Pag-ambit sa Lugpay nga Ginahatag ni Jehova

“Ang amon paglaum para sa inyo indi mationg, kay nahibaluan namon nga, subong nga mga umalambit kamo sa mga pag-antos, sa amo man nga paagi magaambit man kamo sa lugpay.”​—⁠2 CORINTO 1:⁠7.

1, 2. Ano ang naeksperiensiahan sang madamo nga nangin mga Cristiano karon?

MADAMO nga bumalasa karon sang Ang Lalantawan ang nagdaku nga wala sing ihibalo sa kamatuoran sang Dios. Ayhan amo ka sini. Kon amo, dumduma ang imo ginbatyag sang ang imo mga mata sang paghangop nagsugod nga mabuksan. Halimbawa, sang una mo mahangpan nga ang mga patay wala nagaantos kundi wala sing pangalibutan, wala ka bala makabatyag sing kaumpawan? Kag sang matun-an mo ang paglaum sang mga patay, nga binilyon ang pagabanhawon sa bag-ong kalibutan sang Dios, wala ka bala malugpayan?​—⁠Manugwali 9:​5, 10; Juan 5:​28, 29.

² Kamusta naman ang saad sang Dios nga dulaon ang kalautan kag himuon nga paraiso ining duta? Sang matun-an mo ini, wala ka bala malugpayan kag malangkagon nga ginapaabot ini? Ano ang ginbatyag mo sang una mo matun-an ang tuhoy sa posibilidad nga indi na ikaw mapatay kundi maluwas padulong sa sinang nagapakari nga Paraiso sa duta? Walay duhaduha nga nakunyag gid ikaw. Huo, nabaton mo ang makalugpay nga mensahe sang Dios nga ginabantala karon sa bug-os nga kalibutan sang mga Saksi ni Jehova.​—⁠Salmo 37:​9-11, 29; Juan 11:26; Bugna 21:​3-5.

 3. Ngaa nagaantos man sing kapipit-an ang mga nagapaambit sa makalugpay nga mensahe sang Dios sa iban?

³ Apang, sang magtinguha ka nga ipaambit ang mensahe sang Biblia sa iban, nasapwan mo man nga “indi tanan nga tawo may pagtuo.” (2 Tesalonica 3:⁠2) Ayhan ginyubit ka sang pila sang imo mga abyan anay bangod nagatuo ka sa mga saad sang Biblia. Ayhan ginhingabot pa gani ikaw bangod sang imo padayon nga pagtuon sing Biblia upod sa mga Saksi ni Jehova. Ayhan nagbaskog pa ang pagpamatok sang magsugod ikaw sa paghimo sing mga pagbag-o agod ipauyon ang imo kabuhi sa mga prinsipio sang Biblia. Amat-amat nga naeksperiensiahan mo ang kapipit-an nga ginadala ni Satanas kag sang iya kalibutan batok sa tanan nga nagabaton sing lugpay gikan sa Dios.

 4. Ano mahimo ang nanuhaytuhay nga reaksion sang bag-uhan nga mga interesado sa kapipit-an?

⁴ Sing makapasubo, subong gintagna ni Jesus, bangod sang kapipit-an ang iban nasandad kag nag-untat sa pagpakig-upod sa Cristianong kongregasyon. (Mateo 13:​5, 6, 20, 21) Ginabatas sang iban ang kapipit-an paagi sa pagdumdom pirme sang makalugpay nga mga saad nga ginatun-an nila. Sa ulihi ginadedikar nila ang ila kabuhi kay Jehova kag nagapabawtismo subong mga disipulo sang iya Anak, si Jesucristo. (Mateo 28:​19, 20; Marcos 8:34) Sa pagkamatuod, ang kapipit-an wala nagauntat sa tion nga magpabawtismo ang isa ka Cristiano. Halimbawa, ang pagpabilin nga putli mahimo nga isa ka lakas nga panikasog para sa isa ka tawo nga may imoral nga nagligad. Ang iban nagabatas sang padayon nga pagpamatok sang ditumuluo nga mga katapo sang pamilya. Ano man ang kapipit-an, ang tanan nga matutom nga nagatinguha gihapon sing isa ka kabuhi nga nadedikar sa Dios makapat-od sing isa ka butang. Sa isa ka personal gid nga paagi, maeksperiensiahan nila ang lugpay kag bulig sang Dios.

“Ang Dios sang Tanan nga Lugpay”

 5. Upod sa madamong pagtilaw nga gin-antos ni Pablo, ano man ang iya naeksperiensiahan?

⁵ Ang isa nga nag-apresyar gid sang lugpay nga ginahatag sang Dios amo anay si apostol Pablo. Pagkatapos sang mabudlay gid nga tion sa Asia kag sa Macedonia, nalugpayan sia sing daku sang mabatian niya nga ginbaton sang kongregasyon sa Corinto ang iya sulat nga nagaunod sing pagsabdong. Nagpahulag ini sa iya nga sulatan sila sing ikaduha nga sulat, nga nagaunod sang masunod nga komendasyon: “Bulahan ang Dios kag Amay sang aton Ginuong Jesucristo, ang Amay sang mapatugsilingon nga mga kaluoy kag ang Dios sang tanan nga lugpay, nga nagalugpay sa aton sa tanan naton nga kapipit-an.”​—⁠2 Corinto 1:​3, 4.

 6. Ano ang matun-an naton gikan sa mga pulong ni Pablo nga masapwan sa 2 Corinto 1:​3, 4?

⁶ Ining inspirado nga mga tinaga nagahambal sing madamo nga impormasyon. Usisaon naton ini. Sa kada tion nga si Pablo nagapabutyag sing pagdayaw ukon mga pasalamat sa Dios ukon may ginapangabay sa Dios sa mga sulat niya, masapwan naton nga masami niya ginalakip man ang tudok nga apresasyon kay Jesus, ang Ulo sang Cristianong kongregasyon. (Roma 1:8; 7:25; Efeso 1:3; Hebreo 13:​20, 21) Busa, ginapatuhoy ni Pablo ining pagdayaw sa “Dios kag Amay sang aton Ginuong Jesucristo.” Nian, sa nahauna gid nga tion sa iya mga sinulatan, ginagamit niya ang Griegong nombre nga ginbadbad “mapatugsilingon nga mga kaluoy.” Ining nombre naghalin sa tinaga nga nagapabutyag anay sing kasubo sa pag-antos sang isa. Sa amo ginalaragway ni Pablo ang mapatugsilingon nga mga balatyagon sang Dios para sa bisan sin-o sa Iya matutom nga mga alagad nga nagaantos sing kapipit-an​—⁠mapatugsilingon nga mga balatyagon nga nagapahulag sa Dios sa paghikot sing maluluy-on para sa ila. Bilang katapusan, ginatamod ni Pablo si Jehova subong amo ang ginahalinan sining matahom nga kinaiya paagi sa pagtawag sa iya “ang Amay sang mapatugsilingon nga mga kaluoy.”

 7. Ngaa masiling nga si Jehova amo “ang Dios sang tanan nga lugpay”?

⁷ Ang “mapatugsilingon nga mga kaluoy” sang Dios nagapaumpaw sa isa nga nagaantos sing kapipit-an. Gani, nagpadayon si Pablo sa paglaragway kay Jehova subong “ang Dios sang tanan nga lugpay.” Sa amo, bisan ano man nga lugpay ang maeksperiensiahan naton bangod sa pagkamaluluy--on sang aton mga masigkatumuluo, sarang naton matamod si Jehova subong amo ang ginahalinan sini. Wala sing matuod, dayon nga lugpay ang wala nagagikan sa Dios. Dugang pa, sia ang nagtuga sang tawo sa iya larawan, sa amo mahimo kita mangin mga manuglugpay. Kag ang balaan nga espiritu sang Dios amo ang nagapahulag sa iya mga alagad sa pagpakita sing mapatugsilingon nga kaluoy sa mga nagakinahanglan sing lugpay.

Ginahanas Agod Mangin mga Manuglugpay

 8. Bisan pa indi ang Dios ang ginahalinan sang mga pagtilaw sa aton, ano mahimo ang mangin mapuslanon nga epekto sa aton sang pagbatas naton sing kapipit-an?

⁸ Bisan pa ginatugutan ni Jehova nga Dios ang nanuhaytuhay nga pagtilaw nga nagaabot sa iya matutom nga mga alagad, indi gid sia ang ginahalinan sining mga pagtilaw. (Santiago 1:13) Apang, ang lugpay nga iya ginahatag kon nagabatas kita sing kapipit-an makahanas sa aton agod mangin mahinuklugon man kita sa mga kinahanglanon sang iban. Upod ang anong resulta? “Agod nga malugpayan naton sila nga yara sa bisan anong kapipit-an paagi sa lugpay nga ginalugpay mismo sa aton sang Dios.” (2 Corinto 1:⁠4) Sa amo ginahanas kita ni Jehova agod mangin epektibo nga mga manugpaambit sang iya paglugpay sa aton mga masigkatumuluo kag sa ila nga makilala naton sa aton ministeryo samtang ginailog naton si Cristo kag ‘ginalugpayan ang tanan nga nagakasakit.’​—⁠Isaias 61:2; Mateo 5:⁠4.

 9. (a) Ano ang magabulig sa aton nga batason ang pag-antos? (b) Paano ginalugpayan ang iban kon matutom nga ginabatas naton ang kapipit-an?

⁹ Nabatas ni Pablo ang iya madamo nga pag-antos, bangod sa bugana nga lugpay nga nabaton niya gikan sa Dios paagi kay Cristo. (2 Corinto 1:⁠5)Makaeksperiensia man kita sing bugana nga lugpay kon pamalandungan naton ang hamili nga mga saad sang Dios, kon mangamuyo kita para sa pagsakdag sang iya balaan nga espiritu, kag kon ginasabat sang Dios ang aton mga pangamuyo. Sa amo mapalig-on kita nga padayunon ang pagsakdag sa soberanya ni Jehova kag pamatud-an nga butigon ang Yawa. (Job 2:4; Hulubaton 27:11) Kon mabatas naton sing matutom ang bisan anong porma sang kapipit-an, kaangay ni Pablo, dapat naton ihatag ang tanan nga kadungganan kay Jehova, nga ang iya paglugpay amo ang nagabulig sa mga Cristiano sa pagpabilin nga matutom sa idalom sang pagtilaw. Ang pagbatas sang matutom nga mga Cristiano may makalugpay nga epekto sa paghiliutod, nagapalig-on sa iban nga mangin determinado man sa “pagbatas sing amo man nga mga pag-antos.”​—⁠2 Corinto 1:⁠6.

10, 11. (a) Ano ang pila ka butang nga ginbangdan sang pag-antos sang kongregasyon sang dumaan nga Corinto? (b) Paano ginlugpayan ni Pablo ang kongregasyon sang Corinto, kag anong paglaum ang ginpabutyag niya?

¹⁰ Naeksperiensiahan man sang mga taga-Corinto ang mga pag-antos nga nagaabot sa tanan matuod nga mga Cristiano. Dugang pa, ginkinahanglan gid nga laygayan sila nga paguwaon sa kongregasyon ang isa ka dimahinulsulon nga makihilawason. (1 Corinto 5:​1, 2, 11, 13) Ang kapaslawan sa paghimo sini kag sa pagtapos sang pinuyas kag mga pagbinahinbahin nagdala sing kahuluy-an sa kongregasyon. Apang gin-aplikar nila sang ulihi ang laygay ni Pablo kag nagpakita sing matuod nga paghinulsol. Busa, ginhatagan niya sila sing mainit nga komendasyon kag nagsiling nga ang ila maayo nga reaksion sa iya sulat naglugpay sa iya. (2 Corinto 7:​8, 10, 11, 13) Mahimo gid nga naghinulsol man ang isa nga ginpaguwa sa kongregasyon. Gani ginlaygayan sila ni Pablo nga ‘patawaron kag lugpayan sia, agod nga ina nga tawo indi malumos sa iya lakas nga kasubo.’​—⁠2 Corinto 2:⁠7.

¹¹ Pat-od gid nga nalugpayan ang kongregasyon sang Corinto sang ikaduha nga sulat ni Pablo. Kag amo ini ang isa sang iya mga katuyuan. Sia nagpaathag: “Ang amon paglaum para sa inyo indi mationg, kay nahibaluan namon nga, subong nga mga umalambit kamo sa mga pag-antos, sa amo man nga paagi magaambit man kamo sa lugpay.” (2 Corinto 1:⁠7) Sa katapusan sang iya sulat, nagpalig-on si Pablo: “Magpadayon kamo . . . nga malugpayan, . . . kag ang Dios sang gugma kag paghidait mangin sa inyo.”​—⁠2 Corinto 13:⁠11.

12. Ano ang kinahanglan sang tanan nga Cristiano?

¹² Daw ano ka importante nga leksion ang matun-an naton gikan sa sini! Ang tanan nga katapo sang Cristianong kongregasyon dapat ‘makaambit sa lugpay’ nga ginaaman sang Dios paagi sa iya Pulong, sa iya balaan nga espiritu, kag sa iya dutan-on nga organisasyon. Bisan gani ang mga ginpaguwa sa kongregasyon mahimo nga nagakinahanglan sing lugpay kon naghinulsol na sila kag gintadlong ang ila malain nga dalanon anay. Sa amo, ang “matutom kag mainandamon nga ulipon” naghimo sing maluluy-on nga aman sa pagbulig sa ila. Makaisa kada tuig mahimo duawon sang duha ka gulang ang pila nga ginpaguwa sa kongregasyon. Mahimo nga wala na sila nagapakita sing rebelyuso nga panimuot ukon nagahimo sing malaut nga sala kag mahimo nga nagakinahanglan sing bulig agod makahimo sing kinahanglanon nga mga tikang nga makapanumbalik sila.​—⁠Mateo 24:45; Ezequiel 34:⁠16.

Ang Kapipit-an ni Pablo sa Asia

13, 14. (a) Paano ginlaragway ni Pablo ang tion sang mabudlay gid nga kapipit-an nga naeksperiensiahan niya sa Asia? (b) Anong hitabo ang mahimo ginahunahuna ni Pablo?

¹³ Ang sahi sang pag-antos nga naeksperiensiahan sang kongregasyon sang Corinto tubtob sa sining punto indi gid mapaanggid sa madamong kapipit-an nga ginbatas ni Pablo. Sa amo, sarang niya mapahanumdom sila: “Kay indi namon luyag nga indi kamo makahibalo, mga kauturan, nahanungod sa kapipit-an nga natabo sa amon sa distrito sang Asia, nga napaidalom kami sa lakas nga pag-ipit labaw sa amon kusog, amo kon ngaa indi gid kami pat-od bisan sang amon kabuhi. Sa katunayan, nabatyagan namon sa sulod namon nga nabaton na namon ang pamatbat sang kamatayon. Amo sini agod magsalig kami, indi sa amon kaugalingon, kundi sa Dios nga nagabanhaw sang mga patay. Gikan sa sinang daku nga butang subong sang kamatayon ginluwas niya kami kag luwason niya kami; kag nagalaum kami nga luwason man niya kami gihapon.”​—⁠2 Corinto 1:​8-10.

¹⁴ Nagapati ang iban nga mga iskolar sang Biblia nga ang ginapatuhuyan ni Pablo amo ang kinagubot sa Efeso, nga diutayan lang magkutol sang kabuhi ni Pablo kag sang iya duha ka taga-Macedonia nga kaupod sa iya paglakbay, sanday Gayo kag Aristarco. Pilit nga ginpasulod ining duha ka Cristiano sa isa ka teatro nga puno sing akig nga kadam-an nga “nagsinggit sa sulod sang duha ka oras: ‘Daku si Artemis [diosa] sang mga taga-Efeso!’ ” Sang ulihi, napahipos sang isa ka opisyal sang siudad ang kadam-an. Pat-od gid nga daku ang kabalaka ni Pablo sa sining peligro sa kabuhi nanday Gayo kag Aristarco. Sa katunayan, luyag niya magsulod man kag magpaathag sa panatiko nga kadam-an, apang ginpunggan sia sa pagtaya sang iya kabuhi sa sining paagi.​—⁠Binuhatan 19:​26-41.

15. Anong mabudlay gid nga kahimtangan ang mahimo ginalaragway ni Pablo sa 1 Corinto 15:⁠32?

¹⁵ Apang, mahimo nga mas mabudlay pa sa sining hitabo ang ginalaragway ni Pablo. Sa iya unang sulat sa mga taga-Corinto, namangkot si Pablo: “Kon, kaangay sang mga tawo, nagpakig-away ako sa mga sapat sa Efeso, ano ang kaayuhan sini sa akon?” (1 Corinto 15:32) Mahimo ini magkahulugan nga ang kabuhi ni Pablo ginbutang sa peligro indi lamang sang sapatsapaton nga mga tawo kundi sang literal nga mabangis nga mga sapat sa istadyum sang Efeso. Ang mga kriminal anay ginasilutan kon kaisa paagi sa pagpilit sa ila nga makig-away sa mabangis nga mga sapat samtang nagatan-aw ang uhaw sa dugo nga kadam-an. Kon ang buot silingon ni Pablo amo nga nag-atubang sia sa literal nga mabangis nga mga sapat, sa katapusan nga tinion mahimo nga sia sa isa ka milagruso nga paagi ginluwas gikan sa isa ka mapintas nga kamatayon, subong nga si Daniel anay ginluwas gikan sa baba sang literal nga mga leon.​—⁠Daniel 6:⁠22.

Modernong-Adlaw nga mga Huwaran

16. (a) Ngaa mahangpan sang madamong Saksi ni Jehova ang mga kapipit-an nga gin-antos ni Pablo? (b) Ano ang mapat-od naton tuhoy sa ila nga napatay bangod sang ila pagtuo? (c) Anong maayong epekto ang nagaresulta kon ang mga Cristiano makaeksperiensia sing diutayan lang nga pagkapatay?

¹⁶ Madamong mga Cristiano karon ang makahangop sang mga kapipit-an nga gin-antos ni Pablo. (2 Corinto 11:​23-27) Sa karon man, ang mga Cristiano ‘ginpaidalom sa lakas nga pag-ipit labaw [sa ila] kusog,’ kag madamo ang nakaatubang sing mga kahimtangan diin ‘indi [nila] pat-od bisan ang ila kabuhi.’ (2 Corinto 1:⁠8) Ang iban napatay sa mga kamot sang mga manugpatay kag mapintas nga mga manughingabot. Mapat-od naton nga ang makalugpay nga gahom sang Dios nagbulig sa ila sa pagbatas kag nga napatay sila nga ang ila tagipusuon kag hunahuna malig-on nga nasentro sa katumanan sang ila paglaum, sa langit man ukon sa duta. (1 Corinto 10:13; Filipos 4:13; Bugna 2:10) Sa iban nga mga kaso, ginmaniobra ni Jehova ang mga butang, kag ang aton kauturan naluwas gikan sa kamatayon. Walay duhaduha nga sila nga nakaeksperiensia sini nga sahi sang pagluwas nakapalambo sing dugang pa nga pagsalig “sa Dios nga nagabanhaw sang mga patay.” (2 Corinto 1:⁠9) Pagkatapos sadto, makahambal sila nga may daku pa nga pagsalig samtang ginapaambit sa iban ang makalugpay nga mensahe sang Dios.​—⁠Mateo 24:⁠14.

17-19. Anong mga eksperiensia ang nagapakita nga ang aton kauturan sa ­Rwanda nangin mga umalambit sa paglugpay sang Dios?

¹⁷ Kasan-o lang naeksperiensiahan sang aton mahal nga kauturan sa Rwanda ang kaanggid sa naeksperiensiahan nanday Pablo kag sang iya mga kaupod. Madamo ang napatay, apang napaslawan ang mga panikasog ni Satanas nga laglagon ang ila pagtuo. Sa baylo, naeksperiensiahan sang aton kauturan sa sining pungsod ang paglugpay sang Dios sa madamong personal nga paagi. Sa tion sang pagpapas sa mga Tutsi kag mga Hutu nga nagapuyo sa Rwanda, may mga Hutu nga nagtaya sang ila kabuhi agod amligan ang mga Tutsi kag mga Tutsi nga nag-amlig sa mga Hutu. Ang iban nga ginpatay sang mga ekstremista bangod gin-amligan nila ang ila Tutsi nga mga masigkatumuluo. Halimbawa, ang isa ka Hutu nga Saksi nga si Gahizi ginpatay sa tapos niya gintago ang isa ka Tutsi nga utod nga babayi nga si Chantal. Ang Tutsi nga bana ni Chantal nga si Jean gintago sa lain naman nga lugar sang isa ka Hutu nga utod nga babayi nga si Char­lotte. Sa sulod sang 40 ka adlaw si Jean kag ang isa pa ka Tutsi nga utod nga lalaki nanago sa isa ka daku nga simburyo, kag kon gab-i lamang sila nagaguwa sa makadali. Sa sining tanan nga tion, ginhatagan sila ni Char­lotte sing pagkaon kag pangamlig, bisan pa nagapuyo sia malapit sa isa ka kampo sang Hutu nga mga soldado. Sa sining pahina, makita mo ang laragway sang nahiusa nga si ­Jean kag si Chan­tal, nga mapasalamaton nga ang ila Hutu nga mga masigkasumilimba ‘nagtaya sang ila mga liog,’ para sa ila, subong sang ginhimo ni Prisca kag ni Aquila para kay apostol Pablo.​—⁠Roma 16:​3, 4.

¹⁸ Ang isa pa ka Hutu nga Saksi, si Rwa­kabubu, gindayaw sang pamantalaan nga Intaremara bangod gin-amligan niya ang iya Tutsi nga mga masigkatumuluo.a Nagsiling ini: “Yara man si Rwa­kabubu, isa sang mga Saksi ni Jehova, nga padayon nga nagtago sing mga tawo diri kag didto sa tunga sang iya kauturan (amo sina ang pagtawganay sang mga masigkatumuluo). Bug-os nga adlaw nga ginadul-ungan niya sila anay sing pagkaon kag tubig bisan pa hapuon sia. Apang ginhatagan sia sang Dios sing kabaskog nga labaw sa kinaandan.”

¹⁹ Binagbinaga man, ang isa ka interesado nga Hutu nga mag-asawa nga sanday Nico­deme kag Atha­nasie. Antes magsugod ang pagpapas, nagatuon ining mag-asawa sing Biblia upod sa isa ka Tutsi nga Saksi nga si Al­phonse. Bisan pa makatalagam para sa ila kabuhi, gintago nila si Al­phonse sa ila puluy-an. Sang ulihi narealisar nila nga may peligro gihapon sa ila balay bangod nahibaluan sang ila Hutu nga mga kaingod ang ila Tutsi nga abyan. Busa, gintago nanday Nico­deme kag Atha­nasie si Al­phonse sa sulod sang isa ka buho sa ila ugsaran. Nangin maayo ini nga tikang bangod halos adlaw-adlaw nga nagkinadto ang mga kaingod sa pagpangita kay Al­phonse. Samtang nagapanago sa sining buho sa sulod sang 28 ka adlaw, ginpamalandong ni Al­phonse ang mga kasaysayan sa Biblia subong sang isa nahanungod kay Rahab, nga nagtago sing duha ka Israelinhon sa alibungan sang iya balay sa Jerico. (Josue 6:17) Sa karon ginapadayon ni Al­phonse ang iya pag-alagad sa ­Rwanda subong isa ka manugbantala sing maayong balita, mapinasalamaton nga gintaya sang iya Hutu nga mga estudyante sa Biblia ang ila kabuhi bangod sa iya. Kag kamusta sanday Nico­deme kag Atha­nasie? Bawtismado na sila karon nga mga Saksi ni Jehova kag nagadumala sing kapin sa 20 ka pagtuon sa Biblia upod sa interesado nga mga tawo.

20. Sa anong paagi ginlugpayan ni Jehova ang aton kauturan sa ­Rwanda, apang ano gihapon ang kinahanglan sang madamo sa ila?

²⁰ Sang tion nga nagsugod ang pagpapas sa ­Rwanda, 2,500 ang mga manugbantala sing maayong balita sa pungsod. Bisan pa ginatos ang napatay ukon napilitan sa pagpalagyo sa pungsod, ang kadamuon sang mga Saksi nag-uswag padulong sa kapin sa 3,000. Pamatuod ina nga ginlugpayan matuod sang Dios ang aton kauturan. Kamusta naman ang madamong ilo kag balo nga mga babayi sa tunga sang mga Saksi ni Jehova? Nagaantos sila gihapon sing kapipit-an kag dapat padayon nga lugpayan. (Santiago 1:27) Ang ila mga luha bug-os nga mapahiran lamang kon matabo na ang pagkabanhaw sa bag-ong kalibutan sang Dios. Walay sapayan, bangod sang bulig sang ila kauturan kag bangod nagasimba sila sa “Dios sang tanan nga lugpay,” masarangan nila nga atubangon ang kabuhi.

21. (a) Sa ano pa nga mga duog nagakinahanglan gid ang aton kauturan sing paglugpay sang Dios, kag ano ang isa ka paagi nga makabulig kita tanan? (Tan-awa ang kahon nga “Lugpay sa Sulod sang Apat ka Tuig nga Inaway.”) (b) San-o mapaayawan sing bug-os ang lugpay nga ginakinahanglan naton?

²¹ Sa madamong iban pa nga pungsod, subong sang Eri­trea, Sin­ga­pore, kag anay Yu­go­sla­via, ang aton kauturan padayon gihapon nga nagaalagad sing matutom kay Jehova walay sapayan sang kapipit-an. Kabay nga buligan naton ining kauturan paagi sa regular nga pagpangamuyo nga makabaton man sila sing lugpay. (2 Corinto 1:11) Kag kabay nga magbatas kita sing matutom tubtob sa tion nga ang Dios paagi kay Jesucristo ‘magapahid sang tagsa ka luha gikan sa mga mata’ naton sa pinakabug-os nga kahulugan. Nian maeksperiensiahan naton sa bug-os nga kadakuon ang lugpay nga pagaihatag ni Jehova sa iya bag-ong kalibutan sang pagkamatarong.​—⁠Bugna 7:17; 21:4; 2 Pedro 3:⁠13.

[Footnote]

Nahibaluan Mo Bala?

◻ Ngaa ginatawag si Jehova “ang Dios sang tanan nga lugpay”?

◻ Paano naton dapat tamdon ang mga kapipit-an?

◻ Upod kay sin-o naton mapaambit ang lugpay?

◻ Paano mapaayawan sing bug-os ang lugpay nga ginakinahanglan naton?

[Retrato sa pahina 17]

Si Jean kag si Chantal, bisan pa Tutsi nga mga Saksi, gintago sa magkatuhay nga mga duog sang Hutu nga mga Saksi sa tion sang pagpapas sa Rwanda

[Retrato sa pahina 17]

Padayon gihapon nga ginapaambit sang mga Saksi ni Jehova ang makalugpay nga mensahe sang Dios sa ila mga isigkatawo sa Rwanda