Ang kabuhi kag Ministeryo ni Jesus

Ang Salabton sang Pagkadisipulo

SA TAPOS maghalin sa balay sang isa ka kilala nga Fariseo, nga mahimo katapo sang Sanhedrin, nagpadayon si Jesus padulong sa Jerusalem. Ginsundan sia sang daku nga kadam-an. Apang ano ang ila mga motibo? Ano gid ang nadalahig agod mangin iya matuod nga sumulunod?

Samtang nagalakbay sila, nagliso si Jesus sa kadam-an kag ayhan nakibot niya sila sang magsiling sia: “Kong ang bisan sin-o nga tawo nagakari sa akon kag wala nagadumot sang iya kaugalingon nga amay kag iloy kag asawa kag mga anak kag mga utod nga lalaki kag mag utod nga babayi, huo, kag bisan sang iya kaugalingon nga kalag, indi sia mangin akon disipulo.”

Ano ang buot silingon ni Jesus? Indi buot silingon nga literal nga dumtan sang iya mga sumulunod ang ila mga paryente. Sa baylo, dapat nila dumtan sila sa kahulugan nga higugmaon sila sing kubos sa paghigugma nila sa iya. Ang katigulangan ni Jesus nga si Jacob ginsiling nga “nagdumot” kay Laya kag naghigugma kay Raquel, nga nagakahulugan nga si Laya kubos nga ginhigugma sang sa iya utod nga si Raquel.

Binagbinaga, man, nga si Jesus nagsiling nga dapat dumtan sang isa ka disipulo ‘bisan ang iya kaugalingon nga kalag,’ ukon kabuhi. Sa liwat ang buot silingon ni Jesus amo nga dapat Sia higugmaon sang matuod nga disipulo sing kapin sa paghigugma niya sa iya kaugalingon nga kabuhi. Sa Amon ginapadaku ni Jesus nga isa ka serioso nga salabton ang mangin iya disipulo. Indi ini butang nga batunon nga wala sing mahalungon nga pagbinagbinag.

Ang kabudlayan kag paghingabot nadalahig sa pagkadisipulo ni Jesus, subong padayon nga ginpakita niya: “Ang bisan sin-o nga wala nagapas-an sang iya usok sang pag-antos kag nagasunod sa akon indi mangin akon disipulo.” Sa amo, ang matuod nga disipulo dapat mangin handa sa pag-atubang sing pareho nga lulan sang kahuy-angan nga ginbatas ni Jesus, nga nagalakip pa, kon kinahanglanon, sang kamatayon sa mga kamot sang mga kaaway sang Dios, nga amo ang natabo kay Jesus wala magdugay.

Busa, ang mangin disipulo ni Cristo, isa ka butang nga dapat binagbinagon sing mahalungon sang kadam-an nga nagasunod sa iya. Ginpadaku ni Jesus ining kamatuoran paagi sa isa ka ilustrasyon. “Halimbawa,” siling niya, “sin-o bala sa inyo nga luyag magtukod sing torre ang wala anay nagalingkod kag nagabinagbinag sang kabilihanan, agod tan-awon kon bala may igapahuman sia? Basi kon, sang nabutang na niya ang sadsaran, indi niya mapatapos ini, kag ang tanan nga makakita sini magasugod sa pag-uligyat sa iya, nga nagasiling, ‘Ining tawo nagsugod sa pagtukod kag wala makasarang sa pagpatapos sini.’”

Gani gin-ilustrar ni Jesus sa kadam-an nga nagasunod sa iya nga antes mangin mga disipulo niya, dapat sila mangin desidido sing malig-on nga masarangan nila tumanon ang nadalahig, subong nga ang tawo nga luyag magtukod sing torre nagapat-od anay antes sia magsugod nga sia may kuwarta sa pagpatapos sini. Sa paghatag sing isa pa ka ilustrasyon, si Jesus nagpadayon:

“Ukon sin-o bala nga hari, nga magamartsa sa pag-atubang sa isa ka hari sa inaway, ang indi anay maglingkod kag magbinagbinag kon bala masarangan niya upod sa napulo ka libo ang pag-atubang sa isa nga magaabot batok sa iya nga may duha ka pulo? Kon, sa kamatuoran, indi sia makasarang, nian samtang malayo pa inang isa nagapadala sia sing hubon sang mga embahador kag nagapangayo sing kasugtanan sang paghidait.”

Nian ginpadaku ni Jesus ang punto sang iya ilustrasyon, nga nagasiling: “Sa amo, ang bisan sin-o sa inyo nga indi magbiya sang tanan niya nga pagkabutang indi mahimo nga mangin disipulo ko.” Amo sina ang dapat handa nga himuon sang kadam-an nga nagasunod sa iya, kag, huo, sang tanan nga nagatuon tuhoy kay Cristo. Dapat sila mangin handa sa pagsakripisyo sang tanan nga yara sa ila—sang tanan nila nga pagkabutang, lakip ang ila kabuhi—kon luyag nila mangin mga disipulo niya. Handa ka bala sa paghimo sini?

“Ang asin, sa pagkamatuod, maayo,” padayon ni Jesus. Sa iya Sermon sa Bukid nagsiling sia nga ang iya mga disipulo amo ang “asin sang duta,” nga nagakahulugan nga sila may yara nagaamlig nga impluwensia sa katawhan, subong nga ang literal nga asin isa ka preserbatibo. “Apang kon ang asin magtab-ang, ano bala ang pagpaasin sini? Wala na ini sing pulos para sa duta ukon para sa higko nga inug-abuno,” hinakop ni Jesus. “Ginapilak ini sa guwa. Gani, magpamati kamo kon may dulunggan kamo.”

Gani ginpakita ni Jesus nga bisan ang mga disipulo na niya nga madugaydugay na indi dapat magpaluya sang ila determinasyon sa pagpadayon. Basi kon sila mangin walay pulos, butang nga yulubitan sa sining kalibutan kag indi nagakabagay sa atubangan sang Dios, sa katunayan, isa ka kahuy-anan sa Dios. Busa, kaangay sang wala sing parat, mahigko nga asin, ipilak sila sa guwa, huo, laglagon. Lucas 14:25-35; Genesis 29:30-33; Mateo 5:13.

◆ Ano ang buot silingon sang ‘pagdumot’ sa imo mga paryente kag sa imo kaugalingon?

◆ Ano ang duha ka ilustrasyon nga ginhatag ni Jesus, kag ano ang kahulugan nila?

◆ Ano ang punto sang nagahinakop nga mga komento ni Jesus nahanungod sa asin?