Mga Talalupangdon sa Biblia Salmo 73 tubtob 106

“Pakamaayuha si Jehova”—Ngaa?

Sin-o sa aton ang wala sing kabalaslan kon hunahunaon naton ang tanan nga ginhimo, ginahimo, kag pagahimuon ni Jehova para sa aton? Sa pagkamatuod, ang aton mga tagipusuon magapahulag sa aton nga pakamaayuhon ang aton Dios. Ang Tolon-an Tres kag Kuatro sang Salmo nagapadaku kon ngaa may yara kita nagakaigo nga rason agod pakamaayuhon si Jehova. Samtang ginabinagbinag naton karon ang Salmo 73 tubtob 106, pamangkota ang imo kaugalingon, ‘Ano ang mga rason nga akon pakamaayuhon sing personal si Jehova’?

Indi Magkahisa sa Malaut

Basaha palihug ang Salmo 73 tubtob 77. Ginakabig ini nga ginsulat ni Asap, ayhan lakip sang iya mga anak. Si Asap nagtu-ad nga nahisa sia sa malaut—tubtob naulian sia. (Salmo 73) Nian ang kalaglagan sang Jerusalem gintangisan. (Salmo 74) Masunod nga nakita ang mga ekspresyon sang pasalamat sa “makahalangawa” nga Dios, ginsundan sang pangamuyo sa “dakung Dios” agod dumdumon ang iya nasit-an nga katawhan.—Salmo 75-77.

◆ 73:24—Sa anong “himaya” gindala ni Jehova ang salmista?

Sang wala pa maapresyar sang salmista nga ‘ang pagpalapit sa Dios maayo para sa iya,’ nagbatyag sia nga maayo pa ang malaut sang sa matarong. (Salmo 73:2-12, 28) Ang pagpahanugot sa “laygay” sang Dios nga magtuytuy sa iya nagresulta sa pagbaton niya sang “himaya,” kon sayuron, sang kahamuot ni Jehova, ang ginpakamaayo nga kaangtanan upod sa Iya.

◆ 76:6—Paano ang “kangga” kag ang “kabayo” ‘natulogan’?

Ang mga Israelinhon gintudloan nga magsalig kay Jehova sa baylo sa mga kabayo kag mga kangga. (Salmo 20:7; Hulubaton 21:31) Wala sila sing rason nga magkahadlok sa mga kabayo kag sa nagapanghagbas nga mga kangga sang ila mga kaaway, kay himuon ni Jehova ang ila mga kaaway nga walay gahom, ‘nagapatulog [sa ila].’ Ang ginapatuhoyan diri amo ang ‘pagtulog sing mahamuok’—ang kamatayon mismo. (Jeremias 51:39) Dapat ini mangin paandam sa mga lider sang kalibutan karon nga nagasalig sa ila mga hinganiban.—Salmo 76:12.

Leksion Para sa Aton: Ang Salmo 75 nagaunod sang paandam batok sa bugal sang magsiling ini, “Dili pagbayawa sa mataas ang inyo sungay.” (Bersikulo 5) Ang sungay simbulo sang kusog, gahom. (Deuteronomio 33:17) Ang pagbayaw sa sungay nagakahulugan sang paghulag sing matinaastaason. Ang salmista nagapaandam diri sa malauton nga indi magpabugal sa daw ginaangkon nila nga malig-on nga kahimtangan sa gahom, kay “ang sungay sang mga malauton utdon” ni Jehova. (Salmo 75:10) Ang paghibalo sini nagapalig-on sa mga alagad sang Dios nga magpabilin nga matutom sa iya walay sapayan sang daw kabuganaan sang malauton.—Ipaanggid ang Salmo 144:11-15a.

Tumana “ang Labing Mataas”

Basaha ang Salmo 78 tubtob 83. Ang salmo ni Asap nagapadayon. Ang mga leksion sang maragtas sang Israel gin-asoy. (Salmo 78) Nian ang kahapayan sang templo gintangisan, nga ginsundan sang pangamuyo para sa pagpasag-uli sang Israel. (Salmo 79, 80) Pagkatapos sang ambahanon nga nagapabanaag sang pagluwas sang Dios kag sang paglaygay sa iya katawhan nga tumanon sia, may mga pangabay kay Jehova agod hukman ang malaut nga mga hukom kag ang mga kaaway sang Israel.—Salmo 81-83.

◆ 82:1—Paano nagahukom ang Dios “sa tunga sang mga dios”?

Sing maathag, ang “mga dios” amo ang mga hukom sang Israel. Ginatawag sila nga mga dios bangod gamhanan sila sa hudisyal nga gahom. Si Jehova, subong ang Supremo nga Hukom, may balaan nga kinamatarong sa pagpasilabot sa tunga sinang mga hukom agod sawayon sila bangod sang indi paghukom suno sa iya kasugoan.—Isaias 33:22; Salmo 82:2-4.

◆ 83:9-15—Pagtimalus bala ang motibo sang salmista?

Indi gid. Nagapangamuyo sia sa Dios nga hukman yadtong “nagadumut” kay Jehova. (Bersikulo 2) Sa amo ang iban nga mga pungsod makahibalo nga ang Dios nga ang ngalan amo si Jehova sa pagkamatuod “Labing Mataas sa bug-os nga duta.” (Bersikulo 18) Ini nga pagpadayag sang gahom magaresulta sa pagpakadaku sa ngalan sang Dios, nga si Jehova, sa bug-os nga duta.

Leksion Para sa Aton: Nga si Jehova bugana nga nagapadya sadtong nagatuman sa iya ginapakita sang ginasiling nga “pili gid nga trigo.” (Salmo 81:16) Ang tinaga diri nga “pili” ginagamit sing malaragwayon sa pagpakita sang pinakamaayo. (Ipaanggid ang Salmo 63:5.) Kon ang mga Israelinhon ‘nagpamati sa tingog ni Jehova,’ kuntani ginpakamaayo sila sing “pili gid nga trigo”—ang pinakamaayo, ang pinakaali sa tanan nga butang. (Salmo 81:11; Deuteronomio 32:13, 14) Sing kaanggid, kon aton ‘pamatian ang tingog ni Jehova,’ pakamaayuhon niya kita sing bugana.—Hulubaton 10:22.

Pagpalapit sa Dios

Basaha ang Salmo 84 tubtob 89. Ang mga salmista nagpabutyag sing kahidlaw sa balay sang Dios. (Salmo 84) Masunod, ang nagpauli nga mga tinapok nangabay nga kuhaon ang kaakig sang Dios. (Salmo 85) Si David nangamuyo sing panuytoy kag pangamlig, nagasalig nga si Jehova magasabat sa iya. (Salmo 86) Ang ambahanon nahanungod sa mga ‘natawo sa Sion’ ginsundan sang pakiluoy sang isa nga nasit-an. (Salmo 87, 88) Nian ginapadaku sang salmo ang mahigugmaon nga kaluoy ni Jehova subong sang ginpakita sa katipan kay David.—Salmo 89.

◆ 84:3—Ngaa ginasambit ang mga pispis?

Ang salmista, nga isa ka Levinhon nga kaliwat ni Core, nahidlaw nga mangin yara sa “dakung tabernakulo” ni Jehova. (Bersikulo 1, 2) Apang may yara napulo ka linibo ka mga Levinhon. Makaisa lamang sa kada tunga ka tuig nga ang binahinbahin sang mga Levinhon matangdo sa pag-alagad sing isa ka semana sa tabernakulo. Sa kabaliskaran, bisan ang magagmay nga mga pispis may permanente nga balay sa santuaryo paagi sa paghimo sing pugad didto. Daw ano ka malipayon ang salmista sa pagdayaw kay Jehova paagi sa pagpuyo man sing permanente sa balay ni Jehova!

◆ 89:49—Ano ining “mga buhat sang mahigugmaon nga kaluoy”?

Ang ekspresyon nga “mga buhat sang mahigugmaon nga kaluoy” nagapatuhoy sa katipan sang Ginharian upod ang tanan nga bahin sini. Sa tion sang kabudlayan, nagakaigo para sa mga Israelinhon ang magpatalupangod sining mga saad kay Jehova, indi bangod ginaduhaduhaan nila ang katipan, kundi paagi sa pagpakiluoy sa Dios may sadsaran sa sini.

Leksion Para sa Aton: Ang Salmo 85 nagapadaku kon ano ang nagapalangkag sa aton para sa bag-ong sistema sang mga butang sang Dios. Malip-ot lamang nga ginsambit ang materyal nga mga pagpakamaayo. (Bersikulo 12) Ang panguna nga ginapadaku ginhatag sa espirituwal nga mga pagpakamaayo: mahigugmaon nga kaluoy, pagkamatuod, pagkamatarong, kag paghidait. (Bersikulo 10-13) Si Jehova wala naganyat sa materyalistiko nga handum kundi nagapakita nga ang espirituwal nga mga pagpakamaayo sang bag-ong sistema dapat mangin ang pinakamakusog nga puwersa nga nagapahulag sa aton.

‘Si Jehova Nangin Hari’

Basaha ang Salmo 90 tubtob 100. Ginapaanggid ni Moises ang pagkamapinadayunon sang Dios sa malip-ot nga kalawigon sang pagkabuhi sang tawo, kag nian ginapadaku niya si Jehova subong ang aton tuboran sang kalig-onan. (Salmo 90, 91) Ang superyor nga mga kinaiya ni Jehova ginbayaw, kag ang masunod nga mga salmo nagapadaku sang gahom, mahigugmaon nga kaluoy, kag pagkamatarong sang Dios, subong man sang tema nga Ginharian.—Salmo 92–100.

◆ 90:10—Wala bala magkabuhi si Moises sing malawig pa sa 80 ka tuig?

Si Moises, nga nagkabuhi sing 120 ka tuig, indi tipiko sa mga tawo sa kabilogan. Tuhoy sa walay pagtuo nga kaliwat nga nagguwa sa Egipto, ang ginrehistro “kutob sa duha ka pulo ka tuig ang edad pataas” mapatay sa sulod sang 40 ka tuig, sa sulod sang ginhambal ni Moises. (Numeros 14:29-34) Ang komento nga sang mapatay si Moises “ang iya mata wala magdulum, kag ang iya kinaugali nga kusog wala magbuhin” nagapakita nga may yara sia sang nagasakdag nga gahom sang Dios.—Deuteronomio 34:7.

◆ 95:3—Paano si Jehova isa ka “Hari sa ibabaw sang tanan nga dios”?

Subong ang Soberano sa Bug-os nga Uniberso, si Jehova amo ang supremo kag Hari sa ibabaw sang tanan nga butig nga mga dios sa bagay nga sia mas labaw sa ila. Wala gid sing mapaanggid kay Jehova nga Dios kag sa bisan ano nga anghel ukon bisan ano nga butang nga mahimo simbahon sang iban, lakip ang wala nagaluntad nga butig nga mga dios.

Leksion Para sa Aton: Ang Salmo 91 nagapadaku sang isa pa ka rason naton para pakamaayuhon si Jehova—“sa tagong duog sang Labing Mataas.” (Bersikulo 1) Isa ini ka duog sang espirituwal nga kalig-onan, sang pangamlig gikan sa espirituwal nga halit, para sa mga nagatuman sa mga kinahanglanon nga ginpahamtang sa sining salmo. “Tago” ini sa bagay nga wala ini mahibal-i sang mga tawo sang kalibutan, nga kulang sing espirituwal nga panan-aw. Ang kamatuoran nga amo ini ang tagong duog “ang Labing Mataas” nagapakita nga kon sakdagon lamang naton ang kiliran ni Jehova sa hulusayon sang pagkasoberano sa bug-os nga uniberso nga masapwan naton ang kalig-onan didto.

“Dayawa Ninyo si Jah!”

Basaha ang Salmo 101 tubtob 106. Ginalaragway diri ni David ang iya paagi sa pagtatap sa buluhaton sang estado. (Salmo 101) Ang isa ka nasit-an nangamuyo kay Jehova nga “tukuron ang Sion.” (Salmo 102) Ang panawag nga “pakamaayuhon si Jehova” nagasunod sa mga salmo nga nagahatag sing igtalupangod sa kaluoy, kadaku, kag mga buhat sa pagpanuga sang Dios. Ginalista man diri ang nahauna sa kapin sa 20 ka paggamit sang Salmo sang ekspresyon “Dayawa ninyo si Jah!” (Salmo 103, 104) Sa katapusan, duha ka maragtason nga salmo ang nagapakamaayo kay Jehova bangod sang iya mga binuhatan tungod sa iya katawhan.—Salmo 105, 106.

◆ 102:25—Sin-o ang “nagpasad sang duta”?

Ang salmista nagahambal tuhoy sa Dios, apang si apostol Pablo nag-aplikar sining mga pulong kay Jesucristo. (Hebreo 1:10, 11) Subong sang natabo, ining mga pulong naaplikar man kay Jesus, kay nagpanghikot sia subong ang Ahente ni Jehova sa pagtuga sa uniberso. (Colosas 1:15, 16) Gani, masiling man nga si Jesus “nagpasad sang duta.”

◆ 103:14—Ano ang kahulugan sang “ginhuman”?

Ang tinaga nga ginbadbad diri nga “ginhuman” may labot sa berbo nga “sa paghuman,” nga gingamit sa Genesis 2:7, kag sa nombre nga “maninihon,” nga gingamit may kaangtanan sa isa nga nagadihon sang daga. (Isaias 29:16; Jeremias 18:2-6) Gani ginapahanumdom kita sang salmista nga si Jehova, ang Dakung Maninihon, nagadipara sa aton sing malum-ok, nakahibalo, nga kita halalungan gid subong sang mga suludlan nga human sa daga.—Ipaanggid ang 2 Corinto 4:7.

◆ 104:4—Paano ‘ginahimo [ni Jehova] ang iya mga anghel nga mga espiritu’?

Sanglit ang mga anghel espiritu na nga mga tinuga, indi ini mapatuhoy sa ila espiritu nga mga lawas. Apang, ang tinaga “espiritu” nagakahulugan man sing “hangin” ukon “aktibo nga puwersa.” Busa sarang magamit sang Dios ang iya mga anghel subong gamhanan nga mga puwersa sa pagtuman sang iya kabubut-on. Sarang man sila magamit subong mga ahente sa pagpatay—subong “kalayo nga nagalamon.” Makapasalig gid nga mahibal-an sang mga Cristiano nga ang ila hilikuton nga pagbantala ginasakdag sinang gamhanan anghel nga mga tinuga.—Ipaanggid ang Bugna 14:6, 7.

Leksion Para sa Aton: Ang Salmo 106 nagabulig sa aton sa pag-apresyar nga ang rebelyuso nga si Core, Datan, kag Abiram nahisa sa kahimtangan ni Moises subong administrador sang pungsod sang Dios. (Salmo 106:16; Numeros 16:2-11) Sang ulihi, ang pagrebelde gindugmok sang “ang kalayo nagdabdab” sa tunga sang mga rebelde. (Salmo 106:18) Sa pagkamatuod ang mga katalagman sang bugal kag kahisa ginapadayag diri. Ang paghambal batok sa gintangdo nga mga alagad ni Jehova sa karon magadala man sina nga pagkadinahamuot.—Hebreo 13:17; Judas 4, 8, 11.

Sa pagkamatuod, madamo na ang ginhatag ni Jehova sa aton nga bagay pasalamatan. Kon binagbinagon naton ang tanan nga mga pagpakamaayo nga ginabubo niya sa aton, indi man bala naton paghimuon ang ginlaygay sang salmista, “Pakamaayuha si Jehova, O kalag ko”?—Salmo 103:1.