Paano Mangin Malipayon ang Imo Pamilya?—Bahin 2

Ang kabataan regalo halin kay Jehova. Gusto niya nga atipanon sang mga ginikanan ina nga regalo. Si Jehova naghatag sing laygay nga makabulig sa mga ginikanan nga mahimo ini. Naglaygay man sia sa kabataan kon paano sila makabulig para mangin malipayon ang ila pamilya.

1. Ano ang laygay ni Jehova para sa mga ginikanan?

Gusto ni Jehova nga palanggaon sang mga ginikanan ang ila kabataan kag kon posible pirme maghatag sing tion sa ila. Gusto man niya nga proteksionan sang mga ginikanan ang ila kabataan kag tudluan sila base sa mga prinsipio sa Biblia. (Hulubaton 1:8) Nagsiling sia sa mga amay: ‘Padayon ninyo nga padakua ang inyo mga anak sa laygay ni Jehova.’ (Basaha ang Efeso 6:4.) Nalipay si Jehova kon ginasunod sang mga ginikanan ang iya laygay sa pagpadaku sang ila kabataan kag wala nila ginahatag ini nga responsibilidad sa iban.

2. Ano ang laygay ni Jehova para sa kabataan?

Si Jehova nagsugo sa kabataan: “Mangin matinumanon kamo sa inyo mga ginikanan.” (Basaha ang Colosas 3:20.) Kon ginarespeto kag ginatuman sang kabataan ang ila mga ginikanan, mapalipay nila si Jehova kag ang ila mga ginikanan. (Hulubaton 23:22-25) Maayo gid nga halimbawa si Jesus sang bata pa sia. Bisan perpekto sia, gintuman niya kag ginrespeto ang iya mga ginikanan.—Lucas 2:51, 52.

3. Paano kamo mangin malapit sa Dios bilang pamilya?

Kon isa ikaw ka ginikanan, gusto mo man nga palanggaon sang imo kabataan si Jehova. Paano mo mahimo ini? Paagi sa pagsunod sa ginasiling sang Biblia: “Ipatudok ninyo [ang pulong ni Jehova] sa inyo anak kag ihambal ninyo ini kon nagapungko kamo sa inyo balay kag kon nagalakat kamo sa dalan.” (Deuteronomio 6:7) Ang termino nga “ipatudok” nagakahulugan sing sulitsulit nga pagtudlo. Siguro kabalo ka gid nga dapat mo sulitsuliton ang isa ka butang para madumduman ini sang imo kabataan. Ginapakita sini nga bersikulo nga dapat ka pirme maghatag sing tion para tudluan ang imo kabataan parte kay Jehova. Maayo gid nga mag-iskedyul kamo bilang pamilya nga tun-an ang Biblia kada semana. Kon wala kamo sing bata, makabenepisyo kamo gihapon kon may iskedyul kamo sa pagtuon sa Pulong sang Dios kada semana.

USISAA PA GID

4. Mapinalanggaon nga disiplinaha ang imo kabataan

Indi mahapos ang pagdisiplina sang isa ka bata. Paano makabulig ang Biblia? Basaha ang Santiago 1:19, 20, dayon binagbinaga ini nga mga pamangkot:

• Paano mapakita sang mga ginikanan nga palangga nila ang ila kabataan kon nagaistorya sila sa ila?

• Ngaa indi dapat pagdisiplinahon sang ginikanan ang iya bata kon akig sia?a

5. Proteksioni ang imo kabataan

Para maproteksionan ang imo kabataan, importante nga ipaathag mo sa kada isa sa ila ang parte sa sex. Pero mahimo masaw-ahan ka. Tan-awa ang VIDEO, dayon binagbinaga ang masunod nga mga pamangkot.

VIDEO: Amligi ang Imo Kabataan sa Kon Ano ang Malain (2:58)

• Ngaa indi mahapos sa pila ka ginikanan nga istoryahan ang parte sa sex upod sa ila kabataan?

• Paano ginpaathag sang pila ka ginikanan sa ila kabataan ang parte sa sex?

Suno sa gintagna, magalain pa gid ang kalibutan ni Satanas. Basaha ang 2 Timoteo 3:1, 13, dayon binagbinaga ini nga pamangkot:

• Ang pila sa malaut nga mga tawo nga ginsiling sang bersikulo 13 seksuwal nga nagaabuso sa kabataan. Gani, ngaa importante nga ipaathag sang mga ginikanan sa ila kabataan ang parte sa sex kag kon paano nila maproteksionan ang ila kaugalingon sa mga nagapang-abuso?

Kabalo ka bala?

Ang mga Saksi ni Jehova nagahimo sing mga publikasyon nga makabulig sa mga ginikanan para ipaathag sa ila kabataan ang parte sa sex kag kon paano sila maproteksionan sa mga nagapang-abuso. Halimbawa, tan-awa ang:

• Proteksioni ang Inyo Kabataan (video)

• Magtuon Gikan sa Daku nga Manunudlo, kapitulo 10 kag 32

• “Tudlui ang Imo Bata Parte sa Sex” (Magmata! Num. 5 2016)

6. Respetuha ang imo mga ginikanan

VIDEO: Paano Ko Istoryahon ang Akon mga Ginikanan? (2:19)

• Kon nagaistorya ang pamatan-on sa iya mga ginikanan, ngaa maayo gid nga may pagrespeto sia?

• Paano mapakita sang pamatan-on nga ginarespeto niya ang iya mga ginikanan kon nagaistorya sa ila?

Basaha ang Hulubaton 1:8, dayon binagbinaga ini nga pamangkot:

• Ano dapat ang reaksion sang pamatan-on kon ginatudluan sia sang iya mga ginikanan?

7. Simbaha si Jehova bilang pamilya

Ang mga pamilya nga Saksi ni Jehova may iskedyul kada semana para magsimba sing ululupod. Ano ang ginahimo nila sa ila pangpamilya nga pagsimba? Tan-awa ang VIDEO, dayon binagbinaga ang masunod nga mga pamangkot.

VIDEO: Pangpamilya nga Pagsimba—Mga Kabudlayan kag mga Benepisyo (8:04)

• Ano ang himuon sang pamilya para mangin regular ang ila Pangpamilya nga Pagsimba?

• Ano ang himuon sang ginikanan para mangin mapuslanon kag makalilipay ang ila pangpamilya nga pagsimba?—Tan-awa ang piktyur sa umpisa sini nga leksion.

• Ano ang posible nga rason nga mabudlay sa inyo ang pagtuon sing ululupod?

Sa Israel sang una, gusto ni Jehova nga istoryahan pirme sang mga pamilya ang parte sa Kasulatan. Basaha ang Deuteronomio 6:6, 7, dayon binagbinaga ini nga pamangkot:

• Paano mo sundon ini nga prinsipio?

Mga puede himuon sa pangpamilya nga pagsimba:

• Maghanda para sa mga miting sang kongregasyon.

• Basahon kag istoryahan ang isa ka kasaysayan sa Biblia nga nanamian sang imo pamilya.

• Kon may gamay ka nga bata, i-download ukon i-print ang mga hilimuon para sa kabataan sa jw.org.

• Kon may tin-edyer ka nga bata, binagbinaga ninyo ang mga artikulo para sa mga tin-edyer sa jw.org.

• Idrama ang isa ka istorya sa Biblia upod ang imo kabataan.

• Tan-awon kag binagbinagon ang isa ka video sa jw.org.

SUMARYO

Gusto ni Jehova nga palanggaon, disiplinahon, kag proteksionan sang mga ginikanan ang ila kabataan; respetuhon kag tumanon sang kabataan ang ila mga ginikanan; kag simbahon sia sang mga pamilya sing ululupod.

Rebyu

• Paano disiplinahon kag proteksionan sang mga ginikanan ang ila kabataan?

• Paano mapakita sang kabataan nga ginarespeto nila ang ila mga ginikanan?

• Ano ang mga benepisyo kon may iskedyul kada semana ang pamilya sa pagsimba sing ululupod?

DUGANG NGA IMPORMASYON

Ano nga mga leksion ang dapat matun-an sang imo kabataan?

“Anom ka Leksion nga Dapat Matun-an sang Kabataan” (Magmata! Num. 2 2019)

Hibalua ang laygay sang Biblia nga makabulig sa mga nagaatipan sa tigulang nga mga ginikanan.

“Ano ang Ginasiling sang Biblia Parte sa Pag-atipan sa Tigulang nga mga Ginikanan?” (Artikulo sa website)

Tan-awa kon paano ang isa ka lalaki nga indi sadto kabalo magpadaku sang kabataan nangin maayo nga amay.

Gintudluan Kami ni Jehova Kon Paano Atipanon ang Amon Pamilya (5:58)

Binagbinaga kon paano mapabakod sang mga amay ang ila relasyon sa ila bata nga lalaki.

“Paano ang mga Amay Makapabilin nga Suod sa Ila Bata nga Lalaki?” (Ang Lalantawan, Nobiembre 1, 2011)