Nagkaon Upod sa Isa ka Fariseo

Samtang sa Judea, ginbaton ni Jesus ang imbitasyon sang isa ka Fariseo nga magkaon. Mahimo nga sa adlaw ini. (Lucas 11:37, 38; ipaanggid ang Lucas 14:12.) Antes magkaon, nanghugas ang mga Fariseo sing kamot asta sa ila siko suno sa ila ritwal. Pero wala ini ginhimo ni Jesus. (Mateo 15:1, 2) Wala sing malapas sa Kasuguan sang Dios kon himuon ini, pero wala ini ginapatuman sang Dios.

Nakibot ang Fariseo nga wala ginasunod ni Jesus ini nga tradisyon. Nasat-uman ini ni Jesus kag sia nagsiling: “Kamo nga mga Fariseo, ginatinluan ninyo ang gua lang nga bahin sang kopa kag pinggan, apang ang sulod sang inyo tagipusuon puno sang kakagod kag kalautan. Mga indi makatarunganon! Indi bala nga ang isa nga naghimo sang gua amo man ang naghimo sang sulod?”—Lucas 11:39, 40.

Ang isyu amo ang relihioso nga pagkasalimpapaw indi ang pagpanghugas sang kamot antes magkaon. Wala matinluan sang mga Fariseo kag sang iban ang ila mga tagipusuon gikan sa kalautan bisan pa nga nagapanghugas sila sing kamot suno sa ila ritwal. Gani ginlaygayan sila ni Jesus: “Maghatag kamo sing dulot tungod sa kaluoy paagi sa paghatag sing tinagipusuon. Kon himuon ninyo ini, mangin matinlo kamo.” (Lucas 11:41) Matuod gid ini! Ang paghatag dapat naghalin sa tagipusuon nga mahigugmaon, indi bangod sang handum nga dayawon sang iban paagi sa pagpakunokuno nga matarong.

Indi buot silingon nga wala nagahatag ini nga mga tawo. Si Jesus nagsiling: “Nagahatag kamo sang ikanapulo sang hierbabuena kag sang ruda kag sang iban pa nga tanom sa hardin, apang ginapatumbayaan ninyo ang katarungan kag ang gugma sa Dios! Ini dapat ninyo himuon, apang indi pagpatumbayai ang katarungan kag ang gugma sa Dios.” (Lucas 11:42) Ginapatuman sa Kasuguan sang Dios nga magbayad sang ikanapulo nga bahin sang patubas. (Deuteronomio 14:22) Nagalakip ini sang hierbabuena kag sang ruda, mga tanom nga ginagamit sa pagtimpla sang pagkaon. Estrikto nga nagabayad ang mga Fariseo sang ikanapulo sini nga mga tanom, pero kamusta ang mas importante nga ginapatuman sang Kasuguan, pareho sang pagpakita sang hustisya kag mangin maugdang sa atubangan sang Dios?—Miqueas 6:8.

Si Jesus padayon nga nagsiling: “Makaluluoy kamo nga mga Fariseo, bangod luyag ninyo magpungko sa nahauna nga mga pulungkuan sa mga sinagoga kag luyag ninyo tamyawon sa mga tiendahan! Makaluluoy kamo, bangod kaangay kamo sang mga lulubngan nga wala sing tanda nga ginatapakan lang sang mga tawo nga wala makahibalo!” (Lucas 11:43, 44) Huo, mahimo makasandad sa sini nga mga lulubngan ang mga tawo kag mangin indi matinlo suno sa kasuguan. Ginapadaku diri ni Jesus nga indi hilmunon nga mahigko ang mga Fariseo.—Mateo 23:27.

Nagreklamo ang isa ka tawo nga sampaton sa Kasuguan sang Dios: “Manunudlo, ginainsultuhan mo man kami sa imo ginhambal.” Pero dapat marealisar sini nga mga tawo nga wala nila mabuligan ang katawhan. Nagsiling si Jesus: “Makaluluoy man kamo nga mga sampaton sa Kasuguan, bangod nagahimo kamo sing mga pagsulundan nga kaangay sang mabug-at nga lulan nga ginapapas-an sa mga tawo, apang kamo mismo indi luyag magtandog sini bisan sang inyo tudlo! Makaluluoy kamo, bangod ginatukod ninyo ang mga lulubngan sang mga manalagna, apang ang inyo mga katigulangan ang nagpatay sa ila!”—Lucas 11:45-47.

Ang mga lulan nga ginapatuhuyan ni Jesus amo ang pinalatonlaton nga mga tradisyon kag ang interpretasyon sang mga Fariseo sa Kasuguan. Wala nila ginapahapos ang kabuhi sang mga tawo. Sa baylo, ginapilit nila nga dapat tumanon sang tanan ang nangin mabug-at nga mga palas-anon. Ginpatay sang ila mga katigulangan ang mga manalagna sang Dios sugod kay Abel. Kag subong, ginailog nila ang panimuot kag mga buhat sang ila mga katigulangan paagi sa pagpadungog kuno sa mga manalagna kay gintukuran nila sila sang mga lulubngan. Ginatinguhaan pa gani nila nga patyon ang panguna nga Manalagna sang Dios. Si Jesus nagsiling nga sukton sang Dios ini nga kaliwatan. Kag nangin matuod gid ini pagligad sang mga 38 ka tuig, sang 70 C.E.

Nagsiling pa gid si Jesus: “Makaluluoy kamo nga mga sampaton sa Kasuguan, bangod ginkuha ninyo ang yabi sa ihibalo. Kamo mismo wala magsulod, kag ginabalabagan ninyo ang mga nagasulod!” (Lucas 11:52) Sa baylo nga ipaathag nila ang Pulong sang Dios, ginakuhaan nila sing kahigayunan ang mga tawo nga mahibaluan kag mahangpan ini.

Ano ang reaksion sang mga Fariseo kag mga escriba? Sang manughalin na si Jesus, akig nga ginpamatukan nila sia kag ginpaarakan sang mga pamangkot. Wala sila nagapamangkot para makatuon. Sa baylo, luyag nila nga tiplangon si Jesus sa pagsiling sing isa ka butang nga puede sia maaresto.