Mga Pamangkot Gikan sa mga Bumalasa

◼ Natapos bala ang Kasuguan nga katipan sang mapatay si Jesus sa usok, kag san-o ini gin-islan sang bag-ong katipan?

Madamo ang nagpamangkot sining mga pamangkot, nga ginadumdom ang tatlo ka hitabo: ang pagtagumatayon ni Jesus sa usok sang pag-antos sang hapon sang Nisan 14, 33 C.⁠E., ang iya pagpresentar sang bili sang iya dugo nga kabuhi sa langit, kag ang iya pagbubo sing balaan nga espiritu sang adlaw sang Pentecostes 33 C.⁠E. Sing Makasulatanhon, ang Kasuguan nga katipan natapos kag gin-islan sang bag-ong katipan sang Pentecostes. Tan-awon naton kon ngaa subong sini.

Gintagna ni Jehova nga, sa ulihi, islan niya ang Kasuguan nga katipan sing “bag-ong katipan” nga magatugot sa pagpatawad sing bug-os sa sala, nga indi posible sa idalom sang Kasuguan. (Jeremias 31:​31-34) San-o matabo ina nga pag-ilis?

Ang daan nga katipan, ang Kasuguan nga katipan, dapat anay dulaon subong nakatuman na sang iya katuyuan. (Galacia 3:​19, 24, 25) Si apostol Pablo nagsulat: “Ginpatawad niya [Dios] kita sang tanan naton nga paglapas kag ginpanas niya ang mando nga batok sa aton, nga ginahuman sang kasuguan nga batok sa aton; kag ginkuha Niya ini paagi sa paglansang sini sa usok sang pag-antos.” (Colosas 2:​13, 14) Nagakahulugan bala ina nga sang tion nga napatay si Jesus, ang Kasuguan nga katipan gin-islan sang bag-ong katipan?

Indi, kay ang ba-ong katipan sugdan paagi sa dugo sang nagakaigo nga halad kag upod sa isa ka bag-ong pungsod, ang espirituwal nga Israel. (Hebreo 8:​5, 6; 9:​15-22) Si Jesus ginbanhaw sang Nisan 16, kag 40 ka adlaw sang ulihi nagkayab sia sa langit. (Binuhatan 1:​3-9) Napulo ka adlaw sa tapos sang iya pagkayab, ukon sang adlaw sang Pentecostes, ginbubo ni Jesus sa iya mga disipulo “ang ginsaad nga balaan nga espiritu” nga nabaton niya gikan sa iya Amay, kag nagluntad ang espirituwal nga Israel. (Binuhatan 2:33) Paagi sa Manugpatunga, nga si Jesucristo, ang Dios naghimo sing bag-ong katipan upod sa espirituwal nga Israel.

Bangod sining nagainangot nga mga butang, sa anong tion gin-islan sang bag-ong katipan ang Kasuguan nga katipan?

Ang isa indi makasiling nga ang Kasuguan natapos sang mapatay si Jesus. Sa sulod sang 40 ka adlaw sa tapos si Jesus ginbanhaw sa espiritu nga kabuhi apang nagpabilin pa sa duta, ang iya mga disipulo nagatuman pa sa Kasuguan. Dugang pa, ang importante nga bahin sang Kasuguan amo ang pagsulod sang mataas nga saserdote sa Labing Balaan sing kis-a kada tuig. Naglaragway ina sa pagkabanhaw ni Jesus padulong sa langit. Didto, sa atubangan sang Dios, iya, subong Manugpatunga sang bag-ong katipan, ginpresentar ang bili sang iya gawad nga halad. (Hebreo 9:​23, 24) Nagbukas ini sang dalan agod ang bag-ong katipan sugdan sa katumanan sang Jeremias 31:​31-34.

Ang bag-ong katipan nagpanghikot sang naghikot si Jehova sa iya pagbaton sa gawad nga halad. Ginbubo niya ang iya balaan nga espiritu sa matutom nga mga disipulo ni Jesus agod paluntaron ang isa ka bag-ong pungsod, ang espirituwal nga Israel, nga ginatapuan sang mga yara sa katipan para sa Ginharian. (Lucas 22:​29; Binuhatan 2:​1-4) Nagpakita ini nga ginpanas sang Dios ang Kasuguan nga katipan, kag sa malaragwayon nga paagi ginlansang ini sa usok nga namatyan ni Jesus. Gani ang Kasuguan nga katipan natapos sang ang pagpanghikot, ukon pagsugod, sang bag-ong katipan natabo sa pagkabun-ag sang bag-ong pungsod, ang espirituwal nga Israel, sang Pentecostes 33 C.⁠E.​—⁠Hebreo 7:​12; 8:​1, 2.

Dugang sa sinang una nga sabat sa pamangkot, matalupangdan naton nga ang Dios wala magtalikod sing bug-os gikan sa kinaugali nga Israel sang matapos ang Kasuguan nga katipan kag sa dayag nga pagsugod sang bag-ong katipan sang Pentecostes 33 C.⁠E. Halimbawa, nahisuno sa Abrahamiko nga katipan, nagpakita si Jehova sing pinasahi nga kahamuot sa mga Judiyo, mga proselita, kag mga Samariahanon sa tion sang ika-70 nga “semana” nga natapos sang 36 C.⁠E. (Genesis 12:​1-3; 15:​18; 22:​18; Daniel 9:27; Binuhatan 10:​9-28, 44-48) Madugaydugay pa antes ang pila sang hinaplas nga Judiyong mga Cristiano nakapasibu sa kamatuoran nga sa tapos sang 33 C.⁠E. indi na kinahanglanon nga tumanon ang Kasuguan; makita naton ini gikan sa pamangkot nga gindala sa nagadumala nga hubon sang 49 C.⁠E. (Binuhatan 15:​1, 2) Ang bug-os nga pagsikway sa Kasuguan indi mapanghiwala nga napamatud-an sang 70 C.⁠E., sang ang templo kag ang rekord sang mga kaliwatan nga may kaangtanan sa Kasuguan nadula, sang ginlaglag sang mga Romano.​—⁠Mateo 23:⁠38.

[Picture Credit Line sa pahina 31]

Pictorial Archive (Near Eastern History) Est.