Kabuhi kag Ministeryo ni Jesus

Kon Ngaa Nagkari si Jesus sa Duta

SUBONG naton-an na naton sa nagligad nga guwa sining magasin, ang adlaw ni Jesus sa Capernaum upod sa iya apat ka disipulo masako. Una, gin-ayo niya ang gindemonyo nga tawo sa sinagoga, nian sa balay ni Pedro gin-ayo niya ang ugangan nga babayi ni Pedro, kag tubtob sa gab-i gindala sa iya sang mga tawo sang Capernaum ang tanan nila nga balatianon agod ayuhon niya. Wala sing tion sa pag-isahanon.

Karon aga pa sang masunod nga adlaw. Samtang madulomdulom pa, nagbangon si Jesus kag nagguwa nga isahanon. Nagkadto sia sa isa ka mamingaw nga duog agod mangamuyo sa iya Amay. Apang madali lang ang pag-isahanon ni Jesus bangod sang matalupangdan ni Pedro kag sang iban pa nga wala si Jesus, ginpangita nila sia.

Sang makita nila si Jesus, si Pedro nagsiling: “Nagapangita ang tanan sa imo.” Indi luyag sang mga tawo sang Capernaum nga palakton si Jesus. Gin-apresyar nila ang iya nahimo sa ila! Apang nagkari bala si Jesus sa duta agod una sa tanan maghimo sing milagruso nga pagpang-ayo? Ano ang iya ginsiling?

Suno sa isa ka rekord sang Biblia, si Jesus nagsabat sa iya mga disipulo: “Makadto kita sa kasilingan nga mga banwa agod makawali man ako didto, kay bangod sini nagkari ako.” Bisan indi luyag sang katawhan nga palakton si Jesus, sia nagsiling sa ila: “Kinahanglan ko magwali sing maayong balita sang ginharian sang Dios sa iban nga mga siudad man, kay sa sining katuyoan ginpadala ako.”

Huo, nagkari si Jesus sa duta agod una sa tanan magbantala nahanungod sa Ginharian sang Dios nga magabindikar sang ngalan sang iya Amay kag magalubad sing dayon sang tanan nga balatian sang tawo. Apang, sa paghatag sing pamatuod nga ginpadala sia sang Dios, naghimo si Jesus sing milagruso nga mga pag-ayo. Sa amo man nga paagi si Moises, mga siglo sang una, naghimo sing mga milagro agod pamatod-an nga sia alagad sang Dios.

Karon, sang maghalin si Jesus sa Capernaum agod magbantala sa iban nga mga siudad, nag-upod sa iya ang iya apat kag disipulo. Ining apat amo sanday Pedro kag ang iya utod nga si Andres, kag si Juan kag ang iya utod nga si Santiago. Madumduman mo nga, sang semana nga nagligad, gin-agda sila nga mangin una nga mga kaupod ni Jesus sa paglakbay.

Ang pagbantala ni Jesus sa Galilea upod sa iya apat ka disipulo madinalag-on gid! Sa kamatuoran, ang balita nahanungod sa iya mga nahimoan naglapnag tubtob sa bug-os nga Siria. Daku nga kadam-an gikan sa Galilea, Judea, kag sa tabok sang Suba sang Jordan ang nagsunod kay Jesus kag sa iya mga disipulo. Marcos 1:35-39; Lucas 4:42, 43; Mateo 4:23-25; Exodo 4:1-9, 30, 31.

◆ Ano ang natabo pagkaaga sa tapos sang masako nga adlaw ni Jesus sa Capernaum?

◆ Ngaa ginpadala si Jesus sa duta, kag ano ang katuyoan sang iya mga milagro?

◆ Sin-o ang nag-upod kay Jesus sa iya pagbantala sa Galilea, kag ano ang resulta sang iya pagpanghikot?