Pagpangita sing mga Bahandi nga “Natago sing Maayo sa Iya”
“Natago sing maayo sa iya ang tanan nga bahandi sang kaalam kag ihibalo.”—COL. 2:3.
1, 2. (a) Ano nga mga bahandi ang natukiban sang 1922, kag diin na ini subong? (b) Ano ang pangagda sang Pulong sang Dios para sa tanan?
ANG pagkatukib sa natago nga mga bahandi masami nangin headline sa mga balita. Halimbawa, sang 1922, pagkatapos sang tinuig nga maid-id kag mabudlay nga pagpangita, natukiban sang isa ka taga-Britanya nga arkeologo nga si Howard Carter ang isa ka tumalagsahon nga bahandi. Natukiban niya ang wala pa maguba nga pantyon ni Paraon Tutankhamen, nga nagaunod sing mga 5,000 ka pagkabutang.
2 Bisan pa tumalagsahon ang mga butang nga natukiban ni Carter, ang kalabanan sini gintago lang sa mga museo ukon ginhimo nga koleksion sang pila ka tawo. Matuod, ini nga mga butang importante gid sa maragtas kag may pinasahi nga mga desinyo, apang may diutay lang ukon wala gid gani ini sing epekto sa aton adlaw-adlaw nga pagkabuhi. Sa pihak nga bahin, ginaagda kita sang Pulong sang Dios nga pangitaon ang mga bahandi nga may daku gid nga epekto sa aton. Ini nga pangagda bukas sa tanan, kag ang kapuslanan sini mas daku pa sangsa materyal nga bahandi.—Basaha ang Hulubaton 2:1-6.
3. Ngaa mapuslanon ang mga bahandi nga luyag ni Jehova nga pangitaon sang iya mga alagad?
3 Binagbinaga ang balor sang mga bahandi nga luyag ni Jehova nga pangitaon sang iya mga alagad. Lakip sa sini nga mga bahandi amo “ang kahadlok kay Jehova,” nga isa ka proteksion sa aton sa sining mabudlay nga mga tion. (Sal. 19:9, NW) Ang pagpangita sa “ihibalo sang Dios” makabulig sa kay bisan sin-o nga matigayon ang pinakamataas nga kadungganan nga maangkon sang isa ka tawo—ang suod nga kaangtanan sa Labing Mataas. Kag paagi sa mga bahandi subong sang hatag-Dios nga kaalam, ihibalo, kag paghantop, maatubang naton sing madinalag-on ang mga problema kag mga palaligban sa aton adlaw-adlaw nga pagkabuhi. (Hulu. 9:10, 11) Paano naton matigayon ining hamili nga mga bahandi?
Pagpangita sing Espirituwal nga mga Bahandi
4. Paano naton makita ang espirituwal nga mga bahandi nga ginsaad sang Dios?
4 Indi kaangay sang mga arkeologo kag iban pa nga mga manuglagulad nga madamo pa sing lugar nga ginakadtuan para mangita sing mga bahandi, nakahibalo kita kon sa diin naton makita ang espirituwal nga mga bahandi. Ang Pulong sang Dios daw kaangay sang isa ka mapa nga nagatuytoy sa aton kon diin makita ang mga bahandi nga ginsaad sang Dios. Si apostol Pablo nagsiling tuhoy kay Cristo: “Natago sing maayo sa iya ang tanan nga bahandi sang kaalam kag ihibalo.” (Col. 2:3) Apang, mahimo mamangkot kita: ‘Ngaa dapat naton pangitaon ini nga mga bahandi? Paano ini “natago” kay Cristo? Kag paano naton ini pangitaon?’ Agod masabat ina nga mga pamangkot, binagbinagon anay naton sing maayo ang pinamulong ni apostol Pablo.
5. Ngaa nagsulat si Pablo tuhoy sa espirituwal nga mga bahandi?
5 Ini nga mga pinamulong ginsulat ni Pablo para sa iya mga kauturan sa Colosas. Ginsilingan niya sila nga daku gid ang iya pagpanikasog para sa ila agod ‘malugpayan ang ila tagipusuon kag agod magahisantuanay sila nga nahiusa sa gugma.’ (Basaha ang Colosas 2:1, 2.) Ngaa nabalaka gid si Pablo sa ila? Maathag nga nahibaluan ni Pablo nga ang mga kauturan didto mahimo naimpluwensiahan sang pila nila ka kaupdanan nga nagapasanyog sang Griego nga mga pilosopiya ukon nagasakdag gihapon sa Mosaikong Kasuguan. Malig-on niya nga ginlaygayan ang mga kauturan: “Mag-andam kamo: basi may isa nga magataban sa inyo subong iya natukob paagi sa pilosopiya kag wala pulos nga daya suno sa tradisyon sang mga tawo, suno sa nahauna nga mga butang sang kalibutan kag indi suno kay Cristo.”—Col. 2:8.
6. Ngaa dapat kita mangin interesado sa laygay ni Pablo?
6 Sa aton panahon, nagaatubang kita sing amo man nga mga impluwensia halin kay Satanas kag sa iya malaut nga kalibutan. Ang kalibutanon nga mga pilosopiya, nga nagalakip sa pagpanghiwala sa pagluntad sang Dios kag ang teoriya sang ebolusyon, nagaimpluwensia sa panghunahuna, mga prinsipio, mga tulumuron, kag estilo sang pagkabuhi sang mga tawo. Ang butig nga relihion may daku man nga papel sa madamo nga popular nga selebrasyon. Ang kalabanan nga kalingawan karon gindesinyo agod paayawan ang aton sayop nga mga handum, kag ang kalabanan nga kaundan sang Internet makatalagam indi lamang sa mga pamatan-on kundi pati man sa mga may edad. Kon pirme naton ginapadayag ang aton kaugalingon sa sini kag sa iban pa nga kalibutanon nga mga huyog, madali sini maapektuhan ang aton balatyagon kag panimuot sa mga panuytoy nga ginhatag ni Jehova, kag mahimo sini paluyahon ang aton pagpanguyapot sa matuod nga kabuhi. (Basaha ang 1 Timoteo 6:17-19.) Gani, kon indi naton luyag nga masiod ni Satanas dapat naton tun-an ang kahulugan sang pinamulong ni Pablo para sa mga taga-Colosas kag ipatudok sa aton tagipusuon ang iya laygay.
7. Anong duha ka butang ang ginsambit ni Pablo nga makabulig sa mga taga-Colosas?
7 Kon aton balikan ang pinamulong ni Pablo sa mga taga-Colosas, matalupangdan naton nga pagkatapos niya mapabutyag ang iya kabalaka sa ila, ginsambit niya ang duha ka butang nga makalugpay kag makapahiusa sa ila sa gugma. Una, ginsambit niya ang “bug-os nga pasalig sang ila paghangop.” Dapat magsalig gid sila ukon kumbinsido nga husto ang ila paghangop sa Kasulatan, agod ang ila pagtuo mapasad sa isa ka malig-on nga sadsaran. (Heb. 11:1) Ikaduha, ginsambit niya ang “sibu nga ihibalo tuhoy sa sagrado nga likom sang Dios.” Dapat indi lang sila magpabilin sa sadsaran nga ihibalo tuhoy sa kamatuoran kundi dapat man nila tun-an ang madalom nga mga butang sang Dios. (Heb. 5:13, 14) Mapuslanon gid ini nga laygay para sa mga kauturan sa Colosas kag sa aton man subong! Apang, paano naton matigayon ina nga pasalig kag sibu nga ihibalo? Ginhatag ni Pablo ang sabat sa iya ginsiling tuhoy kay Jesucristo: “Natago sing maayo sa iya ang tanan nga bahandi sang kaalam kag ihibalo.”
Mga Bahandi nga “Natago” kay Cristo
8. Ipaathag ang kahulugan sang termino nga “natago” kay Cristo.
8 Ang ekspresyon nga ang tanan nga bahandi “natago” kay Cristo wala nagapahangop nga nakandaduhan na ini ukon wala na sing bisan sin-o nga makakuha. Sa baylo, nagakahulugan ini nga kon luyag naton makita ang mga bahandi dapat gid kita manikasog kag isentro ang aton igtalupangod kay Jesucristo. Nahisanto ini sa ginsiling ni Jesus tuhoy sa iya kaugalingon: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.” (Juan 14:6) Huo, agod makita ang ihibalo tuhoy sa Dios, kinahanglan naton ang bulig kag panuytoy ni Jesus.
9. Ano ang pila sa mga papel ni Jesus?
9 Magluwas nga sia amo “ang dalan,” nagsiling si Jesus nga sia amo “ang kamatuoran kag ang kabuhi.” Nagapahangop ini nga si Jesus indi lang palaagyan pakadto sa Amay. May mga papel man sia nga importante gid sa paghangop sang kamatuoran sa Biblia kag sa pagtigayon sing kabuhi nga wala sing katapusan. Huo, natago gid kay Jesus ang wala tupong nga espirituwal nga mga bahandi nga matukiban lamang sang isa kon iya ini usisaon sing maayo. Binagbinagon naton ang pila ka bahandi nga direkta nga nagaapektar sa aton palaabuton kag sa aton kaangtanan sa Dios.
10. Ano ang matun-an naton tuhoy kay Jesus sa Colosas 1:19 kag 2:9?
10 “Kay sa iya nagapuyo sing lawasnon ang tanan nga kabug-usan sang kinaiya sang Dios.” (Col. 1:19; 2:9) Bangod nakaupod na niya ang iya langitnon nga Amay sa sulod sang tuman kalawig nga tion, mas nahibaluan gid ni Jesus ang personalidad kag kabubut-on sang Dios sangsa kay bisan sin-o. Sa iya bug-os nga pagministeryo sa duta, gintudlo ni Jesus sa iban ang gintudlo sa iya sang iya Amay kag nakita sa iya mga buhat ang mga kinaiya nga nakuha niya sa iya Amay. Amo kon ngaa nakasiling si Jesus: “Sia nga nakakita sa akon nakakita man sa Amay.” (Juan 14:9) Ang tanan nga kaalam kag ihibalo sang Dios natago, ukon nagapuyo, kay Cristo, kag ang pinakamaayo nga paagi nga makatuon kita tuhoy kay Jehova amo ang maid-id nga pagtuon tuhoy kay Jesus.
11. Ano ang kaangtanan ni Jesus sa mga tagna sa Biblia?
11 “Ang pagpanaksi tuhoy kay Jesus amo ang katuyuan sang mga tagna.” (Bug. 19:10) Ini nga pinamulong nagapahangop nga madamo sang mga tagna sa Biblia ang natuman kay Jesus. Halin sa nahauna nga tagna ni Jehova, nga ginrekord sa Genesis 3:15, pakadto sa mahimayaon nga mga palanan-awon sa tulun-an sang Bugna, ang mga tagna sa Biblia mahangpan lamang naton sing husto kon binagbinagon naton ang papel ni Jesus may kaangtanan sa Mesianiko nga Ginharian. Amo sini ang rason kon ngaa madamo nga tagna sa Hebreong Kasulatan ang mabudlay hangpon sang mga tawo nga wala nagbaton kay Jesus subong ang ginsaad nga Mesias. Amo man sini ang rason kon ngaa si Jesus wala makilala sing maayo sang mga tawo nga wala nagapabalor sa Hebreong Kasulatan, nga nagaunod sang madamo nga tagna tuhoy sa Mesias. Ang ihibalo tuhoy kay Jesus amo ang yabi para mahangpan sang katawhan sang Dios ang kahulugan sang mga tagna sa Biblia nga wala pa matuman.—2 Cor. 1:20.
12, 13. (a) Paano si Jesus nangin “kapawa sang kalibutan”? (b) Bangod ang mga sumulunod ni Cristo nakagua na sa espirituwal nga kadudulman, ano ang ila obligasyon?
12 “Ako ang kapawa sang kalibutan.” (Basaha ang Juan 8:12; 9:5.) Sang wala pa matawo si Jesus sa duta, si manalagna Isaias nagtagna: “Ang katawohan nga naglakat sa kadudulman nakakita sing daku nga kapawa; ang mga nagpuyo sa duta sang landong sang kamatayon, ang kapawa nagsilak sa ila.” (Isa. 9:2) Ginpaathag ni apostol Mateo nga gintuman ni Jesus ina nga tagna sang nagbantala Sia nga nagasiling: “Maghinulsol kamo, kay malapit na ang ginharian sang langit.” (Mat. 4:16, 17) Ang ministeryo ni Jesus nagdala sing espirituwal nga kapawa sa mga tawo kag kahilwayan sa pagkaulipon sa butig nga mga panudlo. “Nagkari ako subong kapawa sa kalibutan,” siling ni Jesus, “agod ang tagsatagsa nga nagatuo sa akon indi magpabilin sa kadudulman.”—Juan 1:3-5; 12:46.
13 Pagligad sang madamo nga tuig, ginsilingan ni apostol Pablo ang iya mga masigka-Cristiano: “Kay kadudulman kamo anay, apang kapawa na kamo karon may kaangtanan sa Ginuo. Padayon kamo nga maglakat subong mga anak sang kapawa.” (Efe. 5:8) Bangod ang mga Cristiano nakagua na sa espirituwal nga kadudulman, obligado na sila nga maglakat subong mga anak sang kapawa. Nahisuno gid ini sa ginsiling ni Jesus sa iya mga sumulunod sa Sermon sa Bukid: “Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa langit.” (Mat. 5:16) Ginaapresyar mo bala ang espirituwal nga mga bahandi nga nakita mo kay Jesus amo nga luyag mo nga matigayon man ini sang iban? Ginapakighambal mo bala ini ukon makita bala ini sa imo maayo nga paggawi?
14, 15. (a) Ano ang papel sang karnero kag sang iban pa nga mga sapat sa matuod nga pagsimba sa panahon sang Biblia? (b) Ngaa tuman gid ka bilidhon ang papel ni Jesus subong “Kordero sang Dios”?
14 Si Jesus amo “ang Kordero sang Dios.” (Juan 1:29, 36) Sa Biblia, ang karnero may importante nga papel sa kapatawaran sang sala kag sa pagpalapit sa Dios. Halimbawa, pagkatapos mapakita ni Abraham nga handa sia nga ihalad ang iya anak nga si Isaac, ginsilingan sia nga indi niya pagpatyon si Isaac kundi maghalad na lamang sia sing isa ka lalaki nga karnero bilang tal-us. (Gen. 22:12, 13) Sang ginhilway ang mga Israelinhon gikan sa Egipto, ang mga karnero may importante man nga papel, kay nangin bahin ini sang “pascua sang GINOO.” (Ex. 12:1-13) Dugang pa, sa idalom sang Mosaikong Kasuguan sarisari nga mga sapat ang ginahalad, nalakip sa sini ang mga karnero kag mga kanding.—Ex. 29:38-42; Lev. 5:6, 7.
15 Sa katunayan, ang halad sang tawo indi makahatag sing permanente nga kahilwayan gikan sa sala kag kamatayon. (Heb. 10:1-4) Sa pihak nga bahin, si Jesus amo “ang Kordero sang Dios nga nagakuha sang sala sang kalibutan.” Ini nga kamatuoran nagapakita nga si Jesus isa ka bahandi nga labaw pa sa bisan ano nga materyal nga bahandi nga natukiban. Gani, maayo gid nga maghatag kita sing tion sa pagtuon tuhoy sa gawad kag magtuo sa sining dalayawon gid nga aman. Kon himuon naton ini, makatigayon kita sing pagpakamaayo kag padya—himaya kag dungog kaupod ni Cristo sa langit para sa “diutay nga panong” kag wala sing katapusan nga kabuhi sa Paraiso nga duta para sa “iban nga mga karnero.”—Luc. 12:32; Juan 6:40, 47; 10:16.
16, 17. Ngaa importante nga mahangpan naton ang papel ni Jesus subong ang “Pangulo nga Ahente kag Manughimpit sang aton pagtuo”?
16 Si Jesus amo ang “Pangulo nga Ahente kag Manughimpit sang aton pagtuo.” (Basaha ang Hebreo 12:1, 2.) Sa Hebreo kapitulo 11, makit-an naton ang talalupangdon nga pagsaysay ni Pablo tuhoy sa pagtuo. Ginlaragway diri sing malip-ot kon ano ang pagtuo kag ginpakita diri ang listahan sang mga lalaki kag babayi nga huwaran sa pagtuo pareho nanday Noe, Abraham, Sara, kag Rahab. Pagkatapos sini, ginpalig-on ni Pablo ang iya masigka-Cristiano nga ‘tulukon sing maayo ang Pangulo nga Ahente kag Manughimpit sang aton pagtuo, si Jesus.’ Ngaa?
17 Bisan pa may mabakod nga pagtuo sa mga saad sang Dios yadtong matutom nga mga lalaki kag babayi nga ginlista sa Hebreo kapitulo 11, wala sila makahibalo sa bug-os nga detalye kon paano tumanon sang Dios ang iya mga saad paagi sa Mesias kag paagi sa Ginharian. Sa amo, ang ila pagtuo indi pa kompleto. Ang matuod, bisan ang mga gingamit ni Jehova sa pagsulat sang madamo nga tagna tuhoy sa Mesias wala makahangop sa bug-os nga kahulugan sang ila ginsulat. (1 Ped. 1:10-12) Ang pagtuo mahimpit lamang, ukon mabug-os paagi kay Jesus. Gani, importante gid nga mahangpan naton sing maayo kag kilalahon ang papel ni Jesus subong ang “Pangulo nga Ahente kag Manughimpit sang aton pagtuo.”
Magpadayon sa Pagpangita
18, 19. (a) Ano ang iban pa nga bahandi nga natago kay Cristo? (b) Ngaa dapat kita magpadayon sa pagpangita sing espirituwal nga mga bahandi kay Jesus?
18 Nabinagbinag naton ang pila lamang ka hamili nga papel ni Jesus sa katuyuan sang Dios para sa kaluwasan sang katawhan. May iban pa nga espirituwal nga bahandi nga natago kay Cristo. Ang pagpangita sini makahatag sa aton sing kalipay kag mga pagpakamaayo. Halimbawa, si apostol Pedro nagtawag kay Jesus subong “ang Pangulo nga Ahente sang kabuhi” kag “ang kabugwason” nga nagasubang. (Binu. 3:15; 5:31; 2 Ped. 1:19) Ang Biblia nagpatuhoy man kay Jesus subong ang “Amen.” (Bug. 3:14) Nahibaluan mo bala ang kahulugan kag importansia sining mga papel ni Jesus? Subong sang ginsiling ni Jesus, “padayon sa pagpangita, kag inyo makita.”—Mat. 7:7.
19 Ang kabuhi ni Jesus puno sing kahulugan kag may daku nga kaangtanan sa aton dayon nga kaayuhan, kag sa bug-os nga maragtas wala na sing tawo nga kaangay sa iya. Yara sa iya ang espirituwal nga mga bahandi nga sarang matigayon sang mga nagapangita sini sing tinagipusuon. Kabay nga makita mo ang mga bahandi nga “natago sing maayo sa iya” kag sa amo matigayon mo ang kalipay kag mga pagpakamaayo.
Madumduman Mo Bala?
• Ginapalig-on ang mga Cristiano nga pangitaon ang ano nga mga bahandi?
• Ngaa ang laygay ni Pablo sa mga taga-Colosas nagakaigo gihapon para sa aton?
• Sambita kag ipaathag ang pila ka espirituwal nga bahandi nga “natago” kay Cristo.
[Mga Retrato sa pahina 5]
Ang Biblia daw kaangay sang isa ka mapa sang bahandi nga nagatuytoy sa aton padulong sa mga bahandi nga “natago sing maayo” kay Cristo