Ginaapresyar Mo Bala ang Organisasyon ni Jehova?

“Amo ini ang ginasiling ni Jehova: ‘Ang langit amo ang akon trono, kag ang duta amo ang palatungan sang akon mga tiil.’ ”​—⁠ISAIAS 66:⁠1.

1, 2. (a) Anong kitaon nga pamatuod sang organisasyon ni Jehova ang imo matudlo? (b) Diin nagapuyo si Jehova?

NAGAPATI ka bala nga si Jehova may organisasyon? Kon amo, ngaa nagapati ka? Mahimo magasabat ka: ‘Ti, may Kingdom Hall kami. May organisado kami nga kongregasyon nga ginadumalahan sang hubon sang mga gulang. May tinangdo nga manugtatap sa sirkito kami nga nagaduaw sa amon sing tayuyon. Nagatambong kami sa organisado nga mga asambleya kag mga kombension. May sanga talatapan kami sang Watch Tower Society sa amon pungsod. Sa pagkamatuod, ini tanan kag ang iban pa nagapamatuod nga si Jehova may yara isa ka nagapanghikot nga organisasyon.’

² Ini nga mga butang nagapamatuod sa isa ka organisasyon. Apang kon ang makita lamang naton kag ginaapresyar amo ang diri sa duta, wala naton mahangpan sing bug-os ang organisasyon ni Jehova. Ginsugiran anay ni Jehova si Isaias nga ang duta palatungan lamang sang Iya mga tiil, apang ang mga langit amo ang Iya trono. (Isaias 66:1) Ano nga “mga langit” ang ginapatuhuyan ni Jehova? Amo bala ang aton atmospera? Ang kahawaan? Ukon ang iban nga sahi sang kabuhi? Si Isaias nagahambal tuhoy sa “mataas nga puluy-an sang pagkabalaan kag himaya” ni Jehova, kag ginalaragway sang salmista ining mga langit subong “ang malig-on nga duog nga iya ginapuy-an.” Sa amo, ang “mga langit” sa Isaias 66:1 nagapatuhoy sa dikitaon nga duog sang mga espiritu diin si Jehova amo ang may supremo, ukon pinakamataas nga posisyon.​—⁠Isaias 63:​15; Salmo 33:​13, 14.

3. Paano naton malandas ang mga pagduhaduha?

³ Busa, kon luyag gid naton mahangpan kag maapresyar ang organisasyon ni Jehova, dapat kita magtangla sa kalangitan. May problema kita sa sini. Sanglit ang langitnon nga organisasyon ni Jehova dikitaon, paano naton nahibaluan nga nagaluntad gid ini? Mahimo nga ang iban daw nagaagi sa isa ka tanel sang pagduhaduha, nga nagapalibog, ‘Paano kita makasigurado?’ Paano madaug sang pagtuo ang pagduhaduha? Ang duha ka importante nga paagi amo ang maukod personal nga pagtuon sa Pulong sang Dios kag regular nga pagtambong kag pagpakigbahin sa Cristianong mga miting. Nian makita naton ang kapawa sang kamatuoran sa punta sang tanel. May mga alagad anay ang Dios nga nagduhaduha. Binagbinagon naton ang alagad ni Eliseo sang ang Israel ginasalakay sang hari sang Siria.​—⁠Ipaanggid ang Juan 20:​24-29; Santiago 1:​5-8.

Ang Isa nga Nakakita sang mga Kasuldadusan sang Langit

4, 5. (a) Ano ang problema sang alagad ni Eliseo? (b) Paano ginsabat ni Jehova ang pangamuyo ni Eliseo?

⁴ Ang hari sang Siria nagpadala sing daku nga kasuldadusan sang kagab-ihon sa Dotan agod dakpon si Eliseo. Sang nagbangon sing aga pa ang alagad ni Eliseo kag nagguwa, ayhan agod maghaklo sing lab-as nga hangin sa ibabaw sang matapan nga atop sang ila puluy-an sa Natung-an nga Sidlangan, nakibot gid sia! Nalikupan ang banwa sang bug-os nga kasuldadusan sang mga Sirianhon nga may mga kabayo kag mga kangga, nga nagahulat agod dakpon ang manalagna sang Dios. Ang alagad nagsinggit kay Eliseo: “Abaw, agalon ko! Ano ang himuon naton?” Sing kalma kag may pagsalig, si Eliseo nagsabat: “Dili ka magkahadlok, kay ang mga nagaupod sa aton madamo pa sa mga nagaupod sa ila.” Mahimo gid nga nagpalibog ang alagad, ‘Diin sila? Indi ko sila makita!’ Kon kaisa mahimo nga amo man sina ang problema naton​—⁠indi makita paagi sa mga mata sang paghangop, ukon paghantop, ang langitnon nga mga kasuldadusan.​—⁠2 Hari 6:​8-16; Efeso 1:⁠18.

⁵ Nangamuyo si Eliseo nga buksan ang mga mata sang iya alagad. Ano ang natabo dayon? “Sa gilayon ginbuksan ni Jehova ang mga mata sang alagad, agod nga makakita sia; kag, yari karon! ang bukid hil-ob sang mga kabayo kag sang mga kangga nga kalayo sa palibot ni Eliseo.” (2 Hari 6:17) Huo, nakita niya ang mga kasuldadusan sang langit, ang mga anghel nga nagahulat sa pag-amlig sa alagad sang Dios. Nahangpan na niya karon ang pagsalig ni Eliseo.

6. Paano naton mahantop ang langitnon nga organisasyon ni Jehova?

⁶ Kita bala kaangay sang alagad ni Eliseo may problema man kon kaisa sa paghantop? May huyog bala kita nga tan-awon ang pisikal lamang nga bahin sang mga kahimtangan nga nagapahog sa aton ukon sa aton Cristianong hilikuton sa pila ka kadutaan? Kon amo, mapaabot bala naton nga pasanagan kita sang isa ka pinasahi nga palanan-awon? Indi, bangod may yara kita isa ka butang nga wala anay sa alagad ni Eliseo​—⁠ang bug-os nga libro nga nagaunod sing madamo nga palanan-awon, ang Biblia, nga makahatag sa aton sing paghantop sa langitnon nga organisasyon. Inang inspirado nga Pulong nagahatag man sing nagatuytoy nga mga prinsipio sa pagtadlong sang aton panghunahuna kag sang aton dalanon sang pagkabuhi. Apang, dapat kita manikasog nga matigayon ang paghantop kag palambuon ang apresasyon sa kahimusan ni Jehova. Kag mahimo naton ina paagi sa personal nga pagtuon, upod sa pangamuyo kag pagpamalandong.​—⁠Roma 12:​12; Filipos 4:​6; 2 Timoteo 3:​15-17.

Pagtuon Agod Makahantop

7. (a) Ano mahimo ang problema sang iban sa personal nga pagtuon sing Biblia? (b) Ngaa takus ang panikasog nga ginahinguyang sa personal nga pagtuon?

⁷ Ang personal nga pagtuon indi makalilipay para sa madamo nga tawo, subong sang mga tawo nga wala gid malipay anay sa pagtuon sang nagaeskwela pa sila ukon wala gid makaeskwela. Apang, kon luyag naton mahantop kag maapresyar ang organisasyon ni Jehova paagi sa aton mga mata sang paghangop, dapat kita magpalambo sing handum sa pagtuon. Makakaon ka bala sing manamit nga pagkaon kon wala sing paghanda? Subong amo gid ang isugid sa imo sang bisan sin-o nga kusinero ukon manugluto, trabahuso ang pagluto sing isa ka manamit nga pagkaon. Apang, mahimo nga maubos ini sa sulod lamang sang tunga sa oras ukon wala pa. Sa pihak nga bahin, ang mga kaayuhan sang personal nga pagtuon mahimo mapuslan sa bug-os nga kabuhi. Amat-amat nga maluyagan naton ang personal nga pagtuon kon makita naton ang pag-uswag nga mahimo naton. Husto si apostol Pablo sa pagsiling nga dapat naton bantayan pirme ang aton kaugalingon kag ang aton panudlo kag padayon kita nga magbasa sing dayag. Kinahanglan ang dalayon nga panikasog, apang ang mga benepisyo mahimo nga walay katapusan.​—⁠1 Timoteo 4:​13-16.

8. Ano nga panimuot ang ginarekomendar sang Hulubaton?

⁸ Ang isa ka maalam nga tawo sang dumaan nga tion nagsiling: “Anak ko, kon batunon mo ang akon mga pulong kag pakabahandion ang akon mga sugo sa imo, sa paglingig sa imo igdulungog sa kaalam, agod mapahamtang mo ang imo tagipusuon sa paghantop; kon, dugang pa, magtuaw ka tungod sa paghangop kag magbayaw sang imo tingog tungod sa paghantop, kon padayon nga pangitaon mo ini subong sang pilak, kag usisaon ini subong sang mga bahandi nga natago, nian mahangpan mo ang kahadlok kay Jehova, kag makita mo ang ihibalo sang Dios.”​—⁠Hulubaton 2:​1-5.

9. (a) Ano ang balor sang bulawan kon ipaanggid sa balor sang “ihibalo gid sang Dios”? (b) Ano nga mga gamit ang kinahanglanon naton agod makatigayon kita sing sibu nga ihibalo?

⁹ Nakita mo bala kon sin-o ang may salabton? Talupangda nga makapila ginsulit ang mga tinaga nga ‘Kon imo.’ Kag talupangda man ang ekspresyon nga, ‘Kon imo padayon nga usisaon ini subong sang bahandi nga natago.’ Hunahunaa ang mga minero nga sa sulod sang mga siglo nagapangutkot sing pilak kag bulawan sa Bolivia, Mexico, Bagatnan nga Aprika, kag sa iban pa nga mga pungsod. Maukod sila nga nagpangabudlay, nga ginagamit ang mga piko kag mga pala, sa pagkutkot sa dalagku nga mga bato nga nagaunod sing hamili nga mga metal. Daku gid ang pagpabalor nila sa bulawan amo kon ngaa sa isa ka minahan sa California, E.⁠U.⁠A., nakakutkot sila sing 591 kilometros nga kalabaon sang tanel, kag may kadalumon nga mga 1.5 kilometros​—⁠agod lamang mangita sing bulawan. Apang, makaon mo bala ang bulawan? Mainom mo bala ang bulawan? Mabuhi ka bala sini sa desyerto kon nagatagumatayon ka bangod sa gutom kag kauhaw? Indi, ang balor sini artipisyal lamang kag depende sa pagkinahanglan sang bumalakal, pirme nagabag-obag-o subong sa ginapakita sang presyo sang bulawan sa lainlain nga mga pungsod. Walay sapayan, may mga tawo nga napatay bangod sini. Karon daw ano kadaku nga panikasog ang kinahanglanon agod matigayon ang espirituwal nga bulawan, “ang ihibalo gid sang Dios”? Hunahunaa ini, ang ihibalo tuhoy sa Soberano nga Ginuo sang uniberso, sa iya organisasyon, kag sa iya mga katuyuan! Sa sining bahin, makagamit kita sing espirituwal nga mga piko kag mga pala. Amo ini ang napasad-sa-Biblia nga mga publikasyon nga nagabulig sa aton sa pagkutkot sa Pulong ni Jehova kag mahantop ang kahulugan sini.​—⁠Job 28:​12-19.

Pagkutkot Para sa Paghantop

10. Ano ang nakita ni Daniel sa palanan-awon?

¹⁰ Tilawan naton ang espirituwal nga pagkutkot agod masugdan naton ang pagtigayon sing ihibalo tuhoy sa langitnon nga organisasyon ni Jehova. Bilang yabi sa paghantop, binagbinagon naton ang palanan-awon ni Daniel tuhoy sa Dumaan sang mga Adlaw sa iya trono. Si Daniel nagsulat: “Nagpadayon ako sa pagtan-aw tubtob may mga trono nga ginpahamtang kag ang Dumaan sang mga Adlaw naglingkod. Ang iya panapton maputi subong sang nieve, kag ang buhok sang iya ulo kaangay sa matinlo nga bulbol. Ang iya trono mga dabdab sang kalayo; ang mga ruweda sini kalayo nga nagadabadaba. Ang ilig nga nagadabdab nag-ilig kag nagguwa gikan sa atubangan niya. Ang mga linibo sang mga linibo nagaalagad sa iya, kag linaksa sa mga linaksa nagatilindog sa atubangan niya. Ang Hukmanan nagsugod, kag may mga libro nga ginbuksan.” (Daniel 7:​9, 10) Sin-o ining linibo nga nagaalagad kay Jehova? Ang marhinal nga reperensia sa New World Translation, nga ginagamit subong “mga piko” kag “mga pala,” nagadul-ong sa aton sa mga reperensia subong sang Salmo 68:​17 kag Hebreo 1:⁠14. Huo, ang mga nagaalagad amo ang langitnon nga mga anghel!

11. Paano makabulig sa aton ang palanan-awon ni Daniel agod mahangpan ang ginhambal ni Eliseo?

¹¹ Ang kasaysayan ni Daniel wala nagasiling nga nakita niya ang tanan nga matutom nga mga anghel nga ginasugo sang Dios. Mahimo nga may minilyon pa. Apang pat-od nga naapresyar na naton karon kon ngaa si Eliseo nakasiling: “Ang mga nagaupod sa aton madamo pa sa mga nagaupod sa ila.” Bisan pa ang mga kasuldadusan sang hari sang Siria ginsakdag sang dimatutom nga mga anghel, ang mga demonyo, laban gihapon ang langitnon nga mga kasuldadusan ni Jehova!​—⁠Salmo 34:​7; 91:⁠11.

12. Paano ikaw makatigayon sing dugang nga ihibalo nahanungod sa mga anghel?

¹² Ayhan luyag mo makahibalo sing dugang pa nahanungod sa sining mga anghel, subong sang ila katungdanan sa pag-alagad kay Jehova. Pasad sa Griegong tinaga para sa anghel, makita naton nga mga mensahero sila bangod nagakahulugan man ini nga “mensahero.” Apang, kapin pa ang ila mga katungdanan. Ugaling, agod mahibaluan ini, dapat ikaw magkutkot. Kon may yara ka Insight on the Scriptures, sarang mo matun-an ang artikulo nga “Angels,” ukon mahimo mo tan-awon ang nagligad nga mga artikulo sa Ang Lalantawan tuhoy sa mga anghel. Matingala gid ikaw kon daw ano kadaku ang matun-an mo nahanungod sa sining langitnon nga mga alagad sang Dios kag maapresyar mo ang ila bulig. (Bugna 14:​6, 7) Apang, sa langitnon nga organisasyon sang Dios, may pinasahi nga mga katungdanan ang iban nga espiritu nga mga tinuga.

Kon Ano ang Nakita ni Isaias

13, 14. Ano ang nakita ni Isaias sa palanan-awon, kag ano ang epekto sini sa iya?

¹³ Magkutkot naman kita karon sa palanan-awon ni Isaias. Kon basahon mo ang kapitulo 6, bersikulo 1 tubtob 7, pat-od nga magadayaw gid ikaw. Nagsiling si Isaias nga iya “nakita si Jehova, nga nagalingkod sa trono,” kag “sa ibabaw niya nagatindog ang mga serafin.” Ginabantala nila ang himaya ni Jehova, kag ginadayaw ang iya pagkabalaan. Pat-od nga matandog gid ikaw bisan kon ginabasa mo lang ining kasaysayan. Ano ang ginhimo ni Isaias? “Nagsiling ako: ‘Kailo ako! Kay daw subong bala nga ginpahipos ako [sa Sheol], bangod nga tawo ako nga dimatinlo sing mga bibig, kag nagapuyo ako sa tunga sang katawhan nga dimatinlo sing mga bibig; kay ang akon mga mata nakakita sa Hari, si Jehova sang mga kasuldadusan!’ ” Nagdayaw gid sia sa sadto nga palanan-awon! Amo man bala ikaw?

¹⁴ Gani paano nasarangan ni Isaias ining mahimayaon nga talan-awon? Ginpaathag niya nga ginbuligan sia sang isa ka serafin kag nagsiling: “Nakuha ang imo kalautan kag napatawad ang imo sala.” (Isaias 6:7) Masaligan ni Isaias ang kaluoy sang Dios kag mapamatian ang mga pulong ni Jehova. Karon, indi mo bala luyag makahibalo sing dugang pa nahanungod sa sining mataas sing ranggo nga espiritu nga mga tinuga? Kon amo, ano ang dapat mo himuon? Magkutkot ka sing dugang pa nga impormasyon. Ang isa ka bulig nga magamit mo amo ang Watch Tower Publications Index, nga ginasundan ang mga reperensia nga ginatudlo sini sa madamo nga kuluhaan sing makapaathag nga impormasyon.

Ano ang Nakita ni Ezequiel?

15. Ano ang nagapakita nga masaligan ang palanan-awon ni Ezequiel?

¹⁵ Masunod nga talupangdon naman naton ang isa pa ka sahi sang espiritu nga tinuga. Nakabaton si Ezequiel sing pribilehiyo nga makakita sing makapapagsik nga palanan-awon samtang bihag sia sa Babilonia. Buksi ang inyo Biblia sa Ezequiel kapitulo 1, ang una nga tatlo ka bersikulo. Paano nagaumpisa ang kasaysayan? Nagasiling bala ini, ‘Sang una nga panahon, sa isa ka malayo nga pungsod . . . ’? Indi, indi ini isa ka engkantuhanon nga sugilanon sa isa ka ginahanduraw lamang nga danyag. Ang bersikulo 1 nagasiling: “Sa ikakatluan nga tuig, sa ikap-at nga bulan, sa ikalima nga adlaw sang bulan, sang yara ako sa tunga sang mga bihag sa ubay sang suba nga Kebar, ang mga langit nabuksan kag nakakita ako sing mga palanan-awon sang Dios.” Ano ang matalupangdan mo sa sining bersikulo? Ginahatag sini ang eksakto nga petsa kag sibu nga duog. Ining mga detalye nagatudlo sa ikalima nga tuig sang pagkabihag ni Hari Joaquim, sang tuig 613 B.⁠C.⁠E.

16. Ano ang nakita ni Ezequiel?

¹⁶ Ang kamot ni Jehova nagtuytoy kay Ezequiel, kag nakakita sia sing makapulunaw nga palanan-awon tuhoy kay Jehova nga nagalingkod sa trono sa isa ka masangkad langitnon nga kangga nga may dalagku nga mga ruweda nga ang ila mga yanta hil-ob sing mga mata palibot. Ang detalye nga nagapukaw sang aton interes amo ang apat ka tinuga, nga ang tagsatagsa nagatindog sa tagsa ka ruweda. “Amo ini ang ila dagway: kaangay sila sang tawo. Kag ang tagsatagsa sa ila may apat ka nawong, kag ang tagsatagsa sa ila may apat ka pakpak. . . . Kag nahanungod sa kaangay sang ila mga nawong, sila nga apat may nawong sang tawo kag may nawong sang leon sa tuo nga kilid, kag sila nga apat may nawong sang toro nga baka sa wala nga kilid; sila nga apat may nawong man sang agila.”​—⁠Ezequiel 1:​5, 6, 10.

17. Ano ang ginalaragway sang apat ka nawong sang mga querubin?

¹⁷ Ano ining apat ka buhi nga tinuga? Ginasugiran kita ni Ezequiel mismo nga mga querubin sila. (Ezequiel 10:​1-3, 14) Ngaa may apat sila ka nawong? Agod ilaragway ang apat ka talalupangdon nga mga kinaiya ni Jehova nga Soberanong Ginuo. Ang nawong sang agila nagasimbulo sang kaalam nga may ikasarang sa paghibalo sang palaabuton. (Job 39:​27-29) Ano ang ginalaragway sang nawong sang toro nga baka? Bangod sang daku nga kusog sa iya liog kag mga abaga, sarang mahakwat sang isa ka toro ang kabayo kag ang nagasakay sa sini. Sa pagkamatuod, ang toro nagasimbulo sang walay latid nga gahom ni Jehova. Ang leon ginagamit subong simbulo sang maisugon nga hustisya. Bilang katapusan, ang nawong sang tawo nagakaigo nga nagalaragway sang gugma sang Dios, kay ang tawo amo lamang ang dutan-on nga tinuga nga makapakita sining kinaiya nga may kaalam.​—⁠Mateo 22:​37, 39; 1 Juan 4:⁠8.

18. Paano ginadugangan ni apostol Juan ang aton paghantop sa langitnon nga organisasyon?

¹⁸ May iban pa nga mga palanan-awon nga makabulig sa aton agod makompleto ang laragway. Lakip sa sini amo ang mga palanan-awon ni Juan nga ginasaysay sa tulun-an nga Bugna sang Biblia. Kaangay ni Ezequiel, nakita niya si Jehova sa isa ka mahimayaon nga trono nga may kaupod nga mga querubin. Ano ang ginahimo sang mga querubin? Ginasulit nila ang ginabantala sang mga serafin sa Isaias kapitulo 6, nga nagasiling: “Balaan, balaan, balaan si Jehova nga Dios, ang Labing Gamhanan, nga amo anay kag amo karon kag ang magakari.” (Bugna 4:⁠6-8) Nakita man ni Juan ang isa ka kordero sa tupad sang trono. Sin-o ang mahimo ginalaragway sina? Amo ang Kordero sang Dios, si Jesucristo.​—⁠Bugna 5:​13, 14.

19. Paagi sa sining pagtuon, ano ang nahangpan mo nahanungod sa organisasyon ni Jehova?

¹⁹ Gani paagi sa sining mga palanan-awon, ano ang aton nahangpan? Nga si Jehova nga Dios nagalingkod sa iya trono sa pinakamataas nga bahin sang langitnon nga organisasyon nga ginaupdan sang Kordero, si Jesucristo, nga amo ang Pulong, ukon Logos. Nakita man naton ang isa ka langitnon nga kasuldadusan sang mga anghel, lakip ang mga serafin kag mga querubin. Bahin sila sang isa ka daku, nahiusa nga organisasyon nga nagaalagad para sa mga katuyuan ni Jehova. Kag isa sining mga katuyuan amo ang pagbantala sing maayong balita sa bug-os nga kalibutan sa sining tion sang katapusan.​—⁠Marcos 13:​10; Juan 1:​1-3; Bugna 14:​6, 7.

20. Ano nga pamangkot ang pagasabton sa masunod nga artikulo?

²⁰ Bilang katapusan, diri naman sa duta amo ang mga Saksi ni Jehova nga nagatipon sa ila mga Kingdom Hall agod magtuon kon paano himuon ang kabubut-on sang Soberanong Ginuo. Sa pagkamatuod, nahangpan na naton karon nga mas madamo ang kaupod naton sangsa kaupod ni Satanas kag sang mga kaaway sang kamatuoran. Ang pamangkot pa amo, Ano ang ginahimo sang langitnon nga organisasyon sa pagbantala sing maayong balita sang Ginharian? Usisaon sang masunod nga artikulo ina kag ang iban pa nga mga butang.

Mga Pamangkot Para sa Repaso

◻ Agod mahangpan ang organisasyon ni Jehova, ano ang dapat naton mahantop?

◻ Ano ang naeksperiensiahan sang alagad ni Eliseo, kag paano sia ginpalig-on sang manalagna?

◻ Paano naton dapat tamdon ang personal nga pagtuon?

◻ Paano sanday Daniel, Isaias, kag Ezequiel nagahatag sing mga detalye tuhoy sa langitnon nga organisasyon?

[Retrato sa pahina 13]

Ang mga benepisyo sang personal nga pagtuon labaw gid sa mga benepisyo sang naluto sing manamit nga pagkaon

[Retrato sa pahina 15]

Ang palanan-awon tuhoy sa langitnon nga mga kasuldadusan amo ang sabat ni Jehova sa pangamuyo ni Eliseo