“Ginhimo ni Jehova ang Iya Gintuyo”

 1. Sang nalaglag ang Jerusalem, ano ang ginsiling ni Jeremias parte sa mga tagna ni Jehova?

NALAGLAG ang Jerusalem. Ginsunog ini sang mga Babilonianhon kag nagatub-ok gihapon ang aso. Ginaaningal pa ni Jeremias ang siyagit sang mga ginpamatay. Ginsugiran sia nga daan sang Dios nga matabo ini, kag natuman gid. “Ginhimo ni Jehova ang iya gintuyo,” panghayhay sang manalagna. Grabe gid ang kalaglagan sang Jerusalem!—Basaha ang Panalambiton 2:17.

 2. Ano nga tagna nga ginatos ka tuig na nga ginpahayag ang nasaksihan ni Jeremias?

² Nakita ni Jeremias ang katumanan sang madamo nga tagna sa katawhan sang Dios, lakip na ang nauna pa nga mga tagna. Ginatos ka tuig antes sini, ginhambal ni Moises ang resulta sang pagtuman kag pagsupak sa Dios—“ang pagpakamaayo” ukon “ang pagpakamalaut.” Luyag gid ni Jehova nga matigayon sang iya katawhan ang mga pagpakamaayo. Pero, maagihan nila ang grabe nga pagpakamalaut kon magsupak sila. Nagpaandam si Moises, nga ginsulit ni Jeremias sang ulihi, ‘nga kaunon sang mga nagasikway kag nagapamatok kay Jehova ang unod sang ila mga anak.’ (Deut. 30:19, 20; Jer. 19:9; Lev. 26:29) ‘Natabo gid bala ini?’ mahimo may mamangkot. Natabo gid ini sang ginlikupan sila sang mga Babilonianhon, kag naubusan sing pagkaon. “Ang maluluy-on nga mga babayi naglaga sang ila mga anak,” siling ni Jeremias. “Nangin pagkaon sila sa tion sang pagkapukan sang anak nga babayi sang akon katawhan.” (Pan. 4:10) Grabe gid ini nga trahedya!

 3. Ano ang katuyuan sang Dios sa pagsugo sing mga manalagna?

³ Siempre pa, nagsugo si Jehova sing mga manalagna kaangay ni Jeremias indi lang para ipahibalo ang nagahilapit nga kalaglagan. Luyag sang Dios nga maghinulsol kag mangin matutom liwat ang iya katawhan. Si Esdras nagsiling: “Si Jehova nga Dios sang ila mga katigulangan sulitsulit nga nagpaandam sa ila paagi sa iya mga mensahero, bangod naluoy sia sa iya katawhan kag sa iya puluy-an.”—2 Cron. 36:15; basaha ang Jeremias 26:3, 12, 13.

 4. Ano ang ginbatyag ni Jeremias sa iya mensahe?

⁴ Kaangay ni Jehova, naluoy man si Jeremias sa katawhan. Makita mo ini sa iya ginsiling antes nalaglag ang Jerusalem. Nabalaka gid sia sa nagahilapit nga kalaglagan. Malikawan kuntani ini kon namati kag nagtuman lang ang katawhan sa mensahe ni Jeremias! Handurawa ang ginbatyag ni Jeremias samtang ginapahayag niya ang mensahe sang Dios. “Masakit gid ang akon tiyan!” singgit niya. “Masakit gid ang akon tagipusuon. Nagakubakuba ang akon dughan. Indi ako makahipos, kay mabatian ko ang tunog sang budyong, ang sinyales sang inaway.” (Jer. 4:19) Indi sia makahipos sa nagahilapit nga kalaglagan.

 5. Ngaa nagsalig si Jeremias sa iya ginbantala?

⁵ Ngaa nagsalig gid si Jeremias nga matuman ang iya gintagna? (Jer. 1:17; 7:30; 9:22) May pagtuo sia, kag natun-an niya sa Kasulatan nga si Jehova amo ang Dios sang matuod nga mga tagna. Ginpakita sang kasaysayan ang ikasarang ni Jehova sa pagtagna sang mga hitabo nga daw imposible sa mga tawo, kaangay sang kahilwayan sang Israel sa Egipto. Pamilyar si Jeremias sa kasaysayan sa tulun-an sang Exodo kag sa ginsiling sang isa nga nakasaksi mismo. Ginpahanumdom ni Josue ang mga Israelinhon: “Nahibaluan gid ninyo sa bug-os ninyo nga tagipusuon kag sa bug-os ninyo nga kalag nga wala sing bisan isa sa tanan nga ginsaad sa inyo ni Jehova nga inyo Dios ang napaslawan. Natuman ini tanan sa inyo. Wala sing bisan isa sa sini ang napaslawan.”—Jos. 23:14.

6, 7. (a) Ngaa dapat ka mangin interesado sa mga tagna ni Jeremias? (b) Ano ang makabulig sa imo nga magsalig sa imo ginabantala?

⁶ Ngaa dapat ka mangin interesado sa mga tagna ni Jeremias? Una, may rason sia sa pagsalig nga tumanon ni Jehova ang iya gintagna. Ikaduha, bangod nagakatuman na karon ang pila sa ginpatagna sang Dios kay Jeremias, kag makita mo pa ang katumanan sang iban nga tagna. Ikatlo, pinasahi nga alagad sang Dios si Jeremias bangod sang madamo nga mensahe nga ginpahayag niya sa ngalan sang Dios kag sang iya kakugi sa pagsugid sini. “Kon ipaanggid sa iban nga manalagna, nagapangibabaw gid si Jeremias,” siling sang isa ka iskolar. Importante gid si Jeremias sa kasaysayan sang pagpakig-angot sang Dios sa iya katawhan, amo gani nga sang nagpanaksi si Jesus, ang pila nagpati nga sia si Jeremias.—Mat. 16:13, 14.

⁷ Kaangay ni Jeremias, nagakabuhi ka man sa tion nga nagakatuman ang mga tagna sa Biblia. Kag dapat ka man magsalig nga matuman ang mga saad sang Dios. (2 Ped. 3:9-14) Paano? Paagi sa padayon nga pagsalig nga matuman gid ang mga tagna sa Pulong sang Dios. Sa sini nga kapitulo, binagbinagon naton ang pila sa tagna ni Jeremias nga iya nasaksihan nga natuman. Ang iban nga tagna nga aton binagbinagon natuman sang ulihi. Ang iban sini may epekto sa imo kag sa imo palaabuton. Kabay pa nga mapabakod ang imo pagsalig sa mga tagna ni Jehova para makumbinsi ka pa gid nga ‘himuon niya ang iya gintuyo.’—Pan. 2:17.

8, 9. Ano ang isa ka rason ngaa pinasahi gid ang Biblia?

⁸ Madamo ang nagatinguha nga pakton ang palaabuton, subong sang mga ekonomista, pulitiko, espiritista, kag mga manugbalita parte sa paniempo. Pero, mabudlay gid pakton sing sibu bisan ang simple lang nga butang nga matabo sa pila ka adlaw ukon semana. Gani, pinasahi gid ang Biblia bangod sibu ang mga tagna sini. (Isa. 41:26; 42:9) Ang tanan nga tagna ni Jeremias wala gid napaslawan, ang iban natuman gilayon kag ang iban sa palaabuton pa. Madamo sa sini ang may labot sa mga indibiduwal kag mga pungsod. Binagbinagon anay naton ang pila sini, nga natuman sang panahon ni Jeremias.

⁹ Sin-o karon ang makapakot sang matabo sa masunod nga mga tuig? Halimbawa, sin-o ang sibu nga makapakot kon may pagbag-o bala sa mga panguluhan? Pero, paagi sa panuytoy sang Dios, gintagna ni Jeremias nga lutuson sang Babilonia ang iban nga pungsod. Nagsiling sia nga ang Babilonia amo ang “bulawan nga kopa” nga magaula sang kaakig ni Jehova sa Juda kag sa madamo nga kaingod nga siudad kag katawhan, kag magaulipon sa ila. (Jer. 51:7) Amo gid ini ang nasaksihan ni Jeremias kag sang iya mga kontemporaryo.—Ipaanggid ang Jeremias 25:15-29; 27:3-6; 46:13.

10. Ano ang gintagna ni Jehova parte sa apat ka hari sang Juda?

¹⁰ Gingamit man ni Jehova si Jeremias para ipahibalo ang matabo sa apat ka hari sang Juda. Gintagna sang Dios nga ang anak ni Hari Josias nga si Jehoahaz, ukon Sallum, itapok kag indi na makabalik sa Juda. (Jer. 22:11, 12) Natabo gid ini. (2 Hari 23:31-34) Ginpahayag sang Dios nga ang manunubli ni Jehoahaz nga si Jehoiakim, ‘ilubong pareho sang paglubong sa asno nga lalaki.’ (Jer. 22:18, 19; 36:30) Wala ginsugid sang Biblia kon paano sia napatay ukon kon ano ang ginhimo sa iya bangkay, pero ginbuslan sia sang iya anak nga si Jehoiakin sa tion sang paglikop. Gintagna man ni Jeremias nga si Jehoiakin (gintawag man nga Conias kag Jeconias) itapok sa Babilonia kag didto mapatay. (Jer. 22:24-27; 24:1) Natuman man ini. Kamusta ang katapusan nga hari, si Sedequias? Gintagna ni Jeremias nga ihatag si Sedequias sa iya mga kaaway, nga indi magkaluoy sa iya. (Jer. 21:1-10) Ano ang natabo? Nadakpan sia sang iya mga kaaway. Ginpatay sa atubangan niya ang iya kabataan nga lalaki, ginbulag sia, gindala sa Babilonia, kag didto napatay. (Jer. 52:8-11) Huo, natuman ining tanan nga tagna.

11. Sin-o si Hananias, kag ano ang gintagna ni Jehova parte sa iya?

¹¹ Mabasa naton sa Jeremias kapitulo 28 nga sang paggahom ni Sedequias, ginsupak sang butig nga manalagna nga si Hananias ang mensahe ni Jehova paagi kay Jeremias parte sa pagsakop sang Babilonia sa Jerusalem. Wala namati sa mensahe sang Dios si Hananias, kag nagsiling sia nga mabali ang gota sang pagkaulipon nga ginpatuman ni Nabocodonosor sa Juda kag sa iban nga pungsod. Pero, sa sugo ni Jehova, ginpakita ni Jeremias ang kabutigan ni Hananias, ginsulit niya nga magaalagad sa Babilonia ang madamo nga pungsod, kag nagsiling nga sa sulod sang isa ka tuig mapatay si Hananias. Kag natuman gid ini.—Basaha ang Jeremias 28:10-17.

12. Ano ang reaksion sang kalabanan nga kontemporaryo ni Jeremias sa iya panguna nga mensahe?

¹² Siempre pa ang sentro sang mensahe sang Dios nga ginhatag kay Jeremias amo ang kalaglagan sang Jerusalem. Sulitsulit nga nagpaandam si Jeremias nga laglagon ang siudad kon indi maghinulsol ang mga Judiyo sa ila idolatroso nga mga buhat, inhustisya, kag kasingki. (Jer. 4:1; 16:18; 19:3-5, 15) Madamo sa kontemporaryo ni Jeremias ang nagapati nga indi ini paghimuon ni Jehova. Yara sa Jerusalem ang templo sang Dios. Tugutan bala sang Dios nga malaglag ang balaan nga duog? Nagapati sila nga indi gid ina matabo. Pero nahibaluan mo nga wala nagabutig si Jehova. Ginhimo niya ang iya gintuyo.—Jer. 52:12-14.

13. (a) Sa ano nga paagi magkaanggid ang aton sitwasyon sa panahon ni Jeremias? (b) Ngaa dapat ka mangin interesado sa ginsaad sang Dios sa pila ka tawo sang panahon ni Jeremias?

¹³ Ang katawhan sang Dios karon pareho man sa sitwasyon sang mga matutom kay Jehova sang panahon ni Jeremias. Nahibaluan naton nga laglagon ni Jehova sa indi madugay ang tanan nga wala nagapamati sa iya mga paandam. Pero mapalig-on kita sang iya tagna, kaangay sa mga Judiyo sadto nga nagpabilin sa putli nga pagsimba. Bangod sa katutom sang mga Recabnon kay Jehova kag sa sugo sang ila katigulangan, nagsiling ang Dios nga luwason sila sa kalaglagan sang Jerusalem. Naluwas gid man sila. Ang pamatuod sini amo ang pagsambit sang ulihi sa “anak ni Recab nga si Malquias,” nga nagbulig sa pagkay-o sang Jerusalem sang panahon ni Nehemias. (Neh. 3:14; Jer. 35:18, 19) Ginpasalig ni Jehova si Ebed-melec nga maluwas man sia bangod nagsalig sia sa Dios kag nagbulig kay Jeremias. (Jer. 38:11-13; 39:15-18) Gintuman man sang Dios ang iya saad kay Baruc nga “luwason” sia. (Jer. 45:1, 5) Ano ang imo masiling kay natuman ini nga mga tagna? Ano sa banta mo ang himuon ni Jehova sa imo kon magmatutom ka man?—Basaha ang 2 Pedro 2:9.

14. Ngaa talalupangdon gid ang tagna parte sa Babilonia?

¹⁴ Gintagna sang Dios nga lutuson ni Nabocodonosor indi lang ang Juda kundi pati man ang Egipto. (Jer. 25:17-19) Daw indi gid ini mapatihan kay gamhanan ang Egipto sa sina nga tion kag ginakontrol pa sini ang Juda. (2 Hari 23:29-35) Sang nalaglag ang Jerusalem, nagplano ang nagkalabilin nga mga Judiyo nga magdangop sa Egipto. Amo ini ang gusto nila himuon bisan pa ginpaandaman sila ni Jehova kag ginsilingan nga pakamaayuhon kon magpabilin sa Juda. Pero kon magdangop sila sa Egipto, mapatay sila didto sa espada. (Jer. 42:10-16; 44:30) Wala ginsulat ni Jeremias kon bala nakita niya ang pagsalakay sang Babilonia sa Egipto. Pero natuman gid ang tagna ni Jehova parte sa mga Israelinhon nga nagdangop sa Egipto sang ginlutos ini sang Babilonia sang panugod sang ikan-om nga siglo B.C.E.—Jer. 43:8-13.

15, 16. Paano natuman ang ginsiling sang Dios parte sa kahilwayan sang iya katawhan?

¹⁵ Gintagna man ni Jeremias ang kalaglagan sang Babilonia. Isa ka siglo antes sini, sibu nga gintagna ni Jeremias ang hinali nga pagkapukan sang Babilonia. Paano? Suno sa manalagna, “magamala” ang tubig nga nagaamlig sa iya kag indi makig-away ang iya gamhanan nga mga lalaki. (Jer. 50:38; 51:30) Natuman ini sing detalyado sang ginpalikaw sang Media kag Persia ang Suba Eufrates, gin-ubog ini, nagsulod sa siudad, kag hinali nga naglutos sa Babilonia. Mahimo madumduman mo ang tagna nga indi na pagpuy-an ini nga siudad. (Jer. 50:39; 51:26) Sa karon, ang mamingaw nga kahimtangan sang gamhanan anay nga Babilonia nagapamatuod nga sibu gid ang tagna sang Dios.

¹⁶ Ginpahayag ni Jehova paagi kay Jeremias nga magaalagad ang mga Judiyo sing 70 ka tuig sa mga Babilonianhon. Nian pabalikon sang Dios ang iya katawhan sa ila pungsod. (Basaha ang Jeremias 25:8-11; 29:10.) Nagsalig gid si Daniel sa sini nga tagna, kag gingamit niya ini para mahibaluan kon san-o matapos ang “kahapayan sang Jerusalem.” (Dan. 9:2) “Agod matuman ang ginhambal ni Jehova kay Jeremias,” siling ni Esdras, ‘gintandog ni Jehova ang tagipusuon ni Ciro nga hari sang Persia,’ nga naglutos sa Babilonia para pabalikon ang mga Judiyo sa ila pungsod. (Esd. 1:1-4) Makatigayon sing kalinong ang mga nagpalauli sa ila dutang natawhan kag ipasag-uli ang putli nga pagsimba, suno sa tagna ni Jeremias.—Jer. 30:8-10; 31:3, 11, 12; 32:37.

17. Ipaathag kon paano ang pinamulong ni Jeremias parte sa “paghibi” sa Rama nagapatuhoy sa duha ka magkatuhay nga hitabo.

¹⁷ Ginrekord man ni Jeremias ang mga tagna nga matuman sa palaabuton. Nagsiling sia: “Amo ini ang ginsiling ni Jehova, ‘Mabatian sa Rama ang pagpanalambiton kag paghibi. Nagahibi si Raquel tungod sa iya mga anak. Indi sia malugpayan tungod wala na ang iya mga anak.’” (Jer. 31:15) Sang nahapay ang Jerusalem sang 607 B.C.E., posible nga ang bihag nga mga Judiyo gintipon sa Rama, nga mga walo ka kilometro sa aminhan sang Jerusalem. Mahimo man nga ginpatay sa Rama ang iban nga bihag. Amo ini ang una nga katumanan, nga daw nagahibi si Raquel sa pagkapatay sang iya “mga anak.” Pero pagligad sang anom ka siglo, ginpapatay ni Hari Herodes ang mga lapsag sa Betlehem. Ginpaathag ni Mateo nga gintagna ni Jeremias ang mapait nga reaksion sa sini nga pagpamatay.—Mat. 2:16-18.

18. Paano natuman ang tagna sang Dios parte sa Edom?

¹⁸ May isa pa ka tagna nga natuman sang unang siglo C.E. Gintagna sang Dios paagi kay Jeremias nga malakip ang Edom sa mga pungsod nga salakayon sang Babilonia. (Jer. 25:15-17, 21; 27:1-7) Pero indi lang amo ini ang ginsiling sang Dios nga matabo sa Edom. Ang Edom mangin kaangay sang Sodoma kag Gomorra. Nahibaluan mo bala kon ano ang buot silingon sini? Indi na ini pagpuy-an kag indi na magluntad pa. (Jer. 49:7-10, 17, 18) Natabo gid ini. Diin na subong ang Edom kag ang mga Edominhon? Yara pa bala ini sa moderno nga mga mapa? Wala na. Makita na lang ini sa dumaan nga mga libro sang kasaysayan kag sa Biblia ukon sa mga mapa sa sina nga tion. Nagsaysay si Flavius Josephus nga napilitan ang mga Edominhon sa pagbaton sang Judaismo sang ikaduha nga siglo B.C.E. Pagkatapos malaglag ang Jerusalem sang 70 C.E., wala na sila nagluntad subong pungsod.

19. Ano ang ginapakita sang tulun-an sang Jeremias sa ikasarang sang Dios sa pagtuman sang tagna?

¹⁹ Subong sang imo nakita, ang tulun-an sang Jeremias puno sang mga tagna parte sa mga tawo kag mga pungsod. Kalabanan sa sini natuman na. Ini nga katunayan nagapakita nga takus gid talupangdon kag tun-an ini nga libro bangod may ginasugid ini sa imo bahin sa imo Dios. Ginhimo ni Jehova ang iya gintuyo, kag himuon man niya ang iban pa. (Basaha ang Isaias 46:9-11.) Magapabakod ini sang imo pagsalig sa mga tagna sa Biblia. Sa katunayan, ang pila sa mga tagna nga ginrekord ni Jeremias may katumanan nga nagadalahig sa imo kag sa imo palaabuton. Binagbinagon naton ini sa nabilin nga seksion sini nga kapitulo.

20-22. Ngaa masiling naton nga indi lamang isa ang katumanan sang mga tagna sa Biblia, lakip ang pila sa tulun-an sang Jeremias? Iilustrar.

²⁰ May mga tagna sa Biblia nga mahimo indi lang isa ang katumanan. Makita ini sa sabat ni Jesus sa pamangkot sang iya mga disipulo parte sa tanda sang iya “presensia kag sang hingapusan nga bahin sang sistema sang mga butang.” (Mat. 24:3) May katumanan ini sang 66 tubtob 70 C.E. Pero maathag nga may katumanan pa ini sa tion sang “dakung kapipit-an” nga matabo sa sining malaut nga sistema. Ini nga kapipit-an “wala pa gid matabo halin sa ginsuguran sang kalibutan tubtob karon, kag indi na gid ini matabo liwat.” (Mat. 24:21) Kaanggid sa sini ang mga tagna ni Jeremias. Ang pila natuman sang 607 B.C.E. pero may katumanan man ini sa ulihi, subong sang ‘paghibi ni Raquel tungod sa iya mga anak.’ (Jer. 31:15) Sa pagkamatuod, ang pila sa gintagna ni Jeremias nagapatuhoy sa imo tion, kag nadalahig ka sa katumanan sini.

²¹ Sa tulun-an sang Bugna, gintuytuyan sang Dios si apostol Juan nga isulat ang mga butang nga may labot sa mga tagna ni Jeremias parte sa kalaglagan sang Babilonia sang 539 B.C.E. Makita sa Bugna ang mas daku nga katumanan sini. Lakip sa mga tagna ni Jeremias nga natuman sa aton tion amo ang pagkapukan sang daku nga emperyo—ang emperyo sang butig nga relihion, “ang Babilonia nga Daku.” (Bug. 14:8; 17:1, 2, 5; Jer. 50:2; 51:8) Dapat ‘magua sa iya’ ang katawhan sang Dios para indi sila madalahig sa iya madangatan. (Bug. 18:2, 4; Jer. 51:6) Ang tubig sina nga siudad nga nagalaragway sa iya katawhan, ukon sumalakdag, “pamalhon.”—Jer. 51:36; Bug. 16:12.

²² Matuman man sa palaabuton ang saad sang Dios nga laglagon ang butig nga relihion nga nagapaantos sa iya katawhan. ‘Balusan sia ni Jehova tungod sa tanan nga ginhimo niya.’ (Jer. 50:29; 51:9; Bug. 18:6) Mangin mamingaw ang mga lugar nga ginadominahan sang butig nga relihion.—Jer. 50:39, 40.

23. Anong espirituwal nga pagpasag-uli ang gintagna ni Jeremias nga natuman sang ika-20 nga siglo?

²³ Subong sang nahibaluan mo na, may positibo man nga bahin ang mga tagna ni Jeremias. Gintagna niya ang pagpasag-uli sang matuod nga pagsimba sa duta sa aton panahon. Ang paghilway sa bihag nga mga Judiyo sa dumaan nga Babilonia kaanggid sa paghilway sa katawhan sang Dios karon gikan sa Babilonia nga Daku pagkatapos natukod ang Ginharian sa langit. Sa malaragwayon nga paagi, ginpasag-uli ni Jehova ang katawhan sa putli nga pagsimba, nga nagresulta sing pasalamat kag kalipay. Ginpakamaayo niya ang ila panikasog sa pagbulig sa iban nga magsimba man sa iya kag magkaon sing bugana sa espirituwal. (Basaha ang Jeremias 30:18, 19.) Naeksperiensiahan mo man kon paano gintuman ni Jehova karon ang iya saad nga amanan ang iya katawhan sing manugbantay—ang hamtong sa espirituwal nga mga lalaki nga nagatatap kag nagaamlig sa panong.—Jer. 3:15; 23:3, 4.

24. Ano nga tagna ni Jeremias ang wala pa matuman?

²⁴ Ang mensahe ni Jeremias sa katawhan sang Dios sang una may saad nga maayong mga butang para sa mga matutom, pero may paandam nga kalaglagan sa mga wala naghupot sang ila kaangtanan kay Jehova. Amo man ini sa karon. Mabatyagan gid naton nga serioso ang iya paandam: “Ang mapatay ni Jehova sa sina nga adlaw lapnag sa bug-os nga duta. Indi sila paghayaan kag indi sila pagtipunon ukon pag-ilubong. Mangin pareho sila sang ipot sa ibabaw sang duta.”—Jer. 25:33.

25. Ano ang responsibilidad sang katawhan sang Dios karon?

²⁵ Nagakabuhi man kita sa makahalanguyos nga mga tion. Pareho sang panahon ni Jeremias, ang kaluwasan sang mga tawo nagadepende sa ila reaksion sa mensahe ni Jehova. Indi mga manalagna ang katawhan sang Dios karon. Wala kita gin-inspirar para dugangan ang masaligan nga pinamulong ni Jehova nga masapwan sa Biblia. Pero ginsugo kita nga magbantala sing maayong balita tubtob sa katapusan sang sistema sang mga butang. (Mat. 28:19, 20) Indi gid naton gusto nga ‘patikuon ang mga pulong ni Jehova’ paagi sa indi pagsugid sa mga tawo sang matabo. (Basaha ang Jeremias 23:30.) Indi gid naton pagpamag-anon ang mensahe ni Jehova. Madamo sa tagna sang Dios nga ginpahayag ni Jeremias ang natuman na. Nagapasalig ini sa aton nga matuman man ang nabilin pa nga mga tagna. Dapat naton sugiran ang mga tawo nga ‘himuon gid sang Dios ang iya gintuyo nga iya ginsugo sang una pa.’—Pan. 2:17.

26. Ano pa nga tagna ang aton binagbinagon?

²⁶ Indi gid mangin bug-os ang pagbinagbinag sa mga pagpanagna kag mensahe ni Jeremias kon indi naton pagtalupangdon ang saad ni Jehova parte sa “bag-o nga katipan” sa iya katawhan, ang mga kasuguan nga iya ginsulat sa ila tagipusuon. (Jer. 31:31-33) Ini nga tagna kag ang katumanan sini, nga may kahilabtanan sa imo, amo ang topiko sa masunod nga kapitulo.