“Luyag Namon nga Mag-upod sa Inyo”

1, 2. (a) Ano ang ginsiling ni Jehova nga mahanabo sa aton tion? (b) Ano nga mga pamangkot ang sabton sa sini nga artikulo? (Tan-awa ang piktyur sa umpisa sini nga artikulo.)

NAGTAGNA si Jehova parte sa aton tion subong: “Sa sina nga tion napulo ka tawo halin sa tanan nga lenguahe sang mga pungsod ang magauyat sa bayo sang isa ka Judiyo kag magasiling: ‘Luyag namon nga mag-upod sa inyo, kay nabatian namon nga kaupod ninyo ang Dios.’” (Zac. 8:23) Pareho sa malaragwayon nga napulo ka tawo, ang may paglaum nga mabuhi sa duta ‘nagauyat sa bayo sang isa ka Judiyo.’ Nalipay sila nga mag-upod sa ginhaplasan sang espiritu nga “Israel sang Dios,” kay nahibaluan nila nga ginapakamaayo ni Jehova ang iya mga hinaplas.—Gal. 6:16.

² Pareho kay Zacarias, ginsiling man ni Jesus nga mahiusa ang katawhan sang Dios. Ginlaragway niya ang iya mga sumulunod bilang duha ka grupo, ang “diutay nga panong” kag ang “iban nga mga karnero,” pero nagsiling sia nga sila mangin “isa ka panong nga may isa ka manugbantay.” (Luc. 12:32; Juan 10:16) Bangod sining duha ka grupo, mahimo kita mamangkot: (1) Dapat bala mahibaluan sang iban nga mga karnero ang ngalan sang tanan nga hinaplas subong? (2) Paano dapat tamdon sang mga hinaplas ang ila kaugalingon? (3) Kon may magkaon sang tinapay kag mag-inom sang alak sa Memoryal sa inyo kongregasyon, paano mo sia tamdon? (4) Dapat ka bala mabalaka kon magdamo ang nagakaon sang tinapay kag nagainom sang alak sa Memoryal? Binagbinagon naton ang mga sabat sa sini nga mga pamangkot.

 3. Ngaa indi posible nga mapat-od kon sin-o ang mangin bahin sang 144,000?

³ Dapat bala mahibaluan sang iban nga mga karnero ang ngalan sang tanan nga hinaplas subong? Indi. Ngaa? Bangod bisan pa gin-agda sila sang Dios sa langit, pangagda pa lang ini, kag indi pa sigurado kon mabaton nila ang padya. Amo kon ngaa nagagamit si Satanas sang “butig nga mga manalagna . . . agod patalangon, kon mahimo, bisan ang mga pinili.” (Mat. 24:24) Mahibaluan lang sang hinaplas nga mga Cristiano nga sigurado na ang ila padya kon mabaton na nila ang katapusan nga pagmarka. Pat-uron ni Jehova nga mabaton nila ini antes sila mapatay ukon antes magsugod ang “dakung kapipit-an” kay ginhukman niya sila nga matutom. (Bug. 2:10; 7:3, 14) Gani, indi posible nga mapat-od sang bisan sin-o subong sa duta kon sin-o sa mga alagad sang Dios ang mangin bahin sang 144,000.^[1]

 4. Kon indi posible mahibaluan ang ngalan sang tanan nga hinaplas sa duta subong, paano kita ‘makaupod’ sa ila?

⁴ Kon indi posible mahibaluan ang ngalan sang tanan nga espirituwal nga Israelinhon sa duta subong, paano ‘makaupod’ sa ila ang iban nga mga karnero? Talupangda ang gintagna sa Zacarias parte sa malaragwayon nga napulo ka tawo. “Magauyat [sila] sa bayo sang isa ka Judiyo kag magasiling: ‘Luyag namon nga mag-upod sa inyo, kay nabatian namon nga kaupod ninyo ang Dios.’” Isa lang ka Judiyo ang ginsambit diri, pero indi lang isa ang ginapatuhuyan sang tinaga nga “inyo” kag “ninyo.” Ining espirituwal nga Judiyo nagapatuhoy sa isa ka grupo, indi lang sa isa ka tawo. Gani indi kinahanglan nga makilala ang tagsa ka espirituwal nga Judiyo kag mag-upod sa iya. Sa baylo, dapat naton sila makilala bilang isa ka grupo kag suportahan sila. Wala gid kita ginapalig-on sang Kasulatan nga magsunod sa isa ka tawo. Si Jesus ang aton Lider.—Mat. 23:10.

 5. Ano nga paandam ang dapat binagbinagon sing maayo sang mga hinaplas, kag ngaa?

⁵ Dapat binagbinagon sing maayo sang mga nagakaon sang tinapay kag nagainom sang alak sa Memoryal ang paandam sa 1 Corinto 11:27-29. (Basaha.) Ano ang punto diri ni apostol Pablo? Mangin indi takus ang pagkaon kag pag-inom sang isa ka hinaplas nga Cristiano kon indi maayo ang iya kaangtanan kay Jehova. (Heb. 6:4-6; 10:26-29) Makabulig ini nga paandam para dumdumon sang hinaplas nga mga Cristiano nga wala pa nila mabaton ang padya. Dapat sila padayon nga magtinguha nga “mabaton ang padya, ang langitnon nga pagtawag sang Dios paagi kay Cristo Jesus.”—Fil. 3:13-16.

 6. Paano dapat tamdon sang hinaplas nga mga Cristiano ang ila kaugalingon?

⁶ Ginsilingan ni Pablo ang hinaplas nga mga Cristiano nga “magkabuhi sing takus sa pagtawag nga [ila] nabaton.” Paano? Nagsiling si Pablo nga himuon nila ini “nga may bug-os nga pagpaubos kag kalulo, pagkamapinasensiahon, nagabatas sa isa kag isa sa gugma, nagapakighidait sa isa kag isa, kag nagatinguha nga tipigan ang paghiusa nga nabaton ninyo paagi sa balaan nga espiritu.” (Efe. 4:1-3) Ginapalig-on sang espiritu ni Jehova ang pagkamapainubuson, indi ang pagpabugal. (Col. 3:12) Mapainubuson ang mga hinaplas kag wala nila ginakabig nga mas madamo ang balaan nga espiritu nga ila nabaton sangsa mga may paglaum nga mabuhi sa duta. Wala sila nagasiling nga may pinasahi sila nga ihibalo ukon paghangop. Wala sila nagahunahuna nga mas labaw sila sangsa iban. Mapainubuson nila nga ginabaton nga si Jehova ang nagapili sa mga hinaplas, gani wala gid sila nagahambal nga hinaplas man ang iban kag dapat man magkaon sang tinapay kag mag-inom sang alak.

7, 8. Ano ang wala ginapaabot sang hinaplas nga mga Cristiano, kag ngaa?

⁷ Bisan pa dalayawon gid ang pribilehiyo nga agdahon sa langit, wala ginapaabot sang hinaplas nga mga Cristiano nga hatagan sila sing pinasahi nga kadungganan sang iban. (Efe. 1:18, 19; basaha ang Filipos 2:2, 3.) Ang espiritu ni Jehova ang naghatag sang pamatuod sa ila. Wala ini ginapahibalo sa iban. Gani wala sila natingala kon indi dayon magpati ang iban nga ginhaplasan gid sila sang balaan nga espiritu. Ang matuod, nahibaluan nila nga nagalaygay ang Kasulatan nga indi dapat magpati dayon sa nagapangangkon nga pinasahi sia nga ginpili sang Dios. (Bug. 2:2) Gani wala nila ginagamit ang ila pagkahinaplas para ipakilala ang ila kaugalingon. Wala man nila ini ginasugid sa iban para indi sila hatagan sang sobra nga atension. Indi man nila gusto ipabugal ang ila palaabuton nga padya.—1 Cor. 1:28, 29; basaha ang 1 Corinto 4:6-8.

⁸ Wala man nagabatyag ang hinaplas nga mga Cristiano nga daw miembro sila sang pinasahi nga grupo. Wala nila ginapangita ang iban pa nga nagapangangkon nga hinaplas man para mangin suod sa ila ukon para magtuon sang Biblia bilang mga grupo. (Gal. 1:15-17) Tunaan ini sang pagbinahinbahin sa kongregasyon kag batok ini sa panuytoy sang balaan nga espiritu, nga nagapalig-on sang paghidait kag paghiusa.—Basaha ang Roma 16:17, 18.

 9. Ngaa dapat gid ikaw maghalong kon paano mo tamdon ang nagakaon sang tinapay kag nagainom sang alak sa Memoryal? (Tan-awa ang kahon nga “Ang Gugma ‘Wala Nagagawi sing Indi Nagakaigo.’”)

⁹ Paano mo dapat tamdon ang nagakaon sang tinapay kag nagainom sang alak sa Memoryal? Nagsiling si Jesus sa iya mga disipulo: “Kamo tanan mag-ulutod.” Nagsiling pa sia: “Ang nagapakataas sang iya kaugalingon paubson, kag ang nagapaubos sang iya kaugalingon pakataason.” (Mat. 23:8-12) Gani, sala gid nga pakataason ang mga indibiduwal, bisan hinaplas pa sila nga mga utod sang Cristo. Ginapalig-on kita sang Biblia nga ilugon ang pagtuo sang Cristiano nga mga gulang, pero wala gid ini nagasugo sa aton nga himuon nga lider ang tawo. (Heb. 13:7) Matuod, may ginsambit ang Kasulatan nga “kabigon nga takus padunggan sing doble.” Pero takus sila padunggan bangod ‘nagadumala sila sa maayo nga paagi’ kag “nagapangabudlay sing lakas sa paghambal kag pagpanudlo tuhoy sa pulong,” kag indi bangod hinaplas sila. (1 Tim. 5:17) Gani mahuy-an ang mga hinaplas kon hatagan naton sila sing indi nagakaigo nga pagdayaw ukon atension. Ang malain pa gid, mabudlayan nga mangin mapainubuson ang hinaplas nga mga Cristiano kon pinasahi ang pagtratar naton sa ila. (Roma 12:3) Indi gid naton gusto nga mapasandad ang isa ka utod sang Cristo!—Luc. 17:2.

10. Paano mo mapakita nga ginatahod mo ang hinaplas nga mga Cristiano?

¹⁰ Paano naton mapakita ang nagakaigo nga pagtahod sa ginpili ni Jehova nga mga hinaplas? Indi kita dapat mamangkot sa ila parte sa paghaplas sa ila. Gani wala kita nagapasilabot sa mga butang nga wala kita sing labot. (1 Tes. 4:11; 2 Tes. 3:11) Indi kita maghunahuna nga hinaplas man ang ila mga ginikanan, asawa, bana, ukon iban pa nga miembro sang ila pamilya. Wala sing labot ang pamilya ukon pag-asawahay para mangin hinaplas ang isa. (1 Tes. 2:12) Indi man kita mamangkot sa asawa ukon bana sang hinaplas kon ano ang ginabatyag niya kay indi na sila mag-updanay sang iya bana ukon asawa sa Paraiso sa duta sa palaabuton. Sa baylo nga mamangkot sang mahimo magpasubo sa iban, makasalig gid kita tanan nga ihumlad ni Jehova ang iya kamot kag ‘ihatag ang handum sang tagsa ka buhi nga butang.’—Sal. 145:16.

11. Paano kita maamligan kon likawan naton ang indi nagakaigo nga ‘pagdayaw sa iban’?

¹¹ Proteksion man sa aton kon nagakaigo ang pagtratar naton sa hinaplas nga mga Cristiano. Ang Kasulatan nagasiling nga makasulod sa kongregasyon ang “indi matuod nga mga kauturan.” (Gal. 2:4, 5; 1 Juan 2:19) Ini nga mga impostor mahimo magsiling nga hinaplas sila. Isa pa, mahimo magbiya sa pagtuo ang pila ka hinaplas nga Cristiano. (Mat. 25:10-12; 2 Ped. 2:20, 21) Kon likawan naton ang indi nagakaigo nga ‘pagdayaw sa iban,’ indi kita nila mapahilayo sa kamatuoran. Indi man magluya ang aton pagtuo kon indi magpabilin nga matutom ang isa ka Cristiano nga prominente ukon madugay na nga nagaalagad.—Jud. 16, footnote.

12, 13. Ngaa indi kita dapat mabalaka sa kadamuon sang nagakaon sang tinapay kag nagainom sang alak sa Memoryal?

¹² Sa madamo nga tinuig, nagadiutay ang nagakaon sang tinapay kag nagainom sang alak sa Memoryal sang kamatayon sang Cristo. Pero sining karon lang, nagadamo sila kada tuig. Dapat bala kita mabalaka sa sini? Indi. Binagbinagon naton ang pila ka rason kon ngaa.

¹³ “Kilala ni Jehova ang mga ginapanag-iyahan niya.” (2 Tim. 2:19) Indi mahibaluan sang mga nagaisip sang nagakaon sang tinapay kag nagainom sang alak sa Memoryal kon sin-o ang matuod nga hinaplas. Lakip sa maisip ang sayop nga naghunahuna nga hinaplas sila. May pila nga nagsugod sa pagkaon sa tinapay kag pag-inom sa alak pero nag-untat sang ulihi. Ang iban may mga problema sa hunahuna ukon sa emosyon amo nga nagapati sila nga magagahom sila upod sa Cristo sa langit. Gani, ang kadamuon sang nagakaon sang tinapay kag nagainom sang alak sa Memoryal indi ang husto gid nga kadamuon sang nabilin nga mga hinaplas sa duta.

14. Ano ang ginasiling sang Biblia parte sa kadamuon sang hinaplas sa duta kon magsugod ang dakung kapipit-an?

¹⁴ May mga hinaplas sa madamo nga bahin sang duta kon mag-abot na si Jesus para tipunon sila kag dalhon sa langit. Sa amo nga tion, ang Biblia nagsiling parte kay Jesus: “Ipadala niya ang iya mga anghel upod ang mabaskog nga tunog sang trumpeta, kag tipunon nila ang iya mga pinili halin sa apat ka direksion, halin sa isa ka punta sang langit tubtob sa pihak.” (Mat. 24:31) Ginasiling sang Kasulatan nga may mabilin nga mga hinaplas sa duta sa katapusan nga mga adlaw. (Bug. 12:17) Pero wala ginasiling sang Biblia kon pila ang mabilin kon magsugod ang dakung kapipit-an.

15, 16. Ano ang dapat naton mahangpan parte sa 144,000 nga ginpili ni Jehova?

¹⁵ Si Jehova ang nagapat-od kon san-o niya pilion ang mga hinaplas. (Roma 8:28-30) Ginsugdan ni Jehova ang pagpili sa mga hinaplas sa tapos mapatay kag mabanhaw si Jesus, kag mahimo gid nga hinaplas ang tanan nga Cristiano sang unang siglo. Halin sang unang siglo asta nga nagsugod ang katapusan nga mga adlaw, ang kalabanan sang nagapangangkon nga nagasunod sa Cristo indi matuod nga mga Cristiano. Ginpaanggid sila ni Jesus sa “hilamon.” Pero may ginhaplas gihapon si Jehova nga pila ka matutom sa amo nga tion, kag nangin kaangay sila sang “trigo” nga ginsambit ni Jesus. (Mat. 13:24-30) Sa katapusan nga mga adlaw, padayon nga ginapili ni Jehova ang mangin miembro sang 144,000.^[2] Kon mamat-od sia nga pilion ang iban para sa sini nga pribilehiyo sa ulihi nga bahin sini nga tion, duhaduhaan bala naton ang iya kaalam? (Isa. 45:9; Dan. 4:35; basaha ang Roma 9:11, 16.)^[3] Maghalong gid kita kay basi mangin pareho kita sang akig nga mga mamumugon nga nagreklamo sa ginhimo sang ila agalon sa mga tawo nga nagsugod sa pag-obra sang ika-11 nga oras.—Basaha ang Mateo 20:8-15.

¹⁶ Indi tanan sang may paglaum sa langit ang bahin sang “matutom kag mainandamon nga ulipon.” (Mat. 24:45-47) Pareho sang unang siglo, pila lang ang ginagamit subong ni Jehova kag ni Jesus sa pagpakaon sa madamo. Pila lang ka hinaplas nga Cristiano sang unang siglo ang gingamit sa pagsulat sang Cristianong Griegong Kasulatan. Gani subong, pila lang ka hinaplas nga Cristiano ang gintangdo sa paghatag sang espirituwal nga “pagkaon sa nagakaigo nga tion.”

17. Ano ang natun-an mo sa sini nga artikulo?

¹⁷ Ano ang natun-an naton sa aton ginbinagbinag? Namat-od si Jehova nga maghatag sang duha ka padya—kabuhi sa langit para sa espirituwal nga mga Judiyo kag kabuhi sa duta para sa malaragwayon nga napulo ka tawo. Pero isa lang ang iya talaksan para sa ila tanan, nga dapat sila mangin matutom. Dapat sila magpabilin nga mapainubuson. Dapat sila mahiusa. Dapat sila magbuligay para may paghidait sa kongregasyon. Samtang nagapalapit na kita sa katapusan, mangin determinado kita tanan sa pag-alagad kay Jehova bilang isa ka panong nga nagasunod sa Cristo.