Nagatuon Bala Ikaw Gikan sa Aton Dakung Instruktor?

“NAGTUON ako sing abogasiya sang lima ka tuig sa isa sang labing maayo nga unibersidad sa Espanya,” paathag ni Julio. “Apang ang akon natun-an sang nagsugod ako sa pagtuon sa Biblia labaw gid kaayo. Gintudluan ako sang unibersidad kon paano magtuon; gintudluan ako sang Biblia kon paano mabuhi.”

Paagi sa Biblia mahibaluan naton ang mga panghunahuna sang Dios, ang iya mga prinsipio, kag ang iya mga panudlo. Ginalaragway sang mga Kasulatan si Jehova subong ang “Dakung Instruktor” bangod sia ang labing maayo nga manunudlo sa uniberso. (Isaias 30:20) Sing literal, ginatawag Sia sang Hebreong teksto nga “mga instruktor”​—⁠tigdamo (plural) nga nagapakita sing pagkaekselente. Dapat ini magapahanumdom sa aton nga ang matudluan ni Jehova labaw kaayo sangsa pagtuon sa idalom sang bisan sin-o pa nga manunudlo.

Praktikal nga Kaalam Halin kay Jehova

Ngaa mapuslanon katama ang diosnon nga panudlo? Una sa tanan, bangod sang hamili nga kaundan sini. Ang panudlo ni Jehova nagahatag sa aton sing “praktikal nga kaalam.” Dugang pa, ang hatag-Dios nga kaalam “nagatipig nga buhi” sadtong nagapadapat sini.​—⁠Hulubaton 3:​21, 22; Manugwali 7:⁠12.

Narealisar sang kompositor sang Salmo 119 nga ang kaalam ni Jehova nag-amlig sa iya sa bug-os niya nga kabuhi. Halimbawa, sia nag-amba: “Ang kasuguan sang imo baba maayo sa akon, maayo pa sa linibo nga bulawan kag pilak. Kon wala ang imo kasuguan nangin akon kalipay, nawala na ako kuntani sa akon kapipit-an. Ang imo mga sugo nagahimo sa akon nga maalam pa sa akon mga kaaway, kay yari ini sa akon tubtob sa tion nga walay pat-od. May labi pa ako nga paghangop sa tanan ko nga mga manunudlo, kay ang imo mga pahanumdom amo ang akon pamalandungan.”​—⁠Salmo 119:​72, 92, 98, 99.

Ang salmista indi lamang ang isa nga kuntani ‘nawala sa iya kapipit-an,’ kon indi tungod sa kasuguan ni Jehova. Si Rosa, isa ka taga-Espanya nga lamharon nga babayi, nakombinse nga ang iya kabuhi naluwas bangod gin-aplikar niya ang diosnon nga mga prinsipio. “Sa edad nga 26, makaduha na ako nagtinguha sa paghikog,” hinumdom niya.

Si Rosa nadalahig sa prostitusyon, subong man sa abuso sa alkohol kag droga. “Isa ka adlaw, sang halos nadulaan na ako sing paglaum,” siling niya, “isa ka Saksi nga mag-asawa ang nagsugid sa akon kon paano makabulig sa aton ang Biblia sa paglubad sa aton mga problema. Nagsugod ako sa pagtuon sa Pulong sang Dios, nga nasapwan ko nga makawiwili. Sa sulod sang isa ka bulan natigayon ko ang kusog agod makahimo sing matinlo, bag-o sing lubos nga panugod sa kabuhi. Karon nga may katuyuan na ang akon kabuhi, indi ko na kinahanglan ang bulig sang alkohol ukon mga droga. Kag sanglit luyag ko gid mangin abyan ni Jehova, determinado ako nga magkabuhi suno sa iya mga talaksan. Kon indi tungod sa praktikal nga kaalam sang Pulong sang Dios, napat-od ko nga sa karon mahimo nga gin-utod ko na ang akon kabuhi.”

Matuod, ang kaalam halin kay Jehova nagaluwas sing kabuhi. Busa, makabenepisyo kita indi lamang gikan sa hamili nga kaundan sang diosnon nga panudlo kundi gikan man sa paagi nga ginagamit ni Jehova sa pagtudlo sa iya mga alagad. Sanglit ang Anak sang Dios, nga si Jesucristo, nagsugo sa aton nga mangin mga manunudlo kag mga manughimo sing disipulo, luyag naton tun-an ang labing epektibo nga mga paagi sa pagpaambit sang panudlo.​—⁠Mateo 28:​19, 20.

Ang Paggamit ni Jehova sing mga Ilustrasyon

Ang Ebanghelyo ni Marcos nagasiling nga “kon wala sing ilustrasyon [si Jesus] indi magapamulong sa ila.” (Marcos 4:34) Ining kinaiya sang panudlo ni Jesus indi makapakibot. Gin-ilog lamang niya ang isa sa mga paagi nga ang matagnaon nga mga mensahe ni Jehova ginpaalinton sa pungsod sang Israel. Nagaunod ini sing madamong maathag nga mga ilustrasyon.​—⁠Isaias 5:​1-7; Jeremias 18:​1-11; Ezequiel 15:​2-7; Oseas 11:​1-4.

Talupangda, halimbawa, kon paano ginagamit ni Jehova ang epektibo nga ilustrasyon sa pagtudlo sa aton nga ang mga diosdios wala sing pulos. Ang Isaias 44:​14-17 nagasiling: “Nagapulod sia nga sa iya sing mga cedro; kag nagakuha sia sang encina ukon sang roble . . . Nagatanom sia sing abeto, kag . . . nian mangin gatong ini sang tawo. Nagakuha sia sini kag nagapainit sang iya kaugalingon. Ginadabok niya ini kag nagabibingka. Nagahimo man sia sing dios kag nagasimba sini. Ginahimo niya ini nga larawan nga tinigban, kag nagayaub sia sa sini. Ginagatong niya ang bahin sini sa kalayo. Sa bahin sini nagakaon sia sing unod, nagaasal sia kag nabusog sia. . . . Kag ang nabilin sini ginahimo niya nga dios, ang larawan niya nga tinigban. Nagayaub sia sini kag nagasimba sini kag nagapangamuyo sia sa sini kag nagasiling: ‘Luwasa ako, kay ikaw ang akon dios.’ ” Ang mga ilustrasyon kaangay sini epektibo nga mga kagamitan sa pagbulig sa mga bunayag sing tagipusuon nga sikwayon ang idolatriya kag butig nga mga doktrina.

Nagapahunahuna nga mga Pamangkot

Ang Biblia nagaunod man sing mga halimbawa kon paano ginbag-o ni Jehova ang panghunahuna sang iya pila ka alagad paagi sa nagapahunahuna nga mga pamangkot. Si patriarka Job isa sa ila. Mapailubon sia nga ginbuligan ni Jehova sa pagtulutimbang sang iya kaugalingon nga kadiutayon may kaangtanan sa Dios. Ginhimo ini paagi sa serye sang mga pamangkot, nga indi gid masabat ni Job.

“Diin ka bala sang ako nagpasad sang mga sadsaran sang duta?” pamangkot ni Jehova kay Job. “Sin-o bala ang nagtakup sang dagat sing mga ganhaan? . . . Makabugkos ka bala sang pinungpong sang Pleyades, ukon makahubad sang mga higot sang Orion? . . . May butkon ka bala kaangay sang Dios?” Ining nagapaubos nga pakiana nagalakip sang tama ka importante nga pamangkot: “Tagudilian mo bala ako [si Jehova] agod nga mapakamatarong ka?”​—⁠Job 38:​4, 8, 31; 40:​8, 9.

Ining nagapahunahuna nga mga pamangkot nagparealisar kay Job nga naghambal sia nga wala sing paghangop. Hanti, gintadlong niya ang iya ginhambal kag naghinulsol. (Job 42:⁠6) Subong sa sini nga kaso, ang pinili sing maayo nga mga pamangkot mahimo magabulig sa pagtadlong sa di-husto nga panghunahuna sang aton mga anak ukon mga estudyante sa Biblia.

Pagtukod sing Pagsalig

Ano kon kinahanglan naton buligan ang isa nga nagabatyag nga di-takus ukon di-sangkol? Mabuligon sa sining kaangtanan amo ang paghambalanay sa ulot ni Jehova kag sang iya manalagna nga si Moises. Sang gintangdo sang Dios si Moises nga mangin humalambal niya sa atubangan ni Paraon kag sang mga Israelinhon, ang manalagna nagbatyag nga di-sangkol sa paghimo sang hilikuton. “Indi ako madagmit maghambal,” siling niya. Apang, ang Dios nagsabat: “Sin-o bala ang naghimo sang baba sang tawo? . . . Indi bala ako, si Jehova? Busa karon lakat ka, kag magaupod ako sa imo baba kag magatudlo sa imo sang imo ihambal.”​—⁠Exodo 4:​10-12.

Gintangdo ni Jehova ang utod ni Moises nga si Aaron subong humalambal niya, kag ginhimo nila ang ila hilikuton sa Egipto. (Exodo 4:​14-16) Madamong Saksi ni Jehova ang nagbatyag nga dinagakaigo kaangay ni Moises sang una nga nakigbahin sa pamalaybalay nga ministeryo ukon sa pagpanaksi sa dalan. Subong sa kaso ni Moises, ang aton ihibalo nga ginasakdag kita ni Jehova kag nga pagaupdan kita sang isa ka eksperiensiado nga ministro magabulig sa aton sa paglandas sa aton pangalag-ag. Kon paano si Moises nakapalambo sing pagsalig tubtob sa punto nga nakahimo sing epektibo nga mga pamulongpulong nga masapwan sa bug-os nga tulun-an sang Deuteronomio sa Biblia, paagi sa bulig ni Jehova mapalambo man naton ang ikasarang sa paghambal.

Isa ka Praktikal nga Leksion

Ang hanuot nga handum sa pagbulig sa iban kinahanglanon man. Amo ina ang kinaiya nga wala kay manalagna Jonas. Gintangdo ni Jehova si Jonas nga paandaman ang katawhan sang Ninive nahanungod sa nagahilapit nga kalaglagan sang siudad. Sing makapakibot, ang mga taga-Ninive naghinulsol. (Jonas 3:⁠5) Bangod sini, ginpaiway ni Jehova ang kalamidad. Apang, sa baylo nga magkalipay sing daku sa kadalag-an sang iya kampanya sa pagbantala, naakig si Jonas nga ang iya tagna indi matuman. Paano sia ginbuligan ni Jehova agod matigayon ang husto nga pagtamod?

Gingamit ni Jehova ang tanom nga tangantangan agod tudluan si Jonas sang importansia sang pag-ulikid sa iban. Ang tanom milagruso nga nagtubo sa isa ka gab-i kag nag-aman sing makalilipay nga handong para kay Jonas, nga nagpatindog sing kayangkayang sa ilaya sang Ninive. Si Jonas “nagkasadya sing lakas” bangod sining kubos nga tanom. Apang nian si Jehova nag-aman sing ulod sa pag-ut-ut sa tanom sa bagay nga nalaya ini. Sang pagsubang sang adlaw kag pagsingkal sang salatan, si Jonas naakig kag nagsiling: “Maayo pa sa akon nga mapatay sangsa magkabuhi.” (Jonas 4:​5-8) Ano ang leksion sa sining tanan?

Si Jehova nagpamulong kay Jonas kag nagsiling: “May kahilak ka sa tangantangan, nga wala mo pagpangabudlayi, ukon pagpatubua, nga nag-ulhot sa kagab-ihon kag nawala sa kagab-ihon. Kag indi bala ako mahilak sa Ninive, inang daku nga siudad, nga may kapin sa isa ka gatos kag duha ka pulo ka libo ka tawo nga wala makakilala sang ila kamot nga tuo kag sang ila kamot nga wala, kag may madamo man nga kahayupan?”​—⁠Jonas 4:​9-11.

Daw ano ka epektibo nga praktikal nga leksion! Mas interesado si Jonas sa tangantangan sangsa linibo ka tawo. Bisan pa nga ang pagkabalaka sa bisan ano nga tinuga ni Jehova makadalayaw, ang pagbulig agod maluwas ang kabuhi sang mga tawo amo ang aton labing importante nga hilikuton.

Pagtudlo nga May Pagpailob

Subong sang natukiban ni Jonas, indi pirme mahapos ang pagtuman sang aton ministeryo. (2 Timoteo 4:⁠5) Apang, ang mapailubon nga pagtamod sa iban makabulig.

Ano ang reaksion mo kon ang isa sang imo mga estudyante sa Biblia mahinay ukon daw indi rasonable? Ang aton Dakung Instruktor nagatudlo sa aton kon paano pakig-angutan ina nga problema. Nagpakita sia sing dikinaandan nga pagpailob sang padayon sia nga ginpamangkot ni Abraham nahanungod sa nagahilapit nga paghukom sa Sodoma kag Gomorra. “Papason mo bala ang matarong upod sa malauton?” pamangkot ni Abraham. “Pananglit may kalim-an ka matarong sa sulod sang siudad,” pakiluoy ni Abraham. “Papason mo bala kag indi pagpaiwayon ang duog tungod sa kalim-an ka matarong nga yara sa sulod sini?” Ang sabat ni Jehova nagtiklod kay Abraham nga magpadayon sa pagpakiluoy tubtob nga ang kadamuon naglab-ot sa napulo. Nahibal-an ni Jehova nga ang pamilya ni Lot lamang ang nagakaigo nga luwason, kag ang aman ginhimo tungod sa sina. Apang mapailubon nga gintugutan sang Dios si Abraham nga magpadayon sa pagpamangkot sa iya tubtob nahantop niya ang kadakuon sang kaluoy ni Jehova.​—⁠Genesis 18:​20-32.

Ginbinagbinag ni Jehova ang limitado nga paghangop ni Abraham kag ang iya mga balatyagon sang pagkabalaka. Kon hangpon man naton ang mga limitasyon sang aton estudyante, magabulig ini sa aton sa pagpakita sing pagpailob samtang nagapanikasog sia nga mahangpan ang isa ka partikular nga doktrina ukon malandas ang natanom na nga batasan.

Padayon sa Pagtuon Gikan kay Jehova

Si Jehova nga Dios walay duhaduha nga amo ang Dakung Instruktor. Paagi sa mga ilustrasyon, mga pamangkot, kag praktikal nga mga leksion, mapailubon niya nga ginapaambit ang paghangop. Kon tubtob diin naton ginailog ang iya mga metodo sa pagtudlo, kita mismo mangin maayo man nga mga manunudlo.

Sanglit indi dapat pagpatumbayaan sadtong nagatudlo sa iban ang pagtudlo sa ila kaugalingon, dapat kita padayon nga ‘magpatudlo kay Jehova.’ (Isaias 54:13) Si Isaias nagsulat: “Ang imo mga mata magatan-aw sa imo Dakung Manunudlo. Kag ang imo mga igdulungog magapamati sang pulong sa likod nimo nga nagasiling: ‘Ini amo ang dalan. Lakat kamo sa sini,’ kon magliso kamo sa tuo nga kamot ukon magliso kamo sa wala.” (Isaias 30:​20, 21) Paagi sa padayon nga paglakat sa dalanon ni Jehova kag sa pagbulig sa iban nga himuon ini, matigayon naton ang pinasahi nga pribilehiyo nga makatuon gikan sa aton Dakung Instruktor sa walay katubtuban.

[Piktyur sa pahina 28]

Ginpamangkot ni Jehova si Job: “Tungod bala sa imo sugo nga ang agila nagapaibabaw kag nagahimo sang iya mga pugad sa mataas?”

[Piktyur sa pahina 28]

Paagi sa tanom nga tangantangan, gintudluan ni Jehova si Jonas nga mangin mas mabinalak-on sa mga tawo