Mga Talalupangdon sa Biblia Salmo 42 tubtob 72

Maghulat kay Jehova

Masugata sang mga alagad ni Jehova ang mga pagtilaw sang pagtuo nga may pagbatas bangod ang Dios amo ang ila Dalangpan kag Manluluwas. Ginapakita ini sing maayo sa Tolon-an Dos sang Mga Salmo! Huo, ang Salmo 42 tubtob 72 nagapamatuod nga sarang kita makabatas kon mapangamuyuon kita nga maghulat kay Jehova nga manghikot tungod sa aton.

“Maghulat kay Jehova”

Basaha palihug ang Salmo 42 tubtob 45. Ang tinapok nga Levinhon masinulub-on nga indi sia makakadto sa santuaryo ni Jehova, apang kontento sia nga “maghulat kay Jehova” nga magpanghikot subong iya Manluluwas. (Salmo 42, 43) Nian yara ang pakiluoy tungod sa nabutang sa katalagman nga pungsod, ayhan nagapakita sang paglikop sang Asiria sa Juda sang adlaw ni Hari Ezequias. (Salmo 44) Masunod, ang harianon nga ambahanon sa kasal nagatudlo sa Mesias, kay Jesucristo.—Salmo 45.

◆ 42:1—Paano ang salmista kaangay sang ‘usa nga nahidlaw sa tubig’?

Bangod sang pila ka rason, ining Levinhon gintapok. Gani nahidlaw gid sia sa pagsimba sa santuaryo ni Jehova amo kon ngaa nagbatyag sia nga daw kaangay sang ginapangayam, uhaw nga usa, ukon babayi nga usa, nga nahidlaw sa tubig sa kigang, wala sing tubig nga pungsod. ‘Nauhaw,’ ukon nahidlaw sia, kay Jehova kag sa pribilehiyo nga simbahon ang Dios sa Iya santuaryo.—Bersikulo 2.

◆ 45:1—Anong “matahom nga butang” ang nagpukaw sa tagipusuon sang salmista?

Ang bahin sini nga salmo gin-aplikar kay Jesucristo. (Salmo 45:6, 7; Hebreo 1:8, 9) Gani ang tagipusuon sang salmista napukaw sang palaabuton nga hitabo—ang pagtukod sa Mesianikong Ginharian sang 1914. Ang mga Saksi ni Jehova napahulag man sa pagbantala sining “matahom nga butang.”

Leksion Para sa Aton: Ang eksperiensia sang tinapok nga salmista dapat magapahulag sa aton nga ipakita ang tudok nga apresasyon sa paghiliupod nga aton karon ginaagom upod sa katawhan ni Jehova. Kon ang pagkabilanggo bangod sang paghingabot umalagi nga nagaupang sa aton nga makaupod sila, mapamalandongan naton ang nagligad nga mga kalipay sa balaan nga pag-alagad kag dapat mangabay sing pagbatas paagi sa pangamuyo samtang ‘nagahulat [kita] sa Dios’ nga ipasag-uli kita sa aktibo nga pagpakig-upod sa iya mga sumilimba.—Salmo 42:4, 5, 11; 43:3-5.

Ang Aton Maluluy-on nga Dalangpan

Basaha ang Salmo 46 tubtob 51. Si Jehova, ang aton Dalangpan, magadula sang mga inaway. (Salmo 46) Sia amo ang “Hari sa ibabaw sang bug-os nga duta,” kag ining dimalupig nga Manug-amlig amo ang aton Dios sing dayon. (Salmo 47, 48) Ang mga ginapigus dapat maghulat kay Jehova, apang ang tanan nga ‘nagapasalamat subong ila halad’ “makakita sang pagluwas sang Dios.” (Salmo 49, 50) Kon kita nakasala apang nagahinulsul, subong sang pagpakasala ni David upod kay Bat-seba, ang Dios magaluwas sa aton gikan sa pagkamakasasala sa dugo bangod ‘ang tagipusuon nga buong kag nadugmok indi niya pagtamayon.’—Salmo 51.

◆ 46:2—Paano “baylohan ang duta”?

Bisan pa kon ang mga bukid madula sa dagat sa kinaugali nga kagamo sa duta, ang mga nagasalig sa Dios wala sing kabangdanan nga magkahadlok. Bisan ano man ang matabo, makasalig sila sing dimationg kay Jehova subong ila Dalangpan.

◆ 51:5—Ano nga sala ang ginapatuhoyan ni David?

Indi niya buot silingon nga ang relasyon sa pag-asawahay, pagpanamkon, kag pagbun-ag sala; ni ginapatuhoyan niya ang bisan anong espisipiko nga sala sang iya iloy. Sa baylo, ginakilala niya ang iya kaugalingon makasasala nga kinaugali subong kaliwat ni Adan. (Job 14:4; Roma 5:12) Ginpakita ni Jehova kay David ang kaluoy indi lamang bangod sang katipan sang Ginharian kundi bangod sang iya pagkamahinulsulon.—2 Samuel 7:12-16.

Leksion Para sa Aton: Ang Salmo 46 nagakabagay sa tion nga ang Jerusalem ginpahog sang mga Asiria­ha­non. Nakahibalo nga ‘ang Dios amo ang dalangpan, ang bulig nga madali makita sa kasisit-an,’ si Hari Ezequias nangamuyo kay Jehova, kag ang siudad milagruso nga naluwas. (2 Hari, kapitulo 19) Kon yara sa kasisit-an, kita, man, dapat maghimo kay Jehova nga aton Dalangpan. Paano? Paagi sa pagsalig sa iya, pagpamati sa iya Pulong, kag pagpabilin sa iya organisasyon.

Ang Kaluwasan Ginpasalig

Basaha ang Salmo 52 tubtob 57. Indi paggabuton sang Dios ang malain nga tawo ‘gikan sa duta sang buhi’ kag “magalapta sang tul-an” ni bisan sin-o nga nagapamatok sa Iya katawhan. (Salmo 52, 53) Sang ginalagas ni Saul, si David nagsalig sa balaan nga pagluwas, kag subong biktima sang daya, gintugyan niya ang iya lulan kay Jehova. (Salmo 54, 55) Ang salmista kontento sa paghulat sa Dios nga tapuson ang mga kapipit-an.—Salmo 56, 57.

◆ 52:8—Paano ang matarong kaangay sang kahoy nga olibo?

Ang kahoy nga olibo nagalaragway sa pagkamabungahon, katahom, kag dignidad. (Jeremias 11:16; Oseas 14:6) Sa sining salmo, ang nagabuko sing malaut nga magadangat sa malain nga katapusan ginpaanggid sa matarong nga tawo nga ginaamligan kag nagabugana kaangay sang mabungahon nga kahoy nga olibo.

◆ 54:1—Ngaa nagsiling si David, “Paagi sa imo ngalan luwasa ako”?

Ang balaan nga ngalan wala sing mistiko nga gahom kundi nagarepresentar sa Dios mismo. Gani, paagi sa sining pangabay, ginkilala ni David nga si Jehova makasarang sa pagluwas sa Iya katawhan. (Exodo 6:1-8) Bisan pa ginsugid sang mga Zifhanon kay Hari Saul kon diin si David, ang paglikop sang mga Filistinhon sa Israel nag-utod sa pagpangayam ni Saul kay David. (1 Samuel 23:13-19; Salmo 54, super­skripsion) Busa ginluwas ni Jehova si David.

Leksion Para sa Aton: Ang mga kaaway ni David nagkutkut sing buho para sa iya. (Salmo 57:6) Ina nga buho sa pagsiod sa tawo nagalaragway sang makatalagam nga kahimtangan ukon mga buko nga nagabutang sa katalagman sang mga alagad ni Jehova. Apang ang mga nagapamatok sa katawhan sang Dios mahimo nga masiod bangod sang ila malaut nga mga buko. Gani kon magasalig kita kay Jehova kag mag-andam, ang aton kaluwasan ginapasalig.—Hulubaton 11:21; 26:27.

‘Paghulat sing Hipos’

Basaha ang Salmo 58 tubtob 64. Tungod sang kabalaka sa inhustisya, si David nangabay sa pangamuyo nga magtimalus ang Dios batok sa malaut. (Salmo 58, 59) Sang daw ginaatubang sing kapierdehan, nangabay sia nga luwason kag nakapat-od nga ang Dios magalinas sa mga kaaway. (Salmo 60) Si Jehova isa na ka dalangpan kay David; gani makahulat sia sing hipos sang kaluwasan. (Salmo 61, 62) Napilitan nga magkadto sa kamingawan, ayhan sang magrebelde si Absalon, si David nagkalipay ‘sa handong sang pakpak sang Dios.’ (Salmo 63) Ang salmista nangamuyo man nga amligan gikan sa “mga nagahimo sing kahalitan” kag nagsalig nga ang matarong makadangop kay Jehova.—Salmo 64.

◆ 58:3-5—Paano ang malaut kaangay sang man-ug?

Ang butigon, mapasipalahon nga pinamulong sang malaut sarang makahalit sa reputasyon sang biktima, subong nga ang dalit sang man-ug makamamatay. (Salmo 140:3; Roma 3:13; Santiago 3:8) Dugang pa, ang malaut “bungol kaangay sang kobra nga nagasungsong sang iya igdulungog,” kay wala sila nagapamati kag nagabaton sing panuytoy.

◆ 63:3—Paano ang mahigugmaon nga kalulo sang Dios “labi pa kaayo sa kabuhi”?

Ang pagkabuhi nga nahamulag sa Dios kulang sing matuod nga katuyoan. Apang ang mainunungon nga gugma ni Jehova nga ginpabutyag kay David naghatag sing matuod nga kahulugan sa iya kabuhi. Ang pagkasuod sa Dios pirme nagahimo sang pagkabuhi nga makahulugan para sa iya nahamut-an nga mga alagad, nagapasalig sa ila sang bulig kag panuytoy sang Dios, kag nagahimo sa ila nga maghulat sa pagkawalay katubtoban sang malipayon nga pagkabuhi.

Leksion Para sa Aton: Si David kontento sa ‘paghulat sing hipos’ sa Dios nga magpanghikot tungod sa iya. (Salmo 62:1-7) Kay nagpasakop sa kabubut-on ni Jehova, nagbatyag sia nga malig-on kag may hipos nga pagsalig sa Dios. Kon may amo kita sina nga pagsalig kay Jehova, “ang paghidait sang Dios” magaamlig sang aton mga tagipusuon kag mga hunahuna samtang ginahulat naton ang pagluwas sang Dios gikan sa mga kaaway kag mga kapipit-an.—Filipos 4:6, 7; Salmo 33:20.

Dayawa ang Aton Manluluwas

Basaha ang Salmo 65 tubtob 72. Si Jehova gindayaw subong ang Tuboran sang bugana nga patubas, ulan, lunhaw nga hilamon, kag madamong panong. (Salmo 65) Ang ambahanon dapat nga “sa himaya sang iya ngalan.” (Salmo 66) Dapat sia pakataason, kag gindayaw sia subong “ang Dios nga nagaluwas.” (Salmo 67, 68) Ang mga pag-antos sang Mesias gintagna, kag si Jehova gindayaw subong “ang Manug-aman sang palagyohan” nga sa iya bulig ang salmista nagahulat. (Salmo 69-71) Ina nga pagsalig pagapadyaan, kay ang kabuganaan kag kaluwasan sa bug-os nga duta gikan sa pagpigus ginapasalig sa mahimayaon nga paggahom sang Mesias.—Salmo 72.

◆ 68:11—Sin-o ang nagahuman sa “dakung kadam-an” sang mga babayi?

Sa tapos magamit ni Jehova ang mangangaway nga mga lalaki sang Israel sa paglupig sa kaaway, ang Israelinhon nga mga babayi nagbantala sang maayong balita sang kadalag-an paagi sa musika, ambahanon, kag saot. (1 Samuel 18:6, 7; ipaanggid ang Exodo 15:20, 21.) Bilang pagtuman sa “pinamulong,” ukon mando sang Dios, ang mga lalaki sang Israel nakig-away sa kaaway nga mga pungsod sang Ginsaad nga Duta kag nagpierde sa ila. Naghatag ini sa Israelinhon nga mga babayi sing maayong balita nga ibantala sa pagsaulog sang kadalag-an. Sa karon, ang babayi nga mga ministro may yara talalupangdon nga katungdanan subong mga manugbantala sang Ginharian nga nagasugid sang maayong balita nahanungod sa “pinamulong” ni Jehova, nga nagalakip sang paghatag paandam sa mga pungsod nga sa dili madugay sila pagagamhan sang Mesianikong Hari, si Jesucristo.

◆ 69:23—Ngaa ginpangabay ang Dios nga pakurugon ang mga balikawang sang kaaway?

Kon ang mabakod nga mga maskulo sang balikawang ginahul-an, magahatag ini sing daku nga kusog. Apang ang pagkawalay kusog magaresulta kon ang mga balingkawang magakurog, ayhan bangod sang kahadlok. Sa sining pangabay sang kaluwasan, si David nangabay sa Dios nga dingotan ang iya mga kaaway sang ila sayop nga paggamit sang kusog.

◆ 72:16—Ano ang kahulugan sining pagkamapatubason?

‘Ang bunga kaangay sang Libano’ nagalaragway sang uyas nga nagatubo sing bugana kag sa putokputokan amo kon ngaa kaangay ini sa lunhaw, matag-as nga kakahoyan sang Libano. Ayhan bugana sa mga duta tubtob sa putokputokan sa kabukiran, ang matag-as, madabong nga sanga nga puno sang uyas mapaanggid sa matag-as, madamong sedro sang Libano. Nagatudlo ini sa dikinaandan ka bugana nga pag-ani sa paggahom sang Mesias. Kag ang kamatuoran nga ‘ang mga sa siudad magalambo kaangay sang hilamon’ nagapakita nga ang dutan-on nga mga sakop ni Jesus madamo gid.

Leksion Para sa Aton: Ang salmista nangamuyo: “Bangod ikaw nga nagpakita sa akon sing madamo kag tama nga mga kalisdanan, kabay nga ikaw [Jehova] magabuhi sa akon liwat.” (Salmo 71:20) Bisan pa wala pagtugaha sang Dios ina nga kabudlayan, ginapahanugotan niya nga tilawan kita kag makahatag sing sabat sa Nagayaguta sa iya, ang Yawa. (Santiago 1:13; Hulubaton 27:11) Indi gid si Jehova magapahanugot nga sulayon kita labaw sa masarangan naton kag buligan niya kita nga malandas ang aton mga pagtilaw bangod sang malig-on nga pagtuo. (1 Corinto 10:13; 1 Pedro 1:6, 7) Ang hinaplas nga mga Cristiano nakakita sing “madamo kag tama nga mga kalisdanan” sang ginhingabot sila sang talipusposan sang Inaway Kalibutanon I. Apang si Jehova ‘nagbuhi sa ila liwat’ sang 1919, kag nagpadayon sila sa pag-alagad sa Ginharian, sang ulihi ginbuylogan sang “dakung kadam-an.” (Bugna 7:9) Bangod sina nga resulta, sa pagkamatuod ang pagdayaw nagakabagay sa Dakung Manluluwas.

Kinahanglan ang pagtuo sa paghulat sa Dios nga magpanghikot tungod sa aton. Mahimo kita maghulat sing hipos bangod wala kita sing mahimo sa pagbalhin sa aton mabudlay nga kahimtangan. Apang, mahimo kita makabatas, subong sang mga salmista, kon kontento kita sa paghulat kay Jehova.