Ang Kabuhi kag Ministeryo ni Jesus

Dugang nga Laygay sa Pagtadlong

SAMTANG yara gihapon sa isa ka balay sa Capernaum, may butang nga ginhambalan luwas sa pagbaisay sang mga apostoles kon sin-o ang labing daku. Ini nga hitabo mahimo man nga natabo pagbalik nila sa Capernaum, sang wala pa si Jesus. Si apostol Juan nagreport: “Amon nakita ang isa nga nagasubol sang mga yawa sa imo ngalan kag gindumilian namon sia, bangod nga wala sia nagasunod sa aton.”

Maathag nga ginatamod ni Juan ang mga apostoles subong eksklusibo, nagauyat sing titulo nga grupo sang mga manugbulong. Gani ginbatyag niya nga ang tawo wala nagabuhat sing nagakaigo sang gamhanan nga mga buhat bangod indi sia katapo sang ila grupo.

Apang, si Jesus nagalaygay: “Dili sia pagdumilii, kay walay tawo nga nagahimo sing isa ka buhat nga gamhanan sa akon ngalan kag sa madali makahambal sing malaut sa akon; kay ang indi batok sa aton apin sa aton. Kay ang bisan sin-o nga nagapainum sa inyo sing isa ka tagayan nga tubig bangod nga kamo iya ni Cristo, sa pagkamatuod nagasiling ako sa inyo, indi niya nga mas-a madula ang iya balus.”

Indi kinahanglan para sa sining tawo nga magsunod kay Jesus agod mangin apin sa iya. Wala pa matukod ang Cristianong kongregasyon, gani ang indi niya pagkamangin katapo sang ila grupo wala nagakahulugan nga yara sia sa lain nga kongregasyon. Ang tawo nagatuo sa ngalan ni Jesus kag gani nagmadinalag-on sa pagsubol sa mga yawa. Nagahimo sia sing butang nga kalahamut-an kon ipaanggid sa ginsiling ni Jesus nga takus sang balus. Bangod sini, ginapakita ni Jesus, indi niya nga mas-a madula ang iya balus.

Apang kamusta kon ang isa nasandad sa pinamulong kag mga ginabuhat sang mga apostoles? Serioso gid ini! Si Jesus nagsiling: “Ang bisan sin-o nga nagapasandad sa isa sining mga magamay nga nagatuo sa akon, maayo pa sa iya nga bitayan sa liog sing dakung bato sang galingan kag itagbong sa dagat.”

Si Jesus nagsiling nga dapat kuhaon sang iya mga sumulunod sa ila kabuhi ang bisan ano nga mahal sa ila kaangay sang kamot, tiil, ukon mata nga mahimo nagapasandad sa ila. Maayo pa nga wala sining hamili nga butang kag makasulod sa Ginharian sang Dios sang sa magtuo sa sini kag itagbong sa Gehenna (nagadabdab nga halabuyan sing basura malapit sa Jerusalem), nga nagakahulugan sing dayon nga kalaglagan.

Nagpaandam man si Jesus: “Andam kamo nga indi magtamay sang isa sining mga magamay; kay nagasiling ako sa inyo nga sa langit ang ila mga anghel nagatulok sing dayon sa nawong sang akon Amay nga yara sa langit.” Nian gin-ilustrar niya ang pagkahamili sang “mga magamay” paagi sa pagsugid nahanungod sa isa ka tawo nga nagapanag-iya sing 100 ka karnero apang nagtalang ang isa sa ila. Bayaan niya ang 99 agod pangitaon ang isa nga nagtalang, paathag ni Jesus, kag kon makita niya ini nagakalipay sia bangod sini sing labi pa sadtong sang sa 99. “Subong man,” hinakop nian ni Jesus, “indi kabubut-on sang akon Amay nga yara sa langit nga mawala ang isa sining mga magamay.”

Ayhan nagadumdom sang pagbaisay sang mga apostoles sa tunga nila, si Jesus naglaygay: “Maghupot kamo sing asin sa inyo kaugalingon, kag maghidaitay.” Ang wala sing sabor nga pagkaon labi nga ginapanamit sang asin. Gani, ang malaragwayon nga asin nagahimo sa ginasiling sang isa nga mas madali batunon. Ang pagkanaasinan nagabulig sa pagtipig sang paghidait.

Apang bangod sang tawhanon nga pagkadihimpit, kon kaisa nagakatabo ang serioso nga pagbaisay. Naghatag man si Jesus sing mga panuytoy sa paglubad sini. “Kon ang imo utod makasala sa imo,” siling ni Jesus, “kadto ka kag isugid sa iya ang sayop niya sa tunga ninyo nga duha lamang. Kon magpamati sia sa imo, nadaug mo ang imo utod.” Kon indi sia magpamati, laygay ni Jesus, “dala ka sing isa ukon duha pa, agod nga sa baba sang duha ukon tatlo ka saksi mapalig-on ang tagsa ka pulong.”

Subong katapusan lamang nga paagi, si Jesus nagsiling, isugid mo ini “sa kongregasyon,” kon sayuron, sa responsable nga mga manugtatap sang kongregasyon nga nagahimo sing hudisyal nga desisyon. Kon ang nakasala indi magpamati sa desisyon nila, si Jesus naghinakop, “bilangon mo sia nga Gentil kag manugsukot sang buhis.”

Kon nagahimo sing desisyon, ang mga manugtatap dapat magsunod sing maayo sa mga instruksion sa Pulong ni Jehova. Gani, kon masapwan nila ang indibiduwal nga nakasala kag takus silutan, ang paghukom ‘gapuson sa langit.’ Kag kon ini “hubaran sa duta,” nga nagakahulugan nga ang isa wala sing sala, “hubaran [na ini] sa langit.” Sa sinang hudisyal nga pag-usisa, si Jesus nagsiling, “kay diin ang duha ukon tatlo nagatipon sa akon ngalan, yara ako sa tunga nila.” Mateo 18:6-20; Marcos 9:38-50; Lucas 9:49, 50.

◆ Ngaa indi kinahanglan sang kaadlawan ni Jesus ang pag-upod sa iya?

◆ Daw ano ka serioso ang pagpasandad sa magamay, kag paano gin-ilustrar ni Jesus ang importansia sinang magamay?

◆ Ano ayhan ang nagdul-ong sa paglaygay ni Jesus sa mga apostoles nga mag-asin sa tunga nila?

◆ Ano ang kahulugan sang ‘paggapus’ kag ‘paghubad’?