Ang Pagtamod sang Biblia

Importante Ka sa mga Mata sang Dios!

“SA DAKU NGA BAHIN SANG AKON KABUHI, NAGBATYAG AKO NGA WALA SING KABILINGGAN,” SULAT SANG ISA KA CRISTIANONG BABAYI. “BISAN ANO MAN KA DAKU ANG AKON PAGHIGUGMA KAY JEHOVA UKON ANO MAN KA DAKU ANG AKON PANIKASOG NGA ALAGARON SIA, PIRME AKO NAGABATYAG NGA INDI INI BASTANTE.”

MAY kilala ka bala nga nagapakigsumpong sa mabaskog nga mga balatyagon nga wala sing ikasarang ukon wala sing kabilinggan? Ukon ikaw bala mismo may amo sini nga balatyagon kon kaisa? Ini nga mga balatyagon kinaandan, bisan sa tunga sang matutom nga mga sumilimba sang Dios. Wala sing isa nga indi apektado sang mga epekto sang pagkabuhi sa sining “makahalanguyos nga tion nga mabudlay atubangon.” Madamo ang nakaeksperiensia sing pagpatumbaya kag pag-abuso gikan sa mga indibiduwal nga “wala sing pagpugong sa kaugalingon, mga mabangis, mga wala sing gugma sa kaayuhan”—mga kinaiya nga lapnag sa “katapusan nga mga adlaw.” (2 Timoteo 3:1-5) Ining masakit nga mga eksperiensia mahimo nga nagbilin sing madalom nga pinalian sa emosyon, nga nagtuga sing mga balatyagon nga wala gid sing kabilinggan.

Sa iban nga mga hitabo, ang negatibo nga mga balatyagon mahimo nga resulta sang pagpahamtang sang mga tawo sing tuman kataas nga talaksan para sa ila kaugalingon. Bangod indi malab-ot ining mga talaksan, nagbatyag sila sing labi nga wala gid sila sing kabilinggan. Bisan ano man ang rason, ang mga nagapakigsumpong sa mga balatyagon sang pagkawalay kabilinggan mahimo mabudlayan sa paghangop kon ngaa ang Dios—ukon ang iban pa, may kaangtanan sini—nagahigugma sa ila. Sa pagkamatuod, mahimo gani sila magpati nga indi gid sila hiligugmaon.

Apang indi amo sina ang balatyagon ni Jehova nga Dios! Sa iya Pulong, si Jehova nagapaandam sa aton nga magbantay batok sa “malimbungon nga mga taktika” sang iya Kaaway, si Satanas nga Yawa. (Efeso 6:11, Jewish New Testament) Si Satanas nagagamit sing malimbungon nga mga taktika agod pauntaton kita sa pagsimba sa aton Dios. Tungod sina, si Satanas nagapalig-on sang balatyagon nga wala kita sing kabilinggan, nga si Jehova indi gid magahigugma sa aton. Apang si Satanas “butigon”—sa katunayan, “amay sang kabutigan.” (Juan 8:44) Busa, indi kita dapat magpalimbong sa iya malimbungon nga mga taktika! Sa Biblia, si Jehova nagahambal para sa iya kaugalingon, nagapasalig sa aton sang aton kabilihanan sa iya mga mata.

Isa ka Timbang nga Pagtamod sa Aton Kabilihanan

Ang Biblia nagapaandam tuhoy sa negatibo nga epekto sang pagluya sing buot sa aton. Ang Hulubaton 24:10 nagasiling: “Ginpakita mo bala nga naluyahan ka mismo sa adlaw sang kasisit-an? Ang imo kusog mangin diutay.” Ang madugay na nga negatibo nga mga balatyagon sa sulod naton sarang makadula sang aton kusog, nagapabatyag sa aton nga maluya kag mahuyang. Nakapat-od ikaw nga nakahibalo gid sini si Satanas. Mabudlay gid kon ang aton tagipusuon ginasit-an sing mga balatyagon sang pagkawalay kabilinggan. Apang, kon hingalitan ni Satanas ini nga mga balatyagon, labi pa nga nagabudlay ini nga kahimtangan.

Importante, kon amo, nga may yara kita maayo, timbang nga pagtamod tuhoy sa aton kabilihanan. “Nagasiling ako sa tagsatagsa sa inyo,” laygay ni apostol Pablo, “nga dili maghunahuna sang iya kaugalingon sing mataas pa sa dapat niya paghunahunaon; kundi maghunahuna agod may maligdong nga hunahuna.” (Roma 12:3) Ang isa pa ka badbad nagasiling: “Nagasiling ako sa kada isa sa inyo nga dili pagbulubantaon ang kaugalingon sing labaw sa iya matuod nga balor, kundi bantaon sing nagakaigo ang kaugalingon.” (Charles B. Williams) Gani ang kasulatan nagapalig-on sa aton nga tamdon sing timbang ang aton kaugalingon. Sa isa ka bahin, dapat kita magbantay batok sa pagkamatinaastaason; sa pihak nga bahin, dapat kita magtinguha nga indi magsobra sa kabaliskaran sini, kay ginapakita ni Pablo nga agod matigayon ang maligdong nga hunahuna, dapat naton hunahunaon ang aton kaugalingon nga may importansia. Huo, sa idalom sang pag-inspirar sang Dios, ginapakita ni Pablo nga ang kada isa sa aton importante sa mga mata ni Jehova.

Ang timbang nga pagpabalor sa kaugalingon makita man sa pinamulong ni Jesus sang nagsiling sia: “Higugmaa ang imo isigkatawo subong sang imo kaugalingon.” (Mateo 22:39) Ang mga tinaga “subong sang imo kaugalingon” nagapakita nga may yara kita dapat balatyagon nga ginapabaloran ang kaugalingon, ukon ginatahod ang kaugalingon. Matuod, may mga kakulangan kita kag mga kasaypanan. Apang kon nagahimulat kita nga pahamut-an ang Dios, nagakasubo sa aton mga kakulangan, kag nagapangayo sang iya kapatawaran, sa gihapon mapabaloran naton ang aton kaugalingon. Ang aton mamulayon nga tagipusuon mahimo magapamilit sing tuhay, apang dumduma, “ang Dios daku pa sa aton tagipusuon.” (1 Juan 3:20) Sa iban nga hambal, si Jehova nagatan-aw sa aton sa paagi nga ayhan tuhay sa kon paano naton ginatan-aw ang aton kaugalingon.

Buong nga mga Tagipusuon, Nadugmok nga mga Espiritu

Si salmista David nagsulat: “Si Jehova malapit sa mga buong sing tagipusuon; kag ginaluwas niya ang mga nadugmok sa espiritu.” (Salmo 34:18) Nagakomento sa sining bersikulo, ang Matthew Henry’s Commentary on the Whole Bible nagasiling: “Kinaiya sang mga matarong . . . nga sila buong sing tagipusuon kag mahinulsulon sing espiritu, nga amo, ginpaubos bangod sang sala, kag nagabatyag nga wala sing kabilinggan; kubos sila sa ila mismo mga mata, kag wala sing pagsalig sa ila kaugalingon nga kinaiya.”

Ang mga “buong sing tagipusuon” ukon “nadugmok sa espiritu” mahimo magbatyag nga si Jehova malayo kag indi gid sila importante agod pagaulikdan sila ni Jehova. Apang indi ina matuod. Ang pinamulong ni David nagapasalig sa aton nga si Jehova wala nagasikway sa mga “kubos sa ila mismo mga mata.” Ang aton mainawaon nga Dios nakahibalo nga sa sini nga mga tion labi pa gid nga kinahanglan naton sia, kag malapit sia.

Binagbinaga ang isa ka halimbawa. Sang nagligad nga pila ka tuig, dalidali nga gindala sang isa ka iloy ang iya dos-anyos nga anak nga lalaki sa ospital bangod sang grabe nga barukoy. Sa tapos matan-aw ang bata, ginpahibalo sang mga doktor ang iloy nga ang bata dapat maospital sing isa ka gab-i. Diin ang iloy nagpaligad sadto nga gab-i? Sa isa ka bangko sa hulot sang ospital, nga tupad sang katre sang iya anak. Ang iya diutay nga anak nga lalaki nagamasakit, kag dapat nga yara sia sa tupad niya. Pat-od gid nga labi pa sa sina ang mapaabot naton sa aton mahigugmaon nga Amay, nga sa iya larawan ginhimo kita! (Genesis 1:26; Isaias 49:15) Ang makatalandog nga pinamulong sang Salmo 34:18 nagapasalig sa aton nga kon kita “buong sing tagipusuon,” si Jehova, subong sang isa ka mahigugmaon nga ginikanan, “malapit”—pirme nagabantay, nagaatipan, kag handa sa pagbulig.—Salmo 147:1, 3.

“Mahal Pa Kamo sa Madamo nga Maya”

Sa tion sang iya ministeryo sa duta, madamo sing ginpahayag si Jesus tuhoy sa panghunahuna kag balatyagon ni Jehova, lakip na ang kon ano ang balatyagon ni Jehova sa Iya dutan-on nga mga alagad. Indi lamang makaisa nga ginpasalig ni Jesus ang iya mga disipulo sang ila kabilihanan sa mga mata ni Jehova.—Mateo 6:26; 12:12.

Halimbawa, nagailustrar sang indibiduwal nga bili sang kada disipulo niya, si Jesus nagsiling: “Wala bala ginabaligya ang duha ka maya sa isa ka sensilyo nga diutay sing balor? Apang wala sing isa sa ila nga mahulog sa duta nga indi mahibaluan sang inyo Amay. Apang bisan ang mga buhok sa inyo ulo naisip na tanan. Busa dili kamo mahadlok: mahal pa kamo sa madamo nga maya.” (Mateo 10:29-31) Binagbinaga kon ano ang epekto sadto nga pinamulong sa mga tagpalamati ni Jesus sadtong nahaunang siglo.

Ang mga maya maathag gid nga nalakip sa pinakabarato sa tanan nga pispis nga ginakaon. Ining magagmay nga mga pispis masami nga ginahimulbulan, ginaasal, kag ginasugba subong sang kinihad nga karne sang baka. Pat-od gid nga nakita ni Jesus ang imol nga kababayin-an sa merkado nga nagaisip sang ila sensilyo agod tan-awon kon pila ka maya ang mahimo nila mabakal. Ang mga pispis ginaisip nga tuman ka diutay ang bili nga sa isa ka sensilyo nga manubo sing balor (sing literal, isa ka assarion, nga kubos pa sa lima ka sentimo ang balor), ang isa mahimo makabakal sing duha ka maya.

Ginsaysay liwat ni Jesus ini nga ilustrasyon mga pila ka tion sang ulihi—apang may diutay nga kinatuhayan. Suno sa Lucas 12:6, si Jesus nagsiling: “Ang lima ka maya ginabaligya sa duha ka sensilyo nga may diutay nga balor, indi bala?” Hunahunaa lamang ini. Sa isa ka sensilyo nga diutay sing balor, ang isa makabakal sing duha ka maya. Apang kon handa sia sa paggasto sing duha ka sensilyo, indi lamang apat kundi lima ka maya ang mabakal niya. Ang sobra nga pispis ginapaaman lamang subong nga daw wala gid ini sing balor. “Apang,” siling ni Jesus, “wala sing isa sa ila [bisan ang isa nga ginpaaman lamang] nga malipatan sa atubangan sang Dios.” Nagaaplikar sang ilustrasyon, si Jesus naghinakop: “Mahal pa kamo sa madamo nga maya.” (Lucas 12:7) Mahimo gid nga napalig-on ang iya tagpalamati sadto nga pinamulong!

Nahangpan mo bala ang kahulugan sang mahinuklugon nga ilustrasyon ni Jesus? Kon ginakabig ni Jehova bisan ang magagmay nga mga pispis nga may balor, daw ano pa gid ka mahal sa iya ang iya dutan-on nga mga alagad! Para kay Jehova, wala sing isa sa aton nga indi mamulalungan sa kadam-an. Ang kada isa sa aton importante kaayo kay Jehova nga makita niya bisan ang pinakadiutay nga detalye tuhoy sa aton—ang mga buhok mismo sang aton ulo naisip sing isaisa.

Sa pagkamatuod, si Satanas padayon nga magagamit sang iya “malimbungon nga mga taktika”—subong sang paghingalit sa balatyagon nga wala sing kabilinggan—agod pauntaton kita sa pagsimba kay Jehova. Apang indi pagpadauga si Satanas! Dumduma ang Cristianong babayi nga ginhinambitan sa umpisa. Nabuligan sia sang isa ka artikulo sang magasin nga Lalantawan nga nagpaandam tuhoy sa mga panikasog ni Satanas nga hingalitan ang aton balatyagon.a Sia nagsiling: “Wala ko gid mahibalui nga ginagamit gali ni Satanas ang akon balatyagon agod paluyahon ako. Ang pagkahibalo sini nagpahulag sa akon nga batuan ining mga balatyagon. Karon masarangan ko na ining mga pagsalakay ni Satanas, nga may pagsalig.”

Si Jehova “nakahibalo sang tanan nga butang.” (1 Juan 3:20) Huo, nakahibalo sia sang aton ginabatas karon. Nakahibalo man sia sang aton naagihan sang nagligad nga mahimo nga nagdugmok sang aton pagtahod sa kaugalingon. Dumduma, ang pagtamod ni Jehova sa aton amo ang importante! Bisan kon daw ano man ka pagkadihiligugmaon ukon pagkawalay kabilinggan ang aton mahimo hunahunaon sa aton kaugalingon, si Jehova nagapasalig sa aton nga ang kada isa sang iya mga alagad importante sa iya. Masaligan naton ang pinamulong ni Jehova, kay, indi subong sang iya Kaaway, ang Dios “indi makabutig.”—Tito 1:2.

[Footnote]

[Kapsion sa pahina 12]

Kaangay sang isa ka mahigugmaon nga ginikanan, si Jehova malapit sa mga masinulub-on sing tagipusuon

[Mga Laragway sa pahina 13]

Kon si Jehova wala nagakalipat sa maya, paano niya ikaw malipatan?

[Mga Kapsion]

Lydekker

Illustrated Natural History