“Sugiri Kami, San-o Bala Mahanabo Ini?”

“Ako nagapahayag sing mga butang nga bag-o. Sa wala pa sila magguwa, ginasugid ko sila sa inyo.”​—⁠ISAIAS 42:⁠9.

1, 2. (a) Ano ang ginpamangkot sang mga apostoles ni Jesus nahanungod sa palaabuton? (b) Paano natuman ang sabat ni Jesus nahanungod sa madamo sing bahin nga tanda?

ANG balaan nga panudlo nagahalin kay Jehova nga Dios, “ang Isa nga nagapahayag sang katapusan kutob sa ginsuguran.” (Isaias 46:10) Subong sang ginpakita sang nauna nga artikulo, ang mga apostoles nangabay sina nga panudlo gikan kay Jesus, nga namangkot sa iya: “Sugiri kami, San-o bala mahanabo ini, kag ano bala ang tanda kon ini tanan nga butang malapit na matuman?”​—⁠Marcos 13:⁠4.

² Bilang sabat, ginlaragway ni Jesus ang madamo sing bahin nga “tanda” nga nagalakip sang ebidensia nga magapamatuod nga malapit na matapos ang Judiyong sistema. Natuman ini sang nalaglag ang Jerusalem sang 70 C.E. Apang ang tagna ni Jesus may daku pa nga katumanan sa madamong tinuig sa palaabuton. Sang natapos ang “gintalana nga panag-on sang mga pungsod” sang 1914, ang tanda sa daku nga kasangkaron matigayon, nga nagapakita nga sa dili madugay ang karon malauton nga sistema pagatapuson sa “dakung kapipit-an.”⁠a (Lucas 21:24) Minilyon nga nagakabuhi karon ang makapamatuod nga ini nga tanda natuman sa kalibutanon nga mga inaway kag sa iban pa talalupangdon nga mga hitabo sining ika-20 nga siglo. Nagatanda man ini sang daku nga katumanan sang tagna ni Jesus, kay ining moderno nga katumanan ginlaragway sang kon ano ang natabo kutob sang 33 tubtob 70 C.E.

 3. Sa paghambal sang isa pa ka tanda, anong dugang nga mga hitabo ang gintagna ni Jesus?

³ Sa tapos nasambit ni Lucas ang gintalana nga panag-on sang mga pungsod, ang kaanggid nga mga kasaysayan nanday Mateo, Marcos, kag Lucas nagalaragway sang dugang pa nga mga serye sang mga hitabo nga nagalakip sang isa ka tanda dugang sa madamo sing bahin nga ‘tanda sang konklusion sang sistema sang mga butang.’ (Mateo 24:⁠3) (Sa pahina 15, ining punto sa kasaysayan gintandaan sa doble nga linya.) Si Mateo nagsiling: “Sa gilayon sa tapos sang kapipit-an sadtong mga adlaw ang adlaw padulmon, kag ang bulan indi maghatag sang iya kapawa, kag ang mga bituon magakalahulog gikan sa langit, kag ang mga kagamhanan sang mga langit uyugon. Kag nian magapahayag ang tanda sang Anak sang tawo sa langit, kag nian magakasubo ang tanan nga kabikahan sa duta, kag makita nila nga nagakari ang Anak sang tawo sa ibabaw sang mga panganod sa langit nga may gahom kag daku nga himaya. Kag magapadala sia sang iya mga anghel sa mabaskog nga tunog sang budyong, kag magatipon sila sang iya nga pinili gikan sa apat ka hangin, kutob sa isa ka ukbong sang langit tubtob sa isa.”​—⁠Mateo 24:​29-31.

Kapipit-an kag Pinasahi nga mga Hitabo sa Langit

 4. Anong mga pamangkot ang nagautwas nahanungod sa pinasahi nga mga hitabo sa langit nga ginsambit ni Jesus?

⁴ San-o ina matuman? Ang tatlo ka kasaysayan sang Ebanghelyo tanan nagasambit sang matawag naton nga pinasahi nga mga hitabo sa langit​—⁠ang adlaw kag bulan nagdulom kag ang mga bituon nagkalahulog. Si Jesus nagsiling nga magasunod ini sa “dakung kapipit-an.” Ginahunahuna bala ni Jesus ang kapipit-an nga natapos sang 70 C.E., ukon ginapatuhuyan bala niya ang dakung kapipit-an nga yara pa sa unahan sang aton moderno nga mga panahon?​—⁠Mateo 24:29; Marcos 13:⁠24.

 5. Ano anay ang pagpati nahanungod sa kapipit-an sa moderno nga mga tion?

⁵ Sugod sang natapos ang gintalana nga mga panag-on sang mga pungsod sang 1914, ang katawhan sang Dios nangin hanuot gid nga interesado sa “dakung kapipit-an.” (Bugna 7:14) Sa sulod sang mga tinuig naghunahuna sila nga ang modernong-adlaw nga kapipit-an may yara nahauna nga bahin nga katumbas sa panahon sang Inaway Kalibutanon I, nian nagaupang nga pal-at, kag sa ulihi katapusan nga bahin, “ang inaway sang dakung adlaw sang Dios nga Labing Gamhanan.” Kon amo sina, ano ang mahanabo sa ulot sang mga dekada sang “konklusion sang sistema”?​—⁠Bugna 16:14; Mateo 13:39; 24:3; 28:⁠20.

 6. Ano ang ginhunahuna nga magatuman sang tagna ni Jesus nahanungod sa pinasahi nga mga hitabo sa langit?

⁶ Ti, ginhunahuna nga sa tion sini nga pal-at ining madamo sing bahin nga tanda makita, lakip ang pagbantala nga hilikuton nga ginhimo sang gintipon nga katawhan sang Dios. Mahimo man nga ang gintagna nga pinasahi nga mga hitabo sa langit sarang mapaabot sa ulot sang pagkatapos sang una nga bahin sang 1914-18. (Mateo 24:29; Marcos 13:​24, 25; Lucas 21:25) Ang igtalupangod ginsentro sa literal nga mga butang sa langit​—⁠mga pag-usisa sa kahawaan, mga raket, mga kosmiko ukon gamma ray, kag pagkadto ukon pagbase sa bulan.

 7. Anong bag-o nga paghangop nahanungod sa dakung kapipit-an ang ginhatag?

⁷ Apang, gin-usisa liwat sang Enero 15, 1970 nga The Watchtower ang tagna ni Jesus, ilabi na ang nagapakari nga dakung kapipit-an. Ginpakita sini nga bangod sang natabo sang unang siglo, ang moderno nga kapipit-an indi mahimo nga may yara nahauna nga bahin sang 1914-18, ang dinekada kalawig nga pal-at, kag sang ulihi ang liwat nga pagpadayon. Yadto nga magasin naghinakop: “Ang ‘dakung kapipit-an’ nga ang subong wala pa mahanabo liwat yara pa sa unahan, kay nagakahulugan ini sang kalaglagan sang bug-os kalibutan nga emperyo sang butig nga relihion (lakip ang Cristiandad) sundan sang ‘inaway sang dakung adlaw sang Dios nga Labing Gamhanan’ sa Armagedon.

 8. Bangod sang bag-o nga pagtamod sa moderno nga kapipit-an, paano ginpaathag ang Mateo 24:⁠29?

⁸ Apang ang Mateo 24:29 nagasiling nga ang pinasahi nga mga hitabo sa langit natabo “sa gilayon sa tapos sang kapipit-an.” Paano ina natabo? Ang The Watchtower sang Mayo 1, 1975, nagpanugda nga “ang kapipit-an” diri nagakahulugan sang isa nga natapos sadto anay sang 70 C.E. Apang sa anong kahulugan masiling nga ang pinasahi nga mga hitabo sa langit sa aton panahon natabo “sa gilayon” pagkatapos sang hitabo sang 70 C.E.? Ginpangatarungan nga sa itululok sang Dios ang mga siglo sa ulot mangin malip-ot. (Roma 16:20; 2 Pedro 3:⁠8) Apang, ang madalom pa nga pag-usisa sini nga tagna, ilabi na sang Mateo 24:​29-31, nagatudlo sa daw tuhay nga paathag. Nagailustrar ini kon paano ang kapawa nagasilak “sing labi kag labi tubtob sa himpit nga adlaw.” (Hulubaton 4:​18, American Standard Version)⁠b Binagbinagon naton kon ngaa ang bag-o, ukon nagbalhin, nga paathag nagakaigo.

 9. Paano nagahatag sing impormasyon ang Hebreong Kasulatan para sa pinamulong ni Jesus nahanungod sa mga hitabo sa langit?

⁹ Ginhatag ni Jesus ang tagna tuhoy sa ‘pagdulom sang adlaw, indi paghatag sang bulan sang kapawa, kag pagkahulog sang mga bituon’ sa iya apat ka apostoles. Subong mga Judiyo, makilal-an nila ina nga pamulong gikan sa Hebreong Kasulatan, diin sa Sofonias 1:​15, halimbawa, ang tion sang paghukom sang Dios gintawag nga “adlaw sang kalaglagan kag kamingaw, adlaw sang kadudulman kag kaguom, adlaw sang mga gal-um kag pitipit nga kadudulman.” Ginlaragway man sang nanuhaytuhay nga Hebreong mga manalagna ang adlaw subong nga nagdulom, ang bulan nga wala nag-iwag, kag ang mga bituon nga wala naghatag sing kapawa. Masapwan ninyo ina nga pamulong sa mga mensahe sang Dios batok sa Babilonia, Edom, Egipto, kag sa aminhan nga ginharian sang Israel.​—⁠Isaias 13:​9, 10; 34:​4, 5; Jeremias 4:28; Ezequiel 32:​2, 6-8; Amos 5:20; 8:​2, 9.

 10, 11. (a) Ano ang gintagna ni Joel tuhoy sa mga butang sa mga langit? (b) Diin nga bahin sang tagna ni Joel ang natuman sang 33 C.E., kag diin ang wala?

¹⁰ Sang nabatian nila ang ginsiling ni Jesus, mahimo nga nadumduman ni Pedro kag sang tatlo pa ang tagna ni Joel nga makita sa Joel 2:​28-31 kag 3:15: “Ipasagahay ko ang akon espiritu sa tanan nga unod, kag magatagna ang inyo mga anak nga laki kag ang inyo mga anak nga babayi. . . . Magahatag ako sing mga katingalahan sa mga langit kag sa duta, dugo kag kalayo kag mga haligi nga aso. Ang adlaw magabaylo sa kadudulman, kag ang bulan sa dugo, sa wala pa mag-abot ang daku kag makakulugmat nga adlaw ni Jehova.” “Ang adlaw kag ang bulan nagadulom, kag ang kabituunan nagauntat ang ila pagsilak.”

¹¹ Subong sang ginsaysay sang Binuhatan 2:​1-4 kag 14-21, sang Pentecostes 33 C.E., ginpasagahay sang Dios ang balaan nga espiritu sa 120 ka disipulo, sa mga lalaki kag mga babayi. Ginpahibalo ni apostol Pedro nga amo ini ang gintagna ni Joel. Apang, kamusta ang pinamulong ni Joel tuhoy sa ‘pagbaylo sang adlaw sa kadudulman kag sang bulan sa dugo kag pag-untat sa pagsilak sang kabituunan’? Wala sing nagapakita nga natuman ini sang 33 C.E. ukon sang kapin sa 30-ka-tuig nga kalawigon sang konklusion sang Judiyong sistema sang mga butang.

 12, 13. Paano natuman ang pinasahi nga mga hitabo sa langit nga gintagna ni Joel?

¹² Sing maathag, ang naulihi nga bahin sang tagna ni Joel labi nga naangot sing suod sa ‘pag-abot sang daku kag makakulugmat nga adlaw ni Jehova’​—⁠ang kalaglagan sang Jerusalem. Ang The Watchtower sang Nobiembre 15, 1966, nagsiling nahanungod sa kapipit-an nga natabo sa Jerusalem sang 70 C.E.: “ ‘Adlaw ni Jehova’ gid yadto kon tuhoy sa Jerusalem kag sa iya mga anak. Kag may kaangtanan sa sadto nga adlaw may yara madamo nga ‘dugo kag kalayo kag haligi nga aso,’ ang adlaw wala nagpasanag sa kadulom sang siudad sa adlaw, kag ang bulan nagpahanumdom sang napatulo nga dugo, indi malinong, may masanag nga bulan sa kagab-ihon.”c

¹³ Huo, kaangay sang iban pa nga mga tagna nga ginsambit namon, ang pinasahi nga mga hitabo sa langit nga gintagna ni Joel matuman kon ipatuman ni Jehova ang paghukom. Sa baylo nga palawigon ang konklusion sang Judiyong sistema, ang pagdulom sang adlaw, bulan, kag kabituunan natabo sang ang manuglaglag nga puwersa nag-abot batok sa Jerusalem. Sing makatarunganon, mapaabot naton ang daku pa nga katumanan sina nga bahin sang tagna ni Joel kon ang paglaglag sang Dios sa karon nga sistema pagasugdan.

Diin nga Kapipit-an Antes sang Pinasahi nga mga Hitabo sa Langit?

 14, 15. Ano ang epekto sang tagna ni Joel sa aton paghangop sa Mateo 24:⁠29?

¹⁴ Ang katumanan sang tagna ni Joel (nahisanto sa iban pa nga mga tagna nga nagagamit sing kaanggid nga pamulong) nagabulig sa aton sa paghangop sang pinamulong sang Mateo 24:29. Sing maathag, ang ginsiling ni Jesus nahanungod sa ‘adlaw nga nagdulom, bulan nga wala naghatag sing kapawa, kag kabituunan nga nagkalahulog’ wala nagapatuhoy sa mga butang nga nagakatabo sa sulod sang madamong dekada sang konklusion sang karon nga sistema, subong sang pagtuon sa kahawaan nga nagagamit sing mga raket, mga pagkadto sa bulan, kag kaanggid nga mga butang. Indi, ginatudlo niya ang mga butang nga may kaangtanan sa “daku kag makakulugmat nga mga adlaw ni Jehova,” ang kalaglagan nga magaabot pa.

¹⁵ Nagahilabot ini sa aton paghangop kon paano ang pinasahi nga mga hitabo sa langit mangin “sa gilayon sa tapos sang kapipit-an.” Wala ginapatuhuyan ni Jesus ang kapipit-an nga natapos sang 70 C.E. Sa baylo, ginatudlo niya ang pagsugod sang dakung kapipit-an nga mahanabo sa bug-os kalibutan nga sistema sa palaabuton, nga magatapos sa iya ginsaad nga “presensia.” (Mateo 24:⁠3) Ina nga kapipit-an yara pa sa unahan naton.

 16. Diin nga kapipit-an ang ginatudlo sang Marcos 13:​24, kag ngaa amo sina?

¹⁶ Ano naman ang mga pinamulong sa Marcos 13:24: “Sa sadtong mga adlaw, sa tapos yadtong kapipit-an, ang adlaw padulmon, kag ang bulan indi maghatag sang iya kapawa”? Diri, ang “sadtong” kag “yadtong” lunsay mga dagway sang Griegong tinaga nga e·keiʹnos, isa ka demonstratibo nga pronombre nga nagapakita sang butang nga malayo pa sa tion. Ang e·keiʹnos mahimo magamit sa pagpatuhoy sa butang nga madugay na nagligad (ukon ginsambit sang nagligad) ukon sa butang nga sa palaabuton pa. (Mateo 3:1; 7:22; 10:19; 24:​38; Marcos 13:​11, 17, 32; 14:25; Lucas 10:12; 2 Tesalonica 1:10) Busa, ginatudlo sang Marcos 13:24 “yadtong kapipit-an,” indi ang kapipit-an nga ginpukaw sang mga Romano, kundi ang gamhanan nga buhat ni Jehova sa katapusan sang karon nga sistema.

 17, 18. Anong kapawa ang ginhatag sang Bugna kon paano mahanabo ang dakung kapipit-an?

¹⁷ Ang kapitulo 17 tubtob 19 sang Bugna nagahisanto kag nagapamatuod sining bag-o nga paghangop sa Mateo 24:​29-31, Marcos 13:​24-27, kag Lucas 21:​25-28. Sa anong paagi? Ginapakita sang mga Ebanghelyo nga ining kapipit-an indi magasugod kag matapos sa gilayon. Sa tapos ini magasugod, ang pila sa dimatinumanon nga katawhan magakabuhi sa gihapon agod makita “ang tanda sang Anak sang tawo” kag magahulag​—⁠magapanalabiton kag, subong sang ginasiling sang Lucas 21:​26, ‘magakapunaw sa kahadlok kag sa kalangkag sa magaabot sa napuy-an nga duta.’ Ang kabangdanan sang ila daku nga kahadlok amo ang pagkakita nila sang “tanda” nga nagakahulugan sang ila nagapakari nga kalaglagan.

¹⁸ Ang kasaysayan sang Bugna nagapakita nga ang palaabuton nga dakung kapipit-an magasugod kon ang militarisar nga “mga sungay” sang internasyonal nga “sapat nga mapintas” magabalikid sa “daku nga makihilawason,” ang Babilonia nga Daku.⁠d (Bugna 17:​1, 10-16) Apang madamo nga tawo ang magapabilin, kay ang mga hari, mga manugpatikang, mga kapitan sang barko, kag iban pa magalalaw sa pagkalaglag sang butig nga relihion. Sa walay duhaduha marealisar sang madamo nga ang paghukom sa ila amo ang magasunod.​—⁠Bugna 18:​9-19.

Ano ang Magaabot?

 19. Ano ang mapaabot naton kon magsugod ang dakung kapipit-an?

¹⁹ Ang mga pinamulong sang Ebanghelyo sa Mateo, Marcos, kag Lucas ginabuylog sa Bugna kapitulo 17-19 sa paghatag sing kapawa sa kon ano ang mahanabo sa dili madugay. Sa gintalana nga tion sang Dios, ang dakung kapipit-an magasugod paagi sa pagsalakay sa bug-os kalibutan nga emperyo sang butig nga relihion (Babilonia nga Daku). Matigdas ini ilabi na batok sa Cristiandad, nga katumbas sa dimatutom nga Jerusalem. “Sa gilayon sa tapos” sini nga bahin sang kapipit-an, “may mga tanda sa adlaw kag sa bulan kag sa mga bituon, kag sa duta [dimatupungan] nga kasisit-an sang kapungsuran.”​—⁠Mateo 24:29; Lucas 21:⁠25.

 20. Anong pinasahi nga mga hitabo sa langit ang mapaabot pa naton?

²⁰ Sa anong kahulugan nga ‘ang adlaw padulmon, ang bituon indi maghatag sing kapawa, kag ang kabituunan magkalahulog gikan sa langit, kag ang kagamhanan sang mga langit uyugon’? Sa walay duhaduha, sa unang bahin sang dakung kapipit-an, madamong bantog nga mga tawo​—⁠kilala nga mga klero sang relihiosong kalibutan​—⁠ang ibuyagyag kag laglagon sang “napulo ka sungay” nga ginsambit sa Bugna 17:16. Walay duhaduha nga ang politikal nga mga kagamhanan uyugon man. May yara man bala makahaladlok nga mga hitabo sa pisikal nga kalangitan? Ayhan may yara, kag mas makakulugmat ini sangsa ginlaragway ni Josephus nga natabo sang malapit na malaglag ang Judiyong sistema. Nahibaluan naton nga sang nagligad, ginpakita sang Dios ang iya gahom sa pagpahanabo sinang makahalapay nga mga epekto, kag sarang niya ini mahimo liwat.​—⁠Exodo 10:​21-23; Josue 10:​12-14; Hukom 5:20; Lucas 23:​44, 45.

 21. Paano mahanabo ang palaabuton nga “tanda”?

²¹ Sa sining punto ang tanan nga tatlo ka manunulat sang Ebanghelyo naggamit sang toʹte (nian) sa pagpakilala sang masunod nga hitabo. “Nian magapahayag ang tanda sang Anak sang tawo sa langit.” (Mateo 24:30; Marcos 13:26; Lucas 21:27) Kutob sang Inaway Kalibutanon I, nahantop sang matuod nga mga disipulo ni Jesus ang madamo sing bahin nga tanda sang iya dikitaon nga presensia, samtang wala ini mahantop sang kalabanan nga mga tawo. Apang ginatudlo sang Mateo 24:30 ang isa pa ka “tanda” nga makita sa palaabuton, ang iya sang “Anak sang tawo,” kag ang tanan nga pungsod mapilitan sa pagtalupangod. Kon si Jesus magakari upod sa mga panganod nga dimakita, ang nagapamatok nga mga tawo sa bug-os nga kalibutan magakilala sina nga “pagkari” (Griego, er·khoʹme·non) bangod sang labaw sa kinaugali nga pagpakita sang iya harianon nga gahom.​—⁠Bugna 1:⁠7.

 22. Ano ang mangin epekto nga makita “ang tanda” sang Mateo 24:⁠30?

²² Ginagamit liwat sang Mateo 24:30 ang toʹte sa pagpakilala kon ano ang magasunod. Nian ang mga pungsod, nakamutik sang resulta sang ila kahimtangan, magasakit sang ila kaugalingon kag magakasubo, ayhan nakahibalo nga ang ila kalaglagan malapit na. Tuhay gid sa mga alagad sang Dios, kay mabayaw naton ang aton mga ulo, nakahibalo nga ang kaluwasan malapit na! (Lucas 21:28) Ginapakita man sang Bugna 19:​1-6 ang matuod nga mga sumilimba sa langit kag sa duta nga nagakasadya bangod sang pagkalaglag sang dakung makihilawason.

 23. (a) Ano nga buhat ang himuon ni Jesus sa mga pinili? (b) Ano ang mahimo masiling tuhoy sa pagdala sa langit sa mga nagkalabilin?

²³ Ang tagna ni Jesus padayon sa pagsiling, sa Marcos 13:27: “Nian [toʹte] magapadala sia sang iya mga anghel kag magatipon sang iya mga pinili gikan sa apat ka mga hangin, kutob sa mga ukbong sang duta tubtob sa ukbong sang langit.” Ginapatalupangod diri ni Jesus ang nagkalabilin sang 144,000 ka “pinili” nga nagakabuhi gihapon sa duta. Sa una nga bahin sang konklusion sang sistema sang mga butang, ining hinaplas nga mga disipulo ni Jesus ginhiusa sing teokratiko. Apang, suno sa pagpaagisod sang mga hitabo, ang Marcos 13:27 kag Mateo 24:31 nagalaragway sang iban pa nga butang. “Sa mabaskog nga tunog sang budyong,” ang nagkalabilin nga “mga pinili” pagatipunon gikan sa mga kaukbungan sang duta. Paano sila pagatipunon? Sa walay duhaduha, “pat-inan” sila kag maathag nga makilal-an ni Jehova subong bahin “sadtong mga gintawag kag ginpili kag matutom.” Kag sa gintalana nga tion sang Dios, pagatipunon sila sa langit agod mangin mga hari-saserdote.⁠e Magapahalipay ini sa ila kag sa ila matutom nga mga kaupdanan, ang “dakung kadam-an,” nga sila mismo pagatandaan nga ‘makalampuwas sa dakung kapipit-an’ sa pag-agom sang mga pagpakamaayo sang isa ka paraiso nga duta.​—⁠Mateo 24:22; Bugna 7:​3, 4, 9-17; 17:​14; 20:6; Ezequiel 9:​4, 6.

 24. Anong pagpasunod ang ginahatag sang Mateo 24:​29-31 tuhoy sa palaabuton nga mga hitabo?

²⁴ Sang ang mga apostoles nagsiling, “Sugiri kami . . . ,” ang sabat ni Jesus naglakip sang labi pa sa ila mahangpan. Apang, sa sulod sang ila pagkabuhi nalipay sila nga makita ang tipiko nga katumanan sang iya tagna. Ang aton pagtuon sa sabat ni Jesus nagpatalupangod sang bahin sang iya tagna nga matuman sa malapit nga palaabuton. (Mateo 24:​29-31; Marcos 13:​24-27; Lucas 21:​25-28) Nakita na naton nga malapit na ang aton kaluwasan. Mapaabot naton ang pagsugod sang dakung kapipit-an, nian ang tanda sang Anak sang tawo, kag nian ang pagtipon sang Dios sa mga pinili. Sa katapusan, subong Manuglaglag ni Jehova sa Armagedon, ang aton Hangaway-Hari, ang nagalingkod sa trono nga si Jesus, “magatapos sang iya pagpangdaug.” (Bugna 6:⁠2) Ina nga adlaw ni Jehova, kon ipatuman niya ang pagtimalos, magadangat sa daku nga katapusan padulong sa konklusion sang sistema sang mga butang nga nagtanda sang adlaw ni Ginuong Jesus sugod sang 1914.

 25. Paano kita makapakigbahin sa palaabuton pa nga katumanan sang Lucas 21:⁠28?

²⁵ Kabay nga padayon kamo nga manginpulos sa balaan nga panudlo, agod maghulag sa palaabuton pa nga katumanan sang mga pulong ni Jesus. “Kon ining mga butang magsugod sa pagkahanabo, maghangad kamo kag bayawa ang inyo mga ulo, kay ang pagtubos sa inyo nagapalapit.” (Lucas 21:28) Daw ano ka makalilipay nga palaabuton ang nagahulat sa mga pinili kag sa dakung kadam-an samtang ginapakabalaan ni Jehova ang iya balaan nga ngalan!

[Mga footnote]

Madumduman Mo Bala?

◻ Paano natuman sang unang siglo ang mga bahin sang Joel 2:​28-31 kag 3:⁠15?

◻ Diin nga kapipit-an ang ginapatuhuyan sang Mateo 24:​29, kag ngaa mahinakop naton ina?

◻ Anong pinasahi nga mga hitabo sa langit ang ginatudlo sang Mateo 24:​29, kag paano ini mahanabo sa gilayon sa tapos sang kapipit-an?

◻ Paano matuman sa palaabuton ang Lucas 21:​26, 28?

[Piktyur sa pahina 16, 17]

Duog sang templo

[Credit Line]

Pictorial Archive (Near Eastern History) Est.