Madumduman Mo Bala?

Nasapwan mo bala ang ulihi nga mga guwa sang Ang Lalantawan nga may praktikal nga kabilihanan sa imo? Nian ngaa indi pagtilawan ang imo memorya paagi sa masunod?

◻ Ano ang buot silingon ni Jesus sang nagsiling sia nga wala sing isa ang mangin disipulo niya kon indi niya ‘pagdumtan ang iya amay kag iloy kag asawa kag mga anak kag mga utod nga lalaki kag mga utod nga babayi, huo, bisan ang iya kaugalingon nga kalag’? (Lucas 14:26)

Indi buot silingon ni Jesus nga ang isa sang iya mga sumulunod dapat literal nga magadumot sang iya mga himata ukon sang iya kaugalingon nga kabuhi. Sa baylo, buot niya silingon nga ang disipulo dapat maghigugma sang iban ukon sang iya kabuhi nga kubos sang sa paghigugma niya kay Jesus.​—⁠1/1, pahina 8.

◻ Ano ang tatlo ka butang nga nag-amot sa kadalag-an sang misyonero nga buluhaton sang Saksi, sang nagligad kag karon?

Ang isa amo ang personal nga pagpakigsugilanon sa mga tawo sa ila puluy-an. Ikaduha amo ang direkta kag simple nga mensahe sang Ginharian pasad sa Biblia. Ang ikatlo amo ang katulad Cristo nga gugma nga ginpakita sang mga misyonero sa pagpakigsugilanon sa mga tawo.​—⁠1/1, pahina 14.

◻ Ngaa umalagi nga gindugang sang Dios ang Kasuguan nga katipan sa katipan ni Abraham?

Ang Kasuguan nga katipan nagapamatuod nga ang mga Israelinhon mga makasasala nga nagakinahanglan sing permanente nga saserdote kag himpit nga halad. Ginbantayan sini ang linya sang Binhi kag nagbulig sa pagkilala kon sin-o ina nga Binhi. Ginpakita man sini nga sa pila ka adlaw ang Dios may pungsod sang mga hari kag mga saserdote.​—⁠2/1, pahina 16.

◻ Ano ang pito ka progresibo nga balaan nga katipan nga nagadul-ong sa dayon nga mga pagpakamaayo para sa aton tanan?

Ang katipan sa Eden, ang katipan kay Abraham, ang Kasuguan nga katipan, ang katipan para sa saserdote kaangay ni Melquisedec, ang katipan sang Ginharian kay David, ang bag-ong katipan, kag ang Ginharian nga katipan.​—⁠2/1, pahina 19.

◻ Ang linibolibo ka pagkananuhaytuhay sa mga manuskrito sang Biblia nagapaluya bala sa pag-angkon sang Biblia nga Pulong sang Dios?

Wala. Ginasugiran kita sang mga eskolar sa Biblia nga halos ang tanan nga mga pagkananuhaytuhay diutay sing importansia sa teksto. Nagapalig-on lamang ini sa pamatuod sang pagkamasaligan sang mga Kasulatan. (Salmo 119:​105; 1 Pedro 1:25)​—⁠2/1, pahina 29, 30.

◻ Diin naghalin ang termino nga “agnostiko,” kag paano ini ginagamit sa Biblia?

Ang “agnostiko” naghalin sa Griegong tinaga nga aʹgno·stos, nga nagakahulugan sing “wala makilal-i.” Gingamit ni Pablo ang dagway sini sa iya pamulongpulong sa mga taga-Atenas sang ginpatuhuyan niya ang isa ka pagano nga halaran nga gindedikar sa “Wala Makilal-i nga Dios.” (Binuhatan 17:23)​—⁠2/15, pahina 5.

◻ Ano ang himuon naton kon ang pila ka Makasulatanhon nga panuytoy mahimo nga bukas sa lainlain nga opinyon?

Dapat naton ipakita ang mapainubuson nga pagkamatinumanon nga ginpakita sang dumaan nga mga Cristiano, ginabaton ang mga desisyon kag mga panuytoy sang kongregasyon sang Dios. (Binuhatan 15:​6-29)​—⁠2/15, pahina 20.

◻ Ano ang buot silingon ni Jesus sang nagsiling sia: “Maghimo kamo sing mga abyan paagi sa manggad nga dimatarong, agod nga kon madula ini mabaton nila kamo sa mga puluy-an nga walay katapusan”? (Lucas 16:9)

Dapat naton gamiton sing hanuot ang manggad sa pagsakdag sa mga interes sang Ginharian kag busa ginapalambo ang pagpakig-abyan kay Jehova kag sa iya Anak. Sila lamang ang makaaman sing lugar para sa aton sa langit ukon sa paraiso nga duta kon ang materyal nga manggad mapaslawan ukon madula.​—⁠3/1, pahina 9.

◻ Ano ang tatlo ka butang nga ginakinahanglan sa bahin naton agod makabenepisyo kita gikan sa paghangop nga ginaaman ni Jehova?

Dapat naton apresyahon ang organisasyon ni Jehova; dapat naton ton-an sing tayuyon ang Pulong sang Dios kag ang bulig nga ginaaman nga nagabulig sa aton nga mahangpan ini; kag dapat naton pamalandungan kon ano ang naton-an naton kag kon paano ini iaplikar sa aton matag-adlaw nga pagkabuhi.​—⁠3/15, pahina 14.

◻ Ngaa ang katawhan sang dumaan nga Israel nagpanghikot upod ang daku nga kakulang sing paghangop?

Wala nila ginpamalandungi sing mainapresyahon ang tanan nga butang nga ginhimo ni Jehova para sa ila. (Salmo 106:​7, 13)​—⁠3/15, pahina 17.

◻ Ano ang ginarepresentar sang “kadamuon sang mga hangaway” nga ginasiling sang Bugna 9:​16?

Ining simbuliko nga mga kabayo nagarepresentar indi lamang sa naga­diu­tay nga nagkalabilin sang mga hinaplas kundi sa nagadamo man kag makusog nga “dakung kadam-an” sang “iban nga mga karnero.” (Bugna 7:​9; Juan 10:16)​—⁠4/1, pahina 19.