Kapitulo Beinte-dos

Nagapanugdo ang Pagkamatarong sa Sion

Isaias 61:1-11

1, 2. Ano nga pagbag-o ang malapit na matabo sa Israel, kag sin-o ang magapahanabo sini?

IBANTALA ang kahilwayan! Determinado si Jehova nga hilwayon ang iya katawhan kag ipasag-uli sila sa duta sang ila katigulangan. Kaangay sang isa ka binhi nga nagapanugdo sa tapos sang haganhagan nga ulan, ang matuod nga pagsimba magalutaw liwat. Kon mag-abot ina nga adlaw, ang kasubo pagabuslan sang malipayon nga pagdayaw, kag ang mga ulo nga ginatabunan anay sing mga abo sang kalisod pagakoronahan sing kahamuot sang Dios.

² Sin-o ang magapahanabo sining dalayawon nga pagbag-o? Si Jehova lamang ang makahimo sini nga butang. (Salmo 9:​19, 20; Isaias 40:25) Ang manalagna nga si Sofonias matagnaon nga nagsugo: “Magsinggit ka sa kalipay, O anak nga babayi sang Sion! Magsinggit ka sa kasadya, O Israel! Magkasadya ka kag maghugyaw sing bug-os tagipusuon, O anak nga babayi sang Jerusalem! Ginkuha ni Jehova ang mga paghukom sa imo.” (Sofonias 3:​14, 15) Mangin makalilipay gid ina nga tion! Kon tipunon ni Jehova ang ginpasag-uli nga nagkalabilin gikan sa Babilonia sa 537 B.C.E., mangin subong ini sang isa ka damgo nga nagmatuod.​​—Salmo 126:1.

 3. Ano ang mga katumanan sang matagnaon nga mga pulong sang Isaias kapitulo 61?

³ Ini nga pagpasag-uli gintagna sa Isaias kapitulo 61. Apang, bisan pa maathag nga ina nga tagna natuman sang 537 B.C.E., natuman ini sing detalyado pa sang ulihi nga panahon. Ang kapin ka detalyado nga katumanan nagadalahig kay Jesus kag sa iya mga sumulunod sang nahauna nga siglo kag sa katawhan ni Jehova sa modernong mga tion. Makahulugan gid, kon amo, ining inspirado nga mga pulong!

“Ang Tuig Sang Maayong Kabubut-on”

 4. Sin-o ang ginsugo sa pagwali sing maayong balita sa una nga katumanan sang Isaias 61:1, kag sin-o sa ikaduha?

⁴ Si Isaias nagsulat: “Ang espiritu sang Soberanong Ginuong Jehova yari sa akon, bangod nga ginhaplas ako ni Jehova sa pagwali sing maayong balita sa mga mahagop. Ginpadala niya ako sa pagbugkos sang mga buong sing tagipusuon, sa pagbantala sing kahilwayan sa mga bihag kag sa bug-os nga pagpamuklat sang mga mata bisan sa mga bilanggo.” (Isaias 61:1) Sin-o ang isa nga ginsugo sa pagwali sing maayong balita? Mahimo gid nga sa una nga tion, amo si Isaias nga gin-inspirar sang Dios sa pagrekord sang maayong balita para sa mga bihag sa Babilonia. Apang, ginpatuhuyan ni Jesus ang labing importante nga katumanan sang gin-aplikar niya ang mga pulong ni Isaias sa iya kaugalingon. (Lucas 4:​16-​21) Huo, ginpadala si Jesus agod magwali sing maayong balita sa mga mahagop, kag sa sining katuyuan ginhaplasan sia sing balaan nga espiritu sang ginbawtismuhan sia.—Mateo 3:​16, 17.

 5. Sin-o ang nagabantala sing maayong balita sa mga 2,000 ka tuig na?

⁵ Dugang pa, gintudluan ni Jesus ang iya mga sumulunod nga mangin mga ebanghelisador, ukon mga manugbantala sing maayong balita. Sang Pentecostes 33 C.E., mga 120 sa ila ang ginhaplasan sing balaan nga espiritu kag nangin espirituwal nga mga anak sang Dios. (Binuhatan 2:​1-4, 14-​42; Roma 8:​14-​16) Ginsugo man sila nga iwali ang maayong balita sa mga mahagop kag mga buong sing tagipusuon. Ang 120 amo ang una sa 144,000 nga ginhaplas sa sining paagi. Ang katapusan nga mga katapo sini nga grupo aktibo pa sa duta karon. Busa, sa halos 2,000 ka tuig na, ang hinaplas nga mga sumulunod ni Jesus nagapanaksi “tuhoy sa paghinulsol sa Dios kag pagtuo sa aton Ginuong Jesus.”​—Binuhatan 20:21.

 6. Sin-o ang nakatigayon sing kaumpawan gikan sa pagkabati sa maayong balita nga ginbantala sang dumaan nga mga tion, kag kamusta naman sa karon?

⁶ Ang inspirado nga mensahe ni Isaias naghatag sing kaumpawan sa mahinulsulon nga mga Judiyo sa Babilonia. Sang panahon ni Jesus kag sang iya mga disipulo, naghatag ini sing kaumpawan sa mga Judiyo nga may buong nga tagipusuon bangod sang kalautan sa Israel kag nagapalangluya bangod sang pagkabihag sa mga tradisyon sang butig nga relihion sang unang-siglo nga Judaismo. (Mateo 15:​3-6) Sa karon minilyon nga nasiod sa paganong mga kinabatasan kag nagapakahuya-sa-Dios nga mga tradisyon sang Cristiandad ang “nagapanghayhay kag nagabakho” bangod sang makangilil-ad nga mga butang nga ginahimo sa sining relihioso nga sistema. (Ezequiel 9:4) Ang mga nagbaton sang maayong balita ginhilway gikan sa sining makaluluoy nga kahimtangan. (Mateo 9:​35-​38) Ang ila mga mata sang paghangop ginpamuklat sang makatuon sila sa pagsimba kay Jehova “sa espiritu kag kamatuoran.”​​—Juan 4:24.

7, 8. (a) Ano ang duha ka “tuig sang maayong kabubut-on”? (b) Ano ang mga “adlaw sang pagtimalos” ni Jehova?

⁷ May limitado nga tion ang pagbantala sing maayong balita. Si Jesus kag ang iya mga sumulunod ginsugo: ‘Ibantala ang tuig sang maayong kabubut-on ni Jehova kag ang adlaw sang pagtimalos sang aton Dios; sa paglipay sa tanan nga nagakalisod.’ (Isaias 61:2) Ang isa ka tuig isa ka malawig nga tion, apang may panugod ini kag katapusan. Ang “tuig sang maayong kabubut-on” ni Jehova amo ang hut-ong sang panahon nga nagahatag sia sa mga mahagop sing kahigayunan nga batunon nila ang kahilwayan nga iya ginapabantala.

⁸ Sang nahauna nga siglo, ang tuig sang maayong kabubut-on para sa pungsod sang mga Judiyo nagsugod sang 29 C.E. sang ginsugdan ni Jesus ang iya ministeryo sa duta. Ginsilingan niya ang mga Judiyo: “Maghinulsol kamo, kay ang ginharian sang mga langit malapit na.” (Mateo 4:17) Yadto nga tuig sang maayong kabubut-on nagdugay tubtob sang “adlaw sang pagtimalos” ni Jehova, nga natapos sang 70 C.E. sang gintugutan ni Jehova ang Romanong mga hangaway nga laglagon ang Jerusalem kag ang templo sini. (Mateo 24:​3-​22) Nagakabuhi kita karon sa isa pa ka tuig sang maayong kabubut-on, nga nagsugod sang gintukod ang Ginharian sang Dios sa langit sang 1914. Ini nga tuig sang maayong kabubut-on magahinakop sa isa pa ka mas lapnag nga adlaw sang pagtimalos kon laglagon na ni Jehova ining bug-os nga sistema sang mga butang sa “dakung kapipit-an.”​—Mateo 24:21.

 9. Sin-o sa karon ang nagabenepisyo sa tuig sang maayong kabubut-on ni Jehova?

⁹ Sin-o sa karon ang nagabenepisyo sa tuig sang maayong kabubut-on sang Dios? Ang mga nagabaton sang mensahe, nagapakita sing kahagop, kag makugi nga nagasakdag sang pagwali sing Ginharian sang Dios sa “tanan nga kapungsuran.” (Marcos 13:10) Napamatud-an nila nga ang maayong balita nagahatag sing matuod nga kaumpawan. Apang, ang mga nagasikway sa mensahe, nga nagapangindi sa paghimulos sa tuig sang maayong kabubut-on ni Jehova, magaatubang gid sa indi madugay sa iya adlaw sang pagtimalos.​​—2 Tesalonica 1:​6-9.

Espirituwal nga mga Bunga nga Nagahimaya sa Dios

10. Paano ang mga Judiyo nga nagbalik gikan sa Babilonia naapektuhan sang daku nga buhat ni Jehova para sa ila?

¹⁰ Narealisar sang mga Judiyo nga nagbalik gikan sa Babilonia nga si Jehova naghimo sing isa ka daku nga buhat para sa ila. Ang ila pagkalisod subong mga bihag nangin paghugyaw kag pagdayaw bangod hilway na sila sa katapusan. Sa amo, gintuman ni Isaias ang matagnaon nga ginsugo sa iya, nga amo, “sa pagtangdo sa mga nagakalisod sa Sion, sa paghatag sa ila sing takdong sa baylo sang mga abo, sing lana sang paghugyaw sa baylo sang kalisod, sing kunop sang pagdayaw sa baylo sang masubo nga espiritu; kag tawgon sila nga dalagku nga mga kahoy sang pagkamatarong, ang tinanom ni Jehova, agod patahumon sia.”​​—Isaias 61:3.

11. Sin-o sang nahauna nga siglo ang may rason gid sa pagdayaw kay Jehova bangod sang iya daku nga buhat?

¹¹ Sang nahauna nga siglo, ang mga Judiyo nga nagbaton sing kahilwayan gikan sa pagkaulipon sa butig nga relihion nagdayaw man sa Dios bangod sang iya daku nga buhat para sa ila. Ang ila kasubo ginbuslan sang “kunop sang pagdayaw” sang ginluwas sila gikan sa patay sa espirituwal nga pungsod. Ini nga pagbag-o una nga naeksperiensiahan sang mga disipulo ni Jesus sang ang ila paglalaw sa iya kamatayon nangin pagkasadya bangod ginhaplasan sila sing balaan nga espiritu sang ila ginbanhaw nga Ginuo. Wala madugay sa tapos sadto, kaanggid nga pagbag-o ang naeksperiensiahan sang 3,000 ka mahagop nga indibiduwal nga nagbaton sang pagbantala sang bag-o ginhaplasan nga mga Cristiano kag nagpabawtismo sang Pentecostes 33 C.E. (Binuhatan 2:41) May kaayuhan gid ang pagsalig sa pagpakamaayo ni Jehova! Sa baylo sang ‘pagkalisod sa Sion,’ nakabaton sila sing balaan nga espiritu kag narepreskuhan sang “lana sang paghugyaw,” nga nagasimbulo sa paghugyaw sang mga ginpakamaayo ni Jehova sing bugana.​​—Hebreo 1:9.

12, 13. (a) Sin-o ang “dalagku nga mga kahoy sang pagkamatarong” sa tunga sang nagbalik nga mga Judiyo sang 537 B.C.E.? (b) Sin-o ang nangin “dalagku nga mga kahoy sang pagkamatarong” sugod sang Pentecostes 33 C.E.?

¹² Ginapakamaayo ni Jehova ang iya katawhan sing “dalagku nga mga kahoy sang pagkamatarong.” Sin-o ining dalagku nga mga kahoy? Sa sulod sang tinuig pagligad sang 537 B.C.E., sila amo ang mga indibiduwal nga nagtuon kag nagpamalandong sa Pulong sang Dios kag nagpalambo sang matarong nga mga talaksan ni Jehova. (Salmo 1:​1-3; Isaias 44:​2-4; Jeremias 17:​7, 8) Yadto nga mga tawo subong nanday Esdras, Hageo, Zacarias, kag ang Mataas nga Saserdote nga si Josue nangin talalupangdon nga “dalagku nga mga kahoy”​​—mapag-on nga mga tawo para sa kamatuoran kag batok sa espirituwal nga pagdagta sa pungsod.

¹³ Kutob sang Pentecostes 33 C.E. padayon, nagtanom ang Dios sing kaanggid nga “dalagku nga mga kahoy sang pagkamatarong”​​—maisog, hinaplas nga mga Cristiano​—​sa espirituwal nga duog sang iya bag-o nga pungsod, ang “Israel sang Dios.” (Galacia 6:16) Sa pagligad sang mga siglo, ining “mga kahoy” nangin 144,000 sa kadamuon, nga nagapatubas sing matarong nga mga bunga agod patahumon, ukon himayaon, si Jehova nga Dios. (Bugna 14:3) Ang katapusan nga mga katapo sining mataas nga “mga kahoy” nag-uswag sa sulod sang mga tinuig kutob sang 1919, sang ginpapagsik liwat ni Jehova ang nagkalabilin sang Israel sang Dios gikan sa ila temporaryo nga pag-untat sa pagpanghikot. Paagi sa paghatag sa ila sing bugana nga suplay sang espirituwal nga tubig, nagpatubas si Jehova sing isa ka kagulangan sang matarong, nagapamunga nga mga kahoy.​​—Isaias 27:6.

14, 15. Ano nga mga proyekto ang ginhimo sang nahilway nga mga sumilimba ni Jehova sugod sang (a) 537 B.C.E.? (b) 33 C.E.? (c) 1919?

¹⁴ Sa pagpadaku sang hilikuton sining “mga kahoy,” nagpadayon si Isaias: “Patindugon nila liwat ang mga duog nga madugay na nga nahapay; tukuron nila ang ginbiyaan nga mga duog sang una nga mga tion, kag pat-od nga kay-uhon nila ang nahapay nga mga siudad, ang mga duog nga ginbiyaan sang sunodsunod nga mga kaliwatan.” (Isaias 61:4) Sa idalom sang mando ni Hari Ciro sang Persia, ginpatindog sang matutom nga mga Judiyo nga nagbalik gikan sa Babilonia ang Jerusalem kag ang templo sini, nga ginbiyaan sa isa ka nahapay nga kahimtangan sa tuman kadugay nga tion. Ang mga proyekto sa pagpasag-uli nagtanda man sang mga tuig pagkatapos sang 33 C.E. kag sang 1919.

¹⁵ Sang 33 C.E., ginsubuan gid ang mga disipulo ni Jesus sang gindakop sia, ginkasaba, kag ginpatay. (Mateo 26:31) Apang, nagbag-o ang ila pagtamod sang nagpakita sia sa ila sa tapos sia mabanhaw. Kag sang mabubo sa ila ang balaan nga espiritu, nangin masako sila sa hilikuton nga pagbantala sing maayong balita, “sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:8) Sa amo, ginsugdan nila nga ipasag-uli ang matuod nga pagsimba. Sa kaanggid nga paagi, kutob sang 1919 padayon, ginpahulag ni Jesucristo ang nagkalabilin sang iya hinaplas nga kauturan nga patindugon liwat “ang mga duog nga ginbiyaan sang sunodsunod nga mga kaliwatan.” Sa sulod sang mga siglo napaslawan ang mga klero sang Cristiandad nga ipaalinton ang ihibalo tuhoy kay Jehova, sa baylo ginbuslan nila ini sing hinimo-sang-tawo nga mga tradisyon kag di-makasulatanhon nga mga doktrina. Ginkuha sang hinaplas nga mga Cristiano gikan sa ila mga kongregasyon ang mga buhat nga nadagtaan sang butig nga relihion agod makaabante ang pagpasag-uli sa matuod nga pagsimba. Kag ginsugdan nila ang mangin pinakadaku nga kampanya sa pagpanaksi nga nakilala sang kalibutan.​​—Marcos 13:10.

16. Sin-o ang nagabulig sa hinaplas nga mga Cristiano sa ila pagpasag-uli nga hilikuton, kag ano nga mga hilikuton ang gintugyan sa ila?

¹⁶ Isa ini ka daku nga tulumanon. Paano himuon sang pila na lamang nga nagkalabilin ini nga buluhaton? Gin-inspirar ni Jehova si Isaias sa pagsiling: “Ang mga estranghero magatindog sa pagkamatuod kag magabantay sang inyo panong, kag ang mga dumuluong mangin inyo mga mangunguma kag inyo mga manugtatap sang ubas.” (Isaias 61:5) Ang malaragwayon nga mga estranghero kag mga dumuluong amo ang “dakung kadam-an” sang “iban nga mga karnero” ni Jesus.a (Bugna 7:9; Juan 10:​11, 16) Wala sila ginhaplasan sing balaan nga espiritu para sa langitnon nga palanublion. Sa baylo, may paglaum sila nga makatigayon sing kabuhi nga walay katapusan sa isa ka paraiso nga duta. (Bugna 21:​3, 4) Apang, ginahigugma nila si Jehova kag gintugyanan sila sing espirituwal nga pagbantay, pagpanguma, kag pag-atipan sa ubasan nga mga katungdanan. Indi manubo nga sahi ini nga mga hilikuton. Sa idalom sang pagtuytoy sang mga nagkalabilin sang Israel sang Dios, nagabulig ining mga mamumugon sa pagbantay, pagpakaon, kag pag-ani sa mga tawo.​—Lucas 10:2; Binuhatan 20:​28; 1 Pedro 5:2; Bugna 14:​15, 16.

17. (a) Ano ang itawag sa mga katapo sang Israel sang Dios? (b) Ano lamang nga halad ang kinahanglanon agod mapatawad ang mga sala?

¹⁷ Kamusta naman ang Israel sang Dios? Ginsilingan sila ni Jehova, paagi kay Isaias: “Kon tuhoy sa inyo, tawgon kamo nga mga saserdote ni Jehova; patuhuyan kamo nga mga ministro sang aton Dios. Kan-on ninyo ang manggad sang mga pungsod, kag sa ila himaya magapamulong kamo sing malipayon tuhoy sa inyo kaugalingon.” (Isaias 61:6) Sa dumaan nga Israel, gin-aman ni Jehova ang mga Levinhon subong mga saserdote agod magdulot sing mga halad para sa mga saserdote mismo kag sa ila mga masigka-Israelinhon. Apang, sang 33 C.E., gin-untatan ni Jehova ang paggamit sa mga Levinhon subong saserdote kag ginsugdan ang isa ka mas maayo nga kahimusan. Ginbaton niya ang himpit nga kabuhi ni Jesus subong isa ka halad para sa mga sala sang katawhan. Sugod sadto, indi na kinahanglan ang iban pa nga halad. Ang gahom sang halad ni Jesus nagapadayon.​—Juan 14:6; Colosas 2:​13, 14; Hebreo 9:​11-​14, 24.

18. Ano nga sahi sang pagkasaserdote ang ginaporma sang Israel sang Dios, kag ano ang sugo sa ila?

¹⁸ Paano, nian, ang mga katapo sang Israel sang Dios nangin “mga saserdote ni Jehova”? Sang magsulat sa iya masigka-hinaplas nga mga Cristiano, si apostol Pedro nagsiling: “Kamo ‘pinili nga kaliwatan, harianon nga pagkasaserdote, balaan nga pungsod, katawhan nga pinasahi nga ginapanag-iyahan, agod mapahayag ninyo sing lapnag ang pagkahalangdon’ sang isa nga nagtawag sa inyo gikan sa kadudulman pakadto sa iya makatilingala nga kapawa.” (1 Pedro 2:9) Busa, subong isa ka grupo, ang hinaplas nga mga Cristiano nagaporma sing isa ka pagkasaserdote nga may espesipiko nga tulumanon: magwali sa mga pungsod tuhoy sa himaya ni Jehova. Dapat sila mangin mga saksi niya. (Isaias 43:​10-​12) Sa bug-os nga katapusan nga mga adlaw, matutom nga ginatuman sang hinaplas nga mga Cristiano ining importante nga tulumanon. Subong resulta, minilyon karon ang nagapakigbahin sa ila sa hilikuton nga pagpanaksi tuhoy sa Ginharian ni Jehova.

19. Ano nga pribilehiyo sang pag-alagad ang himuon sang hinaplas nga mga Cristiano?

¹⁹ Dugang pa, ang mga katapo sang Israel sang Dios may paglaum nga mag-alagad subong mga saserdote sa tuhay nga paagi. Sa tapos sila mapatay, ginabanhaw sila padulong sa di-mamalatyon nga kabuhi subong mga espiritu sa langit. Magaalagad sila didto indi lamang subong mga manuggahom upod ni Jesus sa iya Ginharian kundi subong mga saserdote man sang Dios. (Bugna 5:​10; 20:6) Subong amo sini, may pribilehiyo sila nga ipadapat ang mga benepisyo sang halad nga gawad ni Jesus sa matutom nga katawhan sa duta. Sa palanan-awon ni apostol Juan nga narekord sa Bugna kapitulo 22, ginalaragway sila subong “mga kahoy.” Ang tanan nga 144,000 ka “kahoy” makita sa langit, nga nagapatubas sing “napulog-duha ka ani sang mga bunga, nga nagapatubas sang ila mga bunga kada bulan. Kag ang mga dahon sang mga kahoy bulong sa mga pungsod.” (Bugna 22:​1, 2) Makadalayaw gid ini nga pag-alagad sang mga saserdote!

Kahuluy-an kag Pagkanahuy-an, Dayon Pagkasadya

20. Walay sapayan sang pagpamatok, ano nga pagpakamaayo ang nagahulat sa harianon nga pagkasaserdote?

²⁰ Sugod sang 1914 sang nagsugod ang tuig sang maayong kabubut-on ni Jehova, ang mga klero sang Cristiandad nagpamatok gid sa harianon nga pagkasaserdote. (Bugna 12:17) Walay sapayan, napaslawan sang ulihi ang tanan nga panikasog nga padulugon ang pagbantala sing maayong balita. Gintagna ini ni Isaias, nga nagasiling: “Sa baylo sang inyo kahuluy-an may doble nga bahin, kag sa baylo sang pagkanahuy-an magahugyaw sila bangod sang ila bahin. Busa sa ila duta magatag-iya sila sing doble pa gani nga bahin. Ang pagkasadya tubtob sa tion nga walay latid mangin sa ila.”​—Isaias 61:7.

21. Paano ang hinaplas nga mga Cristiano nakatigayon sing doble nga bahin sang mga pagpakamaayo?

²¹ Sa tion sang Bug-os Kalibutan nga Inaway I, nahuy-an kag ginpakahuy-an sang nasyonalistiko nga Cristiandad ang hinaplas nga nagkalabilin. Lakip sa butig nga nagsumbong sa walo ka matutom nga mga utod sa ulong-talatapan sa Brooklyn sing sedisyon amo ang mga katapo sang mga klero. Ini nga mga utod di-makatarunganon nga ginbilanggo sing siam ka bulan. Sang ulihi, sang tigpamulak sang 1919, ginbuy-an sila, kag sang ulihi ginbawi ang tanan nga panumbungon batok sa ila. Sa amo nagbalandra ang pahito nga padulugon ang pagbantala nga hilikuton. Sa baylo nga tugutan ang iya mga sumilimba nga mag-antos sing dayon nga kahuluy-an, ginhilway sila ni Jehova kag ginpasag-uli sila sa ila espirituwal nga duog, ang “ila duta.” Didto nakabaton sila sing doble nga bahin sang mga pagpakamaayo. Ang tanan nga pag-antos nila gintumbasan ni Jehova sing bugana nga pagpakamaayo. Sa pagkamatuod may rason gid sila sa paghugyaw sing malipayon!

22, 23. Paano gin-ilog sang hinaplas nga mga Cristiano si Jehova, kag paano niya ginpadyaan sila?

²² Ang masunod nga ginsiling ni Jehova nagahatag sing isa pa ka rason nga magkasadya ang mga Cristiano karon: “Ako, si Jehova, nagahigugma sang katarungan, nagadumot sang pagpangawat kag sang pagkadimatarong. Kag maminatud-on nga ihatag ko ang ila suhol, kag magahimo ako sa ila sing dayon nga katipan.” (Isaias 61:8) Paagi sa ila pagtuon sang Biblia, natun-an sang hinaplas nga nagkalabilin nga higugmaon ang katarungan kag dumtan ang kalautan. (Hulubaton 6:​12-​19; 11:20) Natun-an nila nga ‘salsalon ang ila mga espada nga mga punta sang arado,’ nga nagapabilin nga walay nadampigan sa mga inaway kag politikal nga mga kagubot sang katawhan. (Isaias 2:4) Gintalikdan man nila ang nagapakahuya-sa-Dios nga mga buhat, subong sang pagpasipala, pagpanghilahi, pagpangawat, kag pagpahubog.​—Galacia 5:​19-21.

²³ Bangod ginailog man sang hinaplas nga mga Cristiano ang paghigugma sang ila Manunuga sa katarungan, ginhatag sa ila ni Jehova ‘ang ila suhol sing maminatud-on.’ Isa sini nga “suhol” amo ang dayon nga katipan​—ang bag-ong katipan—​nga ginpahibalo ni Jesus sa iya mga sumulunod sang gab-i antes sia ginpatay. Pasad sa sini nga katipan, sila nangin isa ka espirituwal nga pungsod, ang pinasahi nga katawhan sang Dios. (Jeremias 31:​31-​34; Lucas 22:20) Sa idalom sini, ipadapat ni Jehova ang tanan nga benepisyo sang halad nga gawad ni Jesus, lakip ang kapatawaran sang mga sala sang mga hinaplas kag sang tanan nga iban pa nga matutom sang katawhan.

Paghugyaw sa mga Pagpakamaayo ni Jehova

24. Sin-o gikan sa tunga sang mga pungsod ang “mga anak” nga ginpakamaayo, kag paano sila nangin “mga anak”?

²⁴ Ginkilala sang iban sa tunga sang mga pungsod ang pagpakamaayo ni Jehova sa iya katawhan. Gintagna ini sang saad ni Jehova: “Ang ila mga anak makilala gid bisan sa tunga sang mga pungsod, kag ang ila mga kaliwat sa tunga sang mga katawhan. Ang tanan nga makakita sa ila magakilala sa ila, nga sila ang mga anak nga ginpakamaayo ni Jehova.” (Isaias 61:9) Aktibo ang mga katapo sang Israel sang Dios, ang hinaplas nga mga Cristiano, sa tunga sang mga pungsod sa tion sang tuig sang maayong kabubut-on ni Jehova. Minilyon ang nagabaton sang ila ministeryo karon. Paagi sa pagpanghikot sing suod upod sa Israel sang Dios, ang mga tawo gikan sa mga pungsod may pribilehiyo nga mangin “mga anak nga ginpakamaayo ni Jehova.” Ang ila malipayon nga kahimtangan kitaon sa tanan nga katawhan.

25, 26. Paano ginailog sang tanan nga Cristiano ang mga sentimiento nga ginpabutyag sa Isaias 61:​10?

²⁵ Ang tanan nga Cristiano, hinaplas man kag iban nga mga karnero, nagapaabot sa pagdayaw kay Jehova sing dayon. Bug-os tagipusuon nga nagaugyon sila kay manalagna Isaias nga gin-inspirar sa pagsiling: “Pat-od gid nga magahugyaw ako kay Jehova. Magakalipay ang akon kalag sa akon Dios. Kay ginpanaptan niya ako sing mga panapton sang kaluwasan; ginputos niya ako sing walay pako nga panapton sang pagkamatarong, kaangay sang nobyo nga, subong sang saserdote, nagsul-ob sing takdong, kag kaangay sang nobya nga nagapuni sang iya kaugalingon sang iya mga huluyason.”​—Isaias 61:10.

²⁶ Napanaptan sing “walay pako nga panapton sang pagkamatarong,” determinado ang hinaplas nga mga Cristiano sa pagpabilin nga putli kag matinlo sa mga mata ni Jehova. (2 Corinto 11:​1, 2) Bangod ginpahayag sila ni Jehova nga matarong sa pagpanubli sing langitnon nga kabuhi, indi na gid sila magbalik sa nahapay nga kahimtangan sang Babilonia nga Daku, gikan diin ginhilway na sila. (Roma 5:​9; 8:30) Bilidhon gid para sa ila ang mga panapton sang kaluwasan. Determinado man ang ila iban nga mga karnero nga mga kaupod sa pagtuman sang mataas nga mga talaksan ni Jehova nga Dios sa putli nga pagsimba. Bangod “ginlabhan nila ang ila mga panapton nga malaba kag ginpaputi ini sa dugo sang Kordero,” ginapahayag sila nga matarong kag makalampuwas sila sa “dakung kapipit-an.” (Bugna 7:​14; Santiago 2:​23, 25) Samtang wala pa ini, ginailog nila ang ila hinaplas nga mga kaupod sa paglikaw nga madagtaan sang Babilonia nga Daku.

27. (a) Sa tion sang Isa ka Libo ka Tuig nga Paghari, anong talalupangdon nga “pagpanugdo” ang mahanabo? (b) Paano ang pagkamatarong nagapanugdo na sa tunga sang katawhan?

²⁷ Sa karon, nagakalipay ang mga sumilimba ni Jehova nga yara sila sa isa ka espirituwal nga paraiso. Sa indi madugay matigayon man nila ang Paraiso sa pisikal nga kahulugan. Bug-os tagipusuon nga ginapaabot naton ina nga tion, nga maathag nga ginlaragway sa nagatakop nga mga pulong sang Isaias kapitulo 61: “Subong nga ang duta nagapatubo sang iya tugdo, kag subong nga ang hardin nagapatugdo sang mga butang nga ginsab-ug sa sini, sa amo man nga paagi pahanabuon sang Soberanong Ginuong Jehova ang pagpanugdo sang pagkamatarong kag sang kadayawan sa atubangan sang tanan nga pungsod.” (Isaias 61:11) Sa tion sang Isa ka Libo ka Tuig nga Paghari ni Cristo, maeksperiensiahan sang duta “ang pagpanugdo sang pagkamatarong.” Ang katawhan magasinggit sing madinalag-on, kag ang pagkamatarong magasangkad tubtob sa mga ukbong sang duta. (Isaias 26:9) Apang, indi na naton paghulaton pa inang mahimayaon nga adlaw agod makahatag sing pagdayaw sa atubangan sang tanan nga pungsod. Ang pagkamatarong nagapanugdo na sa tunga sang minilyon nga nagahimaya sa Dios sang langit kag nagabantala sing maayong balita tuhoy sa iya Ginharian. Bisan sa karon ang aton pagtuon kag ang aton paglaum nagahatag gid sa aton sing rason nga maghugyaw sa mga pagpakamaayo sang aton Dios.

[Nota]

[Piktyur sa pahina 323]

May maayong balita si Isaias nga ibantala sa Judiyong mga bihag

[Piktyur sa pahina 331]

Sugod sang 33 C.E., nagtanom si Jehova sing 144,000 ka “dalagku nga mga kahoy sang pagkamatarong”

[Piktyur sa pahina 334]

Ang duta magapanugdo sing pagkamatarong