Ang Kabuhi kag Ministeryo ni Jesus

Ang Labing Bantog nga Wali nga Nahatag

ANG danyag amo ang isa sang labing halandumon sa maragtas sang Biblia: Si Jesus nagalingkod sa kiliran sang bukid, nga nagahatag sang iya bantog nga Wali sa Bukid. Ang lugar malapit sa Dagat sang Galilea, ayhan malapit sa Capernaum. Bilog nga gab-i nga nangamuyo si Jesus sa Dios, kag pagkaaga ginpili niya ang 12 sa iya mga disipulo nga mangin mga apostoles. Nian, kaupod nila tanan, nagpanaug sia sa duog nga matapan sang bukid.

Sa sini nga tion, ayhan magahunahuna ka, si Jesus kapoy na kaayo kag maluyag magtulog. Apang nag-abot ang dakung kadam-an, ang iban halin pa sa Judea kag Jerusalem, 60 tubtob 70 ka milya (100 tubtob 110 km) kalayo. Ang iban naghalin pa sa baybayon sang Tiro kag Sidon pakadto sa aminhan. Nagpalapit sila kay Jesus agod ayuhon ang ila balatian. May mga tawo pa gani nga ginatublag sang mga demonyo.

Sang magpanaug si Jesus, ang mga masakiton nagpalapit sa pagtandog sa iya kag nag-ayo sa ila tanan. Pagkatapos sina, si Jesus nagsaka sa mas mataas nga lugar sang bukid. Didto naglingkod sia kag nagsugod sa pagtudlo sa kadam-an nga yara sa duog nga matapan sa atubangan niya. Kag hunahunaa ina! Sa karon wala sing bisan isa ka tawo sa bug-os nga tumalambong nga nagamasakit sing grabe!

Ang mga tawo nalangkag sa pagpamati sa manunudlo nga makahimo sining makatilingala nga mga milagro. Apang, ginhatag ni Jesus ang iya wali una para sa kaayohan sang iya mga disipulo, nga ayhan natipon malapit pa gid sa iya. Apang agod makabenepisyo man kita, ginrekord ini nanday Mateo kag Lucas.

Ang kasaysayan ni Mateo nahanungod sa wali mga apat ka beses ang kalabaon sang sa iya ni Lucas. Dugang pa, ang mga bahin nga ginrekord ni Mateo, ginpresentar ni Lucas subong ginsiling ni Jesus sa lain pa nga tion sang iya ministeryo, subong sang matalupangdan kon ipaanggid ang Mateo 6:9-13 sa Lucas 11:1-4, kag ang Mateo 6:25-34 sa Lucas 12:22-31. Apang indi ini dapat makakilibot. Maathag nga gintudlo ni Jesus ang amo gihapon nga mga butang sing kapin sa makaisa, kag ginpakamaayo ni Lucas nga irekord ang iban sining mga panudlo sa lain nga danyag.

Indi lamang ang kadalom sang espirituwal sini nga mga kaundan ang nagahimo sa wali ni Jesus nga tuman ka hamili kundi ang kasimple kag kaathag nga pagpresentar sining mga kamatuoran. Nagkuha sia sa ordinaryo nga mga eksperiensia kag naggamit sing mga butang nga pamilyar sa mga tawo, sa amo nagahimo sang iya mga ideya nga madali mahangpan sang tanan nga nagapangita sing mas maayo nga kabuhi sa dalanon sang Dios. Sa amon masunod nga mga guwa usisaon naton ang pila ka butang nga ginsiling niya. Lucas 6:12-20; Mateo 5:1, 2.

◆ Diin ginhatag ang labing halandumon nga wali ni Jesus, sin-o ang nagtambong, kag ano ang natabo antes niya ini ginhatag?

◆ Ngaa indi makakilibot nga ginrekord ni Lucas ang pila ka panudlo sa wali sa lain nga danyag?

◆ Ano ang nagahimo sa wali ni Jesus nga tuman ka hamili?