Ginhimo Nila ang Kabubut-on ni Jehova

Ang Pinakabantog nga Tawo Naghimo sing Mapainubuson nga Pag-alagad

NAHIBAL-AN ni Jesus nga ang iya hingapusan nga inoras upod sa iya mga apostoles mangin malahalon. Sa indi madugay, dakpon na sia, kag ang iya pagtuo pagatilawan nga wala pa gid anay matabo. Nahibal-an man ni Jesus nga ang daku nga mga pagpakamaayo yara sa unahan. Sa indi madugay bayawon sia sa tuo nga kamot sang Dios kag hatagan “sing ngalan nga labaw sa tanan iban pa nga ngalan, agod sa ngalan ni Jesus magluhod ang tagsa ka tuhod sang mga yara sa langit kag sang mga yara sa duta kag sang mga yara sa idalom sang duta.”—Filipos 2:9, 10.

Apang, ang kabalaka tungod sa iya nagahilapit nga kamatayon ukon ang kalangkag sa ginsaad sa iya nga padya wala magpahilayo sang igtalupangod ni Jesus sa kinahanglanon sang iya mga apostoles. “Ginhigugma [niya] sila tubtob sa katapusan,” sulat ni Juan sang ulihi sa iya Ebanghelyo. (Juan 13:1) Kag sa sining importante, hingapusan nga inoras sang iya kabuhi subong isa ka himpit nga tawo, gintudluan ni Jesus ang iya mga apostoles sing isa ka importante nga leksion.

Leksion sang Pagkamapainubuson

Ang mga apostoles kaupod ni Jesus sadto sa naibabaw nga hulot sa Jerusalem agod saulugon ang Paskwa. Antes sini, nabatian sila ni Jesus nga nagabaisay tuhoy sa kon sin-o ang pinakadaku sa ila. (Mateo 18:1; Marcos 9:33, 34) Ginbinagbinag niya ining butang sa ila kag ginpanikasugan nga tadlungon ang ila pagtamod. (Lucas 9:46) Apang, sa sining tion, ginpadaku ni Jesus yadto nga mga leksion nga nagagamit sing tuhay nga paagi. Wala lamang sia nagpakighambal sa ila tuhoy sa pagkamapainubuson kundi ginpakita man niya ini.

Si Jesus “nagtindog gikan sa panihapon kag ginhal-id ang iya mga kunop,” sulat ni Juan. “Nagakuha sing tualya, ginwagkusan niya ang iya kaugalingon. Pagkatapos ginbutangan niya sing tubig ang batiya kag ginsugdan ang paghinaw sa mga tiil sang iya mga disipulo kag ginpamala ini paagi sa iya wagkus nga tualya.”—Juan 13:4,5.

Bangod sang mainit nga klima sa dumaan nga Natung-an nga Sidlangan, ang mga tawo masami nga nagasuksok sing bukas nga mga sandalyas kon nagalakat sila sa mayab-ok nga mga dalanon. Sa pagsulod sa puluy-an sang kubos nga mga tawo, ginatamyaw sila sang tagbalay, nga magaaman sing mga suludlan kag tubig agod makapanghinaw sila sang ila mga tiil. Sa mas manggaranon nga mga puluy-an, isa ka ulipon ang magahimo sining paghinaw sang tiil.—Hukom 19:21; 1 Samuel 25:40-42.

Sa naibabaw nga hulot, si Jesus kag ang iya mga apostoles indi mga dinapit. Wala sing tagbalay nga mag-aman sing mga suludlan, kag wala sing mga ulipon nga maghimo sing paghinaw sa mga tiil. Sang ginhinawan ni Jesus ang ila mga tiil, nahuya ang mga apostoles. Yari ang Isa nga amo ang labing daku sa ila nagahimo sing kubos kaayo nga hilikuton!

Sang primero, namalibad si Pedro nga pahinawan kay Jesus ang iya mga tiil. Apang ginsilingan sia ni Jesus: “Kon indi ako maghinaw sa imo, wala ikaw sing bahin sa akon.” Sang nakatapos si Jesus sa paghinaw sa mga tiil sang tanan nga apostoles, sia nagsiling: “Nahibaluan bala ninyo ang ginhimo ko sa inyo? Kamo nagatawag sa akon, ‘Manunudlo,’ kag ‘Ginuo,’ kag husto ang ginasiling ninyo, kay amo ako. Nian, kon ako, bisan pa Ginuo kag Manunudlo, naghinaw sang inyo mga tiil, kamo man dapat maghinaway sang inyo mga tiil. Kay nagpahamtang ako sa inyo sing sulundan, nga, suno sa ginhimo ko sa inyo, himuon man ninyo.”—Juan 13:6-15.

Wala si Jesus nagpatok sing isa ka rituwal nga paghinaw sang tiil. Sa baylo, ginbuligan niya ang iya mga apostoles nga palambuon ang isa ka bag-o nga panimuot—ang isa nga mapainubuson kag kahanda sa paghimo sing labing kubos nga mga hilikuton para sa ila mga kauturan. Maathag nga nahangpan nila ini. Binagbinaga ang natabo tinuig sang ulihi sang ang hulusayon tuhoy sa pagtuli nag-utwas. Walay sapayan nga natabo ang “daku nga sinuay,” nahuptan sang mga yadto didto ang kahim-ong kag matinahuron nga nagpamati sa opinyon sang isa kag isa. Dugang pa, ang isa nga nagdumala sa sadto nga sinapol daw amo si disipulo Santiago—indi isa sang mga apostoles, subong mapaabot naton kuntani, bangod didto man sila. Ginapakita sining detalye sa rekord sang Binuhatan nga ang mga apostoles nag-uswag sing daku sa pagpakita sing pagkamapainubuson.—Binuhatan 15:6-29.

Leksion Para sa Aton

Paagi sa paghinaw sa mga tiil sang iya mga disipulo, naghatag si Jesus sing maayo gid nga leksion sang pagkamapainubuson. Sa pagkamatuod, indi dapat maghunahuna ang mga Cristiano nga importante gid sila sa bagay nga dapat sila alagdon pirme sang iban, kag indi man sila dapat maghingamo sing posisyon sang kadungganan kag kabantugan. Sa baylo, dapat nila sundon ang sulundan nga ginpahamtang ni Jesus, nga “nagkari, indi agod alagdon, kundi sa pag-alagad kag sa paghatag sang iya kalag nga gawad sang madamo.” (Mateo 20:28) Huo, ang mga sumulunod ni Jesus dapat handa maghimo sing pinakakubos sa isa kag isa.

May maayo nga rason nga si Pedro nagsulat: “Magpangwagkus kamo sa inyo kaugalingon sing pagpaubos sang hunahuna sa isa kag isa, bangod ang Dios nagasumpong sang mga bugalon, apang nagahatag sing di-bagay nga kaayo sa mga mapainubuson.” (1 Pedro 5:5) Ang Griegong tinaga para sa “wagkus” ginkuha gikan sa tinaga nga nagakahulugan “tampi sang isa ka ulipon,” nga ginawagkus sa halog nga panapton. Ginapatuhuyan bala ni Pedro ang ginhimo ni Jesus nga pagwagkus sang iya kaugalingon sing tualya kag paghinaw sa mga tiil sang iya mga apostoles? Indi ini mapat-od. Apang, ang mapainubuson nga pag-alagad ni Jesus naghatag sing tudok nga epekto sa tagipusuon ni Pedro, subong nga dapat man sa mga tagipusuon sang tanan nga mangin sumulunod ni Cristo.—Colosas 3:12-14.