Sin-o Gid ang May Langitnon nga Pagtawag?

GINAHIGUGMA ni Jehova ang tawhanon nga rasa. Ti, daku katama ang iya gugma sa bagay nga ginhatag niya ang iya Anak, si Jesucristo, subong gawad sa pagtubos sa nadula sang aton katigulangan nga si Adan! Kag ano ina? Ang dayon, himpit tawhanon nga kabuhi kag ang tanan nga mga kinamatarong kag paglaum sini. (Juan 3:16) Ang gawad pagpabutyag man sang gugma ni Jesus para sa katawhan.​—⁠Mateo 20:⁠28.

Ang balaan nga gugma ginpakita sang ginbuksan ang duha ka hatag-Dios nga paglaum pasad sa merito sang halad gawad ni Jesus. (1 Juan 2:​1, 2) Sa wala pa napatay si Jesus subong tawo, ang lamang nga paglaum nga bukas sa mga kalahamut-an sa Dios amo ang pagkabuhi sa dutan-on nga paraiso. (Lucas 23:43) Apang, pagkatapos sang Pentecostes 33 C.⁠E., si Jehova naghatag sing langitnon nga paglaum sa “diutay nga panong.” (Lucas 12:32) Apang ano ang natabo sining ulihi nga mga tion? Kutob sang 1931 ang mensahe sang Ginharian naghugod sing daku nga igtalupangod sa “iban nga mga karnero,” kag kutob sang 1935 padayon ginpapalapit sang Dios sa iya ang “dakung kadam-an” sang mga katulad karnero paagi kay Cristo. (Juan 10:​16; Bugna 7:9) Ginbutang sang Dios sa ila tagipusuon ang paglaum nga kabuhi nga dayon sa dutan-on nga paraiso. Luyag nila magkaon sing himpit nga pagkaon, mahigugmaon nga maggahom sa mga sapat, kag magpakig-upod sa matarong nga mga tawo sing dayon.

Maluluy-on nga mga Saserdote kag mga Hari

Bangod ginpahulag sang gugma si Jesus agod ihatag ang iya kabuhi subong gawad, pat-od gid nga isa sia ka maluluy-on nga langitnon nga Hari. Apang, si Jesus indi magaisahanon sa pagbayaw sa katawhan sa kahimpitan sa iya Isa ka Libo ka Tuig nga Paggahom. Nag-aman si Jehova para sa iban pa maluluy-on nga mga hari sa langit. Huo, “mangin saserdote sila sang Dios kag ni Cristo, kag magahari sila kaupod niya sing isa ka libo ka tuig.”​—⁠Bugna 20:​1-6.

Pila ang kaupod nga mga gumalahom ni Cristo, kag paano sila ginpili para sa sinang makahalawhaw nga pribilehiyo? Ti, nakita ni apostol Juan ang 144,000 sa langitnon nga Bukid Sion kaupod sang Kordero, si Jesucristo. Bangod “ginbakal gikan sa mga tawo,” mahibaluan nila kon paano makaeksperiensia sing mga pagtilaw, makabatas sang mga lulan sang pagkadihimpit, pag-antos, kag mapatay subong mga tawo. (Bugna 14:​1-5; Job 14:1) Busa, mangin maluluy-on nga mga saserdote kag mga hari gid sila!

Ang Saksi sang Espiritu

Ang 144,000 “ginhaplas sang balaan,” si Jehova. (1 Juan 2:20) Paghaplas ini sa isa ka langitnon nga paglaum. ‘Ginbutang [sang Dios] ang pat-in sa ila kag naghatag sa ila tagipusuon subong kalig-onan sang iya espiritu.’​—⁠2 Corinto 1:21, 22.

Huo, ang mga may langitnon nga pagtawag may pamatuod sang espiritu sang Dios. Nahanungod sini, si Pablo nagsulat sa Roma 8:​15-17: “Wala kamo makabaton sang espiritu sang kahiolipnan nga sa kahadlok liwat, kundi nakabaton kamo sang espiritu sang pagkaanak, nga sa sina nga espiritu nagatuaw kita: ‘Abba, Amay!’ Ang espiritu gid nagasaksi upod sa aton espiritu nga mga anak kita sang Dios. Kag kon mga anak, nian mga manunubli: mga manunubli sang Dios kag mga masigkamanunubli ni Cristo, kon matuod nga nagaantos kita kaupod niya agod nga paghimayaon man kita kaupod niya.” Paagi sa espiritu, ukon aktibo nga kusog, sang Dios nga ang mga hinaplas nagatuaw, “Abba, Amay!”

Ang pangunang pamatuod nga ang isa ka tawo ginhaplas sa langitnon nga pagtawag amo ang espiritu, ukon nagapangibabaw nga balatyagon, sang pagkaanak. (Galacia 4:​6, 7) Sigurado gid sia nga gin-anak sia sang Dios sa espirituwal nga pagkaanak subong isa sang 144,000 ka mga masigkamanunubli sa langitnon nga Ginharian. Makapamatuod sia nga ang iya langitnon nga paglaum indi lamang iya kaugalingon ginpalambo nga handum ukon iya imahinasyon; sa baylo, naghalin ini kay Jehova subong resulta sang pagpanghikot sang espiritu sang Dios sa iya.​—⁠1 Pedro 1:​3, 4.

Sa idalom sang impluensia sang balaan nga espiritu sang Dios, ang espiritu, ukon nagapangibabaw nga panimuot, sang mga hinaplas nagapanghikot subong nagapahulag nga puwersa. Nagapahulag ini sa iya sa paghulag sing positibo sa kon ano ang ginasiling sang Pulong sang Dios nahanungod sa langitnon nga paglaum. Nagahulag man sila sa positibo nga paagi sang pagpakig-angot ni Jehova sa ila paagi sa balaan nga espiritu. Busa, sigurado sila nga sila espirituwal nga mga anak kag mga manunubli sang Dios.

Kon ang mga hinaplas nagabasa sang ginasiling sang Pulong sang Dios nahanungod sa iya espirituwal nga mga anak kag sa langitnon nga paglaum, ang ila kinaugali nga huyog amo ang pagsiling sa sulod nila, ‘Ako ini.’ Huo, nagasabat sila sing malipayon kon ang Pulong sang ila Amay nagasaad sing langitnon nga padya. Nagasiling sila, ‘Ako ini!’ kon mabasa nila: “Mga hinigugma, karon mga anak kita sang Dios.” (1 Juan 3:2) Kag kon mabasa sang mga hinaplas nga gindala sang Dios ang mga tawo nga “mangin sari sang una nga mga bunga sa iya mga tinuga,” ang ila hunahuna nagasabat, ‘Huo, gindala niya ako para sa sina nga katuyuan.’ (Santiago 1:18) Nahibaluan nila nga sila “ginbawtismuhan kay Cristo Jesus” kag sa iya kamatayon. (Roma 6:3) Gani may malig-on sila nga kombiksion nga mangin bahin sang espirituwal nga lawas ni Cristo kag nagabinagbinag sang paglaum nga mapatay kaangay niya kag banhawon pakadto sa langitnon nga kabuhi.

Agod mapanubli ang langitnon nga Ginharian, ang mga hinaplas dapat ‘maghimulat sa paglig-on sang pagkatinawag kag pagkapinili nila.’ (2 Pedro 1:​5-11) Nagalakat sila sa pagtuo kag padayon nga nagatubo sa espirituwal, kaangay sang mga may dutan-on nga paglaum. Gani, ano pa ang nagasaksi sa espiritu?

Kon Ngaa Nagapakigbahin Sila

Ang hinaplas nga mga Cristiano indi luyag magkadto sa langit bangod kay indi sila kontento sa karon nga pagkabuhi sa duta. (Ipaanggid ang Judas 3, 4, 16.) Sa baylo, ang balaan nga espiritu nagasaksi upod sa ila espiritu nga sila mga anak sang Dios. Nakapat-od man sila nga gindala sila pasulod sa bag-ong katipan. Ang mga partido sa sining katipan amo si Jehova nga Dios kag ang espirituwal nga Israel. (Jeremias 31:​31-34; Galacia 6:​15, 16; Hebreo 12:​22-24) Ini nga katipan, nga nagapanghikot paagi sa ginpaagay nga dugo ni Jesus, nagakuha sing katawhan para sa ngalan ni Jehova kag nagahimo sining hinaplas nga mga Cristiano nga bahin sang “binhi” ni Abraham. (Galacia 3:​26-29; Binuhatan 15:14) Ang bag-ong katipan nagapabilin nga nagapanghikot tubtob nga ang tanan nga espirituwal nga mga Israelinhon maban­haw padulong sa dimamalatyon nga kabuhi sa langit.

Dugang pa, yadtong tunay nga may langitnon nga pagtawag wala sing pangduhaduha nga yara man sila sa katipan para sa langitnon nga Ginharian. Ginpatuhuyan ni Jesus ini nga katipan sa ulot niya kag sang iya sumulunod sang nagsiling sia: “Kamo amo ang mga nakapadayon kaupod nakon sa mga pagsulay sa akon; kag nagapakigkatipan ako sa inyo, subong nga ang akon Amay nagpakigkatipan sa akon, para sa isa ka ginharian, agod nga magkaon kamo kag mag-inum sa akon latok sa akon ginharian, kag maglingkod kamo sa mga trono nga nagahukom sang napulog duha ka kabikahan sang Israel.” (Lucas 22:​28-30) Ini nga katipan gin-inagurahan sa mga disipulo ni Jesus sang ginhaplas sila sang balaan nga espiritu sang adlaw sang Pentecostes 33 C.⁠E. Nagapabilin ini nga nagapanghikot sa ulot ni Cristo kag sang iya kaupod nga mga hari sing dayon.​—⁠Bugna 22:⁠5.

Yadtong may langitnon nga pagtawag positibo nga yara sila sa bag-ong katipan kag sa katipan para sa Ginharian. Gani, nagakaigo sila nga nagapakigbahin sa emblema nga tinapay kag alak sa tuigan nga pagdumdom sa Panihapon sang Ginuo, ukon Memoryal sang kamatayon ni Jesucristo. Ang tinapay nga walay tapay nagasimbulo sa walay sala tawhanon nga lawas ni Jesus, kag ang alak sa iya himpit nga dugo nga ginbubo sa kamatayon kag nagpatuman sa bag-ong katipan.​—⁠1 Corinto 11:​23-26.

Kon ginpalambo ni Jehova sa imo ang dimapanghiwala nga paglaum sang langitnon nga kabuhi, ginapaimportansiahan mo ina. Nagapangamuyo ka sa pagpabutyag sina nga paglaum. Pirme mo ini ginahunahuna, kag indi mo ini madula sa imo sistema. May yara ikaw espirituwal nga mga handum. Apang kon nagaduhaduha kag indi nakapat-od, nian indi ka gid dapat makigbahin sa mga emblema sang Panihapon sang Ginuo.

Ngaa Sayop nga Paghunahuna?

Ang iban mahimo magapakigbahin sing sayop sa mga emblema sa Memoryal bangod wala gid nila ginakilala nga ang paghaplas “indi sa pagbuot ukon pagpanikasog sang tawo, kundi sa Dios.” (Roma 9:16) Indi ang indibiduwal ang magapamat-od nga sia pagadalhon sa bag-ong katipan kag mangin masigkamanunubli ni Cristo sa langitnon nga Ginharian. Ang importante amo ang pagpili ni Jehova. Sa Israel anay, ang Dios ang nagpili kon sin-o ang magaalagad subong mga saserdote niya, kag ginpatay niya si Core bangod sang matinaastaason nga pagpaninguha sa pagkasaserdote nga ginbutang sang Dios sa pamilya ni Aaron. (Exodo 28:​1; Numeros 16:​4-11, 31-35; 2 Cronica 26:​18; Hebreo 5:​4, 5) Sa kaanggid, indi kalahamut-an kay Jehova kon ipresentar sang isa ang iya kaugalingon subong isa nga ginatawag nga mangin kaupod sang langitnon nga mga hari kag mga saserdote kon ang Dios wala naghatag sa iya sina nga pagtawag.​—⁠Ipaanggid ang 1 Timoteo 5:24, 25.

Ang isa mahimo magahunahuna sing sayop nga may langitnon sia nga pagtawag bangod sang makusog nga emosyon bunga sang mabug-at nga mga problema. Ang pagkapatay sang tiayon ukon isa pa ka trahedya mahimo nga magahimo sa isa nga madulaan sing interes sa kabuhi sa duta. Ukon ang suod nga abyan mahimo magaangkon nga hinaplas, kag mahimo man sia maghandum sina. Inang mga rason mahimo magapabatyag sa iya nga para sa iya ang kabuhi sa langit. Apang indi ini ang paagi sang Dios sa paghatag kay bisan sin-o sang espiritu sang pagkaanak. Pagpakita sing indi pagpasalamat sa katuyuan sang Dios sa duta kon ang isa nagahandum sa pagkadto sa langit bangod sang dimaayo nga mga kahimtangan ukon emosyonal nga kasubo nga may kahilabtanan sa dutan-on nga kabuhi.

Ang nagligad nga relihiosong mga pagpati mahimo man magatiklod sa isa sa paghinakop sing sayop nga sia may langitnon nga pagtawag. Ayhan miembro sia anay sang isa ka butig nga relihion nga nagapati nga ang langitnon nga kabuhi amo lamang ang paglaum para sa matuod nga mga sumilimba. Gani, ang Cristiano dapat magbantay nga indi madala sang emosyon kag sayop nga mga pagpati sang nagligad.

Importante ang Maayo nga Pag-usisa

Ginhatag ni apostol Pablo ang importante katama nga punto sang nagsulat sia: “Ang bisan sin-o nga magkaon sang tinapay ukon mag-inum sa tagayan sang Ginuo sing indi takus mangin malinapason sang lawas kag sang dugo sang Ginuo. Ang tawo mag-usisa sa iya kaugalingon, kag sa sina magkaon sia sang tinapay kag mag-inum sa tagayan. Kay ang nagakaon kag nagainum nga wala pagkilala sang lawas nagakaon kag nagainum sing paghukom sa iya kaugalingon.” (1 Corinto 11:​27-29) Gani, ang bawtismado nga Cristiano nga sining ulihi nga mga tinuig nagsugod sa paghunahuna nga nakabaton sia sang langitnon nga pagtawag dapat anay maghunahuna sing maayo kag sing mapangamu­yuon.

Mahimo man niya pamangkuton ang iya kaugalingon: ‘Naimpluensiahan bala ako sang iban sa paghunahuna sang langitnon nga kabuhi?’ Indi ini nagakaigo, kay ang Dios wala magtangdo kay bisan sin-o sa paghagad sa iban para sa sina nga pribilehiyo. Ang huyog sa pantasya indi man pagpakita sang paghaplas sang Dios, kag wala niya ginatangdo ang mga manunubli sang Ginharian paagi sa pagpabati sa ila sang mga tingog nga may mensahe nahanungod sini.

Mahimo pamangkuton sang iban ang ila kaugalingon: ‘Antes mangin Cristiano, nagdruga bala ako? Naggamit bala ako sang bulong nga nag-apektar sang mga emosyon? Nakapabulong bala anay ako bangod sang problema sa hunahuna ukon balatyagon?’ Ang iban nagsiling nga nakig-away sila primero batok sa ginahunahuna nila nga amo ang langitnon nga paglaum. Ang iban nagsiling nga ginkuha sang Dios ang ila dutan-on nga paglaum kag ginhatagan sila sang ulihi sang isa nga langitnon. Apang supak ina sa balaan nga mga pagpakig-angot. Isa pa, ang pagtuo indi dipat-od; sigurado ini.​—⁠Hebreo 11:⁠6.

Mahimo man niya pamangkuton ang iya kaugalingon: ‘Handum ko bala nga makilala? Ambisyuso bala ako sa isa ka posisyon nga may awtoridad sa karon ukon subong isa sa mga hari kag mga saserdote kaupod ni Cristo?’ Sadtong nahaunang siglo C.⁠E., sang ginhatag ang imbitasyon nga magsulod sa langitnon nga Ginharian, indi tanan nga hinaplas nga mga Cristiano nag-uyat sing mga posisyon sang responsabilidad subong mga katapo sang nagadumala nga hubon ukon subong mga gulang ukon ministeryal nga mga alagad. Madamo ang mga babayi, kag wala sila sing pinasahi nga awtoridad; ni ang paghaplas sang espiritu naghatag sing labaw sa kinaandan nga paghangop sa Pulong sang Dios, kay nasapwan ni Pablo nga kinahanglan tudluan kag laygayan ang iban nga mga hinaplas. (1 Corinto 3:​1-3; Hebreo 5:​11-14) Yadtong may langitnon nga pagtawag wala nagtamod sang ila kaugalingon subong prominente nga mga indibiduwal, kag wala nila ginapadayaw ang ila pagkahinaplas. Sa baylo, ginapadayag nila ang pagkamapinaubuson nga makatarunganon nga ginapaabot sa mga may ­“hunahuna ni Cristo.” (1 Corinto 2:16) Narealisar man nila nga ang matarong nga mga kinahanglanon sang Dios dapat sundon sang tanan nga mga Cristiano, langitnon man ukon dutan-on ang ila paglaum.

Ang pag-angkon nga may langitnon nga pagtawag wala nagadala sa isa sing pinasahi nga mga pagpahayag. Ang Dios may alagyan sang komunikasyon nga paagi sini ginahatag niya ang espirituwal nga pagkaon para sa iya dutan-on nga organisasyon. (Mateo 24:​45-47) Gani wala sing isa ang dapat maghunahuna nga ang pagkamangin hinaplas nga Cristiano nagahatag sa iya sing kaalam nga labaw sang sa “dakung kadam-an” nga may dutan-on nga paglaum. (Bugna 7:9) Ang paghaplas sang espiritu wala ginapakita paagi sa pagkatalunsay sa pagpanaksi, pagsabat sa mga pamangkot sa Kasulatan, ukon paghatag sing pamulongpulong sa Biblia, kay ang mga Cristiano nga may dutan-on nga paglaum maayo man sa sining bahin. Kaangay sang mga hinaplas, nagakabuhi man sila sing huwaran nga Cristianong kabuhi. Bangod sina, si Samson kag ang iban pa sadtong wala pa ang Cristianong panahon may espiritu sang Dios kag napuno sang kakugi kag paghangop. Apang, wala sing isa sadtong ‘dakung panganud sang mga saksi’ ang may langitnon nga paglaum.​—⁠Hebreo 11:​32-38; 12:​1; Exodo 35:​30, 31; Hukom 14:​6, 19; 15:​14; 1 Samuel 16:​13; Ezequiel 2:⁠2.

Dumduma Kon Sin-o ang Nagapili

Kon ang isa ka masigkatumuluo nagapamangkot nahanungod sa langitnon nga pagtawag, ang gintangdo nga gulang ukon iban pa nga hamtong nga Cristiano sarang makahinun-anon sini upod sa iya. Apang ang isa indi mahimo nga makadesisyon para sa iban, kag si Jehova amo ang nagahatag sang langitnon nga paglaum. Ang isa nga tunay nga may langitnon nga pagtawag indi na kinahanglan nga magpamangkot sa masigka Cristiano kon bala may amo sia sina nga paglaum. Ang mga hinaplas “natawo liwat, indi sa madinulunton nga binhi kundi sa dimadinulunton, paagi sa buhi kag nagapadayon nga pulong sang Dios.” (1 Pedro 1:23) Paagi sa iya espiritu kag Pulong, ang Dios nagatanum sang “binhi” nga nagahimo sa indibiduwal nga “bag-ong tinuga,” nga may langitnon nga paglaum. (2 Corinto 5:17) Huo, si Jehova ang nagapili.

Busa, kon nagatuon sang Biblia sa mga bag-ohan, indi maayo ipanugda nga magapamat-od sila kon bala sila may langitnon nga pagtawag. Apang kamusta kon ang isa ka hinaplas nga Cristiano napamatud-an nga dimatutom kag kinahanglan ang isa ka tal-us? Nian makatarunganon ihinakop nga ang Dios magahatag sang langitnon nga pagtawag sa isa nga huwaran sa paghimo sing matutom nga pag-alagad sa aton langitnon nga Amay sa madamong mga tinuig.

Sa karon, ang pangunang punto sang mensahe sang Dios indi agod ang mga tawo mangin katapo sang langitnon nga nobya ni Cristo. Sa baylo, “ang espiritu kag ang nobya nagasiling: ‘Kari!’ ” Amo ini ang imbitasyon sa kabuhi sa dutan-on nga paraiso. (Bugna 22:​1, 2, 17) Samtang ang mga hinaplas nagapanguna sa sining hilikuton, nagapakita sila sing “pagpaubos” kag nagapangabudlay sa ‘paglig-on sang pagkatinawag kag pagkapinili nila.’​—⁠Efeso 4:​1-3; 2 Pedro 1:5-11.