiling sang footnote sang New World Translation sa Genesis 6:⁠17. Tubtob sadto nga tion, wala pa sing subong sadto nga natabo. Apang ang tanan nga tinuga nga nakita ni Noe isa ka maathag nga pagpasundayag nga mapahanabo matuod sang Dios ang subong sadto ka malaglagon nga anaw. Napahulag bangod sang pagtuo, si Noe naghimo sing arka.

7. (a) Ano ang wala ginakinahanglan ni Noe agod mahimo niya ang ginsugo sang Dios sa iya? (b) Paano kita makapanginpulos paagi sa pagbinagbinag sa pagtuo ni Noe, kag paano ang aton pagtuo mangin pagpakamaayo sa iban?

⁷ Ang Dios wala maghatag kay Noe sing petsa kon san-o magasugod ang Anaw. Apang wala yadto gingamit ni Noe subong balibad agod magmangin maduhaduhaon sia, ginhimo nga ikaduha na lamang sa iya kabuhi ang paghimo sing arka kag ang pagbantala. Sa nagakaigo nga tion, ginsugo sang Dios si Noe kon san-o magsulod sa arka. Sadto man nga tion, “ginhimo ni Noe ang tanan nga ginsugo sa iya sang Dios. Amo sini ang ginhimo niya.” (Genesis 6:22) Si Noe naglakat paagi sa pagtuo, indi paagi sa panulok. Daku gid ang aton pagpasalamat nga ginhimo niya ini! Bangod sang iya pagtuo, buhi kita karon. Sa bahin man naton, ang pagtuo nga ginapakita naton mahimo nga may daku nga epekto sa kon ano nga palaabuton ang nagahulat indi lamang sa aton kundi sa aton man mga anak kag sa iban nga mga tawo sa palibot naton.

Ang Pagtuo ni Abraham

8, 9. (a) Sa ano ginpasad ni Abraham ang iya pagtuo? (b) Sa anong paagi ‘nagpakita’ si Jehova kay Abraham?

⁸ Binagbinaga ang isa pa ka halimbawa​—⁠ang iya ni Abraham. (Hebreo 11:​8-10) Sa ano ginpasad ni Abraham ang iya pagtuo? Ang palibot nga iya gindak-an sa Ur sang mga Caldeanhon idolatroso kag materyalistiko. Apang may iban pa nga mga impluwensia nga nagdihon sa panimuot ni Abraham. Pat-od gid nga nakaupod niya si Sem nga anak nga lalaki ni Noe, diin nag-abtanay ang ila kabuhi sing mga 150 ka tuig. Nakumbinse si Abraham nga si Jehova amo “ang Labing Mataas nga Dios, ang Naghimo sang langit kag duta.”​—⁠Genesis 14:⁠22.

⁹ May iban pa nga butang nga nag-impluwensia sing daku kay Abraham. Si Jehova “nagpakita . . . [kay] Abraham samtang sa Mesopotamia sia, sa wala pa sia magpuyo sa Haran, kag nagsiling sia sa iya, ‘Halin ka sa imo duta kag sa imo kahimataan kag magkadto sa duta nga ipakita ko sa imo.’ ” (Binuhatan 7:​2, 3) Sa anong paagi ‘nagpakita’ si Jehova kay Abraham? Wala makita ni Abraham ang Dios sing direkta. (Exodo 33:20) Apang, ayhan nagpakita si Jehova kay Abraham sa isa ka damgo, nga may labaw sa kinaugali nga pagpakita sing himaya, ukon paagi sa isa ka anghel nga mensahero, ukon tiglawas. (Ipaanggid ang Genesis 18:​1-3; 28:​10-15; Levitico 9:​4, 6, 23, 24.) Kon sa ano man nga paagi nagpakita si Jehova kay Abraham, yadtong matutom nga tawo nagsalig nga ang Dios nagpahamtang sing isa ka hamili nga pribilehiyo sa atubangan niya. Si Abraham naghulag nga may pagtuo.

10. Paano ginpalig-on ni Jehova ang pagtuo ni Abraham?

¹⁰ Ang pagtuo ni Abraham wala nasandig sa pagtigayon niya sing mga detalye tuhoy sa duta nga ginpakadtuan sa iya sang Dios. Wala ini nasandig sa pagkahibalo niya kon san-o ihatag sa iya yadto nga duta. May pagtuo sia bangod kilala niya si Jehova subong ang Dios nga Labing Gamhanan. (Exodo 6:3) Ginsilingan ni Jehova si Abraham nga makatigayon sia sing anak, apang kon kaisa nagpalibog si Abraham kon paano ini matabo. Nagatigulang na sia. (Genesis 15:​3, 4) Ginpabakod ni Jehova ang pagtuo ni Abraham paagi sa pagsugo sa iya nga magtangla sa mga kabituunan kag isipon ini kon masarangan niya. “Mangin amo sina ang imo binhi,” siling sang Dios. Si Abraham natandog gid. Maathag gid nga sarang matuman sang Manunuga sadtong makahalawhaw nga langitnon nga mga hubon ang iya ginsaad. Si Abraham “nagtuo kay Jehova.” (Genesis 15:​5, 6) Wala lamang magtuo si Abraham bangod naluyagan niya ang nabatian niya; may malig-on nga sadsaran ang iya pagtuo.

11. (a) Samtang malapit na sia mag-100 ka tuig ang edad, ano ang reaksion ni Abraham sa saad sang Dios nga ang tigulang nga si Sara magapanganak sing lalaki? (b) Paagi sa ano nga sahi sang pagtuo gin-atubang ni Abraham ang pagtilaw may kaangtanan sa pagdala sa iya anak sa Bukid nga Moria agod ihalad sia?

¹¹ Sang halos mag-100 na ka tuig ang edad ni Abraham kag ang iya asawa, nga si Sara, malapit na mag-90 anyos, ginsulit ni Jehova ang iya saad nga si Abraham makatigayon sing anak nga lalaki kag si Sara mangin amo ang iloy. Ginbinagbinag gid ni Abraham ang ila kahimtangan. “Apang bangod sa saad sang Dios wala sia nagpangalag-ag sa kakulang sing pagtuo, kundi nangin mabakod paagi sa iya pagtuo, nagahatag sa Dios sing himaya kag kumbinsido sing bug-os nga masarangan niya himuon ang iya ginsaad.” (Roma 4:​19-21) Nahibaluan ni Abraham nga ang saad sang Dios indi mabang-awan. Sang ulihi, bangod sang iya pagtuo, si Abraham nagtuman sang ginsugo sia sang Dios nga dalhon ang iya anak nga si Isaac sa duta sang Moria kag ihalad sia. (Genesis 22:​1-12) Bug-os ang pagsalig ni Abraham nga ang Dios nga milagruso nga nagpahanabo nga mabun-ag yadto nga anak makasarang man sa pagbuhi liwat sa iya agod matuman ang Iya dugang pa nga mga saad may kaangtanan sa iya.​—⁠Hebreo 11:​17-19.

12. Daw ano kalawig si Abraham nagpadayon sa paglakat paagi sa pagtuo, kag ano nga padya ang nagahulat sa iya kag sa mga katapo sang iya pamilya nga nagpakita sing mabakod nga pagtuo?

¹² Ginpakita ni Abraham nga ginatuytuyan sia sang pagtuo indi lamang sa pila ka tion kundi sa bug-os niya nga kabuhi. Sang nagakabuhi sia wala mabaton ni Abraham gikan sa Dios ang bisan ano man nga bahin sang Ginsaad nga Duta subong palanublion. (Binuhatan 7:5) Apang, si Abraham wala mangluya kag nagbalik sa Ur sang mga Caldeanhon. Sa sulod sang 100 ka tuig, tubtob sang napatay sia, nagpuyo sia sa mga tolda sa duta nga ginpakadtuan sa iya sang Dios. (Genesis 25:7) Nahanungod sa iya kag sa iya asawa nga si Sara, sa ila anak nga si Isaac, kag sa ila apo nga si Jacob, ang Hebreo 11:​16 nagasiling: “Wala sila ginkahuya sang Dios, nga tawgon nga ila Dios, kay nag-aman sia sing isa ka siudad para sa ila.” Huo, si Jehova nag-aman sing duog para sa ila sa dutan-on nga sakop sang iya Mesianikong Ginharian.

13. Sin-o sa tunga sang mga alagad ni Jehova karon ang nagapamatuod nga may pagtuo kaangay kay Abraham?

¹³ May mga alagad ni Jehova karon nga kaangay ni Abraham. Naglakat sila paagi sa pagtuo sa madamong tinuig. Paagi sa kusog nga ginahatag sang Dios, nalandas nila ang kaangay-bukid nga mga balagbag. (Mateo 17:20) Wala sila magpangalag-ag sa pagtuo bangod wala sila makahibalo kon san-o gid ihatag sa ila sang Dios ang palanublion nga ginsaad niya. Nakahibalo sila nga ang pulong ni Jehova indi mabang-awan, kag ginakabig nila nga isa ka hamili nga pribilehiyo nga maisipan sa tunga sang iya mga Saksi. Amo bala sina ang imo balatyagon?

Ang Pagtuo nga Nagpahulag kay Moises

14. Paano ginpasad ang sadsaran sang pagtuo ni Moises?

¹⁴ Ang isa pa ka halimbawa sang pagtuo amo si Moises. Ano ang sadsaran sang iya pagtuo? Ginpasad ini kutob sa pagkalapsag. Walay sapayan nga nakita sang anak nga babayi ni Paraon si Moises sa isa ka takupis sa Suba sang Nilo kag ginkabig sia subong anak niya, ang Hebreong iloy mismo ni Moises, nga si Jocabed, ang nagbatiti sa bata kag nag-atipan sa iya sadtong bata pa sia. Maathag gid nga maayo ang pagtudlo ni Jocabed sa iya, ginpatudok sa iya ang gugma kay Jehova kag ang pagpabalor sa Iya mga saad kay Abraham. Sang ulihi, subong katapo sang panimalay ni Paraon, si Moises ‘gintudluan sang tanan nga kaalam sang mga Egiptohanon.’ (Binuhatan 7:​20-22; Exodo 2:​1-10; 6:20; Hebreo 11:23) Apang, walay sapayan sang maayo nga kahimtangan ni Moises, ang iya tagipusuon yara sa naulipon nga katawhan sang Dios.

15. Ano ang kahulugan kay Moises sang pagpakilala niya sang iya kaugalingon upod sa katawhan ni Jehova?

¹⁵ Sa iya ika-40 ka tuig, ginlampusan ni Moises ang isa ka Egiptohanon agod apinan ang Israelinhon nga ginatratar sing malain. Ini nga hitabo nagpakita kon ano ang pagtamod ni Moises sa katawhan sang Dios. Sa pagkamatuod, “paagi sa pagtuo si Moises, sang nagdaku, nagdumili nga tawgon nga anak sang anak nga babayi ni Paraon.” Sa baylo nga padayunon ang “umalagi nga kalipayan sang sala” subong katapo sang palasyo sang Egipto, ginpahulag sia sang pagtuo nga ipakilala ang iya kaugalingon kaupod sang ginapigos nga katawhan sang Dios.​—⁠Hebreo 11:​24, 25; Binuhatan 7:​23-25.

16. (a) Ano nga sugo ang ginhatag ni Jehova kay Moises, kag paano sia ginbuligan sang Dios? (b) Agod matuman ang ginsugo sa iya, paano nagpakita sing pagtuo si Moises?

¹⁶ Si Moises nalangkag sa pagpanghikot agod mapaumpawan ang iya katawhan, apang wala pa mag-abot ang tion sang Dios para sa ila kahilwayan. Nagpalagyo si Moises gikan sa Egipto. Mga 40 ka tuig lamang sang ulihi nga ginsugo ni Jehova si Moises paagi sa anghel nga magbalik sa Egipto agod pangunahan ang Israel sa pagguwa sa sadto nga duta. (Exodo 3:​2-10) Ano ang reaksion ni Moises? Wala sia magpangduhaduha sa ikasarang ni Jehova sa paghilway sa Israel, apang nagbatyag sia nga indi bagay sa katungdanan nga gintulin sang Dios sa iya. Sing mahigugmaon, si Jehova naghatag sing pagpalig-on nga ginkinahanglan ni Moises. (Exodo 3:​11⁠–​4:17) Ang pagtuo ni Moises nagbakod. Nagbalik sia sa Egipto kag liwat-liwat nga ginpaandaman sing personal si Paraon tuhoy sa mga kalalat-an nga mahanabo sa Israel kon indi pagpalakton sadto nga gumalahom ang Israel sa pagsimba kay Jehova. Wala sing personal nga gahom si Moises agod himuon yadto nga mga kalalat-an. Naglakat sia paagi sa pagtuo, indi paagi sa panulok. Nagtuo sia kay Jehova kag sa iya pulong. Ginpahog ni Paraon si Moises. Apang si Moises nagpadayon. “Paagi sa pagtuo ginbayaan niya ang Egipto, apang nga wala nagakahadlok sa kaakig sang hari, kay padayon sia nga nagbatas subong nga nagatan-aw sa Isa nga dimakita.” (Hebreo 11:27) Si Moises indi himpit. Nakahimo sia sing mga sala. (Numeros 20:​7-12) Apang, pagkatapos ginsugo sang Dios, ang iya bug-os nga kabuhi gintuytuyan sang pagtuo.

17. Ang paglakat paagi sa pagtuo nagresulta sa ano para kanday Noe, Abraham, kag Moises, bisan pa nga wala sila magkabuhi tubtob makita ang bag-ong kalibutan sang Dios?

¹⁷ Kabay nga ang inyo pagtuo mangin kaangay sadtong kanday Noe, Abraham, kag Moises. Matuod nga wala nila makita ang bag-ong kalibutan sang Dios sadtong panahon nila. (Hebreo 11:39) Indi pa yadto ang gintalana nga tion sang Dios; apang may iban pa nga mga bahin sang iya katuyuan ang kinahanglan pa nga matuman. Apang, ang ila pagtuo sa pulong sang Dios wala magluya, kag ang ila mga ngalan yara sa tulun-an sang kabuhi sang Dios.

18. Para sa mga gintawag sa langitnon nga kabuhi, ngaa kinahanglan ang maglakat paagi sa pagtuo?

¹⁸ “Ang Dios may natigana nga maayo pa tungod sa aton,” sulat ni apostol Pablo. Buot silingon, may natigana nga maayo pa ang Dios para sa mga, kaangay ni Pablo, gintawag sa langitnon nga kabuhi kaupod ni Cristo. (Hebreo 11:40) Sila amo labi na ang ginahunahuna ni Pablo sang ginsulat niya ang pinamulong nga narekord sa 2 Corinto 5:​7: “Nagalakat kita paagi sa pagtuo, indi paagi sa panulok.” Sang ginsulat yadto, wala pa sing isa sa ila ang nakabaton sang ila langitnon nga padya. Indi nila ini makita paagi sa ila pisikal nga mga mata, apang ang ila pagtuo sa sini may maayo nga sadsaran. Si Cristo ginbanhaw gikan sa minatay, ang unang mga bunga sadtong pakamaayuhon sing langitnon nga kabuhi. Kag kapin sa 500 ka saksi ang nakakita sa iya antes sia nagkayab sa langit. (1 Corinto 15:​3-8) May nagakaigo gid sila nga rason agod patuytuyan ang ila bug-os nga kabuhi sina nga pagtuo. May maayo man kita nga rason sa paglakat paagi sa pagtuo.

19. Suno sa ginpakita sa Hebreo 1:​1, 2, paagi kay sin-o nagpamulong ang Dios sa aton?

¹⁹ Sa karon, si Jehova wala nagapakighambal sa iya katawhan paagi sa anghel, subong sa ginhimo niya anay kay Moises sa isa ka nagadabadaba nga sapinit. Ang Dios naghambal paagi sa iya Anak. (Hebreo 1:​1, 2) Kon ano ang ginsiling sang Dios paagi sa iya, ginsulat Niya sa Biblia, nga ginbalhag sa mga pamulong sang katawhan sa bug-os nga kalibutan.

20. Paano ang aton kahimtangan mas maayo sangsa kanday Noe, Abraham, kag Moises?

²⁰ Mas madamo pa ang yara sa aton sangsa kanday Noe, Abraham, kag Moises. May kompleto kita nga Pulong sang Dios​—⁠ang kalabanan sini natuman na. Tungod sang tanan nga ginasiling sang Biblia nahanungod sa mga lalaki kag mga babayi nga nagpamatuod sang ila kaugalingon nga matutom nga mga saksi ni Jehova walay sapayan sang tanan nga sahi sang pagtilaw, ang Hebreo 12:1 nagalaygay: “Isikway man naton ang tagsa ka kabug-atan kag ang sala nga madali makasalawid sa aton, kag magdalagan kita nga may pagbatas sang dalaganon nga ginabutang sa aton atubangan.” Ang aton pagtuo indi butang nga dapat pasapayanan. “Ang sala nga madali makasalawid sa aton” amo ang kakulang sing pagtuo. Kinahanglan ang lakas nga pagpakig-away agod magpabilin kita nga “nagalakat paagi sa pagtuo.”

[Footnote]

Ano ang Imo Komento?

◻ Ano ang nadalahig sa ‘paglakat paagi sa pagtuo’?

◻ Paano kita makabenepisyo gikan sa kon paano nagpakita sing pagtuo si Noe?

◻ Paano kita nabuligan kon paano nagpakita sing pagtuo si Abraham?

◻ Ngaa ginatudlo sang Biblia si Moises subong isa ka huwaran sang pagtuo?

[Retrato sa pahina 10]

Si Abraham naglakat paagi sa pagtuo

[Retrato sa pahina 10]

Sanday Moises kag Aaron nagpakita sing pagtuo sang nag-atubang kay Paraon