Mga Pamangkot Gikan sa mga Bumalasa

◼ Si Jehova bala ukon si Jesus ang ginapatuhuyan ni Pablo sang magsulat sia: ‘Ang Ginuo nagsiling sa akon: “Ang akon gahom ginahimpit sa kaluyahon”’?

Ang ginapatuhuyan ni apostol Pablo amo si Ginuong Jehova. Paagi sa pagtalupangod sang ginsiling ni Pablo sa konteksto, indi lamang nga makita naton kon ngaa amo sini kundi mapatudok man naton ang aton apresasyon sa kaangtanan sa ulot sang Dios kag sang iya Anak. Si Pablo nagsulat:

“Sa pagpugong sa akon sa pagpakataas sing labi bangod sang bugana nga mga bugna, ginahatagan ako sing ungon sa unod, isa ka manugbalita ni Satanas, sa pagpintas sa akon, sa pagpugong sa akon sa pagpakataas sing labi. Nahanungod sini ginpakiluoy ko sing makatlo sa Ginuo nga indi magbiya sa akon, apang nagsiling sia sa akon: ‘Ang akon bugay tuman sa imo; kay ang akon gahom ginahimpit sa kaluyahon.’ Sa labing daku nga kalipay, magapabugal ako sa akon mga kaluyahon, agod nga ang gahom ni Cristo magpabilin sa akon.”—2 Corinto 12:7-9.

Ang ungon sa unod ni Pablo, mahimo nga balatian sa mata ukon dimatuod nga mga apostoles nga naghangkat sang iya pagkaapostol. (Galacia 4:15; 6:11; 2 Corinto 11:5, 12-15) Diin man sa sini, nagapaluya ini kay Pablo ukon nagapugong sa iya sa pagkalipay sa iya ministeryo. Gani makatlo sia nga nagpakiluoy nga kuhaon ini. Apang sin-o ang iya ginpamangkot, kag ginsabat paagi sa paghambal sing “akon gahom”?

Bangod ang teksto nagasambit sing “gahom ni Cristo,” mahimo nga daw si Ginuong Jesus ang ginapamangkot ni Pablo. Sa wala sing duhaduha, may gahom sia kag sarang mapaambit ini sa iya mga disipulo. (Marcos 5:30; 13:26; 1 Timoteo 1:12) Sa katunayan, ang Anak sang Dios “nagsakdag sang tanan nga butang paagi sa pulong sang iya gahom.”—Hebreo 1:3; Colosas 1:17, 29.

Walay sapayan, ang Ginuong Dios amo ang pinakamataas nga ginhalinan sang gahom, diin sarang niya kag mahimo niya mahatag sa iya mga sumilimba. (Salmo 147:5; Isaias 40:26, 29-31) Ina nga gahom gikan sa Dios naghimo kay Jesus nga mahimo ang mga milagro kag magahimo sa iya nga magpanghikot. (Lucas 5:17; Binuhatan 10:38) Sing kaanggid, ang mga apostoles ni Jesus kag ang iban nga mga disipulo nakabaton sing gahom gikan kay Jehova. (Lucas 24:49; Efeso 3:14-16; 2 Timoteo 1:7, 8) Naglakip ini kay Pablo, nga nag-alagad “suno sa hiyas sang dibagay nga kaluoy sang Dios nga ginhatag [sa apostol] paagi sa pagpanghikot sang iya gahom.”—Efeso 3:7.

Bangod ginpangabay ni Pablo nga kuhaon ang ‘ungon sang iya unod, ang manugbalita ni Satanas,’ makatarunganon nga ginapaabot niya nga himuon ini sang Ginuong Dios, nga si Jehova subong ang isa nga sa iya ginapatuhoy ang mga pangamuyo. (Filipos 4:6; Salmo 145:18) Dugang pa, sa bisan paano ginapalig-on ni Jehova si Pablo paagi sa pinamulong, “Ang akon gahom ginahimpit sa kaluyahon,” nga wala nagabiya kay Cristo. Ang gahom gikan sa Ginuong Dios mahimo malaragway subong “ang gahom ni Cristo [nga] kaangay sang layanglayang” sa ibabaw ni Pablo, kay ‘si Cristo amo ang gahom sang Dios kag ang kaalam sang Dios.’ (1 Corinto 1:24) Busa, ang 2 Corinto 12:7-9 nagabulig sa aton sa pag-apresyar sing maayo pa sa ginasaligan nga paagi diin gamiton ni Jehova ang iya Anak sa pagtuman sang balaan nga kabubut-on.