Adlaw-adlaw Ka Bala Nagapamangkot, “Diin si Jehova?”

1, 2. (a) Ano ang kahimtangan sa espirituwal sang mga Judiyo sang panahon ni Jeremias? (b) Ano kuntani ang himuon sang mga Judiyo sa ila kahimtangan?

NAGAHIBI si Jeremias. Naapektuhan gid sia sa kahimtangan sang iya katawhan kag sa ginpatagna sa iya sang Dios nga matabo sa ila. Gusto niya nga mangin tuburan sang luha ang iya mga mata para indi na sia mag-untat sa paghibi. May rason gid sia nga magkasubo. (Jer. 9:1-3; basaha ang Jeremias 8:20, 21.) Ginsikway sang mga Judiyo ang kasuguan sang Dios kag wala namati kay Jehova, gani laglagon gid sila.—Jer. 6:19; 9:13.

² Pero ang mga Judiyo nanamian mamati sa ila mga lider sang relihion nga nagasiling nga wala sing problema, kag indi gid sila interesado sa pagtamod ni Jehova sa ila ginahimo. (Jer. 5:31; 6:14) Kaangay sila sang mga pasyente nga nagapakonsulta sa doktor nga nagasugid lang sang maayo nga mga butang kag nagabalewala sang mga sintomas. Kon grabe ang imo ginabatyag, indi bala nga gusto mo sugiran ka sing eksakto sang doktor para mabulong ka gilayon? Ang mga Judiyo sang panahon ni Jeremias dapat magtinguha nga mahibaluan ang ila matuod nga kahimtangan sa espirituwal. Kuntani namangkot sila: “Diin si Jehova?”—Jer. 2:6, 8.

 3. (a) Paano kuntani ginsabat sang mga Judiyo ang pamangkot nga, “Diin si Jehova?” (b) Ano ang himuon sang mga Judiyo sa pagpangita kay Jehova?

³ Ang pagpamangkot sang mga Judiyo, “Diin si Jehova?” nagapahangop nga mangayo sila sing giya sa Dios sa ila mga desisyon, dalagku man ini ukon magagmay. Wala nila ini ginhimo sadto. Pero pagkatapos sang pagkahapay sang Jerusalem kag pagbalik nila gikan sa Babilonia, kinahanglan nila ‘pangitaon si Jehova.’ Kon himuon nila ini, masapwan nila sia kag mahibaluan ang iya mga dalanon. (Basaha ang Jeremias 29:13, 14.) Paano? Ang isa ka paagi amo ang sinsero nga pangamuyo sa Dios, nga nagapangayo sang iya panuytoy. Amo ini ang ginhimo ni Hari David. Nangabay sia sa Dios: “Ipakita sa akon ang imo mga dalanon, O Jehova; tudlui ako sang imo mga banas.” (Sal. 25:4) Talupangda ang pangagda sang Manugpamati sang pangamuyo paagi kay Jeremias sang ikanapulo ka tuig nga paghari ni Sedequias. “Magpanawag ka sa akon, kag magasabat ako sa imo kag sugiran ko ikaw sing makatilingala kag indi mahangpan nga mga butang nga wala mo mahibaluan.” (Jer. 33:3) Kon ang hari kag ang rebelyuso nga pungsod magpanawag sa Dios, ipahayag Niya ang mga butang nga ‘indi nila mahangpan,’ ang kalaglagan sang Jerusalem kag ang pagpasag-uli sini pagligad sang 70 ka tuig.

4, 5. Ano ang iban pa nga paagi nga mapangita sang mga Judiyo si Jehova?

⁴ Dapat man pangitaon sang mga Judiyo si Jehova paagi sa pag-usisa sa kasaysayan sang ila pungsod kag kon paano Sia nakig-angot sa ila. Paagi sini, mahibaluan nila kon ano ang ginakahamut-an kag ginakaugtan sang Dios. Yara sa ila ang sinulatan ni Moises, pila ka inspirado nga rekord, kag rekord sang kasaysayan sang mga hari sang Israel kag Juda. Paagi sa pagpamalandong sa sini kag pagpamati sa matuod nga mga manalagna sang Dios, ang mga Judiyo sang panahon ni Jeremias makakita sing sabat sa pamangkot nga, “Diin si Jehova?”

⁵ Ang ikatlo nga paagi sa pagpangita sang mga Judiyo kay Jehova amo ang pagtuon sa ila personal nga mga eksperiensia kag sang iban. Buot silingon, indi lang sila makatuon sa ila kasaypanan, kundi makabenepisyo man sila paagi sa pagbinagbinag sang ila mga hinimuan kag kon ano ang pagtamod ni Jehova sa sini. Kon mapanilagon sila, mahangpan nila ang pagtamod sang Dios sa ila paggawi.—Hulu. 17:10.

 6. Paano ka napalig-on sang halimbawa ni Job?

⁶ Ano ang aton matun-an sa sini? Kon nagadesisyon ka, pirme ka bala nagapamangkot, “Diin si Jehova?” Natalupangdan sang pila nga talagsa na lang nila ini ginahimo. Kon nagakatabo ini sa imo, indi maluyahan sing buot. Natabo man ini sa matutom nga si Job. Sang grabe na ang pag-ipit sa iya, nangin maiyaiyahon sia. Ginpahanumdom sia ni Elihu sang kinaandan nga huyog sang mga tawo: “Wala sing nagsiling, ‘Diin na ang Dios nga akon Daku nga Manunuga?’” (Job 35:10) Ginpalig-on sia ni Elihu: “Pamalandungi ang makatilingala nga mga binuhatan sang Dios.” (Job 37:14) Dapat obserbahan ni Job ang makatilingala nga mga tinuga ni Jehova sa iya palibot kag ang pagpakig-angot sang Dios sa katawhan. Paagi sa iya eksperiensia, nahangpan ni Job ang dalanon ni Jehova. Pagkatapos sang iya pag-antos kag sang nakita niya ang pagpanghikot ni Jehova, nakasiling sia: “Matuod nga nagahambal ako sang mga butang nga wala ko mahangpan, mga butang nga tuman ka makatilingala sa akon. Sang una nabatian ko lang sa iban ang tuhoy sa imo, apang karon nakita ko na mismo ikaw.”—Job 42:3, 5.

 7. Subong sang ginapakita sa pahina 116, ano ang aton masunod nga binagbinagon?

⁷ Sa bahin ni Jeremias, padayon niya nga ginpangita si Jehova kag nasapwan niya Sia. Indi sia kaangay sang mga Judiyo. Sa iya dinekada nga pag-alagad pirme sia nagapamangkot: “Diin si Jehova?” Sa masunod nga mga parapo, matun-an naton sa halimbawa ni Jeremias kon paano pangitaon si Jehova kag kon paano makabulig ang pangamuyo, pagtuon, kag personal nga mga eksperiensia.—1 Cron. 28:9.

 8. Sa ano nga mga kahimtangan nangamuyo si Jeremias sa Dios?

⁸ Sa mga tinuig nga nangin humalambal sang Dios si Jeremias sa Juda, ginpangita niya si Jehova paagi sa tinagipusuon nga pangamuyo. Nangayo sia sing bulig sa Dios sang ipahayag niya ang indi maayo nga mensahe, sang nagbatyag sia nga indi na niya ini masarangan, kag sang nagpalibog sia kon ngaa nagakatabo ang pila ka butang. Ginsabat sia sang Dios kag gintuytuyan kon paano sia makapadayon. Binagbinaga ang pila ka halimbawa.

 9. (a) Ano ang ginpabutyag ni Jeremias sa Jeremias 15:15, 16, kag ano ang sabat ni Jehova? (b) Ngaa importante nga ipabutyag ang imo balatyagon sa pangamuyo?

⁹ Sang nagtagna si Jeremias sing paghukom, nagbatyag sia nga akig ang tanan sa iya. Gani nangamuyo sia sa Dios nga dumdumon sia. Binagbinaga ang iya pangamuyo sa Jeremias 15:15, 16, diin ginpabutyag niya ang iya balatyagon sa sabat sang Dios. (Basaha.) Sa sina nga pangamuyo, ginsugid ni Jeremias ang iya kabalaka. Pero, sang nakita niya ang pulong sang Dios kag malaragwayon nga ginkaon ini, nangin malipayon sia! Ginbuligan sia ni Jehova nga mapabaloran ang pribilehiyo sa pagdala sa ngalan sang Dios kag pagpahayag sang iya mensahe. Maathag nga nakita ni Jeremias kon sa diin si Jehova sa sini nga kahimtangan. Ano ang aton matun-an sa sini?

10. Ano ang sabat sang Dios sang nagsiling ang manalagna nga indi na sia maghambal sa ngalan ni Jehova?

¹⁰ Ginbunal si Jeremias sang saserdote nga si Pasur nga anak ni Imer. Pagkatapos sini, nagsiling si Jeremias nga indi na gid sia maghambal sa ngalan ni Jehova. Paano ginsabat sang Dios ang iya pangamuyo? (Basaha ang Jeremias 20:8, 9.) Wala nagsiling ang Biblia nga nakigsugilanon ang Dios sa iya gikan sa langit. Pero daw kalayo nga nagadabdab sa iya mga tul-an ang pulong sang Dios, kag indi niya mapunggan ang pagpahayag sini. Paagi sa iya tinagipusuon nga pangamuyo kag pagtugot nga pahulagon sia sang iya ihibalo sa kabubut-on sang Dios, napalig-on si Jeremias nga sundon kon ano ang ginpahimo sa iya.

11, 12. Paano nasabat ang pamangkot ni Jeremias kon ngaa daw nagamadinalag-on ang mga malaut?

¹¹ Natublag si Jeremias sang nakita niya nga nagamadinalag-on ang mga malaut. (Basaha ang Jeremias 12:1, 3.) Wala niya ginduhaduhaan ang pagkamatarong ni Jehova, pero gusto niya masabat ang iya ‘sumbong.’ Ang iya pagkaprangka nagapakita nga maayo ang iya kaangtanan sa Dios, pareho sang bata sa iya hinigugma nga amay. Wala nahangpan ni Jeremias kon ngaa nagauswag ang mga Judiyo bisan pa malaut sila. Nasabat bala ang iya pamangkot? Ginpasalig sia ni Jehova nga gabuton Niya ang mga malauton. (Jer. 12:14) Nakita ni Jeremias nga amat-amat nga nasabat ang iya pamangkot, kag nagdalom ang iya pagsalig sa hustisya sang Dios. Gani, pirme pa gid nagapangamuyo si Jeremias para isugid sa iya Amay ang iya mga kabalaka.

¹² Sa hingapusan sang paghari ni Sedequias, ginsalakay sang mga Babilonianhon ang Jerusalem. Ginpatuhuyan ni Jeremias si Jehova subong Isa nga ‘makakita sang tanan nga dalanon sang mga anak sang mga tawo, agod mabalusan ang kada isa suno sa iya mga dalanon kag suno sa iya binuhatan.’ (Jer. 32:19) Nakita ni Jeremias nga si Jehova Dios sang hustisya, kag nagatan-aw sa ginahimo sang tagsa niya ka alagad kag nagapamati sa ila hanuot nga mga pangamuyo. Gani makita pa gid nila ang mga ebidensia nga ginabalusan Niya “ang kada isa suno sa iya mga dalanon kag suno sa iya binuhatan.”

13. Ngaa makasalig ka nga tumanon sang Dios ang iya kabubut-on?

¹³ Mahimo wala kita nagaduhaduha sa hustisya sang Dios kag sa iya kaalam sa pagtuman sang iya kabubut-on. Pero, makabenepisyo kita sa pagbinagbinag sa naagyan ni Jeremias kag pagsugid sang aton balatyagon sa pangamuyo. Magapabakod ini sang aton pagsalig kay Jehova nga tumanon niya ang iya kabubut-on. Bisan pa indi naton bug-os nga mahangpan ang mga nagakatabo subong, ukon daw natak-an kita sa paghulat sa pagtuman sang Dios sa iya kabubut-on, mapabutyag naton sa pangamuyo ang aton pagsalig nga kontrolado niya ang tanan. Matuman ang iya kabubut-on suno sa iya pamaagi kag sa pinakamaayo nga tion. Masaligan gid ini kag wala gid kita sing rason nga magduhaduha. Padayunon naton ang pagpamangkot, “Diin si Jehova?” paagi sa pagpangamuyo nga mahangpan naton ang iya kabubut-on kag makita ang katumanan sini.—Job 36:5-7, 26.

14. Paano naton nahibaluan nga nanalawsaw si Jeremias sa kasaysayan sang katawhan sang Dios?

¹⁴ Nahibaluan ni Jeremias nga ang pamangkot nga, “Diin si Jehova?” nagadalahig sa ‘pagkilala kay Jehova.’ (Jer. 9:24) Gintun-an niya ang kasaysayan sang katawhan sang Dios samtang ginasulat niya ang tulun-an sang 1 kag 2 Hari. Espesipiko niya nga ginsambit ang “libro sang mga binuhatan ni Solomon,” “libro sang kasaysayan sang mga hari sang Israel,” kag “libro sang kasaysayan sang mga hari sang Juda.” (1 Hari 11:41; 14:19; 15:7) Gani nahangpan niya ang pagpanghikot ni Jehova sa nanuhaytuhay nga kahimtangan. Nahibaluan niya ang nahamut-an ni Jehova kag ang Iya pagtamod sa mga desisyon sang mga tawo. Nausisa man niya ang inspirado nga mga sinulatan nga matigayon sadto, subong sang mga sinulatan nanday Moises, Josue, Samuel, David, kag Solomon. May ihibalo gid sia parte sa mga manalagna sang una kag sa iya kontemporaryo nga mga manalagna. Paano nakabenepisyo si Jeremias sa iya personal nga pagtuon?

15. Ano ang benepisyo kay Jeremias sa iya pagpanalawsaw sa tagna ni Elias?

¹⁵ Ginrekord ni Jeremias ang kasaysayan parte kay Jezebel, ang malaut nga asawa ni Hari Ahab sang Samaria. Nalakip sa sini ang gintagna ni Elias nga kaunon sang mga ido si Jezebel sa latagon sang Jezreel. (1 Hari 21:23) Kag suno sa ginrekord ni Jeremias, pagligad sang 18 ka tuig, ginhulog sa bintana si Jezebel, gintapakan sang kabayo ni Jehu, kag ginkaon sang mga ido. (2 Hari 9:31-37) Ang pagpanalawsaw ni Jeremias sa tagna ni Elias kag sa katumanan sini, lakip ang mga detalye sini, nagpabakod sang iya pagtuo sa pulong sang Dios. Nakapadayon sia subong manalagna bangod sang iya pagtuo nga napabakod sang iya pagtuon sa mga ginhimo ni Jehova antes sang iya panahon.

16, 17. Ngaa nakapadayon si Jeremias sa pagpaandam sa malaut nga mga hari sang iya panahon?

¹⁶ Binagbinagon naton ang isa pa ka halimbawa. Sa banta mo, ngaa nakapadayon si Jeremias sa pagpaandam sa malaut nga mga hari nga sanday Jehoiakim kag Sedequias, bisan pa ginhingabot sia? Ang panguna nga rason amo nga ginhimo sia ni Jehova nga “isa ka siudad nga may pamakod kag isa ka haligi nga salsalon kag pader nga saway” sa atubangan sang mga hari sang Juda. (Jer. 1:18, 19) Pero dumdumon naton nga maid-id man nga nagpanalawsaw si Jeremias sa paggahom sang nauna nga mga hari sang Juda kag Israel. Ginrekord niya nga naghimo si Manases sing “mga halaran sa duha ka luwang sang balay ni Jehova para sa tanan nga butang sa langit,” naghalad sang iya bata sa kalayo, kag nagpatay sang madamo nga inosente. (2 Hari 21:1-7, 16; basaha ang Jeremias 15:4.) Nahibaluan ni Jeremias nga sang nagpaubos si Manases kag padayon nga nangamuyo kay Jehova, “ginpamatian Niya ang iya pakiluoy,” kag ginbalik sia ni Jehova subong hari.—Basaha ang 2 Cronica 33:12, 13.

¹⁷ Sa iya mga sinulatan, wala ginsambit ni Jeremias ang kaluoy ni Jehova kay Manases. Pero mga 15 ka tuig ukon kapin pa lang nga napatay si Manases sang ginsugdan ni Jeremias ang iya pagpanagna. Gani nabatian gid niya ang natabo sang naghinulsol ang hari. Ang pagpanalawsaw parte sa grabe nga kalautan kag paghinulsol ni Manases nakabulig kay Jeremias para mahangpan ang kapuslanan sang pagpalig-on sa mga hari, subong ni Sedequias, nga pangitaon ang kaluoy kag kaayo ni Jehova. Bisan ang hari nga debotado sa pagsimba sa idolo kag manugpatay sang mga tawo naghinulsol kag ginpatawad. Kon ikaw si Jeremias, mapalig-on ka bala sang natabo kay Manases kag magpadayon bisan pa malaut nga mga hari ang nagagahom?

18. Ano ang natun-an ni Jeremias kay Urija, kag ngaa amo sina ang imo sabat?

¹⁸ Bilang manalagna, nakatuon man si Jeremias sa iya mga kontemporaryo. Ang isa amo si manalagna Urija, nga nagpanagna batok sa Jerusalem kag Juda sa tion sang paggahom ni Jehoiakim. Pero bangod sa kahadlok kay Hari Jehoiakim, nalagyo si Urija pa Egipto. Gani nagpadala ang hari sing mga tinawo para kuhaon si Urija sa Egipto, kag ginpapatay sia. (Jer. 26:20-23) Nakatuon bala si Jeremias sa natabo kay Urija? Ang katunayan nga padayon nga ginpaandaman ni Jeremias ang mga Judiyo sa nagahilapit nga kalaglagan, nga nagpanagna bisan sa templo, nagpamatuod nga nakatuon sia sa sini. Nahuptan ni Jeremias ang iya kaisog, kag wala sia ginbiyaan ni Jehova. Ginpahulag sang Dios si Ahikam, nga anak ni Safan, para proteksionan si Jeremias.—Jer. 26:24.

19. Ano ang natun-an ni Jeremias sa padayon nga pagpadala ni Jehova sing mga manalagna sa Iya katawhan?

¹⁹ Nakatuon man si Jeremias sa paggamit sa iya ni Jehova para paandaman ang Iya katawhan. Sang ikap-at nga tuig ni Hari Jehoiakim, ginsilingan ni Jehova si Jeremias nga isulat ang tanan nga ginhambal Niya sugod sa adlaw ni Josias asta sa sina nga panahon. Ngaa ginpasulat ini sang Dios? Para palig-unon ang mga indibiduwal nga biyaan ang ila malain nga mga binuhatan kag patawaron. (Basaha ang Jeremias 36:1-3.) Aga pa nagabangon si Jeremias para ipalab-ot ang paandam sang Dios, nga nagapangabay pa gani sa katawhan nga untatan ang ila makangilil-ad nga mga binuhatan. (Jer. 44:4) Nangin maathag kay Jeremias sa iya mismo eksperiensia nga ginpadala sang Dios ang iya mga manalagna bangod sa kaluoy sa Iya katawhan. Kag indi ayhan nga amo ini ang nagtudlo sa iya nga mangin maluluy-on man? (2 Cron. 36:15) Amo kon ngaa sang nakalampuwas si Jeremias sa kalaglagan sang Jerusalem, nakasiling sia: “Wala kita malaglag tungod sa kaayo ni Jehova, bangod ang iya kaluoy wala sing katapusan. Bag-o ini kada aga.”—Pan. 3:22, 23.

20. Paano mo mailog si Jeremias sa pagpangita kay Jehova?

²⁰ Sa imo mga desisyon kada adlaw, ginahibalo mo bala ang kabubut-on sang Dios kag nagapamangkot, “Diin si Jehova?” (Jer. 2:6-8) Indi pareho sa mga Judiyo sang panahon niya, pirme nagapangayo si Jeremias sing bulig kay Jehova para makadesisyon sing maayo. Ilugon naton si Jeremias paagi sa pagpangita kay Jehova kada adlaw kon nagadesisyon.

21. Ano nga sahi sang pangamuyo ang makabulig sa imo pagbantala, halimbawa kon akigan ka sang tagbalay?

²¹ Ang mga desisyon indi man gid tanan parte sa dalagku nga mga butang ukon nagadalahig sang kabuhi. Halimbawa, iskedyul mo nga maggua sa latagon pagkaaga. Ayhan pagbugtaw mo, nakita mo nga nagagal-um, kag daw indi maayo nga magua. Ang inyo teritoryo sa sina nga adlaw mahimo nga pirme na natuptupan. Ayhan madumduman mo nga gin-akigan ka kag gintabog sang pila ka tagbalay dira. Sa sina nga aga, mahimo ka mamangkot sa pangamuyo, “Diin si Jehova?” Makabulig ini sa imo nga mahunahuna ang katahom sang imo mensahe kag mabatyagan pa gid nga kabubut-on sang Dios nga ipahayag ina nga mensahe. Nian pareho kay Jeremias, mabatyagan mo man ang kalipay bangod sa pulong ni Jehova. (Jer. 15:16, 20) Kon nagapamalaybalay ka na kag may magmulay ukon mamahog sa imo, mahimo ka liwat makapangamuyo sa Dios. Himuon mo bala ina? Dumduma nga mahatag niya sa imo ang balaan nga espiritu para makasabat ka sing nagakaigo, kag makapadayon sa pagsugid sang mensahe sang Dios.—Luc. 12:11, 12.

22. Ngaa mahimo mabalabagan ang pila ka pangamuyo?

²² Dumdumon naton nga ang pila ka pangamuyo maupangan ukon mabalabagan. (Basaha ang Panalambiton 3:44.) Wala ginapamatian ni Jehova ang mga pangamuyo sang rebelyuso nga mga Judiyo bangod ‘wala sila nagpamati sa iya’ kag nagpadayon sa ila pagkamalinapason. (Hulu. 28:9) May natun-an si Jeremias nga dapat man naton matun-an: Kon indi kita manghikot nahisuno sa aton mga pangamuyo, maakig ang Dios sa aton kag indi niya kita pagpamatian. Kabay pa nga indi gid naton ini paghimuon.

23, 24. (a) Ano ang dapat naton himuon para mahibaluan ang kabubut-on ni Jehova? (b) Paano mangin mas mapuslanon ang imo personal nga pagtuon?

²³ Dugang pa sa sinsero nga pangamuyo para sa panuytoy ni Jehova amo ang padayon nga pagtuon sing personal, kay paagi sa sini matun-an naton ang kabubut-on ni Jehova. May bentaha kita sangsa kay Jeremias kay matigayon na naton ang kompleto nga Biblia. Apang, kaangay ni Jeremias nga nanalawsaw gid para matipon ang inspirado nga mga kasaysayan, mausisa mo man ang Pulong sang Dios kag makapangabay sang iya panuytoy nga nagapamangkot, “Diin si Jehova?” Paagi sa pagtinguha nga matun-an ang iya kabubut-on, nagasalig ka sa iya, kag mangin “kaangay [ka] sang kahoy nga natanom malapit sa katubigan nga ang iya mga gamot nagapangalapkap sa tubig.”—Basaha ang Jeremias 17:5-8.

²⁴ Samtang ginabasa kag ginapamalandungan mo ang Biblia, hangpa kon ano ang luyag ni Jehova nga himuon mo sa nanuhaytuhay nga sitwasyon. Makapangita ka sing mga prinsipio nga gusto mo dumdumon kag iaplikar. Samtang ginabasa mo ang mga kasaysayan, mga sugo sang Dios, diosnon nga mga prinsipio, kag maalamon nga mga pinamulong sa Biblia, binagbinaga kon paano ini makaimpluwensia sa imo matag-adlaw nga mga desisyon. Bilang sabat sa imo pamangkot nga, “Diin si Jehova?” ipakita niya sa imo paagi sa Biblia kon paano atubangon bisan ang mabudlay gid nga mga sitwasyon. Matukiban mo sa Biblia ang “indi mahangpan nga mga butang nga wala mo mahibaluan” ukon ang pila ka kasanag!—Jer. 33:3.

25, 26. Ngaa makabenepisyo kita sa mga eksperiensia?

²⁵ Isa pa, mahimo mo pamalandungan ang imo mga eksperiensia kag ang iya sang iban. Halimbawa, mabasa mo nga ang iban nag-untat sa pagsalig kay Jehova, pareho kay Urija. (2 Tim. 4:10) Makatuon ka sa ila ginhimo kag malikawan ang malain nga natabo sa ila. Hunahunaa pirme ang kaayo ni Jehova sa imo, nga nagadumdom nga naapresyar man ni Jeremias ang kaluoy sang Dios. Ano man kabudlay sang imo sitwasyon, indi gid maghunahuna nga wala ka ginaatipan sang Labing Mataas. Ginaatipan ka niya kaangay sang iya pag-atipan kay Jeremias.

²⁶ Samtang ginapamalandungan mo ang pagpakig-angot ni Jehova sa mga indibiduwal subong, marealisar mo nga nagaaman sia sing panuytoy sa nanuhaytuhay nga paagi. Ang isa ka pamatan-on nga utod nga babayi sa Japan nga si Aki nagbatyag nga indi sia takus nga mangin Cristiano. Isa ka adlaw samtang nagabantala sia upod sa asawa sang manugtatap sang sirkito, nagsiling si Aki: “Pamatyag ko, daw ibuga na ako ni Jehova, pero nagakabit ako sa iya bibig, nga nagapangabay nga hatagan pa niya ako sing gamay nga tion.” Gintulok sia sa mata sang asawa sang manugtatap sang sirkito kag nagsiling: “Wala ko gid ginahunahuna nga maalabaab ka nga Cristiano!” Ginhunahuna sing maayo ni Aki ini nga komento. Ang matuod, wala gid sing palatandaan nga maalabaab ang pagtamod ni Jehova sa iya. Gani, nangamuyo si Aki: “Ipadala ako kon diin mo gusto. Himuon ko kon ano ang gusto mo nga himuon ko.” Sa sina nga tion, nagkadto sia sa iban nga pungsod sa diin may gamay nga grupo sang mga Japanese nga nagakinahanglan sing isa nga makahibalo sang lenguahe kag makaalagad upod sa ila. Diri natawo si Aki, amo nga mahapos lang sa iya ang pagsaylo diri para magbulig. Pero sa diin sia maistar? Ginpaistar sia sang isa ka utod nga ang bata bag-o lang nagbalhin sing balay. “Daw puzzle lang ini nga naplastar sa husto nga posisyon. Ginbuligan gid ako ni Jehova,” siling ni Aki.

27. Ngaa dapat ka mapabakod sang pamangkot nga, “Diin si Jehova?”

²⁷ Nabatyagan gid sang madamo nga utod ang panuytoy sang Dios, ayhan sa tion sang ila pagbasa sing Biblia kag personal nga pagtuon. Mahimo nga naeksperiensiahan mo man ini. Dapat gid ini magpabakod sang imo kaangtanan kay Jehova kag magpahulag sa imo nga mangamuyo sa iya sing masunson kag hanuot. Saligi nga kon adlaw-adlaw kita nagapamangkot, “Diin si Jehova?” ipakita niya sa aton ang iya dalanon.—Isa. 30:21.