Madumduman Mo Bala?

Nabinagbinag mo na bala sing maayo ang bag-o nga mga guwa sang Ang Lalantawan? Kon amo, mawili ikaw sa paghinumdom sang masunod:

◻ Ano ang pila ka pamangkot nga mahimo ipamangkot sang duha ka Cristiano sa ila kaugalingon antes sila maghunahuna tuhoy sa kasugtanan sa pag-asawahay?

‘Napat-od ko gid bala ang iya espirituwalidad kag debosyon sa Dios? Mahanduraw ko bala nga nagaalagad sa Dios upod sa iya sa bug-os nga kabuhi? Nahibaluan na bala namon sing maayo ang personalidad sang kada isa? Sigurado gid bala ako nga padayon kami nga magsahuay? Nahibaluan na bala namon sing maayo ang nagligad nga mga buhat kag ang mga kahimtangan karon sang kada isa?’—8/15, pahina 31.

◻ Ano ang buot silingon ni Jesus sang nagsiling sia sa iya mga sumulunod: “Kamo ang asin sang duta”? (Mateo 5:13)

Ginpahangop ni Jesus nga ang pagbantala sang iya mga sumulunod sa iban nahanungod sa Ginharian sang Dios mahimo nga makatipig, ukon makaluwas sang kabuhi, sang mga nagapamati sa ila. Sa pagkamatuod, ang mga nagatuman sang mga pulong ni Jesus maamligan gikan sa moral kag espirituwal nga kaduluntan sa kalibutan.—8/15, pahina 32.

◻ Paano malikawan sang mga magnobyo ang siod sang seksuwal nga imoralidad?

Kon naga-date kamo, maalamon nga likawan ninyo nga magkamohanon lamang upod sa inyo palangasaw-on ukon palamanhon sa di-nagakaigo nga mga kahimtangan. Labing maayo nga mag-updanay upod sa grupo ukon sa publiko nga mga lugar. Butangi sing latid ang pagpakita sing pagpalangga, nagatahod sang balatyagon kag konsiensia sang isa kag isa.—9/1, pahina 17, 18.

◻ Ano ang paghangop?

Ini ang ikasarang sa pagtan-aw sa isa ka butang kag mahantop ang pagkahuman sini paagi sa paghibalo sing mga kaangtanan sa ulot sang mga bahin sini kag sa kabug-usan sini, sa amo mahangpan ini. (Hulubaton 4:1)—9/15, pahina 13.

◻ Ano ang ginapatuman ni Jehova sa aton karon?

Sa sadsaran, ang ginapatuman ni Jehova sa aton amo ang magpamati sa Iya Anak kag magsunod sa iya huwaran kag mga panudlo. (Mateo 16: 24; 1 Pedro 2:21)—9/15, pahina 22.

◻ Sin-o lamang ang makaagom sing paghidait?

Sanglit si Jehova amo “ang Dios nga nagahatag sing paghidait,” ang paghidait sarang lamang maagom sang mga tawo nga nagahigugma sa Dios kag nagatahod sing tudok sa iya matarong nga mga prinsipio. (Roma 15:33)—10/1, pahina 11.

◻ Paano natigayon ni Jose ang moral nga kusog nga pangindian ang asawa ni Potifar adlaw-adlaw?

Ginpakabahandi ni Jose ang iya relasyon kay Jehova nga labaw pa sa umalagi nga kalipay. Subong man, bisan pa wala sia sa idalom sang kasuguan sang Dios, nahangpan gid ni Jose ang mga prinsipio sa moral. (Genesis 39:9)—10/1, pahina 29.

◻ Daw ano ka importante ang aton kahanda sa pagpatawad sa aton mga kauturan?

Ang aton mga paglaum para padayon nga batunon ang pagpatawad sang Dios nasandig sing daku sa aton kahanda sa pagpatawad sa iban. (Mateo 6:12, 14; Lucas 11:4)—10/15, pahina 17.

◻ Ano nga sahi sang mga sala ang ginapatalupangod sang Mateo 18:15-17, kag ano ang nagapakita sina?

Ang mga sala nga buot silingon ni Jesus mabug-at gid amo nga mahimo ini magresulta nga bilangon ang nakasala “subong sang tawo sang mga pungsod kag subong sang manugsukot sang buhis.” Ang mga Judiyo wala nagapakig-upod sa mga Gentil, kag ginalikawan nila ang mga manugsukot sang buhis. Gani ang ginapatuhuyan sa Mateo 18:15-17 amo ang mabug-at nga mga sala, indi ang mga paglain sing buot lamang ukon mga paghinakit nga sarang mo mapatawad kag kalimtan na lang. (Mateo 18:​21, 22)—10/15, pahina 19.

◻ Ano gid ang nalakip sa paghigugma sa Pulong sang Dios?

Ang paghigugma sa Pulong sang Dios nagadul-ong sa pagkabuhi sang isa suno sa mga ginapatuman sini. (Salmo 119:97, 101, 105) Ini nagakinahanglan sing padayon nga pagpasibu sang panghunahuna kag pagkabuhi sang isa.—11/1, pahina 14.

◻ Bangod nakabaton sing madamo gid gikan kay Jehova, ano ang mahatag naton bilang balos sa labing daku nga Hari kag Manughatag?

Ginapakita sang Biblia nga ang labing maayo nga regalo nga mahatag naton kay Jehova amo ang “halad sang pagdayaw.” (Hebreo 13:15) Ngaa? Bangod ini nga halad direkta nga may kaangtanan sa pagluwas sa kabuhi, isa ka butang nga importante gid kay Jehova sa sining tion sang katapusan. (Ezequiel 18:23)—11/1, pahina 21.

◻ Ano ang buot silingon ni Solomon sang sia nagsulat: “Ang mga pulong sang mga maalam subong sang mga pangtuslok sa baka”? (Manugwali 12:11)

Ang mga pulong sang mga may diosnon nga kaalam nagapahulag sa mga bumalasa ukon mga tagpalamati sa pag-uswag suno sa maalamon nga mga pulong nga nabasahan ukon nabatian.—11/15, pahina 21.

◻ Ano ang diosnon nga paghantop?

Ini ang ikasarang sa pagkilala sang husto gikan sa sayop kag dayon ang pagpili sa husto nga dalanon. Ang pagtuon kag pag-aplikar sa Pulong sang Dios nagahatag sing paghantop.—11/15, pahina 25.

◻ Ang kahanda sa pagbaton sing mga responsabilidad dapat timbangan sing ano? (1 Timoteo 3:1)

Dapat ini timbangan sing maayo nga paghantop. Indi dapat pas-anon sang bisan sin-o ang tuman kadamo nga asaynment amo nga madula na niya ang iya kalipay sa pag-alagad kay Jehova. Dalayawon ang handa nga espiritu, apang dapat man ipabanaag sang kahanda ang kaugdang kag “kaligdong sa hunahuna.” (Tito 2:12; Bugna 3:15, 16)—12/1, pahina 28.

◻ Paano mahimo atubangon ang hangkat sang pagkaginikanan? Ginalaygayan sang Dios ang mga ginikanan nga mangin mga huwaran, mga kaupod, mga manugpaalinton, kag mga manunudlo. (Deuteronomio 6:6,7)—12/1, pahina 32.