Pangitaa ang Matuod nga Paghidait kag Himud-usi Ini!

“Sia nga maghigugma sang kabuhi kag magtan-aw sing mga adlaw nga maayo, . . . talikdan niya ang malain kag himuon ang maayo; pangitaon niya ang paghidait kag himud-usan ini.”​—⁠1 PEDRO 3:​10, 11.

1. Anong bantog nga pinamulong sang Isaias ang pat-od nga may kadalag-an?

“SALSALON nila ang ila mga espada nga mga punta sang arado kag ang ila mga bangkaw nga mga galab nga inughagbas. Ang pungsod indi magabayaw sing espada batok sa pungsod, kag indi na sila magtuon sing inaway.” (Isaias 2:4) Bisan pa ining bantog nga teksto makita sa bug-os kalibutan nga ulong-talatapan sang Nasyones Unidas sa New York City, indi gid masiling nga gintuman ini sinang bug-os kalibutan nga organisasyon. Apang, subong bahin sang wala nagakapaslawan nga pulong ni Jehova nga Dios, yadto nga pinamulong indi mahimo nga wala sing mga resulta.​—⁠Isaias 55:​10, 11.

2. Ano ang ‘mahanabo sa ulihi nga bahin sang mga adlaw,’ suno sa Isaias 2:​2, 3?

² Ang mga pinamulong sa Isaias 2:4 bahin sa pagkamatuod sang isa ka makahalawhaw nga tagna, isa ka tagna tuhoy sa matuod nga paghidait​—⁠kag nagakatuman ini karon mismo sa aton tion. Antes ipahayag ang makakulunyag nga mga paglaum nga madula na ang mga inaway kag mga hinganiban sa inaway, ang tagna nagasiling: “Sa ulihi nga mga adlaw mahanabo nga ang bukid sang balay ni Jehova patindugon sa putukputukan sang mga bukid, kag bayawon ini labaw sa kabakuluran; kag ang tanan nga pungsod magadugok sa iya. Kag madamo nga katawhan ang magakadto kag magasiling: ‘Kari kamo, kag magtukad kita sa bukid ni Jehova, sa balay sang Dios ni Jacob; kag tudluan kita niya sang iya mga dalanon, kag magalakat kita sa iya mga banas.’ Kay gikan sa Sion magaguwa ang kasuguan, kag ang pulong ni Jehova gikan sa Jerusalem.”​—⁠Isaias 2:​2, 3.

Ang mga Tawo Mahimo Mangin Mahidaiton

3. Paano ang isa ka tawo nga palaaway mangin mahidaiton?

³ Talupangda nga antes mahimud-usan sang mga tawo ang mahidaiton nga dalanon, dapat sila tudluan sang mga dalanon ni Jehova. Ang matinumanon nga pagsunod sa panudlo ni Jehova mahimo makapabag-o sa hunahuna kag pagginawi sang isa ka tawo, amo nga ang isa anay ka palaaway nangin mahidaiton. Paano matigayon ini nga pagbag-o? Ang Roma 12:2 nagasiling: “Dili kamo magpauyon sa sining sistema sang mga butang, kundi magbalhin kamo paagi sa pagbag-o sang inyo painuino, agod mapamatud-an ninyo sa inyo mga kaugalingon ang maayo kag kalahamut-an kag himpit nga kabubut-on sang Dios.” Ginabag-o naton ang aton painuino, ukon ginapahulag ini sa tuhay nga direksion, paagi sa pagpuno sini sing mga prinsipio kag mga kasuguan gikan sa Pulong sang Dios. Ang regular nga pagtuon sa Biblia nagabulig sa aton nga himuon ini nga pagbag-o kag nagatugot sa aton nga pamatud-an sa aton kaugalingon kon ano ang kabubut-on ni Jehova para sa aton, agod makita naton sing maathag kon sa anong dalanon kita dapat maglakat.​—⁠Salmo 119:​105.

4. Paano ginasuklob sang isa ang mahidaiton nga bag-ong personalidad?

⁴ Ang kamatuoran sang Biblia wala lamang nagabag-o sang aton hunahuna kundi sang aton man mga buhat kag personalidad. Nagabulig ini sa aton nga himuon ang ginlaygay ni apostol Pablo: “Ubaha ninyo ang daan nga personalidad nga iya sang inyo una nga dalanon sang paggawi kag dunot paagi sa iya madaya nga mga kailigbon; kundi . . . magbag-o kamo sa puwersa nga nagapahulag sang inyo hunahuna, kag . . . magsuklob kamo sing bag-ong personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efeso 4:​22-24) Ang puwersa nga nagapahulag sa hunahuna yara sa sulod. Nagabag-o ini kag nagakusog samtang ang aton gugma kay Jehova kag sa iya mga kasuguan nagadugang, kag nagahimo ini sa aton subong espirituwal kag mahidaiton nga mga tawo.

5. Paano ang “bag-ong sugo” nga ginhatag ni Jesus sa iya mga disipulo nagaamot sa paghidait sa tunga nila?

⁵ Ang pagkakinahanglanon sini nga pagbag-o makita gikan sa instruksion nga ginhatag ni Jesus sa iya mga disipulo sadto sang katapusan niya nga mga inoras upod sa ila: “Ako nagahatag sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay. Sa sini ang tanan nga tawo makahibalo nga kamo mga disipulo ko, kon maghigugmaanay kamo.” (Juan 13:​34, 35) Ining tulad-Cristo, dimakagod nga gugma nagahugpong sing tingob sa mga disipulo sa himpit nga paghiusa. (Colosas 3:14) Yadto lamang ang handa sa pagbaton kag sa pagkabuhi suno sining “bag-ong sugo” ang magaagom sang paghidait nga ginasaad sang Dios. May mga tawo bala nga nagahimo sini karon?

6. Ngaa ang mga Saksi ni Jehova nagaagom sing paghidait, kabaliskaran sa mga tawo sang kalibutan?

⁶ Ang mga Saksi ni Jehova nagapanikasog nga ipakita ang gugma sa ila bug-os kalibutan nga paghiliutod. Bisan pa nga naghalin sila sa tanan nga kapungsuran sa kalibutan, wala sila nagaentra sa mga pagsinuay sang kalibutan, bisan pa nga nagaagom sila sing dakung pag-ipit gikan sa politika kag sa relihion. Subong nahiusa nga katawhan, gintudluan sila ni Jehova, kag nagaagom sila sing paghidait. (Isaias 54:13) Nagapabilin sila nga neutral sa mga binangig sa politika, kag wala sila nagapakigbahin sa mga inaway. Ang iban nga mapintas anay nagsikway sina nga estilo sang pagkabuhi. Nangin mahigugmaon sila sa paghidait nga mga Cristiano, nagailog sang huwaran ni Cristo Jesus. Kag bug-os tinagipusuon nila nga ginasunod ang laygay ni Pedro: “Sia nga maghigugma sang kabuhi kag magtan-aw sing mga adlaw nga maayo, punggan niya ang iya dila gikan sa kalainan kag ang iya mga bibig indi maghambal sing limbong, apang talikdan niya ang malain kag himuon ang maayo; pangitaon niya ang paghidait kag himud-usan ini.”​—⁠1 Pedro 3:​10, 11; Efeso 4:⁠3.

Ang mga Nagahimud-os sang Paghidait

7, 8. Maghatag sing mga halimbawa sang mga tawo nga nagbiya sang pagpakig-away kag nangin mga nagapangita sing matuod nga paghidait. (Magsaysay sing iban pa nga mahimo nahibaluan mo.)

⁷ Halimbawa, yara si Rami Oved, nga opisyal anay sang isa ka grupo nga may kinaadman sa pagpakig-away sa mga terorista. Ginhanas sia sa pagpatay sa iya mga kaaway. Daku gid ang iya pagpati sa iya Israeli nga nasyonalismo tubtob sang adlaw nga natukiban niya nga indi luyag sang mga rabbi nga pakaslan niya ang babayi nga iya ginahigugma bangod isa sia ka taga-Asia, isa ka Gentil. Ginsugdan niya nga pangitaon ang kamatuoran sa Biblia. Nian nasugilanon niya ang mga Saksi ni Jehova. Paagi sa pagtuon niya sa Biblia upod sa mga Saksi, nakumbinsi sia nga indi na sia mahimo mangin isa ka panatiko nga nasyonalista. Ang Cristianong gugma nagakahulugan sing pagtalikod sa inaway kag mga hinganiban kag sing pagtuon nga higugmaon ang katawhan sang tanan nga rasa. Daku gid ang iya kakibot sang makabaton sia sing isa ka mahinuklugon nga sulat nga may panugod nga mga tinaga, “Akon Utod nga Rami”! Ano gid bala ang katingalahan sa sina? Ang nagsulat isa ka taga-Palestina nga Saksi. “Daw indi ako makapati sa sini,” siling ni Rami, “kay ang mga taga-Palestina mga kaaway ko anay, kag karon ang isa sa ila nagatawag sa akon nga ‘Akon Utod.’ ” Si Rami kag ang iya asawa nagalakat karon sa matuod nga paghidait sa dalanon sang Dios.

⁸ Ang isa pa ka halimbawa amo si Georg Reuter, nga nag-alagad sa Aleman nga hangaway nga nagsalakay sa Rusya sadtong Inaway Kalibutanon II. Nalugaw-an sia sang ulihi sa matinaastaason nga buko ni Hitler nga gamhan ang bug-os nga kalibutan. Sang nagpauli sia gikan sa inaway, nagsugod sia sa pagtuon sa Biblia upod sa mga Saksi ni Jehova. Nagsulat sia: “Sa ulihi gid man, ang mga butang nangin maathag sa akon. Nahangpan ko nga indi gali ang Dios ang dapat basulon sa tanan nga pagpatulo sing dugo . . . Natun-an ko nga tuyo niya nga tukuron ang bug-os duta nga paraiso lakip ang walay katapusan nga mga pagpakamaayo para sa matinumanon nga katawhan. . . . Ginpabugal ni Hitler ang iya ‘Isa ka Libo ka Tuig nga Paggahom’ apang naggahom sia sing 12 [ka tuig] lamang​—⁠kag makakulugmat gid ang resulta! Si Cristo sa baylo nga si Hitler . . . ang makasarang kag magatukod sing isa ka libo ka tuig nga paggahom sa ibabaw sang duta.” Sa sulod sang 50 ka tuig na karon, si Georg nagaalagad subong embahador sang matuod nga paghidait sa bug-os tion nga ministeryo.

9. Paano ginapamatud-an sang eksperiensia sang mga Saksi ni Jehova sa Nazi Alemanya nga maisugon sila apang mahidaiton?

⁹ Ang integridad kag neutralidad sang mga Saksi ni Jehova sa Alemanya sadtong panahon sang rehimen sang mga Nazi padayon nga nangin isa ka pamatuod sang ila gugma sa Dios kag sa paghidait bisan karon, pagligad sang kapin sa 50 ka tuig. Ang isa ka bukleta nga ginbalhag sang United States Holocaust Memorial Museum sa Washington, D.C., nagasiling: “Ang mga Saksi ni Jehova nagbatas sing daku nga paghingabot sa idalom sang rehimen sang mga Nazi. . . . Bangod sang kaisog nga ginpakita sang kalabanan sa pagdumili [nga isikway ang ila relihion], walay sapayan sang pagpaantos, kapintas sa mga kampo konsentrasyon, kag kon kaisa kamatayon, natigayon nila ang pagtahod sang madamong kontemporaryo.” Nian ini nagdugang: “Sang makaguwa sa mga kampo, ginpadayon sang mga Saksi ni Jehova ang ila hilikuton, nakig-upod sa mga nakalampuwas, kag nangumbertir.”

Daku Pa nga Pagbalhin

10. (a) Anong dakung pagbalhin ang kinahanglan agod magaabot ang matuod nga paghidait? (b) Paano ini ginlaragway sa tulun-an ni Daniel?

¹⁰ Nagakahulugan bala ini nga nagapati ang mga Saksi ni Jehova nga mapaluntad nila ang paghidait sa kalibutan kon makumbertir nila ang madamo nga magpati sa Cristianong neutralidad? Wala! Agod mapasag-uli sa duta ang paghidait, daku pa nga pagbag-o ang ginakinahanglan. Ano ina? Ang nagabahinbahin, mapiguson kag masingki nga pagginahom sang tawo dapat maghatag sing dalan sa pagginahom sang Ginharian sang Dios, nga gintudlo ni Jesus nga ipangamuyo sang iya mga disipulo. (Mateo 6:​9, 10) Apang paano ina mahanabo? Sa isa ka damgo nga inspirado sang Dios, nahibaluan ni manalagna Daniel nga sa katapusan nga mga adlaw, ang Ginharian sang Dios, kaangay sa daku nga bato ‘nga wala matiphag paagi sa tawhanon nga mga kamot,’ magadugmok sa daku nga larawan nga nagalaragway sa politikal nga mga pagginahom sang katawhan sa duta. Nian sia nagsiling: “Sa mga adlaw sadto nga mga hari magapatindog ang Dios sang langit sing ginharian nga dili gid malaglag. Kag ang ginharian mismo indi ibilin sa iban nga katawhan. Kundi dugmukon sini kag papason ini tanan nga ginharian, kag ini magapadayon sa gihapon.”​—⁠Daniel 2:​31-44.

11. Sa anong paagi paluntaron ni Jehova ang kinahanglanon nga pagbalhin para sa paghidait?

¹¹ Ngaa mahanabo ining daku nga pagbalhin sa kahimtangan sang kalibutan? Bangod nanaad si Jehova nga dulaon niya sa duta ang tanan nga nagadagta kag nagaguba sini. (Bugna 11:18) Ining pagbalhin mahanabo sa matarong nga inaway ni Jehova batok kay Satanas kag sa iya malauton nga kalibutan. Aton mabasa sa Bugna 16:​14, 16: “Mga pahayag sila [nga amo, ang dimatinlo inspirado nga mga pahayag] sang mga yawa kag nagahimo sing mga tanda, kag nagakadto sila sa mga hari [ang mga gumalahom sa politika] sang bug-os napuy-an nga duta, sa pagtipon sa ila sing tingob sa inaway sang dakung adlaw sang Dios nga Labing Gamhanan. Kag gintipon nila sila sing tingob sa duog nga ginatawag sa Hebreo Har⁠–​Magedon.”

12. Mangin kaangay sa ano ang Armagedon?

¹² Mangin kaangay sa ano ang Armagedon? Indi ini mangin isa ka nuklear nga apokalipsis ukon isa ka kalamidad nga ginhimo sang mga tawo. Indi, inaway ini sang Dios nga magatapos sa tanan nga inaway kag magahapay sa tanan nga nagasakdag sa mga inaway. Inaway ini sang Dios nga magapaluntad sing matuod nga paghidait para sa mga nagahigugma sing paghidait. Huo, ang Armagedon magaabot suno sa gintuyo ni Jehova. Indi ini magapalantang. Ang iya manalagna nga si Habacuc gin-inspirar sa pagsulat: “Ang palanan-awon naigo pa sa gintalana nga tion, kag nagadalidali ini sa katapusan, kag ini indi magbutig. Bisan magpalantang, hulata ini; kay sa pagkamatuod magaabot ini. Indi ini magpalantang.” (Habacuc 2:3) Bangod sang aton tawhanon nga mga balatyagon, ayhan magahunahuna kita nga daw nagapalantang ini, apang ginasunod ni Jehova ang iya iskedyul. Ang Armagedon mahanabo sa oras nga ginpat-od na nga daan ni Jehova.

13. Ano ang himuon sang Dios sa tunay nga nakasala, si Satanas nga Yawa?

¹³ Ining pat-od nga buhat magahatag sing dalan para sa matuod nga paghidait! Apang agod mapasad sing malig-on ang matuod nga paghidait, may butang nga dapat pa himuon​—⁠ang pagdula sa isa nga nagatuga sing pagbinahinbahin, dumot kag pinuyas. Kag amo gid sini ang ginatagna sang Biblia nga masunod nga matabo​—⁠ang pagtagbong sa kadadalman kay Satanas, ang manugsugyot sang inaway kag ang amay sang kabutigan. Nakita ni apostol Juan ini nga hitabo sa isa ka matagnaon nga palanan-awon, subong sang narekord sa Bugna 20:​1-3: “Nakita ko ang anghel nga nagakunsad gikan sa langit nga may yabi sang kadadalman kag dakung talikala sa iya kamot. Kag gindakop niya ang dragon, ang orihinal nga man-ug, nga amo ang Yawa kag Satanas, kag gingapos sia sing isa ka libo ka tuig. Kag gintagbong sia sa kadadalman kag gintakpan ini kag ginpat-inan sa ibabaw niya, agod nga indi na niya pagdayaan ang mga pungsod tubtob nga matapos ang isa ka libo ka tuig.”

14. Paano malaragway ang madaugon nga pagpanghikot ni Jehova batok kay Satanas?

¹⁴ Indi ini damgo lamang; saad ini sang Dios​—⁠kag ang Biblia nagasiling: “Indi mahimo nga ang Dios magbutig.” (Hebreo 6:18) Sa amo makasiling si Jehova paagi sa iya manalagna nga si Jeremias: “ ‘Ako amo si Jehova: ang Isa nga nagapakita sing mahigugmaon nga kaluoy, katarungan kag pagkamatarong sa duta; kay sa sining mga butang nagakalipay ako,’ siling ni Jehova.” (Jeremias 9:24) Si Jehova nagahikot nga may katarungan kag pagkamatarong, kag nagakalipay sia sa paghidait nga paluntaron niya sa duta.

Pagginahom sang Prinsipe sang Paghidait

15, 16. (a) Sin-o ang ginpili ni Jehova nga maggahom subong Hari? (b) Paano ginalaragway ina nga pagginahom, kag sin-o ang makigbahin sa sini?

¹⁵ Agod pat-uron nga ang matuod nga paghidait magaabot sa tanan nga nagakabuhi sa idalom sang kahimusan sang iya Ginharian, ginhatag ni Jehova ang pagginahom sa matuod nga Prinsipe sang Paghidait, si Jesucristo, subong sang gintagna sa Isaias 9:​6, 7: “Sa aton natawo ang isa ka bata, sa aton ginhatag ang isa ka anak nga lalaki; kag ang prinsipenhon nga paggahom mangin sa iya abaga. Kag tawgon ang iya ngalan Makatilingala nga Manuglaygay, Dios nga Gamhanan, Amay nga Nagapadayon, Prinsipe sang Paghidait. Nahanungod sa pagdugang sang iya prinsipenhon nga paggahom kag sang paghidait walay katapusan . . . Ang kakugi ni Jehova sang mga kasuldadusan magahimo sini.” Ang salmista nagsulat man sing matagnaon tuhoy sa mahidaiton nga paggahom sang Mesias: “Sa iya mga adlaw magalambo ang matarong, kag ang bugana nga paghidait tubtob nga wala na ang bulan.”​—⁠Salmo 72:⁠7.

¹⁶ Dugang pa, ang 144,000 ka gintangdo sang espiritu nga mga utod ni Cristo magagahom kaupod niya sa mga langit. Sila ang mga masigkamanunubli ni Cristo nga tuhoy sa ila si Pablo nagsulat: “Sa iya bahin, ang Dios nga nagahatag sing paghidait magadugmok sa madali kay Satanas sa idalom sang inyo mga tiil. Kabay nga ang di-bagay nga kaluoy sang aton Ginuong Jesus mangin kaupod ninyo.” (Roma 16:20) Huo, magapakigbahin sila gikan sa mga langit sa kadalag-an ni Cristo batok sa mahuyugon sa inaway, nga si Satanas nga Yawa!

17. Ano ang dapat naton himuon agod mapanubli ang matuod nga paghidait?

¹⁷ Gani ang pamangkot karon amo, Ano ang dapat mo himuon agod mapanubli ang matuod nga paghidait? Ang matuod nga paghidait magaabot lamang sa paagi sang Dios, kag agod maagom ini dapat ka maghimo sing positibo nga mga tikang. Dapat mo batunon ang Prinsipe sang Paghidait kag magliso sa iya. Nagakahulugan ini nga dapat mo batunon si Cristo sa iya katungdanan subong Manunubos kag Manuggawad sang makasasala nga katawhan. Si Jesus mismo nagsiling sa iya bantog nga pinamulong: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Handa ka bala nga magtuo kay Cristo Jesus subong ang Ahente sang Dios sa pagpaluntad sing matuod nga paghidait kag kaluwasan? Wala na sing iban pa nga ngalan sa sa idalom sang langit ang makapaluntad sing paghidait kag makagarantiya sini. (Filipos 2:​8-11) Ngaa? Bangod si Jesus amo ang Isa nga Pinili sang Dios. Sia ang labing daku nga mensahero sang paghidait nga nagkabuhi sa duta. Pamatian mo bala si Jesus kag sundon ang iya huwaran?

18. Ano ang dapat naton himuon bilang pagsunod sa pinamulong ni Jesus nga narekord sa Juan 17:​3?

¹⁸ “Nagakahulugan ini sing kabuhi nga walay katapusan,” siling ni Jesus, “ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga ginpadala mo, si Jesucristo.” (Juan 17:3) Karon na ang tion sa pagkuha sing sibu nga ihibalo paagi sa pagtambong sing regular sa mga miting sang mga Saksi ni Jehova sa Kingdom Hall. Ining edukasyunal nga mga miting magapahulag sa imo nga ipaambit ang imo ihibalo kag ang imo paglaum sa iban. Mahimo ka man mangin embahador para sa paghidait sang Dios. Maagom mo karon ang paghidait paagi sa pagsalig kay Jehova nga Dios, subong sa ginsiling sa Isaias 26:​3, suno sa New International Version: “Imo tipigan nga may himpit nga paghidait sia nga ang iya hunahuna dimationg, bangod nagasalig sia sa imo.” Kay sin-o kita dapat magsalig? “Magsalig kay Jehova, kamo nga katawhan, sa tanan nga tion, kay si Jah Jehova amo ang Igang tubtob sa walay katubtuban.”​—⁠Isaias 26:⁠4.

19, 20. Ano ang nagahulat sa mga nagapangita karon sing paghidait kag nagahimud-os sini?

¹⁹ Maghimo karon sang imo panindugan para sa kabuhi nga walay katapusan sa mahidaiton nga bag-ong kalibutan sang Dios. Sa Bugna 21:​3, 4, ang Pulong sang Dios nagapasalig sa aton: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios mismo magaupod sa ila. Kag pahiran niya ang tagsa ka luha sa mga mata nila, kag wala na sing kamatayon ukon kalisod ukon paghibi ukon kasakit pa. Ang nahaunang mga butang nagtaliwan.” Indi bala nga amo ini ang mahidaiton nga palaabuton nga ginakalangkagan mo?

²⁰ Nian dumduma kon ano ang ginsaad sang Dios. “Ang mga mahagop mismo magapanag-iya sang duta, kag magakalipay sila sa kabuganaan sang paghidait. Bantayi ang isa nga disalawayon kag tan-awa ang matadlong, kay ang palaabuton sina nga tawo mangin mahidaiton.” (Salmo 37:​11, 37) Kon mag-abot inang makalilipay nga adlaw, kabay nga makasiling kita nga may pagpasalamat, “Matuod nga paghidait gid man sa ulihi! Salamat kay Jehova nga Dios, ang tuburan sang matuod nga paghidait!”

Mapaathag Mo Bala?

◻ Ano ang makabulig sa isa sa paghimo sing mga pagbalhin sa hunahuna kag buhat?

◻ Paano ginpakita sang mga Saksi ni Jehova, sing indibiduwal kag sing grupo, ang ila gugma para sa matuod nga paghidait?

◻ Ano ang himuon ni Jehova sa tanan nga nagapasanyog sing dumot kag inaway?

◻ Ano ang himuon sang pagginahom sang Prinsipe sang Paghidait para sa katawhan?

[Kapsion sa pahina 14]

Ang pinamulong ni Isaias natuman, indi sang NU, kundi sang mga nagasunod sa panudlo ni Jehova

[Kapsion sa pahina 15]

Ining duha ka lalaki naghimo sing mga pagbag-o agod mahimud-usan ang paghidait

Si Rami Oved

Si Georg Reuter

[Kapsion sa pahina 16]

Ang matuod nga paghidait magapangibabaw sa idalom sang Prinsipe sang Paghidait