Paano Kita Makahimo sing Maayo nga Desisyon?

Tanan kita nagahimo sing mga desisyon. Madamo sa sini ang may epekto sa aton kag sa aton pagpakig-abyan kay Jehova. Halimbawa, mahimo madesisyon kita kon diin maistar, kon ano nga obra ang aton pilion, kag kon bala mamana kita ukon mangasawa. Kon maayo ang aton mga desisyon, mangin malipayon kita kag mapalipay naton si Jehova.

1. Paano ang Biblia makabulig sa imo sa paghimo sing maayo nga mga desisyon?

Antes magdesisyon, magpabulig kay Jehova paagi sa pangamuyo kag usisaa ang ginasiling sang Biblia. (Basaha ang Hulubaton 2:3-6.) Kon kaisa, nagahatag si Jehova sing direkta nga sugo. Ang pagsunod sa sina nga sugo amo ang pinakamaayo nga desisyon nga mahimo mo.

Pero ano abi kon wala sing direkta nga sugo sa Biblia kon ano ang dapat mo himuon? Giyahan ka gihapon ni Jehova “sa dalanon nga dapat mo laktan.” (Isaias 48:17) Paano? May mga prinsipio nga makabulig sa imo. Ang mga prinsipio sa Biblia amo ang mga kamatuoran parte sa ginahunahuna kag ginabatyag sang Dios. Sa masami, mabal-an naton ang ginabatyag sang Dios parte sa isa ka butang kon basahon naton ang isa ka istorya sa Biblia. Kon mabal-an naton ang ginabatyag ni Jehova, makahimo kita sing mga desisyon nga makapalipay sa iya.

2. Ano ang dapat mo pamensaron antes ka maghimo sing desisyon?

Ang Biblia nagasiling: “Ang tawo nga maalamon nagabinagbinag sang tagsa niya ka tikang.” (Hulubaton 14:15) Buot silingon, antes kita magdesisyon, pamensaron anay naton sing maayo ang aton mga opsyon. Samtang ginausisa mo ang kada opsyon, pamangkuta ang imo kaugalingon: ‘Ano nga mga prinsipio sa Biblia ang makabulig sa akon? Diin sa sini nga mga opsyon ang maayo ko nga pilion? Ano ang epekto sini sa iban? Ang pinakaimportante sa tanan, malipay bala sa sini si Jehova?’—Deuteronomio 32:29.

May kinamatarong si Jehova nga hambalan kita kon ano ang maayo kag malain. Kon nahibaluan naton ang iya mga kasuguan kag mga prinsipio kag ginasunod gid naton ini, ginatudluan naton ang aton konsiensia nga himuon ang husto. Ang konsiensia amo ang nagadikta sa aton kon ano ang husto kag sala. (Roma 2:14, 15) Kon natudluan sing maayo ang aton konsiensia, makahimo kita sing maayo nga mga desisyon.

USISAA PA GID

3. Magpagiya sa Biblia

VIDEO: Magpagiya sa mga Prinsipio sa Biblia (5:54)

• Ano ang kahilwayan sa pagdesisyon?

• Ngaa ginhatagan kita ni Jehova sing kahilwayan sa pagdesisyon?

• Ano ang ginhatag ni Jehova nga makabulig sa aton para makahimo kita sing pinakamaayo nga mga desisyon?

Para makita mo ang halimbawa sang isa ka prinsipio sa Biblia, basaha ang Efeso 5:15, 16. Dayon binagbinaga kon paano mo ‘magamit sing maayo ang imo tion’ para . . .

• mabasa ang Biblia kada adlaw.

• mangin mas maayo nga bana ukon asawa, ginikanan, ukon bata.

• makatambong sa mga miting sang kongregasyon.

4. Tudlui ang imo konsiensia sa paghimo sing maayo nga mga desisyon

VIDEO: “Hupti Ninyo ang Maayo nga Konsiensia” (5:13)

• Sa video, ano ang ginhimo sang sister para matudluan ang iya konsiensia kag makahimo sing desisyon nga makapalipay kay Jehova?

Ngaa indi dapat ang iban ang magdesisyon para sa aton? Basaha ang Hebreo 5:14, dayon binagbinaga ini nga mga pamangkot:

• Bisan pa daw mas mahapos nga iban ang magdesisyon para sa aton, ngaa mas maayo nga kita gid ang magdesisyon?

• Ano ang makabulig sa imo nga matudluan ang imo konsiensia kag makahimo sing maayo nga mga desisyon?

5. Respetuha ang konsiensia sang iban

Lainlain ang desisyon sang kada tawo. Paano naton mapakita nga ginarespeto naton ang konsiensia sang iban? Binagbinaga ang duha ka sitwasyon:

Una nga sitwasyon: Ang sister nga mahilig mag-make-up nagsaylo sa kongregasyon nga ang kalabanan nga sister nasaw-ahan magtan-aw sa naka-make-up.

Basaha ang Roma 15:1 kag 1 Corinto 10:23, 24, dayon binagbinaga ini nga mga pamangkot:

• Base sa sini nga mga bersikulo, ano ang puede himuon sang sister? Ano ang himuon mo kon may ginahimo ka nga ginatugot sang imo konsiensia pero wala ginatugot sang konsiensia sang upod mo?

Ikaduha nga sitwasyon: Kabalo ang brother nga wala ginadumilian sang Biblia ang haganhagan nga pag-inom, pero nagdesisyon sia nga indi mag-inom. Gin-agda sia sa isa ka panyapon kag nakita niya ang mga brother nga nagainom.

Basaha ang Manugwali 7:16 kag Roma 14:1, 10, dayon binagbinaga ini nga mga pamangkot:

• Base sa sini nga mga bersikulo, ano ang puede himuon sang brother? Ano ang himuon mo kon nakita mo nga may ginahimo ang iban nga wala ginatugot sang imo konsiensia?

Paano ka makahimo sing maayo nga desisyon?

1. Mangayo sing bulig kay Jehova kon ano ang dapat mo himuon.—Santiago 1:5.

2. Mag-research sa Biblia kag sa mga publikasyon nga base sa Biblia para mabal-an mo ang mga prinsipio nga makabulig sa imo. Puede ka man magpabulig sa hamtong nga mga Cristiano.

3. Pamensara kon ano ang epekto sang imo desisyon sa imo konsiensia kag sa konsiensia sang iban.

SUMARYO

Makahimo kita sing maayo nga mga desisyon kon nabal-an naton ang ginabatyag ni Jehova parte sa isa ka butang kag ginapamensar naton kon bala ang aton desisyon makabulig ukon makahalit sa iban.

Rebyu

• Paano ka makahimo sing mga desisyon nga makapalipay kay Jehova?

• Paano mo matudluan ang imo konsiensia?

• Paano mo mapakita nga ginarespeto mo ang konsiensia sang iban?

DUGANG NGA IMPORMASYON

Paano ka makahimo sing mga desisyon nga magapabakod sang imo pagpakig-abyan sa Dios?

“Maghimo sang mga Desisyon nga Nagapadungog sa Dios” (Ang Lalantawan, Abril 15, 2011)

Hibalua pa gid kon paano kita ginalaygayan ni Jehova.

Ginagiyahan ni Jehova ang Iya Katawhan (9:50)

Ano ang nakabulig sa isa ka tawo nga maghimo sing desisyon bisan pa mabudlay ini?

Sigurado nga Indi Ka Gid Pagpabay-an ni Jehova kay Maayo Sia (5:46)

Hibalua pa gid kon paano naton mapalipay si Jehova bisan pa wala sing direkta nga sugo parte sa isa ka butang.

“Kinahanglan Mo Bala Pirme ang Isa ka Sugo sang Biblia?” (Ang Lalantawan, Disiembre 1, 2003)

Ano dapat ang aton reaksion kon makabati kita sang negatibo nga mga impormasyon parte sa organisasyon ni Jehova? Basaha ang Hulubaton 14:15, dayon binagbinaga ini nga pamangkot:

• Ngaa indi kita dapat magpati dayon sa bisan ano nga mabatian naton?

Basaha ang 2 Juan 9-11, dayon binagbinaga ini nga mga pamangkot:

• Ano dapat ang aton pagtratar sa mga apostata?

• Bisan pa wala kita nagaistorya sa mga apostata, paano kita maimpluwensiahan gihapon sang ila mga panudlo?

• Ano sa banta mo ang batyagon ni Jehova kon ginapamatian naton ang sala nga impormasyon parte sa iya kag sa iya organisasyon?

4. Padayon nga mangin matutom sa Dios bisan nakasala ang isa ka utod